Read Northwest Gbaya 1 KALATA NYƐRƐ 10 Bible Online

1 KALATA NYƐRƐ 10 - Northwest Gbaya bible

1 KALATA NYƐRƐ 10

¹Duka, ɓɛɛ o be Filistii ba biro dúk nɛ̀ o be Israɛl. O be Israɛl yuu mɔ ti wa, ɓɛɛ o be Filistii gbɛ wa nɛ̀ dɔka-a sɛn zu kaya Gilboa.

²O be Filistii nasa Saul in o bem kɔ̧-a̧; wa gbɛɛ Jɔnataŋ, Abinadab bá nɛ̀ Malki-Sua, o bem ko Saul,

³ɓɛɛ biro mɔi̧ pii ɗoŋ zɔk nɛ́ Saul kpɔk. O wi-pi̧-góò kɔɓa a̧, ɓɛɛ wa pi̧ a̧.

⁴Saul tɔ̧ɔ̧ ha̧ baka-nyaŋa kɔ‘i: «Mɛ̀ dák gba-paa kɔ-mɛ tok nɛ̀‘m gbɛ, wen ká o wi-mbii nɔ'ɔ tɛɛ gbɛ‘m, ɓɛɛ ká wa mam am.» Ɓɛɛ baka-nyaŋa kɔ̧-a̧‘i kɔ̧ na, wen kíì dee a̧ nyɛmna. Saul daka gba-paa kɔ‘i, ɓɛɛ hɔ̧fi̧ tik yí-a.

⁵Ɓɛɛ hee mɔ'ɔ nɛ̀ baka-nyaŋa zɔka'e Saul fea ga, a̧ tika yí gba-paa kɔ̧-a̧ ɓɛɛ a̧ fe mbɛt.

⁶Saul gú nɛ̀ o bem kɔ‘i taar fee kpɔk wese; o bíí nutua-wan kɔ̧-a̧ kaɗa wese'i lɛŋ.

⁷Ŋgimbi nɛ̀ o be Israɛl zɔka'e, biro baa wi, ɓɛɛ nɛ̀ Saul gú nɛ̀ o bem kɔ‘i fea, wa yuu mɔ yak e ye kɔ-wa duk, ɓɛɛ o be Filistii tɛ́ɛ̀ ba fara oi wa.

⁸Nɛ̀ mɔ sa̧a̧ kaɗi, o be Filistii tɛɛ mɛ kai mɔ ko o wi nɛ̀ wa gbɛa, ɓɛɛ wa kpa wɔr Saul in o bem kɔ‘i mbɔɗɔnu sɛn zu kaya Gilboa.

⁹Wa kaia mɔɔ-tɛ-a, ba gɔɔzu-a in o boi-biro kɔ̧-a̧, ɓɛɛ wa tom nyɛrɛ-a dam sɛn nú Filistii tɔ̧ nɛnɛ ha̧ o géé-sɔ̧ kɔ-wa in dukbíí kɔ-wa.

¹⁰Wa aa o boi-biro kɔ̧-a̧ kɔ̧ tua ko sɔ̧ kɔ-wa, ɓɛɛ wa mgboi gɔɔzu-a kɔ̧ tua ko Dagɔŋ.

¹¹O bíí Yabɛs nú Galad lɛŋ zia nyɛrɛ mɔ nɛ̀ o be Filistii dee in Saul.

¹²O ŋgaŋa wi-biro lɛŋ kura nɛ́ɛ̀ kai wɔr Saul in o bem kɔ̧-a̧ piinɛ sɛn Yabɛs. Wa guna wɔr-wa ti ɗɔɔ gasa te sɛn Yabɛs, ɓɛɛ wa zim yì tɛ zɛ mɔɔrɔ-ɗoŋ-yiitoo.

¹³Saul fea wen ŋgazu n'aa dee so in GASA WAN; a̧ mbo so zu tɛ wen ko GASA WAN na. A̧ aka so mɔ in sɔ̧-fio,

¹⁴ɓɛɛ a̧ e aka mɔ in GASA WAN duk. Mɛ̀ nɛ́ wen hegɔ sa GASA WAN gbɛ a̧ yinɛ, ɓɛɛ ha̧ wan ha̧ David, bem ko Jɛse.