Read Northwest Gbaya 2 WANNU 8 Bible Online

2 WANNU 8 - Northwest Gbaya bible

2 WANNU 8

¹Duka, ɓɛɛ Elisee nɛ́ɛ̀ tɔ̧ ha̧ okoo n'aa kpasa so bem kɔ̧-a̧: «Mɛ̀ kúr in o bíí nutua kɔ-mɛ, mɛ̀ nɛ́ si ŋma fara, wen GASA WAN tɛ de ha̧ gasa kaɓa mɛ tik nù tɛ pɛ mɔɔrɔ-ɗoŋ-yiitoo.»

²Kóò‘i kura ɓɛɛ de hee mɔ'ɔ nɛ̀ bíí ko Sɔ̧ tɔ̧ɔ̧ ha̧ a̧ ga; a̧ kura yak in o bíí kɔ̧-a̧ nɛ́ɛ̀ ɔ nù ko o be Filistii tɛ pɛ mɔɔrɔ-ɗoŋ-yiitoo.

³Ɗoŋ pɛ mɔɔrɔ-ɗoŋ-yiitoo, kóò‘i pia nɛ̀ nù ko o be Filistii; a̧ nɛ̀ɛ̀ ai nú ha̧ wannu wen tua in fɔ kɔ̧-a̧.

⁴Ŋgimbi'i ká wannu tɔ̧ nɛ wen in Gehazi wi-de-tom ko bíí ko Sɔ̧. A̧ tɔ̧ɔ̧ ha̧ a̧: «Mɛ̀ tɔ̧́ nyɛrɛ o gasamɔ lɛŋ nɛ̀ Elisee dea ha̧‘m.»

⁵Gehazi tɔ̧ so nɛ nyɛrɛmɔ ko bem ko okoo nɛ fea so ká Elisee kpasi'i ha̧ wannu, ɓɛɛ kóò‘i hɔ tɛ wannu mɛ ai nú wen tua in fɔ kɔ̧-a̧ nyɛm nɛ̀ wen'i nɛ̀ Gehazi tɔ̧‘i. Gehazi tɔ̧a̧: «Nyaa wannu, kóò'ɛ nɛ́ mɔ'ɔ, ɓɛɛ bem kɔ̧-a̧ nɛ̀ Elisee kpasa so nɛ́ mɔ'ɔ mbɛt!»

⁶Wannu aka kóò‘i, ɓɛɛ a̧ we ɗoŋ wen'i hee mɔ‘i ga ha̧ a̧. Wannu ee kóò‘i er ŋma gasawi, ɓɛɛ tɔ̧ ha̧ a̧: «Ɛ̀nɛ̀ dé ha̧ wa mɛ ha̧ mɔ ko kóò'ɛ lɛŋ ha̧ a̧, fo n'aa ee so, in mɔ nɛ̀ dɛma sɛnɛ mbɛt.»

⁷Elisee nɛ̀ɛ́ sɛn Damas ŋgimbi nɛ wannu Aram, Bɛn-Hadad ɔ nɛ zɛɛ; wa tɔ̧ɔ̧ ha̧ wannu'e: «Bíí ko Sɔ̧ hɔɔ hɛ̧ɛ̧.»

⁸Wannu tɔ̧ɔ̧ ha̧ Hazaɛl: «Mɛ̀ bá ŋma be gbaka-mɔ er-mɛ, mɛ nɛ́ɛ̀ zɔk bíí ko Sɔ̧‘i, ha̧ a̧ ak GASA WAN'e: ‹Mɔ‘i, mi tɛ kur tɛ zɛɛ'ɛ nde?› »

⁹Hazaɛl kaia o ŋma demɔ sɛn Damas nɛ nɛnɛ tɛ Elisee; a̧ kaia ŋgeloba ɓu-naar wen tuia mɔ nɛnɛ. A̧ nɛ̀ɛ̀ yor ti Elisee, ɓɛɛ a̧ tɔ̧; «Nɛ́ bem k’ɛ́nɛ́ Bɛn-Hadad wannu Aram a̧ tom am mɛ ak'nɛ́‘e, wi tɛ kpasi tɛ zɛɛ kɔ‘i'i nde?»

¹⁰Elisee kifa nú ha̧ a̧: «Mɛ̀ nɛ́ɛ̀ tɔ̧ kɔ-mɛ ha̧ a̧‘e, nɛ̀ mbetɛ, a̧ tɛ kpasi, ɓɛɛ kɔ‘m GASA WAN usa ha̧‘m ndé, a̧ tɛ fe.»

¹¹Bíí ko Sɔ̧ mbaɗa Hazaɛl raaŋ, ɓɛɛ ŋma nú tɛ kɔ̧a̧.

¹²Hazaɛl aka a̧: «Nyaa, ɛnɛ hi̧i̧ kɔ̧a̧ wen ge?» Ɓɛɛ Elisee tɔ̧: «Wen mi iŋa ɗaŋmɔ nɛ mɛ tɛ de in o be *Israɛl lɛŋ. Mɛ tɛ dɔ ye nɛ̀ boi-biro kɔ-wa ya sɛnɛ‘i; mɛ tɛ gbɛ ŋgaiwi in o zɔŋa nɛ̀ gba-paa; mɛ tɛ mbɔli o bem kɔ-wa; mɛ tɛ kak zaŋ o nàá-zaŋ.»

¹³Hazaɛl tɔ̧a̧: «Wi-de-tom k’ɛ́nɛ́, géé toyo hee mi wi-de-tom k’ɛ́nɛ́ ga, so nɛ́ o mɛ de gbamɔ hegɔ o?» Elisee kifa nú: «GASA WAN usa ha̧‘m ndé, mɛ tɛ ɔ wan sɛn nú Aram.»

¹⁴Hazaɛl ee Elisee duk, ɓɛɛ si ɗoŋ tɛ wan kɔ‘i. Wan kɔ̧-a̧ aka a̧: «Nɛ́ ge wen ge a̧ Elisee tɔ̧ɔ̧ ha̧ mɛ ge?» A̧ kifa nú: «A̧‘e, nɛ̀ mbetɛ, ɛnɛ tɛ kpasi.»

¹⁵Mɔ sa̧a̧, ɓɛɛ a̧ pi̧ ŋma zɔ̧-laa ɗɔɔ yì, ba kpe nɛ zɔ̧ɔ̧ Bɛn-Hadad, ɓɛɛ Bɛn-Hadad fe, ɓɛɛ Hazaɛl ɔ wan oi-aa.

¹⁶Tɛ mɔɔrɔ pɛ-wan ko Yoram bem ko Akab wannu *Israɛl, ká Josafat ɔ nɛ wan Juda, Yoram bem ko Josafat wannu Juda ɔɔ wan.

¹⁷A̧ a̧a̧ so nɛ pɛ ɓu-taar-zua-yiitoo, ɓɛɛ a̧ ɔ wan pɛ mɔɔrɔ-ɗoŋ-taar sɛn Jerusalɛm.

¹⁸A̧ dee mɔ hee o wan *Israɛl de so ga, hee deemɔ ko o bíí nutua ko Akab ga, wen kóò kɔ̧-a̧ duka so nɛ́ boko-bem ko Akab. A̧ dee mɔ ɗaŋ yí GASA WAN.

¹⁹Ɓɛɛ GASA WAN kɔ̧ so ɗaŋa Juda na, wen zu wi-de-tom kɔ‘i David, wen nɛ̀ GASA WAN baa ha̧ so nú‘e ndé: «Ŋma bezaŋ-aa beka nyaŋ zu damti na ɓɔnsɛnɛ.»

²⁰Tɛ ŋgimbi-wan ko Yoram, o be Edɔm kɔ̧ mboo zu ha̧ Juda ɓɔna, ɓɛɛ wa ba ŋma wan kɔ-wa nɛtɛ.

²¹Tɛ mɔ‘i, Yoram yaka si Sair in o keekee-nyaŋa kɔ‘i lɛŋ. O be Edɔm nɛ̀ɛ̀ kɛr wa, ɓɛɛ wa kur mɛ ɗuka-zɛ pɛsi yu mɔ yak lɛŋ si tɛ kɔ-wa.

²²Ɗoŋ-aa'i, o be Edɔm de kànà nɛ́ ŋgazu in wannu Juda hɔ sɔsɔɔ. Libna dee ŋgazu tɛ ŋgimbi'i mbɛt.

²³Oi o tom ko Yoram, o mɔ n'aa dee lɛŋ yɔra zaŋ Kalata Nyɛrɛ ko o wannu Juda.

²⁴Yoram sii ɗoŋ tɛ o dáà kɔ‘i, ɓɛɛ wa gun a̧ saaye ko David. Bem kɔ̧-a̧ Akazias ɔɔ wan oi-aa.

²⁵Tɛ ɓu-zua-yiitoo pɛ-wan ko Yoram bem ko Akab wannu *Israɛl, Akazias bem ko Yoram wannu Juda ɔɔ wan.

²⁶Akazias a̧a̧ so nɛ pɛ ɓu-yiitoo-zua-yiitoo, ɓɛɛ a̧ ɔ wan pɛ kpɔk sɛn Jerusalɛm. Nin nàà kɔ̧-a̧ so nɛ́ Atalii boko-bem ko Ɔmri, wannu *Israɛl.

²⁷A̧ dee mɔ ɗaŋ yí GASA WAN, hee o bíí nutua ko Akab ga, wen a̧ so nɛ́ pɛ́r-nam ko Akab.

²⁸A̧ in Yoram bem ko Akab nɛ̀ɛ̀ mɛ bi Hazaɛl wannu Aram sɛn Ramot nú Galad, ɓɛɛ o be Aram e da̧i̧ tɛ Yoram.

²⁹Wannu Yoram pia kɔ‘i ɗoŋ Yizreɛl ha̧ a̧ mɛ a nyina yí da̧i̧ nɛ o be Aram ee so tɛ-a, ŋgimbi nɛ̀ wa de nɛ̀ biro in Hazaɛl wannu Aram'i. Ɗoŋ mɔ‘i, Akazias zira si Yizreɛl mɛ zɔk Yoram nɛ̀ baa so da̧i̧.