Read Northwest Gbaya 1 KALATA NYƐRƐ 14 Bible Online

1 KALATA NYƐRƐ 14 - Northwest Gbaya bible

1 KALATA NYƐRƐ 14

¹Ŋma wese, Hiram wannu Tir toma o betom ha̧ David nɛ̀ o te gbatui, o wi-sɛk-ta in o wi-gbɛr-te, ha̧ wa mɛ de tua ha̧ a̧.

²David zɔka'e GASA WAN ee wi nɛ̀ wan zu Israɛl ɓɛɛ de ha̧ zɔnamɔ mɛ duk zu mɔɔ-wan kɔ‘i, wen zu Israɛl dukbíí kɔ̧-a̧.

³David kaia o ŋma mbe kóò woyo sɛn Jerusalɛm, ɓɛɛ a̧ ko o be-wiwii in o be-okoo.

⁴Nin o bem nɔ‘i n'aa koo Jerusalɛm'i nɛ́ mɔɔ nɔ'ɔ: Samua, Sobab, Nataŋ in Salomɔŋ;

⁵Yibar, Elisua in Ɛlpalɛt;

⁶Nɔga, Nɛfɛg in Yafia;

⁷Elisama, Beɛliad in Elifɛlɛt.

⁸Ŋgimbi nɛ̀ o be Filistii zia'e, wa tɛna nɔ̧́ a zu David ha̧ a̧ mɛ ɔ wan zu Israɛl lɛŋ wó, wa kura lɛŋ mɛ nɛ̀ɛ́ bi a̧. Nyɛrɛ mɔ‘i aa zer David, ɓɛɛ a̧ we ti wa nɛnɛ.

⁹O be Filistii hɔa, ɓɛɛ wa pɛsi dam kɔ̧ ɗoŋgɔ Refaim lɛŋ.

¹⁰David aka Sɔ̧ hee mɔ'ɔ ga: «A̧‘m nɛ́ɛ̀ bi o be Filistii, ɓɛɛ ɛnɛ tɛ a wa kɔ̧ er-am nde?» GASA WAN kifa nú ha̧ a̧: «Mɛ̀ nɛ̀, mi tɛ a wa kɔ̧ er-mɛ!»

¹¹David kura yak si Bal-Pɛrasim, ɓɛɛ tik o be Filistii nɛ biro. A̧ gbina biro ti wa, ɓɛɛ a̧ tɔ̧: «Sɔ̧ hu̧i̧a̧ war ha̧‘m mgbara o wisɛn kɔ‘m hee mɔ'ɔ nɛ̀ yì gbin nɛ̀ gba-zu’ɛ ga.» Mɛ̀ nɛ́ wen mɔ‘i a̧ wa saa nɛ̀ nin fara'i «Bal-Pɛrasim».[12]

¹²O be Filistii siŋa o sɔ̧ kɔ‘i a nù fara'i, ɓɛɛ David tɔ̧: «Wi dɔ́ wa dɔɔ!»

¹³Mɛ ɗoŋ, o be Filistii tɛɛ hur kɔ̧ ɗɔŋgɔ Refaim ɓɛɛ ba.

¹⁴David aka Sɔ̧ woyo, ɓɛɛ Sɔ̧ kifi nú ha̧ a̧: «Ká mɛ́ nɛ́ nɛ̀ war sɔnti wa bi nɛ̀ wa na; mɛ̀ háí nɛ̀ ɗoŋ wa nɛ̀ ti te-nyama.

¹⁵Kà mɛ zii giti naŋ bíí fara nɛ̀ nɔ̀ zu te-nyama, mɛ̀ gbó biro wen Sɔ̧ yaka ti ha̧ mɛ mɛ bi o wi-biro ko o be Filistii kaɗi.»

¹⁶David dee hee mɔ'ɔ nɛ̀ Sɔ̧ tɔ̧ɔ̧ ha̧ a̧ ga, ɓɛɛ a̧ kum o be Filistii sɛn Gabaɔŋ hɔ nɛnɛ sɛn Gezɛr.

¹⁷Nin David hura dam fara lɛŋ, ɓɛɛ GASA WAN de ha̧ o tugun bíí lɛŋ mɛ yu a̧.