Read Northwest Gbaya 2 WANNU 19 Bible Online

2 WANNU 19 - Northwest Gbaya bible

2 WANNU 19

¹Ŋgimbi nɛ wannu Ezɛkias zia wen kɔ-wa'i, a̧ a̧ka̧ laa kɔ̧-a̧, pi̧ laa bufu, ɓɛɛ nɛ́ si kɔ̧ Tua ko GASA WAN.

²A̧ toma Ɛliakim wi-duk-zu tua-wan, Sɛbna wi-yɔr-kalata in o gasa wi-ɗafi-sɔ̧; ɓɛɛ wa a laa bufu nɛ́ nɛnɛ tɛ Esaii bem ko Amɔs,

³mɛ́ tɔ̧ ha̧ a̧ ndé, «Ezɛkias tɔ̧a̧: ‹Wese’ɛ nɛ́ wese-ŋgamɔ, wese-bɔnɛ in wese-ziimɔ! Bem ee zu war kaɗi, ɓɛɛ ŋgai gɔfa a̧ bo na.

⁴Ŋmafara GASA WAN Sɔ̧ kɔ-mɛ tɛ zii wen nɛ̀ wannu Asirii toma nɛ̀ gasa betom kɔ‘i da̧ nɛ̀ Sɔ̧ nɛ̀ duk kpasa, ɓɛɛ Sɔ̧ dee bɔnɛ in a̧, wen o wen nɛ̀ GASA WAN Sɔ̧ kɔ-mɛ zia'i! Mɛ̀ kɔ́fí sɔ̧ wen o oi bíí nɛ̀ ɓɔna'i.› »

⁵O betom ko wannu Ezɛkias hɔɔ tɛ Esaii,

⁶ɓɛɛ Esaii tɔ̧ ha̧ wa: «Ɛ̀nɛ̀ nɛ́ɛ̀ tɔ̧ ha̧ wan k’ɛ́nɛ́; GASA WAN'e ndé: ‹Ká mɛ́ de kíì wen mɔ nɛ̀ mɛ zia'i na; ká mɛ́ de kíí dara nɛ̀ o bíí ko wannu Asirii da̧ nɛ‘m'i na.

⁷Mi tɛ e ŋma taamɔ kɔ‘m tɛ-a, a̧ tɛ zii ŋma nyɛrɛ, a̧ tɛ si ɗoŋ, ɓɛɛ mi dee ha̧ wa mɛ gbɛ a̧ nɛ̀ gba-paa tɛ mgbák nù kɔ̧-a̧.› »

⁸Gasa betom zia'e wannu Asirii yaka si Lakis, ɓɛɛ a̧ nɛ́ɛ̀ kpa a̧ sɛn Libna, fara n'aa bi biro sɛnɛ‘i.

⁹Wannu zia nyɛrɛ ko Tiraka wannu Etiopii nɛ̀ tɛ de biro in a̧, ɓɛɛ wannu Asirii tom mɔ sitɛ Ezɛkias woyo hee mɔ'ɔ ga:

¹⁰«Ɛ̀nɛ̀ tɔ̧́ ha̧ Ezɛkias wannu Juda hee mɔ'ɔ ga: ‹Ká Sɔ̧ kɔ-mɛ nɛ̀ mɛ e ta nɛnɛ ɔr mɛ ndé, wannu Asirii nyɛm mɛ ba Jerusalɛm na,› na!

¹¹Mɛ iŋa mɔ nɛ̀ o wannu Asirii dee in o nù lɛŋ; wa kuma o bíí lɛŋ, ɓɛɛ kɔ-mɛ‘e ndé, ŋma mɔ beka fo wi na!

¹²Nɛ́ ge gbakamɔ ge a̧ o sɔ̧ ko o zuduk nɛ̀ o dáà kuma so’ɛ gbaka nɛ̀ wa ge? Mɛ̀ nɛ́ o ye Gozaŋ, Haraŋ, Rɛsɛf in o be Edan nɛ̀ ɔ so sɛn Tɛlasar.

¹³O wannu Hamat, Arpad, Lair, Sɛfarvaim, Hɛna in wannu Iwa a̧a̧ déè nde?»

¹⁴Ezɛkias baa kalata er o betom, ɓɛɛ tɔr; a̧ daŋa si kɔ̧ Tua ko GASA WAN; a̧ yaia kalata'i ti GASA WAN,

¹⁵ɓɛɛ a̧ kɔfi sɔ̧ tɔ̧ nɛnɛ: «GASA WAN Sɔ̧ ko *Israɛl, ɛ́nɛ́ n’ɛ̀nɛ̀ dúk zu o *keribim, ɛ́nɛ́ kpɔk nɛ́ Sɔ̧ nɛ̀ duk zu o mɔɔ-wan zu nù'ɛ lɛŋ, wen nɛ́ ɛ́nɛ́'ɛ́ dee yiwese in nù.

¹⁶GASA WAN, ɛ̀nɛ̀ yéŋ zer'nɛ́, ɛ̀nɛ̀ zíí mɔ, ɓɛɛ ɛ̀nɛ̀ hú̧í̧ yí‘nɛ́, ɛ̀nɛ̀ zɔ́k mɔ. Ɛ̀nɛ̀ zíí dara nɛ̀ Sɛnakɛrib toma da̧ nɛ̀ ɛ́nɛ́, Sɔ̧ nɛ̀ duk kpasa’ɛ!

¹⁷GASA WAN, o wannu Asirii kuma so o zuduk bíí, ɗaŋ nɛ̀ nù kɔ-wa lɛŋ nɛ̀ mbetɛ.

¹⁸Wa kaia o sɔ̧ kɔ-wa a tɛ wee, ɓɛɛ o sɔ̧ nɔ‘i bo nɛ́ o kpasa sɔ̧ na; wa nɛ́ o tom-er-bíí nɛ̀‘i dee nɛ̀ te in ta, ɓɛɛ sa o wannu Asirii ɗaŋ wa yinɛ.

¹⁹Ɓɛɛ k’ɛ́nɛ́ GASA WAN Sɔ̧ k’ɛɛ, ɛ̀nɛ̀ kpásí yɛ er Sɛnakɛrib, ɓɛɛ o mɔɔ-wan zu nù'ɛ lɛŋ tɛ iŋ‘e, ɛ́nɛ́ nɛ́ GASA WAN, ɛ́nɛ́ nɛ́ Sɔ̧ kpɔk ɓɛɛ.»

²⁰Esaii bem ko Amɔs toma tom ha̧ Ezɛkias hee mɔ'ɔ ga: «Wen nɛ̀ GASA WAN Sɔ̧ ko *Israɛl tɔ̧ nɛ́ mɔ'ɔ: Mi zia kɔfamɔ kɔ-mɛ zu Sɛnakɛrib wannu Asirii.

²¹Wen nɛ GASA WAN tɔ̧ a zu a̧ nɛ́ mɔ'ɔ: Zɔŋa *Siɔŋ mam nɛ mɛ, a̧ zɔk mɛ hee geemɔ ga; Jerusalɛm yàà-de-zɔŋa, sɔr nɛ mɛ, zɛkɛɗi nɛnɛ!

²²Nɛ́ o a̧ mɛ da̧a̧ zɛkɛɗi nɛnɛ'ɛ o? Mɛ̀ nɛ́ o a̧ mɛ tɔ̧ɔ̧ ŋga wen zu a̧, ŋmaŋ nɛ̀ tɛ-mɛ'ɛ o? Mɛ̀ nɛ́ Sa̧a̧-wi ko *Israɛl.

²³«Mɛ́ ee tom nú o betom kɔ-mɛ da̧ nɛ GASA WAN. Mɛ tɔ̧a̧: ‹Tɛ̀ báá naŋanɔ ko o keekee-nyaŋa kɔ‘m, mi daŋa zu o kaya.› Mɛ ŋmaŋa tɛ-mɛ‘e ndé, wi gɔma o kusa te *gbatui in o *zawaya, nɛ́ mɔ'ɔ nɛ̀ wi yee kɔ̧ ɗuka kombo.

²⁴Wi gɔna kɔ̧ yì gɔni nù, ɓɛɛ wi nɔ; wi i̧sa o gɔna-yí Egiptɛ lɛŋ ɔ̧si.

²⁵«Mɛ́ íŋ kɔ-mɛ mɔ n'am ee so zu-a ɓeemɛ na nde? Mɔ n'am taa so mɛ de ɓeemɛ‘i nɛ́ mɔ'ɔ nɛ̀ de kinii'i. Ɓɛɛ nɛ́ mɛ́ a̧ tɛ de ha̧ o ta ŋga-ye nɔ‘i mɛ tir a nù.

²⁶O wi ye nɔ‘i bo nɛ̀ ŋgai na, tɛ-wa gbina, búù baa wa, wa ya hee zɔ̧ in nuŋui kpɛɛfɔ ga. Wa ya hee o mbɔɗimɔ nɛ̀ hɔ zu tua ga, hee alkamaari nɛ laambam baa nɛti ha̧ mɛ sɔk ga.

²⁷«Ŋgimbi nɛ̀ mɛ duk nù, ŋgimbi nɛ̀ mɛ gbo, ŋgimbi nɛ̀ mɛ ye tua, mi iŋa, in ŋgimbi nɛ̀ tɛ-mɛ nak nɛ̀ tu̧u̧-see zu'm mbɛt.

²⁸Mɛ kura zu'm ɓɛɛ o ɗaŋ wen kɔ-mɛ lɛŋ aa zer-am; hegɔ, mi tɛ pi̧ káná zɔ̧ɔ̧-mɛ in nú-mɛ mbɛt. Mi tɛ mgbɔ mɛ sinɛ ɗoŋ nɛ̀ yuwar nɛ̀ mɛ tɛɛ nɛnɛ‘i.

²⁹«Mɔ'ɔ tɛ duk nɛ́ mɔɔ-usi-mɔ ha̧ mɛ, Ezɛkias: wi tɛ nyɔŋ nɛ́ nyɔnɔ mɛ pɛ'ɛ, mɛ bin-mgba-pɛ, wi tɛ nyɔŋ nɛ́ wan nɛ̀ hɔɔ nɛ ta-tɛ; ɓɛɛ tɛ taar pɛ, ɛ̀nɛ̀ gún mɔ, ɛ̀nɛ̀ mɔ́í̧ nyɔnɔ. Ɛ̀nɛ̀ gún o nyak-dɔ̧ɔ̧, ɓɛɛ ɛ̀nɛ̀ nyɔ́ŋ o waya-a.

³⁰O be nutua ko Juda nɛ̀ ɓɔna, nɛ̀ mɔ hɔɔ yɔɔ zu wa, tɛ hɔ ŋmaa in ŋma te nɛ̀ kunin-a yee nù nɛ̀ ɗuka-a, ɓɛɛ wai woyo.

³¹Oi bíí nɛ̀ ɓɔna tɛ gbo nɛ̀ Jerusalɛm; ɓɛɛ o wi nɛ̀ yuu so mɔ tɛ zir nɛ̀ zu kaya *Siɔŋ mɛ. Mɔ nɛ̀ GASA WAN tɛ de tɛ gasa *kɔ̧ɔ̧mɔ kɔ̧-a̧ nɛ́ mɔ‘i.

³²«Wen nɛ̀ GASA WAN tɔ̧ɔ̧ zu wannu Asirii'i nɛ́ mɔ'ɔ: ‹A̧ beka ye saaye-ɛ na; a̧ beka pi̧ góò si hi̧i̧ na, a̧ beka kai ŋgee bi nɛ̀ ye'i na; a̧ beka mbo mɔ mɛ hu̧si ɗoŋ-aa ɓɔna.

³³A̧ tɛ si nɛ̀ kpɔk yuwar n'aa tɛɛ so nɛnɛ‘i; yéé kɔ̧-a̧ saaye bo na; nɛ́ GASA WAN a̧ tɔ̧a̧.

³⁴Mi tɛ pɛm ye’ɛ, ɓɛɛ mi kpasa a̧ wen nin-am in wi-de-tom kɔ‘m David.› »

³⁵Ŋma betom ko GASA WAN tɛɛ mɛ zaŋzɛ‘i, ɓɛɛ gbɛ bíí booro-gɔmŋmaa-nɛ-booro-ɓu-mɔɔrɔ-ɗoŋ-taar-zua-mɔɔrɔ sɛn kɔ̧ gbagari ko o be Asirii. Wa kura mɛ tutuyɛ, ɓɛɛ wa zɔk nɛ o wɔr mbɔɗɔnu nɛnɛ!

³⁶Wannu Asirii Sɛnakɛrib kura ɓɛɛ gbin gbagari. A̧ sii ɗoŋ, ɓɔn sɛn Ninivɛ.

³⁷Ŋma wese, a̧ nɛɛ ye kɔ̧ tua ko sɔ̧ kɔ̧-a̧ Nisrɔk mɛ gas'aa, ɓɛɛ o bem kɔ̧-a̧ Adramɛlɛk in Saresɛr gbɛ a̧ nɛ̀ gba-paa pi̧ nù; wa yuu mɔ yak si nú Ararat, ɓɛɛ bem kɔ̧-a̧ Asaradɔŋ ɔ wan oi-aa.