Read Northwest Gbaya 1 WANNU 15 Bible Online

1 WANNU 15 - Northwest Gbaya bible

1 WANNU 15

¹Tɛ ɓu-zua-mɔɔrɔ-ɗoŋ-taar pɛ-wan ko Jeroboam, bem ko Nɛbat, Abiyam ɔɔ wan Juda.

²A̧ ɔɔ wan pɛ taar sɛn Jerusalɛm. Nin nàà kɔ̧-a̧ so nɛ́ Maka boko-bem ko Absalɔm.

³A̧ zɔka ɗoŋ o ɗaŋmɔ lɛŋ nɛ̀ dáà kɔ̧-a̧ dee so nɛti, ɓɛɛ a̧ e see-aa lɛŋ ha̧ GASA WAN Sɔ̧ kɔ̧-a̧ hee mɔ'ɔ nɛ̀ David zɔmdáa kɔ̧-a̧ duka so de ga na.

⁴Nɛ̀ mbetɛ, GASA WAN Sɔ̧ ko Absalɔm ha̧a̧ ŋma sa̧a̧mɔ ha̧ a̧, ha̧ nɛ̀ ŋma bem ha̧ a̧ mɛ kasi Jerusalɛm, wen zu David.

⁵Mɛ̀ nɛ́ wen nɛ̀ David dee so mɔ nɛ̀ yuwar-a yí GASA WAN, nɛ̀ bo nɛ a̧ a̧ra̧ so tɛ mɔ nɛ̀ GASA WAN ha̧a̧ so nú sɛnɛ ha̧ a̧ wese lɛŋ tɛ duka-a kɔ̧-a̧ na, kànà nɛ́ wen ko Urii be Hit ɓɛɛ.

⁶Biro duka mgbara Roboam in Jeroboam dam ɗoŋ wese lɛŋ tɛ ɔɔ-wan kɔ̧-a̧.

⁷Oi o tom ko Abiyam, mɔ lɛŋ n'aa dea yɔra zaŋ Kalata Nyɛrɛ ko o wannu Juda. Biro duka mgbara Abiyam in Jeroboam.

⁸Abiyam sii ɗoŋ tɛ o dáà kɔ‘i, ɓɛɛ wa gun a̧ sɛn ye ko David. Bem kɔ̧-a̧ Asa ɔɔ wan oi-aa.

⁹Tɛ ɓu-yiitoo pɛ ɔɔ-wan ko Jeroboam wannu Israɛl, Asa ɔɔ wan Juda.

¹⁰A̧ ɔɔ wan pɛ ɓu-naar-zua-kpɔk sɛn Jerusalɛm. Nin nàà kɔ̧-a̧ so nɛ́ Maka, boko-bem ko Absalɔm.

¹¹Asa dee mɔ nɛ̀ yuwar-a yí GASA WAN hee zɔmdáa kɔ̧-a̧ David ga.

¹²A̧ foo o wiwii-de-dàlà wan mɛ fara-ɗafi-sɔ̧ yinɛ, ɓɛɛ a̧ ɗaŋ o géé-sɔ̧ lɛŋ nɛ̀ o dáà kɔ̧-a̧ mboo so.

¹³A̧ dora nàà kɔ̧-a̧ Maka tɛ tom nàá-wan, wen nɛ̀ nàà kɔ̧-a̧ sɛka so ŋma ɗaŋ géé-sɔ̧ ha̧ Asɛra. Asa gɔma ɗaŋ géé-sɔ̧ kɔ̧-a̧‘i yinɛ, ɓɛɛ dɔ a̧ kɔ̧ gboŋgo Sɛdrɔŋ.

¹⁴Mɔ kpɔk, wa ɗaŋ so o kusa-fara yinɛ na. Zu-a'i, see Asa duka kànà tɛ GASA WAN ŋgimbi n'aa duka nɛnɛ zu nù lɛŋ.

¹⁵A̧ baa mɔ nɛ̀ wa ee so nɛtɛ ha̧ Sɔ̧ in ha̧ dáà kɔ̧-a̧ tɛnɛ kɔ̧ Tua ko GASA WAN: nɛ́ bu-mbɔi, lɔr in o nyɛk.

¹⁶Biro duka mgbara Asa in Baesa wannu Israɛl tɛ duka-a kɔ-wa lɛŋ.

¹⁷Baesa wannu Israɛl daŋa ba zu dúk nɛ̀ Juda, ɓɛɛ a̧ mbo mɔ zik nɛ̀ Rama, wen gɔna ti Asa wannu Juda.

¹⁸Asa kaia bu-mbɔi in lɔr lɛŋ nɛ̀ ɓɔna so mgbara o mbɔi-tua ko GASA WAN in mgbara o mbɔi kɔ̧ tua ko wannu; a̧ ha̧a̧ wa ha̧ o wi-de-tom kɔ̧-a̧ mɛ kai nɛnɛ ha̧ Bɛn-Hadad, bem ko Tabrimɔŋ, be-koo Heziɔŋ wannu Aram nɛ̀ duk so sɛn Damas mɛ tɔ̧ ha̧ a̧:

¹⁹«Nɔɔ-tɔk a̧a̧ mgbara'm in mɛɛ, mgbara dáà kɔ‘m in dáà kɔ-mɛ. Ha̧a̧mɔ n'am tom ha̧ mɛ nɛ́ bu-mbɔi in lɔr. Hegɔ, mɛ̀ gbín nɔɔ-tɔk kɔ-mɛ in Baesa wannu Israɛl wen ká a̧ tɛɛ daŋ ba zu dúk nɛ̀‘m.»

²⁰Bɛn-Hadad zia wen ko Wannu Asa; a̧ toma o gasa wi-duk-zu o gíí wi-biro kɔ̧-a̧ si zu o ye nú Israɛl, ɓɛɛ wa tik zu Iyɔŋ, Dan, Abɛl-Bɛt-Maka, zika-nù Kinɛrot lɛŋ in nú Nɛftalii lɛŋ e zu-a.

²¹Ŋgimbi nɛ Baesa zia nyɛrɛ mɔ‘i, a̧ mboo mɔ zik nɛ̀ Rama, ɓɛɛ a̧ ɓɔn sɛn Tirsa.

²²Wannu Asa saa o bíí Juda lɛŋ, ŋma bíí n'aa ee duk bo na; ɓɛɛ wa kai o ta in o te nɛ̀ Baesa mbo so nɛ̀ mɔ zik nɛ̀ Rama'i yaknɛ. Wannu Asa kaia o mɔɔ nɔ‘i mbo nɛ̀ mbe-a sɛn Geba nú Bɛnjamin in Mispa.

²³Oi tom ko Asa lɛŋ, o ŋgaŋamɔ kɔ̧-a̧ lɛŋ, mɔ lɛŋ n'aa dea, o ye n'aa mboa yɔra zaŋ Kalata Nyɛrɛ ko o wannu Juda. Mɔ kpɔk, tɛ sɔki kɔ̧-a̧, a̧ baa ŋma zɛɛ-nyima-naŋ.

²⁴Asa sii ɗoŋ tɛ o dáà kɔ‘i, ɓɛɛ wa gun a̧ in wa tɛ ye ko David dáà kɔ̧-a̧. Bem kɔ̧-a̧ Josafat ɔɔ wan oi-aa.

²⁵Nadab, bem ko Jeroboam ɔɔ wan zu Israɛl, tɛ yiitoo pɛ-wan ko Asa, wannu Juda. A̧ ɔɔ wan pɛ yiitoo zu Israɛl.

²⁶A̧ dee mɔ ɗaŋ yí GASA WAN, ba nɛ̀ yuwar ko dáà kɔ̧-a̧, nɛ́ nɛ̀ ɗoŋ ɗaŋmɔ nɛ̀ dáà kɔ̧-a̧ dee ha̧ Israɛl mɛ de.

²⁷Baesa bem ko Ahiya, be nutua ko Isakar baa ɗaŋ keta zu a̧, ɓɛɛ gbɛ a̧ sɛn Gibetɔŋ nɛ̀ duka so nɛ́ ye ko o be Filistii ŋgimbi nɛ Nadab in o be Israɛl lɛŋ kɛra so nɛ̀ Gibetɔŋ e nù.

²⁸Baesa gbɛɛ Nadab tɛ taar pɛ-wan ko Asa wannu Juda, ɓɛɛ ɔ wan oi-aa.

²⁹Ŋgimbi n'aa baa wan, a̧ kuma bíí nutua ko Jeroboam lɛŋ. Ŋma bíí n'aa ee ha̧ Jeroboam, n'aa gbɛ na, bo na, nyɛm nɛ̀ ɗoŋ wen nɛ̀ GASA WAN tɔ̧ɔ̧ so nɛ̀ nú wi-de-tom kɔ̧-a̧ Ahiya, be Silo

³⁰zu o ɗaŋmɔ ko Jeroboam, o wan n'aa dee so, in n'aa dee ha̧ Israɛl mɛ de, tu̧ nɛ̀ see GASA WAN Sɔ̧ ko Israɛl.

³¹Oi o tom ko Nadab, mɔ lɛŋ n'aa dea yɔra zaŋ Kalata Nyɛrɛ ko o wannu Israɛl.

³²Biro duka mgbara Asa in Baesa wannu Israɛl tɛ duka-a kɔ-wa lɛŋ.

³³Tɛ taar pɛ-wan ko Asa wannu Juda, Baesa bem ko Ahiya ɔɔ wan zu Israɛl lɛŋ sɛn Tirsa tɛ pɛ ɓu-yiitoo-zua-naar.

³⁴A̧ dee mɔ ɗaŋ yí GASA WAN. A̧ baa nɛ́ yuwar ko Jeroboam, zɔk nɛ̀ ɗoŋ ɗaŋmɔ n'aa dee so ha̧ o be Israɛl mɛ de.