Read Northwest Gbaya 1 KALATA NYƐRƐ 12 Bible Online

1 KALATA NYƐRƐ 12 - Northwest Gbaya bible

1 KALATA NYƐRƐ 12

¹Ŋgimbi nɛ̀ David yuu so nɛ̀ Saul bem ko Kis si Siklag, o ŋma wi-biro nɛɛ ɗoŋ-aa. Mɔɔ-de-biro kɔ-wa so nɛ̀ góò in birndiŋ; wa iŋa so pi̧i̧ mɔ nyɛmna, kóó nɛ̀ er mɛ wiiko, kóó nɛ̀ gale mbɛt. Nin o wi nɔ‘i nɛ́ mɔɔ nɔ'ɔ. Tɛ zuduk ko Bɛnjamin tɛ mgbák nú-gara ko Saul nɛ́

³Ahiezɛr gasawi zu wa, in o nya-a̧ Yoas bem ko Sɛma be Gibea, sɛka Yɛziɛl in Pɛlɛt o bem ko Azmavɛt, Bɛraka in Yɛhu be Anatot,

⁴Yismaya be Gabaɔŋ, kpɔk mgbara o ŋgaŋa-wi Ɓu-Taar, a̧ nɛ́ ŋma wan kɔ-wa mbɛt,

⁵sɛka Yirmɛya, Yahaziɛl, Yohanaŋ in Yɔzabad be Gedar,

⁶Ɛluzai, Yɛrimɔt, Bɛalya, Sɛmaria in Sɛfatia be Haruf,

⁷Ɛlkana, Isia, Azarɛl, Yɔɛzɛr, Yasobam, o bezaŋ Kore,

⁸ká bá nɛ̀ Yɔɛla in Zabada, o bem ko Yeroam, nɛ̀ yaa so nɛ́ o be Gɛdɔr.

⁹O ŋma bezaŋ Gad nɛ̀ɛ́ ɗoŋ David fara hu̧sa̧-a̧ kɔ̧-a̧ sɛn ŋga-gbárà mɛ mbɛt. Wa yaa nɛ́ o wi-iŋ-mgbara-mɔ nɛ̀ yamba bíí biro; mɔɔ-de-biro kɔ-wa nɛ́ ŋgee in sɛ́ɛ̀; see-wa nɛ́ see dila; ɓɛɛ yì mɛ naŋ-wa kànà nɛ́ kalamba mɛ zu kaya.

¹⁰Gasawi duka nɛ́ Ezɛr; hɔ-ɗoŋ-aa nɛ́ Obadia; taar-a nɛ́ Eliab;

¹¹naar-a nɛ́ Mismana; mɔɔrɔ-a nɛ́ Yirmɛya;

¹²Atai nɛ́ mɔɔrɔ-ɗoŋ-kpɔk-a; mɔɔrɔ-ɗoŋ-yiitoo-aa nɛ́ Eliɛl;

¹³mɔɔrɔ-ɗoŋ-taar-a nɛ́ Yohanaŋ; mɔɔrɔ-ɗoŋ-naar-a nɛ́ Ɛlzabad,

¹⁴ɓu-a nɛ́ Yirmɛya; ɓɛɛ ɓu-zua-kpɔk-a nɛ́ Makbanai.

¹⁵O gasawi ko o wi-biro mgbara o bezaŋ Gad nɛ́ mɔɔ nɔ‘i. Mgbara o wi nɔ‘i, geɗek wi tɛ biro tɛ bi bíí gɔmŋmaa, ɓɛɛ gasa-a, kɔ̧-a̧ kànà nɛ́ bíí booro.

¹⁶Mɛ̀ nɛ́ wa á̧ kuu so Jurdɛn mɛ ɓar tɛ ŋgimbi nɛ̀ yì ha̧a̧ so nɛnɛ, ɓɛɛ ka wa ndak o bíí nɛ̀ ɔɔ so kɔ̧ ɗoŋgɔ nɛ̀ war daŋa-wese in yee-wese.

¹⁷O ŋma bezaŋ Bɛnjamin in Juda nɛ̀ɛ́ ɗoŋ David fara n'aa hu̧si sɛnɛ mbɛt.

¹⁸David gboo pii tɛ wa, ɓɛɛ tɔ̧ ha̧ wa: «Nɛ́ bòò nɛ́ wen ga̧a̧mɔ ɛ̀nɛ̀ tɛ nɛnɛ pii tɛ‘m h’ɛ́nɛ́ mɛ gbak am, mi tɛ kpa desee nyɛmna wen duka-a in'nɛ̀ɛ́; ɓɛɛ k’ɛ̀nɛ̀ nɛ́ tɛɛ wen ɔra'm ha̧ o wisɛn kɔ‘m, ɓɛɛ hee mɔ'ɔ n'am de kɔ‘m mɔ nɛ̀ ŋgai na ga, Sɔ̧ ko o dáà k’ɛɛ a̧ zɔ́k, ɓɛɛ a̧ a̧ dúk nɛ́ wi-kɛ̧-mgbara mɔ‘i!»

¹⁹Ɓɛɛ Ɔmi ko Sɔ̧ de ha̧ Amasai, wi-duk-zu o ŋgaŋa-wi Ɓu-Taar mɛ tɔ̧ wen’ɛ: «Ɛ́ɛ́ nɛ́ k’ɛ́nɛ́ David, ɛ́ɛ́ a̧a̧ in'nɛ̀ɛ́, bem ko Jɛse! Ga̧a̧mɔ a̧ dúk in'nɛ̀ɛ́ in ga̧a̧mɔ a̧ dúk in o wi nɛ̀ gbak'nɛ́! Wen mɛ̀ nɛ́ Sɔ̧ k’ɛ́nɛ́ a̧ gbák'nɛ́!» David kpɛka wa, ɓɛɛ e wa mgbara o gasawi ko o wi-biro kɔ‘i.

²⁰O bezaŋ Manase yee biro ɗoŋ David ŋgimbi n'aa nɛɛ nɛnɛ in o be Filistii mɛ bi Saul. Mɔ kpɔk, David in o bíí kɔ‘i gbak so o be Filistii na, wen nɛ̀ o be-wan Filistii mɔi̧a ŋmaa ba keta, ɓɛɛ wa ndak David sinɛ tɔ̧ nɛnɛ‘e: «A̧ tɛ zik tɛ-a ye ɗoŋ Saul, wan kɔ̧-a̧, mɛ gbɛ nɛ̀ yɛ!»

²¹Ŋgimbi nɛ̀ David yaka nɛnɛ si Siklag, o be Manase nɛ̀ nɛɛ in a̧ nɛ́ mɔɔ nɔ'ɔ: Adna, Yɔzabad, Yɛdiaɛl, Mikaɛl, Yɔzabad, Elihu in Silɛtai; wa nɛ́ o gasa wi-duk-zu bíí booro sɛn nù ko Manase.

²²Mɛ̀ nɛ́ wa a̧ gbaka David in o gíí wi-biro, wen wa yaa so nɛ́ o wi-iŋ-mgbara-mɔ, ɓɛɛ a̧ e wa nɛ́ o gasa wi-ya-zu o wi-biro.

²³Dam ɗoŋ wese lɛŋ, o bíí a̧a̧ tɛ tɛa-a wen gbaka David tɛ biro, ɓɛɛ gbagari kɔ̧-a̧ gasi hee ko Sɔ̧ ga.

²⁴O bíí tɛ zuduk kpɔk kpɔk nɛ̀ wa tɔra, nɛ̀ a̧a̧ nɛ̀ boi wen bíí biro, nɛ̀ nɛ̀ɛ̀ sitɛ David sɛn Hebrɔŋ ha̧ wa mɛ ba wan ko Saul ha̧ ha̧ a̧ nyɛm nɛ̀ ɗoŋ tɔ̧ɔ̧-wen ko GASA WAN nɛ́ mɔ'ɔ:

²⁵O wi-biro tɛ zuduk ko Juda nɛ̀ mɔɔ-de-biro kɔ-wa nɛ́ sɛ́ɛ̀ in ŋgee nɛ́ bíí booro-mɔɔrɔ-ɗoŋ-kpɔk-nɛ-gɔmŋmaa-mɔɔrɔ-ɗoŋ-taar.

²⁶Tɛ zuduk ko Simɛɔŋ, o ŋga wi-biro nɛ́ booro-mɔɔrɔ-ɗoŋ-yiitoo-nɛ-gɔmŋmaa.

²⁷Tɛ zuduk ko Levii nɛ́ bíí booro-naar-nɛ-gɔmŋmaa-mɔɔrɔ-ɗoŋ-kpɔk,

²⁸in Yehoyada wi-duk-zu o bezaŋ Arɔŋ, a̧ in o bíí kɔ̧-a̧ booro-taar-nɛ-gɔmŋmaa-mɔɔrɔ-ɗoŋ-yiitoo,

²⁹bá nɛ̀ Sadɔk, ŋgaŋa be-ŋgaiwi, in o gasawi nutua kɔ̧-a̧ ɓu-yiitoo-zua-yiitoo.

³⁰Tɛ zuduk ko Bɛnjamin, mgbák nú-gara ko Saul nɛ́ bíí booro-taar nɛ̀ yaa so kɔ-wa nɛti pɛm nɛ̀ tua ko Saul.

³¹Tɛ zuduk ko Efraim nɛ́ o ŋga wi-biro booro-ɓu-yiitoo-nɛ-gɔmŋmaa-mɔɔrɔ-ɗoŋ-taar, nɛ̀ nin-wa hura so nyɛmna nutua kɔ-wa.

³²Tɛ reeta zuduk ko Manase nɛ́ bíí booro-ɓu-mɔɔrɔ-ɗoŋ-taar nɛ̀ wa hoka so mɛ tɛ̀ɛ́ de wan ha̧ David.

³³Tɛ zuduk ko Isakar nɛ́ o gasa wi-duk-zu biro gɔmŋmaa-yiitoo bá nɛ̀ o bíí kɔ-wa nɛ̀ iŋa ŋgimbi ha̧ o be Israɛl mɛ de mɔ.

³⁴Tɛ zuduk ko Zabulɔŋ nɛ́ bíí booro-ɓu-mɔɔrɔ nɛ̀ ya zu naŋ nɛ̀ oi boi-biro lɛŋ mɛ bi biro nɛ̀ see kpɔk.

³⁵Tɛ zuduk ko Nɛftalii nɛ́ o gasawi duk-zu-biro booro bá nɛ̀ o wi-biro booro-ɓu-taar-zua-mɔɔrɔ-ɗoŋ-yiitoo nɛ̀ mɔɔ-de-biro kɔ-wa nɛ́ sɛ́ɛ̀ in ŋgee.

³⁶Tɛ zuduk ko Dan nɛ́ bíí booro-ɓu-yiitoo-zua-mɔɔrɔ-ɗoŋ-taar-nɛ-gɔmŋmaa-mɔɔrɔ-ɗoŋ-kpɔk nɛ̀ ya zu naŋ wen biro.

³⁷Tɛ zuduk ko Asɛr nɛ́ bíí booro-ɓu-naar nɛ̀ ya zu naŋ wen yaka biro.

³⁸Tɛ zuduk ko Rubɛn, Gad, in reeta ɓii zuduk ko Manase nɛ̀ war kur Jurdɛn nɛ́ bíí booro-gɔmŋmaa-nɛ-booro-ɓu-yiitoo nɛ̀ oi boi-biro kɔ-wa lɛŋ.

³⁹O wi-biro nɔ‘i nɛ̀ ya zu naŋ wen biro tɛɛ nɛ̀ kpɔk kale see sɛn Hebrɔŋ ha̧ wa mɛ e David nɛ̀ wan zu Israɛl lɛŋ. Oi o be Israɛl tɛɛ kànà nɛ̀ kpɔk see mbɛt mɛ de wan ha̧ David.

⁴⁰Wa dee zɛ taar hi̧i̧ in David nyɔŋ nɛ̀ mɔ, nɔ nɛ̀ mɔ wen o nya-wa ɗafa so mɔ zɛm nɛ̀ wa.

⁴¹O bíí zika-nù‘i hɔ nɛnɛ Isakar, Zabulɔŋ in Nɛftalii kaia so o nyɔŋmɔ tɛnɛ mbɛt nɛ̀ o tuifuu, o ŋgeloba, o sunda in o ndai. Mɔ nɛ̀ wa kaia tɛnɛ nɛ́ fuu, makala, waya mbɔra, o kora waya nyak-dɔ̧ɔ̧, dɔ̧ɔ̧, nɔ̧́, o gasa mɔ-dai in o geɗek-a nɛ̀ dɔka-a wen gasa desee a̧a̧ so sɛn Israɛl.