Read Northwest Gbaya 2 WANNU 17 Bible Online

2 WANNU 17 - Northwest Gbaya bible

2 WANNU 17

¹Ahaz wannu Juda ɔɔ wan pɛ ɓu-zua-yiitoo, ɓɛɛ Osee bem ko Ela ɔ wan sɛn Samarii nú *Israɛl tɛ pɛ mɔɔrɔ-ɗoŋ-naar.

²A̧ dee mɔ ɗaŋ yí GASA WAN, ɓɛɛ bó nɛ́ hee ko o wi nɛ̀ ɔɔ wan ti ha̧ a̧ sɛn *Israɛl ga na.

³Salmanasar wannu Asirii baa biro dúk nɛ̀ a̧; Osee duka ɗɔɔ ŋgai kɔ̧-a̧, gbo nɛ̀ garama ha̧ a̧.

⁴Nɛ̀ ɗoŋ, wannu Asirii iŋa'e, Osee baa ɗaŋ keta zu wi, wen nɛ Osee toma so kɔ‘i o betom ha̧ Sais wannu Egiptɛ, ɓɛɛ a̧ gbo garama ha̧ wannu Asirii hee mɔ'ɔ n'aa de so nɛti ga ɓɔna. Wannu Asirii baa Osee, ɓɛɛ hɛr a̧ nɛ̀ nyak-boi pi̧ kɔ̧ zɔbɔ.

⁵Wannu Asirii bìí nù nɛ̀ oi-aa lɛŋ; a̧ kpee ye Samarii e nù, ɓɛɛ a̧ bi tɛ pɛ taar sɛka a̧ be tɛ̀ɛ́ ba.

⁶Nɛ́ tɛ mɔɔrɔ-ɗoŋ-naar pɛ ɔɔ-wan ko Osee a̧ a̧ baa nɛnɛ, ɓɛɛ a̧ kai o be *Israɛl lɛŋ si Asirii nɛ̀ bara-biro. A̧ ee ha̧ wa mɛ ɔ kɔ-wa sɛn Hala, ká̧-zaŋ Habɔr, foka-yì Gozaŋ in sɛn tɛ o ye Mɛdii.

⁷Mɔ‘i dee hegɔ wen o be *Israɛl yuu nɛ́ o ŋma sɔ̧, de nɛ̀ ɗaŋmɔ ti GASA WAN Sɔ̧ kɔ-wa nɛ̀ gboo so wa nú Egiptɛ er wannu Egiptɛ.

⁸Wa ndaka ɗoŋ heembea ko o dukbíí nɛ̀ GASA WAN ndaka so ti wa in o heembea nɛ̀ o wannu *Israɛl gɔna so.

⁹O be *Israɛl in o wannu dee ɗaŋmɔ nɛ̀ GASA WAN Sɔ̧ kɔ-wa kɔ̧ so ha̧ wa mɛ de na. Wa mboo o *kusa-fara tɛ ye kɔ-wa lɛŋ, sɛn fara-pɛm-mɔ in tɛ o ŋga ye kɔ-wa mbɛt lɛŋ.

¹⁰Wa sɛka o ta-zu-nù in te nɛ‘i gasi gasi a dam zu o be kusa kaya in ɗɔɔ o da̧a̧ wa̧a̧-te lɛŋ.

¹¹Wa dɔɔ fuu-nyama zu o *kusa-fara nyɛm nɛ̀ ɗoŋ deemɔ ko o dukbíí nɛ̀ GASA WAN ndaka ti wa. Tɛ ɗaŋ deemɔ kɔ-wa'i, wa tu̧u̧ see GASA WAN.

¹²Wa gasa o géé-sɔ̧ nɛ̀ GASA WAN baa tɔ̧ so ha̧ wa ndé, ká wa gasi na wó‘i.

¹³GASA WAN tɔ̧ɔ̧ so ha̧ o be *Israɛl in Juda nɛ̀ nú o *wi-tɔ̧-wen oi nú Sɔ̧ in o wi-zɔk-mɔ lɛŋ hee mɔ'ɔ ga: «Ɛ̀nɛ̀ é ɗaŋ deemɔ k’ɛ́nɛ́ duk, ɛ̀nɛ̀ kásí o heembea in o geŋa kɔ‘m nyɛm nɛ̀ ɗoŋ Heembea n'am yɔra ha̧ o dáà k’ɛ́nɛ́, ɓɛɛ n'am ha̧a̧ h’ɛ́nɛ́ nɛ̀ ɗoŋ o wi-de-tom kɔ‘m.»

¹⁴Wa bɛ̧ɛ̧ mboo zu, wa dee ŋgazu hee o dáà kɔ-wa nɛ̀ e so ta nɛ̀ GASA WAN Sɔ̧ kɔ-wa na'i ga.

¹⁵Wa ee o heembea kɔ̧-a̧ in *nɔɔ-tɔk n'aa nɔɔ so in o dáà kɔ-wa lɛŋ duk. A̧ mbaŋa tɛ-wa tɛ mɔ n'aa kɔ̧a̧ so, ɓɛɛ wa zii na. Wa gasa nɛ́ o géé-sɔ̧, ɓɛɛ wa kifi nɛ́ o geemɔ. Wa zɔka ɗoŋ deemɔ ko o dukbíí nɛ̀ ɔ so zik wa; ɓɛɛ GASA WAN tɔ̧ɔ̧ so ha̧ wa ndé: ká wa de mɔ hee kɔ-wa ga na.

¹⁶Wa ee o heembea ko GASA WAN Sɔ̧ lɛŋ duk, ɓɛɛ wa mbo be ndai yiitoo. Wa sɛka Asɛra, sɔ̧-okoo, wa gbɛɛ zugur-wa nù ti o sɔra, ɓɛɛ wa de tom ha̧ sɔ̧ Bal.

¹⁷Wa dɔɔ o bem kɔ-wa mɛ be-wiwii-a in be-okoo-a ɗafi nɛ̀ sɔ̧. Wa zɔka o wi-de-mɔɔ-kifi in o wan-gbánà, wa pi̧i̧ tɛ-wa tɛ ɗaŋmɔ mɛ tu̧ see GASA WAN.

¹⁸See GASA WAN tu̧u̧ zu o be *Israɛl nɛ̀ ŋgaya-a, ɓɛɛ a̧ fo wa yinɛ yí-a; kànà nɛ́ zuduk ko Juda a̧ ɓɔna kpɔk ɓɛɛ.

¹⁹O be Juda mbɛt kasi o geŋa ko GASA WAN Sɔ̧ kɔ-wa na, ɓɛɛ wa ndak nɛ́ ɗoŋ o heembea nɛ̀ o be *Israɛl gɔna so.

²⁰GASA WAN bɛ̧ɛ̧ duk be *Israɛl lɛŋ; a̧ pi̧i̧ búù zu wa, e nɛ̀ wa er o wi-ɓar-mɔ er wi, ha̧ wa mɛ ndak wa nyɛi̧ nɛ̀ a̧.

²¹Ŋgimbi nɛ GASA WAN foo nɛ̀ *Israɛl yinɛ mgbara o bíí nutua ko David, *Israɛl hoka Jeroboam bem ko Nɛbat hee wannu ga. Jeroboam dee ha̧ *Israɛl mɛ ar nyɛi̧ nɛ̀ GASA WAN, ɓɛɛ fo a̧ pi̧ tɛ gasa ɗaŋmɔ.

²²O be *Israɛl ndaka ɗoŋ o ɗaŋmɔ lɛŋ nɛ̀ Jeroboam dee so'i; wa e yuwar-a duk na,

²³ɓɛɛ sa GASA WAN e wa nyɛi̧ nɛ̀ wi hee mɔ n'aa baa tɔ̧ so nɛ̀ nú o *wi-tɔ̧-wen oi nú Sɔ̧, o wi-de-tom kɔ̧-a̧ ga; wa kaia o be *Israɛl nɛ̀ bara-biro yaknɛ si Asirii, ɓɛɛ wa ɓɔn hi̧i̧ hɔ sɔsɔɔ.

²⁴Wannu Asirii saa o be Babilɔŋ, o be Kut, o be Awa, o be Hamat in o be Sɛfarvaim tɛnɛ, ɓɛɛ a̧ a wa tɛ o ye Samarii oi o be *Israɛl. Wa baa Samarii, ɓɛɛ wa ɔ tɛ o ye.

²⁵Tɛ ku̧u̧ naŋ ɔɔ ye kɔ-wa hi̧i̧, hee mɔ'ɔ nɛ̀ wa yu so GASA WAN na ga, GASA WAN toma o dila gbɛ nɛ̀ wa.

²⁶O bíí tɔ̧ɔ̧ ha̧ wannu Asirii: «O tugun bíí n’ɛnɛ tɔ̧ɔ̧ wa a̧ ɔ́ Samarii wó'ɛ iŋ kɔ‘i yuwar tu̧u̧ tɛ sɔ̧-nù‘i na. Sɔ̧‘i toma o dila, ɓɛɛ gbɛ o ŋma mgbara wa yinɛ wen wa iŋ kɔ-wa yuwar tu̧u̧ tɛ sɔ̧-nù‘i na.»

²⁷Wannu Asirii tɔ̧ɔ̧ hee mɔ'ɔ ga: «Ɛ̀nɛ̀ tóm ŋma wi-ɗafi-sɔ̧ nɛ̀ Samarii kpɔk mgbara o dɔka wi-ɗafi-sɔ̧ n’ɛnɛ kaia nɛ̀ bara’ɛ nɛnɛ mɛ usi yuwar tu̧u̧ tɛ sɔ̧-nù‘i ha̧ wa.»

²⁸Ŋma wi-ɗafi-sɔ̧ mgbara o wan nɛ wa kaia so nɛ̀ bara sɛn Samarii nɛɛ ɔ Bɛtɛl; a̧ usa mgbara yuu GASA WAN ha̧ wa.

²⁹O tugun bíí kpɔk kpɔk mbo nɛ́ sɔ̧ kɔ‘i nɛ̀ gasi so'i, ɓɛɛ nɛ̀ɛ̀ e kɔ̧ tua tɛ o *kusa-fara nɛ̀ o be Samarii dee so'i; tugun bíí dee kànà hegɔ tɛ ye nɛ wa ɔ sɛnɛ‘i.

³⁰Nin sɔ̧ ko o be Babilɔŋ nɛ̀ dea'i nɛ́ Sukot-Bɛnot; ko o be Kut nɛ́ Nɛrgal; o be Hamat gasi kɔ‘i nɛ́ Asima.

³¹O be Awa gasi nɛ́ Nihaz in Tartak; o be Sɛfarvaim dɔ kɔ‘i nɛ́ o bem kɔ‘i ha̧ Adramɛlɛk in Anamɛlɛk.

³²Wa yuu GASA WAN mbɛt, ɓɛɛ wa e kànà o wi-ɗafi-sɔ̧ kɔ-wa mɛ de tom oi nú-wa sɛn kɔ̧ tua tɛ o *kusa-fara.

³³Wa yuu GASA WAN, ɓɛɛ wa gasi kànà o sɔ̧ kɔ-wa siti mbɛt, nyɛm nɛ̀ ɗoŋ yuwar duka-a ko o tugun bíí tɛ nù nɛ̀ wa kaia wa nɛ̀ bara sɛnɛ tɛnɛ‘i.

³⁴Hɔ sɔsɔɔ mbɛt, wa de nɛ o do gba̧‘a̧ mɔ‘i. Wa yu GASA WAN na; wa de mɔ nyɛm nɛ̀ ɗoŋ geŋa, o do-mɔ, in o yuwar duka-a nɛ̀ kifa nɛ́ kɔ-wa'i na. Wa de mɔ nyɛm nɛ̀ ɗoŋ Heembea in wen nɛ̀ GASA WAN yɔra ha̧ o bem ko Jakob, wi n'aa saa nin-a'e Israɛl’ɛ na.

³⁵GASA WAN *nɔɔ tɔk in wa, ɓɛɛ tɔ̧ ha̧ wa hee mɔ'ɔ ga: «Ɛ́nɛ́ beka yu ŋma sɔ̧ na; ɛ́nɛ́ beka gbɛ zugur'nɛ́ nù ti wa na mbɛt; k’ɛ́nɛ́ de tom ha̧ wa na in k’ɛ́nɛ́ ɗafi wa na mbɛt.

³⁶Nɛ́ GASA WAN nɛ̀ baa gbo'nɛ́ yinɛ nú Egiptɛ tɛ ŋgai mɛ er-a, ɛ̀nɛ̀ tɛ yu in ɛ̀nɛ̀ tɛ gu nù ti a̧. Nɛ́ a̧ ɛ̀nɛ̀ tɛ ɗafi.

³⁷O geŋa in o do-mɔ, heembea in o tɔ̧ɔ̧-wen n'aa usa h’ɛ́nɛ́, ɛ̀nɛ̀ dé nɛ̀ tom wese lɛŋ, ɓɛɛ k’ɛ́nɛ́ yu o ŋma sɔ̧ na.

³⁸Ká tɛ‘nɛ́ bi ɗoŋ *nɔɔ-tɔk n'aa nɔɔ so in'nɛ̀ɛ́ na, ɓɛɛ k’ɛ́nɛ́ yu o ŋma sɔ̧ na mbɛt.

³⁹Nɛ́ GASA WAN Sɔ̧ k’ɛ́nɛ́, ɛ̀nɛ̀ tɛ yu. Nɛ́ a̧ a̧ tɛ gbo'nɛ́ er o wisɛn k’ɛ́nɛ́ lɛŋ!»

⁴⁰Wa kɔ̧ mboo zu na, ɓɛɛ wa ɓɔn tɛ deemɔ nyɛm nɛ̀ ɗoŋ do gba̧‘a̧ yuwar duka-a kɔ-wa.

⁴¹O tugun bíí nɔ‘i yuu kíí GASA WAN, ɓɛɛ wa ɓɔn kànà tɛ gasa o géé-sɔ̧ kɔ-wa mbɛt. Mɔ nɛ̀ o zɔmdáà kɔ-wa dee so, o dáà kɔ-wa dea, ɓɛɛ nɛ́ kpɔk mɔ‘i a̧ o bem kɔ-wa de hɔ sɔsɔɔ‘i mbɛt.