Read Northwest Gbaya 1 WANNU 14 Bible Online

1 WANNU 14 - Northwest Gbaya bible

1 WANNU 14

¹Tɛ ŋgimbi'i, Abiya, bem ko Jeroboam baa zɛɛ.

²Jeroboam tɔ̧ɔ̧ ha̧ kóò kɔ‘i: «Mɛ̀ kúr, mɛ̀ kpáí tɛ-mɛ, wen ká‘i tɛɛ iŋ ndé, mɛ́ nɛ́ kóò ko Jeroboam, ɓɛɛ mɛ̀ nɛ́ sɛn Silo. Wi-tɔ̧-wen oi nú Sɔ̧ Ahiya a̧a̧ hi̧i̧, nɛ́ a̧ á̧ tɔ̧ɔ̧ wen ha̧‘m ndé, mi tɛ ɔ wan zu dukbíí'ɛ.

³Mɛ tɛ kai brɛt ɓu, o makala, in dak gɔrɔ kpɔk, ɓɛɛ mɛ nɛɛ kpa a̧. A̧ tɛ tɔ̧ mɔ nɛ tɛ hɔ zu bem’ɛ ha̧ mɛ.»

⁴Kóò ko Jeroboam dee hegɔ; a̧ kura yak si Silo, ɓɛɛ nɛ́ɛ̀ hɔ kɔ̧ tua ko Ahiya. Ahiya zɔk so mɔ ɓɔna, yí-a ɔ raaŋ wen zu sɔki.

⁵GASA WAN tɔ̧ɔ̧ so ha̧ Ahiya: «Mɛ̀ zɔ̀k, kóò ko Jeroboam a̧a̧ sɛn yuwar wen tɛa-a mɛ kii wen-tɛ bem kɔ̧-a̧ nɛ̀ ɔ zɛɛ sɛn tɛ mɛ. A̧ be tɛ̀ɛ́ hɔ, a̧ tɛ duk hee ŋma okoo nɛtɛ ga, ɓɛɛ mɛ̀ kífí nú ha̧ a̧ hegɔ, kóó hegɔ.»

⁶Ŋgimbi nɛ Ahiya zia nɛ̀ giti naŋ-a ŋgimbi n'aa hɔɔ nɛnɛ nú tua, a̧ tɔ̧a̧: «Kóò ko Jeroboam, mɛ̀ yé tua! Wen ge sa mɛ kpai tɛ-mɛ hee ŋma okoo nɛtɛ ga ge? Wa toma'm ha̧‘m mɛ tɔ̧ nɛ́ ŋga wen ha̧ mɛ.

⁷Mɛ̀ nɛ́ɛ̀ tɔ̧́ ha̧ Jeroboam ndé, wen nɛ̀ GASA WAN Sɔ̧ ko Israɛl tɔ̧ nɛ́ mɔ'ɔ: ‹Mi baa mɛ e ŋgɔn mgbara dukbíí, mi ee mɛ nɛ̀ wan zu Israɛl dukbíí kɔ‘m.

⁸Mi ɓara mɔɔ-wan yinɛ nutua ko David, ɓɛɛ mi ha̧ ha̧ mɛ; ɓɛɛ bo nɛ mɛ duka hee wi-de-tom kɔ‘m David nɛ̀ kasa geŋa kɔ‘m, in nɛ̀ ndaka ɗoŋ-aa nɛ̀ see lɛŋ, de nɛ̀ mɔ mɛ nɛ̀ yuwar-a yí‘m ga na.

⁹Mɛ dee mɔ ɗaŋ gan o wi nɛ̀ yaa nɛ̀ ti ha̧ mɛ lɛŋ. Mɛ́ nɛɛ dui o ŋma sɔ̧ kɔ-mɛ in o sɛka-mɔ tu̧ nɛ̀ see-am, ɓɛɛ kɔ‘m nɛ̀ tɛ‘m, mɛ ea'm nɛ̀ ɗoŋ.

¹⁰Mɛ̀ nɛ́ wen hegɔ, sa'm tɛ ba bɔnɛ pi̧ zu o bíí nutua ko Jeroboam. Mi tɛ kum o wiwii tɛ ko Jeroboam yinɛ, kóó nɛ́ o bara, kóó nɛ́ o géé bíí sɛn Israɛl. Mi tɛ mbii o bezaŋ nutua ko Jeroboam lɛŋ hee mɔ'ɔ nɛ‘i mbii nɛ̀ yɔsɛ a taŋ'ɛ ga.

¹¹O toyo tɛ nyɔŋ pɛ́r-nam ko Jeroboam lɛŋ nɛ̀ tɛ fe saaye, ɓɛɛ o wan nɛ̀ tɛ fe kɔ‘i zaŋbɛɛ, nɔ̧́í̧ tɛ nyɔŋ wa.› Wen’ɛ nɛ́ GASA WAN a̧ tɔ̧a̧.

¹²«Nɛ̀ war kɔ-mɛ, mɛ̀ kúr, mɛ̀ sí tɛ kɔ-mɛ; ŋgimbi nɛ naŋ-mɛ tɛ i̧si̧ bee-gara nú ye, bem’ɛi tɛ fe.

¹³O be Israɛl lɛŋ tɛ hi̧i̧ a̧, ɓɛɛ wa tɛ gun a̧ wen nɛ́ bíí kpɔk mgbara o bíí nutua ko Jeroboam a̧ wa tɛ gun ɓɛɛ. Mɛ̀ nɛ́ a̧ kpɔk tɛ nutua ko Jeroboam a̧ GASA WAN Sɔ̧ ko Israɛl kpaa ŋma demɔ tɛ-a ɓɛɛ.

¹⁴GASA WAN tɛ e ŋma wannu Israɛl nɛ̀ tɛ kum oi bíí nutua ko Jeroboam yinɛ. Mɔ‘i tɛ de sɔsɔɔ. Weyaa! Kinii ɛ̧!

¹⁵GASA WAN tɛ gusi Israɛl. Israɛl tɛ duk hee ɓoɓo nɛ̀ nak sɛn see yì ga. A̧ tɛ zuɗi o be Israɛl tɛ de nù n'aa ha̧a̧ ha̧ o dáà kɔ-wa’ɛ yinɛ, ɓɛɛ a̧ tɛ pɛsi wa nɛ̀ kur yì ɓi mɛ wen wa sɛka o te nɛ‘i gasi gasi, tu̧ nɛ̀ see GASA WAN.

¹⁶A̧ tɛ siŋ Israɛl pi̧ nù wen o ɗaŋmɔ nɛ̀ Jeroboam dea, ɓɛɛ n'aa dea ha̧ Israɛl mɛ de mbɛt.»

¹⁷Kóò ko Jeroboam kura yak nɛ́ɛ̀ hɔ sɛn Tirsa. Ŋgimbi n'aa hɔɔ nɛnɛ mgbák nutua, bem’ɛi fea.

¹⁸Wa guna a̧, ɓɛɛ Israɛl lɛŋ hi̧i̧ a̧ nyɛm nɛ̀ ɗoŋ wen nɛ̀ GASA WAN tɔ̧ɔ̧ so nɛ̀ nú wi-de-tom kɔ‘i Ahiya, wi-tɔ̧-wen oi nú Sɔ̧.

¹⁹Oi o tom ko Jeroboam, biro, ɔɔ-wan, mɔɔ nɔ‘i lɛŋ yɔra zaŋ Kalata Nyɛrɛ ko o wannu Israɛl.

²⁰Jeroboam ɔɔ wan tɛ pɛ ɓu-yiitoo-zua-yiitoo. A̧ sii ɗoŋ tɛ o dáà kɔ̧-a̧ ɓɛɛ bem kɔ̧-a̧ Nadab ɔ wan oi-aa.

²¹Roboam bem ko Salomɔŋ ɔɔ wan sɛn nù Juda. Roboam a̧a̧ so nɛ̀ pɛ ɓu-naar-zua-kpɔk ŋgimbi n'aa ɔɔ nɛ̀ wan, ɓɛɛ a̧ ɔ wan tɛ pɛ ɓu-zua-mɔɔrɔ-ɗoŋ-yiitoo sɛn Jerusalɛm, ye nɛ̀ GASA WAN hoka so mgbara o zuduk be Israɛl lɛŋ, wen ee nin wi sɛnɛ. Nin nàà kɔ̧-a̧ so nɛ́ Naama zɔŋa Amɔŋ.

²²O be Juda dee mɔ ɗaŋ yí GASA WAN, ɓɛɛ wa tu̧ see-aa nɛ̀ o ɗaŋmɔ nɛ̀ wa dea, gan ko o dáà kɔ-wa nɛ̀ dee so.

²³Hee o kuti-wi ga, wa mboo o kusa-fara, wa kaia o ta a ŋgɔn in o te nɛ‘i gasi gasi zu o kusa kaya lɛŋ in ɗɔɔ o da̧a̧ wa̧a̧-te lɛŋ.

²⁴O wiwii-de-dàlà wan mɛ fara-ɗafi-sɔ̧ a̧a̧ so tɛ nù‘i mbɛt. Wa dee mɔ nyɛm nɛ̀ ɗoŋ o gasa ndiŋmɔ ko o tugun bíí nɛ̀ GASA WAN ndaka so yinɛ ti o be Israɛl.

²⁵Tɛ mɔɔrɔ pɛ ɔɔ-wan ko Roboam, Sisak wannu Egiptɛ baa biro dúk nɛ̀ Jerusalɛm.

²⁶A̧ kaia o mbɔi-tua ko GASA WAN in o mbɔi kɔ̧ tua ko wannu. A̧ kaia mɔ lɛŋ. A̧ kaia o ŋgee nɛ‘i dee nɛ̀ lɔr lɛŋ nɛ̀ Salomɔŋ dee so mbɛt.

²⁷Wannu Roboam dee o ŋgee nɛ̀ ndɛrɛ a oi-aa, ɓɛɛ ha̧ wa ha̧ o wan ko o wi-biro nɛ̀ pɛm so nɛ́ nú tua ko wannu.

²⁸Ŋgimbi lɛŋ nɛ̀ wannu nɛ́ si kɔ̧ Tua ko GASA WAN, ɓɛɛ o wi-pɛm-mɔ kaia o ŋgee nɔ‘i nɛnɛ; kà a̧ pii ɗoŋ, ɓɛɛ wa kaia a oi-aa woyo.

²⁹Oi o tom ko Roboam, mɔ lɛŋ n'aa dea yɔra sɛn zaŋ Kalata Nyɛrɛ ko o wannu Juda.

³⁰Roboam in Jeroboam dee nɛ́ biro in ŋmaa ɓɔnsɛnɛ.

³¹Roboam sii ɗoŋ tɛ o dáà kɔ‘i, ɓɛɛ wa gun a̧ in o dáà kɔ̧-a̧ sɛn ye ko David. Nin nàà kɔ̧-a̧ duka so nɛ́ Naama zɔŋa Amɔŋ. Bem kɔ̧-a̧ Abiyam ɔɔ wan oi-aa.