Read Northwest Gbaya 1 WANNU 16 Bible Online

1 WANNU 16 - Northwest Gbaya bible

1 WANNU 16

¹Wen nɛ̀ GASA WAN tɔ̧ɔ̧ ha̧ Jɛhu bem ko Hanani, zu Baesa nɛ́ mɔ'ɔ:

²«Hee mɔ'ɔ n'am baa mɛ e ŋgɔn nɛ̀ ɗɔɔ fuunu, e nɛ̀ mɛ nɛ̀ wan zu dukbíí kɔ‘m Israɛl, ɓɛɛ ka mɛ ba nɛ́ yuwar ko Jeroboam, de nɛnɛ ha̧ dukbíí kɔ‘m Israɛl mɛ de ɗaŋmɔ, tu̧ nɛ̀ see-am nɛ̀ o ɗaŋmɔ kɔ-wa ga,

³mi tɛ kum mɛ in o bíí nutua kɔ-mɛ, ɓɛɛ mi tɛ de mɔ nɛ̀ tua kɔ-mɛ hee mɔ'ɔ n'am dee nɛnɛ in o bíí nutua ko Jeroboam bem ko Nɛbat ga.

⁴O toyo tɛ nyɔŋ bíí nutua kɔ-mɛ lɛŋ nɛ̀ tɛ fe sɛn saaye, ɓɛɛ o nɔ̧́í̧ tɛ nyɔŋ o wan nɛ̀ tɛ fe sɛn zaŋbɛɛ lɛŋ.»

⁵O oi tom ko Baesa, mɔ n'aa dea, o ŋgaŋamɔ kɔ̧-a̧, yɔra zaŋ Kalata Nyɛrɛ ko o wannu Israɛl.

⁶Baesa sii ɗoŋ tɛ o dáà kɔ‘i, ɓɛɛ wa gun a̧ sɛn Tirsa. Bem kɔ̧-a̧ Ela ɔɔ wan oi-aa.

⁷Wen ko GASA WAN nɛ̀ wi-tɔ̧-wen oi nú Sɔ̧ Jɛhu, bem ko Hanani tɔ̧ɔ̧ so zu Baesa in o bíí nutua kɔ̧-a̧‘i, bo nɛ wen ɗaŋmɔ n'aa dea yí GASA WAN tu̧ nɛ̀ see-aa nɛ̀ naŋanɔ kɔ̧-a̧ in zɔka ɗoŋ deemɔ ko o bíí nutua ko Jeroboam ɓɛɛ na, ɓɛɛ mɛ̀ nɛ́ wen nɛ̀ Baesa kuma so o bíí nutua'i mbɛt.

⁸Tɛ ɓu-yiitoo-zua-mɔɔrɔ-ɗoŋ-kpɔk pɛ ɔɔ-wan ko Asa wannu Juda, Ela bem ko Baesa ɔɔ wan zu Israɛl sɛn Tirsa, tɛ pɛ yiitoo.

⁹Wi-de-tom kɔ̧-a̧ Zimri, gasawi zu o reeta keekee-nyaŋa baa ɗaŋ keta zu a̧. Wannu duk so kɔ‘i sɛn Tirsa, gbɛ nɛ̀ dɔ̧ɔ̧ kɔ̧ tua ko Arsa, gasa wi-pɛm-tua-wan.

¹⁰Zimri yee tua, gɔm Ela gbɛ tɛ ɓu-yiitoo-zua-mɔɔrɔ-ɗoŋ-yiitoo pɛ-wan ko Asa, wannu Juda; ɓɛɛ a̧ ɔ wan oi-aa.

¹¹Ŋgimbi n'aa ɔɔ wan, n'aa duka nù zu damti kaɗi, a̧ kuma bíí nutua ko Baesa lɛŋ; a̧ e ŋma be-wiwii, ŋma pɛ́r-nam kɔ̧-a̧, kóó ŋma bíí kɔ̧-a̧ na.

¹²Zimri kuma bíí nutua ko Baesa lɛŋ nyɛm nɛ̀ ɗoŋ wen nɛ̀ GASA WAN tɔ̧ɔ̧ so nɛ̀ nú wi-tɔ̧-wen oi nú Sɔ̧ Jɛhu zu a̧,

¹³zu o ɗaŋmɔ kɔ̧-a̧ lɛŋ in zu o ɗaŋmɔ ko Ela bem kɔ̧-a̧ mbɛt; mɛ̀ nɛ́ o ɗaŋmɔ kɔ-wa mɛ tɛ-wa in o wan nɛ̀ wa dee so ha̧ Israɛl mɛ de, tu̧ nɛ̀ see GASA WAN Sɔ̧ ko Israɛl nɛ̀ o géé-sɔ̧ kɔ-wa.

¹⁴Oi o tom ko Ela, mɔ lɛŋ n'aa dea yɔra zaŋ Kalata Nyɛrɛ ko o wannu Israɛl.

¹⁵Tɛ ɓu-yiitoo-zua-mɔɔrɔ-ɗoŋ-yiitoo pɛ-wan ko Asa wannu Juda, Zimri ɔɔ wan tɛ zɛ mɔɔrɔ-ɗoŋ-yiitoo sɛn Tirsa; ŋgimbi'i ká dukbíí bi so nɛ ye Gibetɔŋ nɛ̀ duka so nɛ́ ko o be Filistii.

¹⁶Dukbíí nɛ̀ bi so nɛ biro zia nyɛrɛ'ɛ: «Zimri baa ɗaŋ keta, ɓɛɛ gbɛ wannu yinɛ.» Hegɔ, kpɔk kale wese'i sɛn kɔ̧ gbagari-biro, o be Israɛl ee Ɔmri, gasawi ko o gíí wi-biro nɛ̀ wannu Israɛl.

¹⁷Ɔmri in o be Israɛl lɛŋ daŋa nɛ̀ Gibetɔŋ, ɓɛɛ tɛ́ɛ̀ kɛr Tirsa nɛ̀ biro.

¹⁸Ŋgimbi nɛ Zimri zɔka wa baa ye kaɗi, a̧ yee kɔ̧ tua-hu̧si-biro ko wannu, dɔ tua ko wannu a zu, ɓɛɛ fe.

¹⁹Mɛ̀ nɛ́ wen o ɗaŋmɔ n'aa dee so de nɛ̀ mɔ ɗaŋ yí GASA WAN, ba nɛ̀ yuwar ko Jeroboam, zɔk nɛ̀ ɗoŋ ɗaŋmɔ n'aa dee so, kai nɛ̀ o be Israɛl a sɛnɛ.

²⁰Oi o tom ko Zimri, o ɗaŋ keta n'aa ba so yɔra zaŋ Kalata Nyɛrɛ ko o wannu Israɛl.

²¹Nɛ́ mɔ'ɔ nɛ̀ dukbíí Israɛl kɛ̧ɛ̧ yiitoo: reeta-a nɛɛ ɗoŋ Tibni bem ko Ginat, mɛ de wan ha̧ a̧; ɓɛɛ ɓii reeta nɛ́ kɔ‘i nɛ́ ɗoŋ Ɔmri.

²²O bíí nɛ̀ ndaka pata Ɔmri gana zu o wan nɛ̀ ndaka pata Tibni bem ko Ginat. Tibni fea, ɓɛɛ Ɔmri ɔ wan.

²³Tɛ ɓu-taar-zua-kpɔk pɛ-wan ko Asa wannu Juda, Ɔmri ɔɔ wan zu o be Israɛl pɛ ɓu-zua-yiitoo. A̧ ɔɔ wan pɛ mɔɔrɔ-ɗoŋ-kpɔk sɛn Tirsa,

²⁴ɓɛɛ a̧ hi̧fi kaya Samarii sɛn Sɛmɛr tɛ kɔya bu-mbɔi booro-mɔɔrɔ-ɗoŋ-kpɔk. A̧ mboo mɔ zik nɛ̀ kaya, ɓɛɛ a̧ a nin ye n'aa mboa'i nɛ́ Samarii, nyɛm nɛ̀ ɗoŋ nin Sɛmɛr wan kaya'i.

²⁵Ɔmri dee mɔ ɗaŋ yí GASA WAN gan ko o wi nɛ̀ yaa nɛti ha̧ a̧ lɛŋ.

²⁶A̧ nɛɛ kànà ɗoŋ yuwar ko Jeroboam bem ko Nɛbat lɛŋ, ɓɛɛ a̧ nɛ́ ɗoŋ o ɗaŋmɔ nɛ̀ Jeroboam dee so ha̧ o be Israɛl mɛ de, tu̧ nɛ̀ see GASA WAN Sɔ̧ ko Israɛl nɛ̀ o géé-sɔ̧ kɔ-wa.

²⁷Oi o tom ko Ɔmri, mɔ n'aa dea, o ŋgaŋamɔ n'aa dea, yɔra zaŋ Kalata Nyɛrɛ ko o wannu Israɛl.

²⁸Ɔmri sii ɗoŋ tɛ o dáà kɔ‘i, ɓɛɛ wa gun a̧ sɛn Samarii. Bem kɔ̧-a̧ Akab ɔɔ wan oi-aa.

²⁹Akab bem ko Ɔmri ɔɔ wan zu Israɛl tɛ pɛ ɓu-taar-zua-mɔɔrɔ-ɗoŋ-taar pɛ-wan ko Asa wannu Juda. Akab bem ko Ɔmri ɔɔ wan pɛ ɓu-yiitoo-zua-yiitoo zu Israɛl sɛn Samarii.

³⁰Akab bem ko Ɔmri dee mɔ ɗaŋ yí GASA WAN gan o wi nɛ̀ yaa nɛti ha̧ a̧ lɛŋ.

³¹Hee mɔ'ɔ nɛ̀ ndaka ɗoŋ o ɗaŋmɔ ko Jeroboam bem ko Nɛbat nyɛm a̧ na ga, a̧ baa Jezabɛl boko-bem ko Ɛtbal wannu ko o be Sidɔŋ nɛ̀ kóò. A̧ nɛɛ de tom ha̧ sɔ̧ Bal, ɓɛɛ a̧ gu nù ti a̧.

³²A̧ mboo fara-ɗafi-sɔ̧ ha̧ sɔ̧ Bal sɛn kɔ̧ tua n'aa mboo so ha̧ sɔ̧‘i sɛn Samarii.

³³Akab sɛka te nɛ‘i gasi gasi, ɓɛɛ a̧ ndak kànà nɛ́ ɗoŋ deemɔ mɛ tu̧ nɛ́ see GASA WAN Sɔ̧ ko Israɛl, gan o wannu Israɛl lɛŋ nɛ̀ ɔɔ so wan nɛti ha̧ a̧.

³⁴Tɛ ŋgimbi kɔ̧-a̧, Hiɛl be Bɛtɛl mboo mɔ zik nɛ̀ Jeriko. Ŋgimbi baa naŋ garo, kaya-bem kɔ̧-a̧ Abiram fea, ɓɛɛ ŋgimbi aa o kpar-nú-a, hɔ-ɗoŋ-kaya-bem Sɛgub mbɛt fea, nyɛm nɛ̀ ɗoŋ wen nɛ̀ GASA WAN tɔ̧ɔ̧ so nɛ̀ nú Josue bem ko Nun.