Read Northwest Gbaya 2 WANNU 10 Bible Online

2 WANNU 10 - Northwest Gbaya bible

2 WANNU 10

¹Akab a̧a̧ so nɛ̀ be-wiwii ɓu-mɔɔrɔ-ɗoŋ-yiitoo sɛn Samarii. Jɛhu yɔra kalata tom si Samarii ha̧ o gasawi Yizreɛl in o wi nɛ̀ dai o bem ko Akab, ɓɛɛ tɔ̧:

²«Ŋgimbi nɛ kalata’ɛ tɛ hɔ er'nɛ́, hee mɔ'ɔ nɛ̀ o bem ko wan k’ɛ́nɛ́ a̧a̧ in'nɛ̀ɛ́ in o keekee-nyaŋa, o nyaŋa, ŋga ye in o boi-biro ga,

³ɛ̀nɛ̀ hók bíí nɛ̀ a̧a̧ nɛ̀ mboozu nɛ̀ duk nɛ̀ de-a mbɛt mgbara o bem ko wan k’ɛ́nɛ́; ɛ̀nɛ̀ dé wan ha̧ a̧ oi dáà kɔ̧-a̧, ɓɛɛ ɛ̀nɛ̀ yé ɗoŋ o bíí nutua ko wan k’ɛ́nɛ́, kà biro nɛ́ boa.»

⁴Kíì dee wa nyɛmna, ɓɛɛ wa tɔ̧: «O wannu yiitoo nɛ̀ yor ti a̧ na’ɛ kà bó nɛ̀ ɛ́ɛ́ nde?»

⁵Gasa wi-zɔk-kira ko wannu, wanye, o gasawi in o wi-dai o bem toma tɔ̧ ha̧ Jɛhu hee mɔ'ɔ ga: «K’ɛ́ɛ́, ɛ́ɛ́ nɛ́ o wi-de-tom k’ɛ́nɛ́, ɛɛ tɛ de mɔ lɛŋ n’ɛnɛ tɛ tɔ̧ h’ɛ́ɛ́, ɛɛ beka de wan ha̧ ŋma bíí na; mɔ n’ɛnɛ kɔ̧ɔ̧ mɛ de, ɛ̀nɛ̀ de!»

⁶Jɛhu yɔra yiitoo kalata, ɓɛɛ tɔ̧ ha̧ wa hee mɔ'ɔ ga: «K’ɛ̀nɛ̀ nɛ́ bòò nɛ́ bíí kɔ‘m, ɓɛɛ k’ɛ̀nɛ̀ zíí wen kɔ‘m, sa̧a̧mɔ tɛ ŋgimbi hee mɔ'ɔ ga, ɛ̀nɛ̀ káí o gɔɔ-zu o bem ko wan k’ɛ́nɛ́ lɛŋ tɛnɛ ha̧‘m sɛn Yizreɛl.» Wa kɛ̧ɛ̧ so o bem ko wannu ɓu-mɔɔrɔ-ɗoŋ-yiitoo'i ha̧ o gasawi saaye, ɓɛɛ wa duk dai nɛ̀ wa.

⁷Ŋgimbi nɛ wa kpaa kalata'i, wa kaia o bem ko wannu ɓu-mɔɔrɔ-ɗoŋ-yiitoo'i lɛŋ gɔn, a gɔɔ-zu-wa kɔ̧ gɛsɛ, ɓɛɛ wa tom ha̧ Jɛhu sɛn Yizreɛl.

⁸Ŋma betom tɛɛ tɔ̧ ha̧ Jɛhu: «Wa kaia o gɔɔ-zu bem ko wannu hɔ nɛnɛ kaɗi.» Jɛhu tɔ̧a̧: «Ɛ̀nɛ̀ á wa dùk-aa yiitoo ká̧ nú garo ye hegɔɔ hɔ tutuyɛ.»

⁹Jɛhu gboo mɛ tutuyɛ yor ti dukbíí nɛ̀ oi-aa lɛŋ ɓɛɛ tɔ̧ ha̧ wa: «Ɛ́nɛ́ nɛ́ o wi-de-mɔ nɛ̀ yuwar-a; kɔ‘m, mi baa nɛ́ ɗaŋ keta zu wan kɔ‘m sa'm gbɛ a̧, ɓɛɛ nɛ̀ ko o wi nɔ'ɔ, nɛ́ o'o gbɛɛ wa o?

¹⁰Ɛ̀nɛ̀ íŋ‘e, ŋma wen ko GASA WAN kpɔk, o wan n'aa tɔ̧ɔ̧ zu o bíí nutua ko Akab beka tik nu géè na. GASA WAN dee mɔ n'aa tɔ̧ɔ̧ so nɛ̀ nú Elii wi-de-tom kɔ̧-a̧ hɔ́ gba̧a̧.»

¹¹Jɛhu gbɛɛ oi bíí nutua ko Akab nɛ̀ ɓɔna, o gasawi kɔ̧-a̧, o nam kɔ̧-a̧ in o wi-ɗafi-sɔ̧ kɔ̧-a̧ lɛŋ a nù sɛn Yizreɛl. A̧ e ŋma bíí kpɔk na.

¹²Jɛhu baa yuwar yak si Samarii. A̧ hɔɔ sɛn Bɛt-Ɛkɛd tɛ ko o wi-dai-mɔ,

¹³ɓɛɛ a̧ kpa o nya Akazias wannu Juda. A̧ aka wa: «Ɛ́nɛ́ nɛ́ o?» Wa kifa nú: «Ɛ́ɛ́ nɛ́ o nya Akazias, ɛ́ɛ́ nɛ́ mɛ fan o be-wan in o bíí nutua ko Jezabɛl, nàà ko wannu.»

¹⁴Jɛhu tɔ̧a̧: «Ɛ̀nɛ̀ káí wa nɛ̀ kpasa.» Wa kaia wa nɛ̀ kpasa, ɓɛɛ wa gɔn wa ká̧ gɔna-yì Bɛt-Ɛkɛd. Wa lɛŋ yaa so nɛ́ ɓu-naar-zua-yiitoo; ŋma bíí kpɔk mgbara wa yu mɔ yak na.

¹⁵Jɛhu yaka hi̧i̧, ɓɛɛ a̧ kpa Jɔnadab bem ko Rekab, nɛ̀ we ti a̧ tɛnɛ. Jɛhu fana a̧, ɓɛɛ ak a̧: «Mɛ kɔ̧a̧‘m hee mɔ'ɔ n'am kɔ̧ɔ̧ nɛ̀ mɛ'ɛ ga nde?» Jɔnadab kifa nú: «Ii!» Ɓɛɛ Jɛhu tɔ̧: «Kà bó hegɔ, mɛ̀ nyɛ́í̧ er-mɛ tɛnɛ. Jɔnadab nyɛi̧a er, ɓɛɛ Jɛhu dak a̧ e kɔ̧ keekee-nyaŋa sɛn ká̧ tɛ,

¹⁶tɔ̧ nɛnɛ: «Mɛ̀ tɛ́ in am, ɓɛɛ mɛ tɛ zɔk *kɔ̧ɔ̧mɔ n'am kɔ̧ɔ̧ nɛ GASA WAN.» Wa yaka in ŋmaa nɛ̀ keekee-nyaŋa ko Jɛhu.

¹⁷Jɛhu hɔɔ Samarii, ɓɛɛ a̧ gbɛ oi o bíí ko Akab nɛ̀ ɓɔna nɛ̀ ɔ hi̧i̧. A̧ kuma wa lɛŋ nyɛm nɛ̀ ɗoŋ wen nɛ̀ GASA WAN tɔ̧ɔ̧ so ha̧ Elii.

¹⁸Jɛhu mɔi̧a dukbíí nɛ̀ oi-aa lɛŋ, ɓɛɛ tɔ̧ ha̧ wa: «Akab wora Bal tikiɗi, ɓɛɛ kɔ‘m Jɛhu, mi tɛ wor a̧ gan.

¹⁹Kinii, ɛ̀nɛ̀ sá o *wi-tɔ̧-wen oi nú Bal, o wi nɛ̀ de tom ha̧ a̧ in o wi-ɗaf'aa lɛŋ ha̧‘m, ká ŋma kpɔk ɓɔn na, wen mi tɛ ɗafi Bal de nɛ̀ gasa gbaŋa ha̧ a̧; wi nɛ̀ beka tɛ sɛnɛ na tɛ fe.» Jɛhu de so nɛ́ gɔn-ta mɛ kum o wi-gasi Bal yinɛ.

²⁰A̧ tɔ̧a̧: «Giiwi a̧ mɔ́í̧ wen tu̧u̧ tɛ Bal.» Wa ɗafa saa-sara,

²¹ɓɛɛ Jɛhu tom dam nú *Israɛl lɛŋ. O wi nɛ̀ gasi Bal lɛŋ tɛa, ŋma bíí nɛ̀ mbosa bo na. Wa mɔi̧a dun tua ko Bal sum-sum.

²²Jɛhu tɔ̧ɔ̧ ha̧ wi-pɛm-laa: «Mɛ̀ káí o laa gbonɛ ha̧ o bíí lɛŋ nɛ gasi Bal.» A̧ kaia laa gbonɛ ha̧ wa.

²³Jɛhu in Jɔnadab bem ko Rekab yee kɔ̧ tua-gasi Bal, ɓɛɛ tɔ̧ ha̧ o bíí ko Bal: «Ɛ̀nɛ̀ zɔ́k mɔ ká ŋma wi-de-tom ko GASA WAN tɛ́ɛ̀ bó hɛ̧ɛ̧; kànà nɛ́ o wi-gasi sɔ̧ Bal ɓɛɛ nde?»

²⁴Jɛhu in Jɔnadab yee tua mɛ ɗafi sɔ̧ in *dɔɔ kpoo-sɔ̧; ŋgimbi'i Jɛhu aa so o ŋma bíí kɔ‘i ɓu-mɔɔrɔ-ɗoŋ-taar nɛ̀ war zan, ɓɛɛ a̧ tɔ̧ ha̧ wa: «Kà ŋma bíí mgbara o wi nɔ'ɔ gɔm yak, wi nɛ̀ ee a̧ tɛ fe oi nú-a.»

²⁵Ŋgimbi nɛ Jɛhu *dɔɔ kpoo-sɔ̧ kaɗi, a̧ tɔ̧ɔ̧ ha̧ o wi-pɛm-tua in o baka-nyaŋa: «Ɛ̀nɛ̀ yé tua, ɛ̀nɛ̀ gbɛ́ wa yinɛ! Ká ŋma bíí kpɔk yu mɔ yak na!» Wa gɔma wa nɛ̀ gba-paa gbɛ. Ɗoŋ nɛ wa gbura wɔr-wa a ɗoŋ ye kaɗi, o wi-pɛm-tua in o baka-nyaŋa pia ɗoŋ pii saaye nɛ̀ tua ko Bal duk sɛnɛ‘i.

²⁶Wa baa ta-zu-nù kɔ̧ tua ko Bal gbonɛ, ɓɛɛ wa dɔ a nù.

²⁷Ɗoŋ nɛ wa ɗaŋa ta-zu-nù‘i kaɗi, wa gbina tua ko Bal a nù, é nɛ̀ fara-nɛ̀-zaŋbɛɛ nɛ̀ duk hɔ sɔsɔɔ.

²⁸Jɛhu ɗaŋa sɔ̧ Bal yinɛ sɛn nú *Israɛl.

²⁹Mɔ kpɔk, a̧ e ɗaŋmɔ ko Jeroboam bem ko Nɛbat nɛ̀ dee so kai nɛ̀ o be *Israɛl a sɛnɛ‘i duk na. O be ndai nɛ̀ wa dee nɛ̀ lɔr ɓɔna sɛn Bɛtɛl in Dan.

³⁰GASA WAN tɔ̧a̧ ha̧ Jɛhu: «Hee mɔ'ɔ nɛ̀ mɛ dee mɔ nɛ̀ de-a de nɛ̀ mɔ nɛ̀ yuwar-a yí‘m, ɓɛɛ mɛ de mɔ in o bíí nutua ko Akab hee mɔ'ɔ n'am kɔ̧a̧ so kànà ga, o bezaŋ-mɛ tɛ duk zu damti *Israɛl ɗoŋ ŋmaa war taar.»

³¹Ɓɛɛ Jɛhu nɛ́ nɔ̀ nɛ̀ see lɛŋ nyɛm nɛ̀ ɗoŋ Heembea ko GASA WAN Sɔ̧ ko *Israɛl na. A̧ e o ɗaŋmɔ nɛ̀ Jeroboam kaia so o be *Israɛl a sɛnɛ‘i duk na.

³²Tɛ ŋgimbi'i, GASA WAN ku̧u̧ naŋ daka er zu *Israɛl. Hazaɛl gusa o be *Israɛl lɛŋ tɛ *gbìsí nù kɔ-wa,

³³kuu̧naŋ-a nɛ̀ Jurdɛn, nɛ̀ war daŋa-wese, nú Galad lɛŋ, nù ko o be Gad, nù ko o bezaŋ Rubɛn, nù ko o bezaŋ Manase, sɛn Arɔɛr nɛ̀ a̧a̧ kɔ̧ gboŋgo Arnɔŋ, ká bá nɛ̀ Galad in Basaŋ mbɛt.

³⁴Oi o tom ko Jɛhu, mɔ n'aa dea lɛŋ, o ŋgaŋamɔ kɔ̧-a̧ lɛŋ yɔra zaŋ Kalata Nyɛrɛ ko o wannu *Israɛl.

³⁵A̧ fea si ɗoŋ o dáà kɔ̧-a̧, ɓɛɛ wa gun a̧ sɛn Samarii. Bem kɔ̧-a̧ Jɔakaz ɔɔ wan oi-aa.

³⁶Jɛhu ɔɔ wan *Israɛl pɛ ɓu-yiitoo-zua-mɔɔrɔ-ɗoŋ-taar sɛn Samarii.