Read Northwest Gbaya 2 WANNU 11 Bible Online

2 WANNU 11 - Northwest Gbaya bible

2 WANNU 11

¹Ŋgimbi nɛ Atalii nàà ko Akazias zia'e ndé, bem kɔ‘i fea wó, a̧ kɔ̧ɔ̧ mɛ gbɛ o bezaŋ wannu lɛŋ.

²Yɛhoseba boko-bem ko wannu Yoram boko-nya Akazias mgbɔɔ Jɔas bem ko Akazias yinɛ mgbara o bem ko wannu nɛ̀ wa tɛ gbɛ‘i; a̧ hu̧sa̧ a̧ kɔ̧ ŋma gɔna-bɛr Tua ko Sɔ̧ fara-a-gado, in kó-dai-a mbɛt. Wa hu̧sa̧ a̧ nɛ̀ Atalii, ɓɛɛ wa gbɛ a̧ na.

³A̧ duka nɛ̀ hu̧sa̧-a̧ in ko-dai-a hegɔɔ pɛ mɔɔrɔ-ɗoŋ-kpɔk sɛn kɔ̧ Tua ko GASA WAN, ŋgimbi ɔɔ wan ko Atalii zu nù‘i.

⁴Dee pɛ mɔɔrɔ-ɗoŋ-yiitoo, ɓɛɛ Yehoyada pi̧ tom ha̧ o gasawi ko o wi-biro gɔmŋmaa nɛ̀ tɛ̀ɛ́ nɛ̀ Kɛrɛt, in o wi-pɛm-tua ha̧ wa mɛ mɔi̧ lɛŋ tɛnɛ tɛ a̧ sɛn kɔ̧ Tua ko GASA WAN. A̧ *nɔɔ tɔk in wa, wa kàná mɔ ti a̧, ɓɛɛ a̧ usi bem ko wannu ha̧ wa.

⁵A̧ ha̧a̧ nú ha̧ wa hee mɔ'ɔ ga: «Mɔ n’ɛnɛ tɛ de a̧a̧: Ɛ́nɛ́ tɛ kɛ̧ bíí tɛ dùk-aa taar; kuti-a tɛ ba tom wese-ɔm-tɛ, ɓɛɛ nɛ́ a̧ a̧ tɛ pɛm tua ko wannu.

⁶Yiitoo-aa tɛ ya nú tua Sur ɓɛɛ taar-a yaa kɔ‘i nú tua sɛn ɗoŋ o wi-pɛm-tua nɛ̀ pɛm Tua ko GASA WAN ká ŋma bíí tɛɛ ye.

⁷Ɓɛ kɛ̧ɛ̧-bíí tɛ dùk-aa yiitoo nɛ̀ de kɔ-wa tom wese-ɔm-tɛ na tɛ pɛm Tua ko GASA WAN sɛn fara nɛ̀ wannu duk sɛnɛ‘i.

⁸Ɛ̀nɛ̀ zík wannu e see-a, kóó o ndé nɛ̀ boi-biro kɔ‘i er; wi nɛ̀ tɛ yak sitɛ‘nɛ́ nɛ̀ ŋgai, ɛ̀nɛ̀ gbɛ́ a̧; ɛ̀nɛ̀ yá ɓɔn katɛ wannu fara lɛŋ n'aa tɛ nɛ.»

⁹O gasawi ko o wi-biro gɔmŋmaa dee mɔ hee mɔ'ɔ nɛ̀ wi-ɗafi-sɔ̧ Yehoyada tɔ̧ɔ̧ ha̧ wa'i ga. Kóó o ndé kaia o bíí kɔ‘i, o wan nɛ̀ ye tom wese-ɔm-tɛ in o wan nɛ̀ gbo kɔ‘i wese'i, ɓɛɛ wa nɛ́ si katɛ wi-ɗafi-sɔ̧ Yehoyada.

¹⁰Wi-ɗafi-sɔ̧ ha̧a̧ sɛ́ɛ̀ in o ŋgee ko wannu David nɛ̀ yaa so kɔ̧ Tua ko GASA WAN'i ha̧ gasawi ko o wi-biro gɔmŋmaa.

¹¹O wi-pɛm-tua nɛka nɛ̀ boi-biro er, ku̧u̧naŋ-a nɛ̀ mgbii Tua nɛ̀ war wiiko hɔ nɛnɛ war gale ká̧ *fara-ɗafi-sɔ̧ zik wannu e see-a.

¹²Ɓɛɛ Yehoyada mgbɔ bem ko wannu gbonɛ, gu *laasɔ̧i̧-wan zu a̧, a o mɔɔ-sedaako-wan tɛ a̧, ɓɛɛ de wan ha̧ a̧. Wa tɛna nɔ̧́-wan a zu-a, ɓɛɛ wa gai mɔ: «Wannu kànà nɛ́ ɛ́nɛ́ ɓɛɛ!»

¹³Atalii zia giti maa yì ko o betom nɛ̀ ma tɛnɛ, a̧ nɛɛ sitɛ o bíí kɔ̧ Tua ko GASA WAN mɛ.

¹⁴Ŋgimbi n'aa zɔka wannu fara yora-a zu mɔ nɛ̀ kusa-a hee mɔ'ɔ nɛ̀ wa de ɓɔnsɛnɛ ga, o wan in o wi-dɔm-mbia nɛ̀ ya katɛ a̧, gú nɛ̀ o wi saaye lɛŋ nɛ̀ ya nɛ̀ desee dɔm nɛ̀ mbia, a̧ a̧ka̧ laa tɛ-a, ɓɛɛ a̧ hiɗi mɔ: «Wa ɗɔa'm! Wa ɗɔa'm!»

¹⁵Wi-ɗafi-sɔ̧ Yehoyada ha̧a̧ nú ha̧ o gasawi ko o wi-biro gɔmŋmaa hee mɔ'ɔ ga: «Ɛ̀nɛ̀ fó kóò'ɛ gbonɛ hɛ̧ɛ̧! Ɓɛɛ wi nɛ̀ tɛ ndak ɗoŋ-aa tɛ fe fio gba-paa!» Wi-ɗafi-sɔ̧ tɔ̧ɔ̧ hegɔ wen a̧ baa tɔ̧ so'e: «Ká‘i gbɛ a̧ kɔ̧ Tua ko GASA WAN na.»

¹⁶Wa baa Atalii nɛnɛ sitɛ tua ko wannu, tɛ nú tua nɛ‘i sa'e nú tua ko o Nyaŋa, ɓɛɛ wa gbɛ a̧ hi̧i̧.

¹⁷Yehoyada *nɔɔ tɔk in GASA WAN, ká bá nɛ̀ wannu in dukbíí kɔ‘i ha̧ wa mɛ ya nɛ́ dukbíí ko GASA WAN. A̧ dee ha̧ wannu mɛ nɔ tɔk in o dukbíí kɔ‘i mbɛt.

¹⁸O bíí nù‘i lɛŋ nɛɛ si kɔ̧ tua ko Bal, wa gbina tua'i a nù, wa ɗaŋa o *fara-ɗafi-sɔ̧ in o mboo-mɔ, ɓɛɛ wa gbɛ Mataŋ, wi-ɗafi-sɔ̧ sɛn ti o fara-ɗafi o sɔ̧. Wi-ɗafi-sɔ̧ Yehoyada ee o bíí mɛ pɛm Tua ko GASA WAN.

¹⁹A̧ kaia o gasawi ko o wi-biro gɔmŋmaa, o wi-biro nɛ̀ tɛ̀ɛ́ nɛ̀ Kɛrɛt, o wi-pɛm-tua in o bíí nù‘i lɛŋ. Wa mgbɔɔ wannu gbonɛ nɛ̀ kɔ̧ Tua ko GASA WAN ɓir nɛ̀ nú tua ko o wi-pɛm-tua si kɔ̧ tua ko wannu mɛ, ɓɛɛ Jɔas duk nù zu damti.

²⁰O bíí nù‘i lɛŋ duka nɛ̀ gasa desee, ɓɛɛ ye duk nɛ̀ ga̧a̧-a̧; ká wa gbɛɛ Atalii nɛ̀ gba-paa nú tua ko wannu kaɗi.

²¹Jɔas a̧a̧ so nɛ̀ pɛ mɔɔrɔ-ɗoŋ-yiitoo ŋgimbi n'aa ɔɔ nɛ̀ wan.