Read Northwest Gbaya 2 WANNU 23 Bible Online

2 WANNU 23 - Northwest Gbaya bible

2 WANNU 23

¹Wannu toma sa o gasawi Jerusalɛm in Juda lɛŋ tɛnɛ pii katɛ wi.

²Wannu nɛɛ kɔ̧ Tua ko GASA WAN in wa lɛŋ: o be Juda in o be Jerusalɛm, o wi-ɗafi-sɔ̧, o *wi-tɔ̧-wen oi nú Sɔ̧, o bíí saaye lɛŋ, kóó ge bíí ge ndé lɛŋ. A̧ tɔra gba̧a̧ wen nɛ̀ yɔra zaŋ kalata *nɔɔ-tɔk nɛ̀ wa kpaa kɔ̧ Tua ko GASA WAN'i ha̧ wa.

³Wannu yora zu mɔ nɛ̀ kusa-a ɓɛɛ ha̧ nú ti GASA WAN ndé, wi kpɛka *nɔɔ-tɔk n'aa nɔɔ in wi'i; wi tɛ nɛ ɗoŋ-aa, ɓɛɛ wi kasa o usamɔ in o geŋa, o heembea kɔ̧-a̧ nɛ̀ see-wi lɛŋ in kiitɛ-wi lɛŋ, ha̧ deemɔ kɔ‘i mɛ nyɛm ɗoŋ o gba̧a̧ wen nɛ̀ yɔra zaŋ kalata nɔɔ-tɔk'i, ɓɛɛ dukbíí nɛ oi-aa lɛŋ kpɛk nɔɔ-tɔk'i.

⁴Wannu ha̧a̧ nú ha̧ gasa wan-ɗafi-sɔ̧ Hilkia, ha̧ o ŋma wi-ɗafi-sɔ̧ in ha̧ o wi-pɛm-tua ko GASA WAN ha̧ wa mɛ kai o mɔ nɛ̀ wa ɗafa so wen gasa sɔ̧ Bal, Asɛra in o sɔra gbonɛ kɔ̧ Tua ko GASA WAN. Wa dɔɔ wa lɛŋ sɛn kpɛɛfɔ Sɛdrɔŋ nɛ̀ ɗoŋ Jerusalɛm, ɓɛɛ wa kai bùk-aa yaknɛ si Bɛtɛl mɛ.

⁵A̧ gbɛɛ o wi-ɗafi géé-sɔ̧ nɛ̀ o wannu Juda hoka so mɛ dɔ fuu-nyama zu o *kusa-fara tɛ o ye Juda in ká̧ Jerusalɛm yinɛ; a̧ gbɛɛ o wi nɛ̀ dɔ fuu-nyama gasi nɛ̀ Bal, gasi nɛ̀ wese, gasi nɛ̀ nyaŋa-zɛ in o sɔra lɛŋ a nù.

⁶A̧ baa te nɛ‘i gasi gasi gbonɛ sɛn kɔ̧ Tua ko GASA WAN sɛn Jerusalɛm si kɔ̧ gboŋgo Sɛdrɔŋ, ɓɛɛ wa dɔ hi̧i̧. Wa kaia bùk-aa nɛ́ɛ̀ gbai a fara-gun o bíí.

⁷A̧ gbina fara-ɔɔ ko o wiwii-de-dàlà *fara-ɗafi-sɔ̧ nɛ̀ ya so tok nɛ̀ laa ko Asɛra sɛn kɔ̧ Tua ko GASA WAN lɛŋ a nù.

⁸A̧ saa o wi-ɗafi-sɔ̧ nɛ̀ ɔ saaye Juda lɛŋ tɛnɛ, ɓɛɛ a̧ ɗaŋ o *kusa-fara nɛ̀ o wi-ɗafi-sɔ̧ nɔ‘i dɔɔ so fuu-nyama sɛnɛ‘i lɛŋ, ku̧u̧naŋ-a sɛn Geba hɔ Bɛrseba; a̧ gbina o *kusa-fara wan mɛ nú garo-ye, nɛ̀ duk nú garo ko wanye Josue, in o wan nɛ̀ duk nɛ̀ war gale nú-garo lɛŋ tɛ yee ye.

⁹O wi-ɗafi géé-sɔ̧ nyɛm so mɛ daŋ si zu fara-ɗafi GASA WAN sɛn Jerusalɛm na. Wa nyɔŋ kànà kɔ-wa nɛ *brɛt nɛ̀ hao bo sɛnɛ na mgbara o nya-wa.

¹⁰A̧ ɗaŋa fara-dɔ-bíí[13] kɔ̧ ɗɔŋgɔ Bɛn-Hinɔm, wen ká ŋma bíí tɛɛ dɔ bem kɔ‘i mɛ be-wiwii-a kóó be-okoo-a gasi nɛ̀ Mɔlɛk.

¹¹A̧ gbɛɛ o nyaŋa nɛ̀ o wannu Juda ha̧a̧ so ha̧ sɔ̧-wese mgbák nú Tua ko GASA WAN nɛ̀ war zan ká̧ gɔna bɛr-tua ko kpàná Nɛtaŋ-Mɛlɛk, ɓɛɛ a̧ dɔ o keekee-nyaŋa nɛ̀ wa ha̧a̧ so ha̧ sɔ̧-wee mbɛt.

¹²Wannu gbina o *fara-ɗafi-sɔ̧ nɛ̀ o wannu Juda mboo so e zu tua ko Ahaz mɛ ŋgɔn, in o wan nɛ̀ Manase mboo so sɛn bee-gara Tua ko GASA WAN yiitoo lɛn a nù; a̧ kaia oi bia wee-aa yinɛ, nɛ́ɛ̀ á bùk-aa kɔ̧ gboŋgo Sɛdrɔŋ.

¹³Wannu ɗaŋa o *kusa-fara nɛ̀ yaa so tan nɛ̀ Jerusalɛm nɛ̀ ká̧-zan-mɛ́-ɗɔɔ ha̧ kaya te-nɔ̧́; mɛ̀ nɛ́ o kusa-fara nɛ̀ Salomɔŋ wannu *Israɛl mboo so mɛ gasi nɛ̀ Astarte, okoo-sɔ̧ ko o be Sidɔŋ, Kɛmɔs géé-sɔ̧ ko o be Mɔab in Milkɔm ɗaŋ sɔ̧ ko o be Amɔŋ.

¹⁴A̧ gbina o ta-zu-nù ɓɛɛ a̧ gɔm o sɛka-te nɛ‘i gasi gasi a nù; a̧ kaia o gba̧a̧ bíí a oi-aa.

¹⁵Josias gbina *fara-ɗafi-sɔ̧ nɛ̀ duk sɛn Bɛtɛl, *kusa-fara nɛ Jeroboam bem ko Nɛbat mboo so, mgbɔ nɛ̀ o be *Israɛl a tɛ ɗaŋmɔ; a̧ gbina fara-ɗafi géé-sɔ̧‘i in *kusa-fara-a; a̧ dɔɔ kusa-fara'i kifi bùk, ɓɛɛ a̧ dɔ te nɛ‘i gasi gasi.

¹⁶Josias zika tɛ ɓɛɛ zɔk o pɛsi-fio nɛ̀ ya so zu kaya'i; a̧ tɔ̧ɔ̧ ha̧ wa mɛ nɛ̀ɛ́ kai gba̧a̧ nɛ̀ ya kɔ̧ o pɛsi nɔ‘i tɛnɛ, ɓɛɛ a̧ dɔ zu *fara-ɗafi-sɔ̧; a̧ dee hegɔ fɛŋ nɛ̀ fara-ɗafi géé-sɔ̧‘i nyɛm nɛ̀ ɗoŋ wen ko GASA WAN nɛ̀ bíí ko Sɔ̧ tɔ̧ɔ̧ so.

¹⁷A̧ zɔka ŋma mboo-mɔ ɓɛɛ a̧ ak mɔ: «Nɛ́ ge mboo-mɔ ge n'am zɔk mɛ‘i ge?» O wi saaye kifa nú ha̧ a̧: «Nɛ́ pɛsi-fio ko ŋma bíí ko Sɔ̧ nɛ̀ tɛɛ so nɛ̀ Juda; nɛ́ a̧ a̧ tɔ̧ɔ̧ wen zu mɔ n’ɛnɛ de kinii zu *fara-ɗafi-sɔ̧ Bɛtɛl’ɛ.»

¹⁸A̧ tɔ̧a̧: «Ɛ̀nɛ̀ é pɛsi'i! K’ɛ́nɛ́ fo gba̧a̧ nɛ̀ a̧a̧ kɔ̧ a̧ na!» Wa ee o gba̧a̧ nɔ‘i oi-aa in gba̧a̧ ŋma *wi-tɔ̧-wen oi nú Sɔ̧ nɛ̀ tɛɛ so nɛ̀ Samarii mbɛt.

¹⁹Josias gbina o tua *kusa-fara nɛ̀ o wannu *Israɛl mboo so tu̧ nɛ̀ see GASA WAN sɛn tɛ o ye Samarii a nù. A̧ dee kànà mɔ in wa hee mɔ'ɔ n'aa dee so nɛnɛ sɛn Bɛtɛl ga.

²⁰A̧ gɔna o wi-ɗafi-sɔ̧ lɛŋ nɛ̀ de tom zu o *kusa-fara sɛn *fara-ɗafi-sɔ̧, ɓɛɛ a̧ dɔ gba̧a̧ bíí sɛnɛ. Ɗoŋ mɔ‘i a̧ pia ɗoŋ pii Jerusalɛm.

²¹Wannu tɔ̧ɔ̧ ha̧ o bíí lɛŋ hee mɔ'ɔ ga: «Ɛ̀nɛ̀ dé gbaŋa *Paska ha̧ GASA WAN Sɔ̧ k’ɛ́nɛ́ hee mɔ'ɔ nɛ̀ yɔra zaŋ kalata *nɔɔ-tɔk ga.»

²²Tɛ ŋgimbi ko o wi-gɔn-kita nɛ̀ duka so nɛnɛ *Israɛl hɔ tɛ ŋgimbi ko o wannu *Israɛl in o wannu Juda lɛŋ, wa tɛ de ŋma gbaŋa *Paska hee mɔ‘i ga na.

²³Mɛ̀ nɛ́ tɛ ɓu-zua-mɔɔrɔ-ɗoŋ-taar pɛ-ɔɔ-wan ko Josias a̧ wa dee nɛ̀ gbaŋa Paska'i ha̧ GASA WAN sɛn Jerusalɛm.

²⁴Josias kuma o wi-zɔk-sɔ̧-fio, o wan-gbánà, o wi-zɔk-mɔ, ɗaŋ nɛ̀ o géé-sɔ̧ in o mɔɔ-ndiŋ nɛ‘i zɔk sɛn Juda in sɛn Jerusalɛm lɛŋ yinɛ, wen ha̧ gba̧a̧ heembea nɛ yɔra zaŋ kalata nɛ̀ Hilkia wi-ɗafi-sɔ̧ kpaa so kɔ̧ Tua ko GASA WAN mɛ nyɛm sɛnɛ.

²⁵Ŋma wi nɛ̀ ɔɔ wan nɛti nɛ̀ ha̧a̧ see, kiitɛ nɛ̀ oi-aa in ŋgai kɔ‘i lɛŋ ha̧ GASA WAN nyɛm nɛ̀ ɗoŋ Heembea ko Moisɛ hee mɔ'ɔ nɛ̀ Josias dea ga, bo na. Nɛ̀ ɗoŋ mbɛt, ŋma bíí nɛ̀ dee hegɔ, bo na.

²⁶Ɓɛɛ bó nɛ́ GASA WAN ee kifa-er tɛ ŋga nyimsea kɔ‘i ha̧ Juda nyɛm nɛ̀ ɗoŋ o mɔɔ-ɗaŋ-see-aa nɛ̀ Manase dee so'i duk na.

²⁷GASA WAN tɔ̧a̧: «Kóó nɛ́ Juda, mi tɛ fo yinɛ ti'm hee mɔ'ɔ n'am foo so nɛ̀ *Israɛl yinɛ ti'm ga; mi tɛ bɛ̧ Jerusalɛm, ye n'am hoka so'i, in Tua n'am tɔ̧ɔ̧ so'e ndé, nin-am tɛ duk sɛnɛ wo'i mbɛt.»

²⁸Oi o tom ko Josias, o mɔ n'aa dea lɛŋ yɔra zaŋ Kalata Nyɛrɛ ko o wannu Juda.

²⁹Tɛ ŋgimbi-wan ko Josias, Nɛko, wannu Egiptɛ kura mɛ nɛɛ ye ɗoŋ wannu Asirii sɛn ká̧ zaŋ Efrat. Wannu Josias kura we ti a̧ nɛ̀ biro, ɓɛɛ tɛ ku̧u̧naŋ biro hegɔ, wannu Egiptɛ gbɛɛ a̧. Duka nɛ́ sɛn Mɛgido.

³⁰O gasa wi-biro kɔ̧-a̧ baa wɔr-aa nɛ̀ keekee-nyaŋa nɛ̀ Mɛgido pii Jerusalɛm, ɓɛɛ wa gun a̧ sɛn kɔ̧ pɛsi kɔ̧-a̧. O bíí-nù baa Jɔakaz bem ko Josias, wa tɛna nɔ̧́ a zu-a, ɓɛɛ wa de wan ha̧ a̧ oi dáà kɔ̧-a̧.

³¹Jɔakaz a̧a̧ so nɛ̀ pɛ ɓu-yiitoo-zua-taar ŋgimbi n'aa ɔɔ nɛ̀ wan, ɓɛɛ a̧ ɔ wan fio-zɛ taar sɛn Jerusalɛm; nin nàà kɔ̧-a̧ nɛ́ Hamutal, boko-bem ko Yirmɛya, be Libna.

³²A̧ dee mɔ ɗaŋ yí GASA WAN hee ko o dáà kɔ̧-a̧ ga.

³³Nɛko, wannu Egiptɛ nɛ̀ɛ̀ ba a̧ hɛr nɛ̀ nyak-boi sɛn Ribla, nú Hamat ha̧ ɔɔ-wan kɔ̧-a̧ mɛ kaɗi sɛn Jerusalɛm, ɓɛɛ a̧ gɔn sede garama ha̧ o bíí nù ko Josias mɛ yoɓi tɛ kilo bu-mbɔi booro-taar in kilo lɔr ɓu-taar.

³⁴Nɛko wannu Egiptɛ dee wan ha̧ Ɛliakim oi dáà kɔ̧-a̧ Josias, ɓɛɛ a̧ gɔn mbe nin ha̧ a̧ ndé «Jɔakim.» War ko Jɔakaz, wa baa a̧ nɛ̀ bara-biro pii Egiptɛ, ɓɛɛ a̧ fe sɛn hi̧i̧.

³⁵Jɔakim gɔna sede ha̧ o bíí nù kɔ‘i mɛ yoɓi wen ha̧a̧-a̧ ha̧ Nɛko wannu Egiptɛ. Duka nɛ́ bu-mbɔi in lɔr, kóó o ndé kpɔk kpɔk nyɛm nɛ̀ ɗoŋ kpaamɔ kɔ‘i, ɓɛɛ a̧ ba gbo nɛ̀ garama ha̧ Nɛko.

³⁶Jɔakim a̧a̧ so nɛ̀ pɛ ɓu-yiitoo-zua-mɔɔrɔ ŋgimbi n'aa ɔɔ nɛ̀ wan, ɓɛɛ a̧ ɔ wan pɛ ɓu-zua-kpɔk sɛn Jerusalɛm. Nin nàà kɔ̧-a̧ nɛ́ Zɛbida, boko-bem ko Pɛdaya, be Ruma.

³⁷A̧ dee mɔ ɗaŋ yí GASA WAN hee ko o dáà kɔ̧-a̧ ga.