Read Northwest Gbaya 1 WANNU 9 Bible Online

1 WANNU 9 - Northwest Gbaya bible

1 WANNU 9

¹Ŋgimbi nɛ wannu Salomɔŋ kaɗa tom Tua ko GASA WAN in tua-wan, in n'aa dee mɔ lɛŋ n'aa kɔ̧ɔ̧ so kaɗi,

²GASA WAN hɔɔ zu ha̧ a̧ hee mɔ'ɔ n'aa dee so Gabaɔŋ ga.

³GASA WAN tɔ̧ɔ̧ ha̧ a̧: «Mi zia akamɔ in aia-nú kɔ-mɛ‘i; mi ee Tua nɛ̀ mɛ dee ha̧‘m'i wen zɔna nin-am ɓɔnsɛnɛ. Yí‘m in see-am tɛ duk tɛ Tua'i kpoo nɛ kpoo.

⁴Ɓɛɛ nɛ̀ kɔ-mɛ, kà mɛ nɛ́ nɛɛ nɔ̀ ti'm hee dáà kɔ-mɛ David nɛɛ so ga, kà mɛ de mɔ lɛŋ n'am tɛ tɔ̧ ha̧ mɛ mɛ de, kà mɛ kasi o heembea in o yuwar duka-a kɔ‘m,

⁵mi tɛ de ha̧ damti kɔ-mɛ zu Israɛl mɛ́ duk ɓɔnsɛnɛ, hee mɔ n'am tɔ̧ɔ̧ so nɛnɛ ha̧ dáà kɔ-mɛ David'e, ‹Ŋma bíí kɔ-mɛ tɛ duk zu damti Israɛl ɓɔnsɛnɛ,› ga.

⁶Ɓɛɛ k’ɛ̀nɛ̀ nɛ́ bɛ̧a̧‘m in o bem k’ɛ́nɛ́, k’ɛ̀nɛ̀ kasi o ha̧a̧nú in o heembea kɔ‘m n'am ha̧a̧ h’ɛ́nɛ́‘i na, k’ɛ̀nɛ̀ gasi o ŋma sɔ̧, gbɛ nɛ̀ zugur nù ti wa,

⁷mi tɛ ndak o be Israɛl yinɛ zu nù n'am ha̧a̧ ha̧ wa; ɓɛɛ mi tɛ ba yí‘m yinɛ zu Tua n'am hoka mɛ e nin-am sɛnɛ‘i. Israɛl tɛ duk nɛ́ mɔɔ-de-zɛŋ in mɔɔ-zɛkɛɗi ko o bíí lɛŋ.

⁸Ɓɛɛ ɗɛɗɛ o bíí lɛŋ nɛ̀ tɛ ɓir ká̧ zɔm Tua’ɛ tɛ gɔn. Wa tɛ tɔ̧: ‹Wen ge sa GASA WAN dee mɔ nɛ̀ nù'ɛ in Tua’ɛ hegɔ ge nde?›

⁹Bíí tɛ kifi nú: ‹Mɛ̀ nɛ́ wen nɛ wa bɛ̧ɛ̧ GASA WAN Sɔ̧ kɔ-wa, nɛ̀ gboo so o dáà kɔ-wa sɛn nú Egiptɛ, ɓɛɛ wa ɗafi o géé-sɔ̧, wa gbɛɛ zugur-wa nù, de nɛ̀ tom ha̧ wa, sa GASA WAN fo ŋgayamɔ'ɛ pi̧ zu wa.› »

¹⁰Mboo Tua ko GASA WAN in tua-ɔɔ ko Salomɔŋ dee nɛ́ pɛ ɓu-yiitoo sɛka kaɗi.

¹¹Hiram wannu Tir ha̧a̧ so te gbatui, te zawaya in lɔr ha̧ Salomɔŋ, ɓɛɛ Salomɔŋ ha̧ gasa ye ɓu-yiitoo sɛn nú Galilee ha̧ a̧.

¹²Wannu Hiram kura Tir mɛ nɛ̀ɛ́ zɔk ye nɛ Salomɔŋ ha̧a̧ ha̧ a̧‘i, ɓɛɛ o ye nɔ‘i de tɛ-a na.

¹³Hiram tɔ̧a̧: «Nya'm, nɛ́ ge ye ge a̧ mɛ ha̧a̧ ha̧‘m’ɛ ge?» Ku̧u̧naŋ-a nɛ wese'i, wi sa nin o ye nɔ‘i nɛ́ Nú Kabul.[11] Nin'i ɓɔna hɔ sɔsɔɔ.

¹⁴Hiram toma so kilo lɔr booro-taar-nɛ-reeta ha̧ Salomɔŋ.

¹⁵Wannu Salomɔŋ kaia o bíí nɛ̀ mgbánà wen dee tua kɔ̧-a̧ in Tua ko GASA WAN. Nɛ́ kpɔk o wi nɔ‘i a̧ hura gboŋgo Milo, mbo nɛ̀ garo Jerusalɛm, ɗafi nɛ̀ o ye Hazɔr, Mɛgido in Gezɛr mbɛt.

¹⁶Wannu Egiptɛ nɛɛ bi so Gezɛr; a̧ dɔɔ ye'i, ɓɛɛ a̧ gbɛ o be Kanaŋ nɛ̀ ɔɔ sɛnɛ‘i. A̧ ha̧a̧ ye'i nɛ̀ mɔɔ-desee baa-ŋmaa ha̧ boko-bem kɔ̧-a̧ kóò ko Salomɔŋ.

¹⁷Hegɔ, wannu Salomɔŋ ɗafa ye Gezɛr woyo in Bɛt-Hɔrɔŋ mɛ ɗɔɔ,

¹⁸gú nɛ̀ o ye Balat in Tamar sɛn ŋga-gbárà nù Juda.

¹⁹Salomɔŋ ɗafa ye nɛ̀ o dam a̧a̧ sɛnɛ, in o ye nɛ̀ keekee-nyaŋa a̧a̧ sɛnɛ, in o ye ko wan-daŋ-nyaŋa mbɛt. Salomɔŋ dee mɔ lɛŋ n'aa kɔ̧ɔ̧ so sɛn Jerusalɛm, sɛn Libaŋ in tɛ o nù lɛŋ n'aa ɔɔ wan zu wa.

²⁰O oi duk ko o be Amɔr, o be Hit, o be Periz in o be Hiv gú nɛ̀ o be Jebus, nɛ̀ dùk kɔ-wa bo nɛ Juif na, ɓɔna so kɔ‘i.

²¹Salomɔŋ kaia o oi bem kɔ-wa, wan nɛ̀ o bezaŋ Israɛl kum so kaɗi na, nɛ̀ ɓɔna so oi wa tɛ nù‘i, a tɛ tom bara hɔ sɔsɔɔ.

²²O be Israɛl duka so nɛ́ o wi-biro, o wi-pɛm-wannu, o gasa wi-biro, in o wan-keekee-nyaŋa, in o wan-nyaŋa, ɓɛɛ Salomɔŋ e ŋma mgbara wa kóó kpɔk tɛ tom bara na.

²³O wi-duk-zu tom ko wannu Salomɔŋ lɛŋ nɛ gɔmŋma-mɔɔrɔ-nɛ-ɓu-mɔɔrɔ.

²⁴Boko-bem ko wannu Egiptɛ nɛ̀ baa wannu Salomɔŋ kura ye ko David yak si kɔ̧ tua nɛ̀ Salomɔŋ dee ha̧ a̧‘i, sɛka wannu Salomɔŋ biti hur gboŋgo Milo.

²⁵Sɛn tɛ pɛ kpɔk, wannu Salomɔŋ ɗafa sɔ̧ war taar, dɔ nɛ̀ kpoo-sɔ̧, ha̧ nɛ̀ mɔ-gaŋmɔ zu fara-ɗafi-sɔ̧ n'aa mboo ha̧ GASA WAN, dɔ nɛ̀ fuu-nyama hi̧i̧ mbɛt. Nɛ́ hegɔ a̧ a̧ zɔk nɛ̀ Tua ko Sɔ̧ nɛ̀ de-a.

²⁶Wannu Salomɔŋ sɛka o dɔka kombon sɛn Eziɔŋ-Gebɛr, nɛ̀ duk ká̧ Elat ká̧ Gbɛ̧ gba-tɔp sɛn nú Edɔm.

²⁷Hiram toma o wi-de-tom kɔ‘i nɛ̀ iŋa tom-yì nɛ̀ de-a nɛ̀ kombon mɛ nɛ in o wi-de-tom ko Salomɔŋ.

²⁸Wa nɛ̀ɛ́ hɔ Ofir, ɓɛɛ wa kai lɔr tɛ kilo booro ɓu-zua-yiitoo piinɛ ha̧ Salomɔŋ.