Read Northwest Gbaya 1 KALATA NYƐRƐ 19 Bible Online

1 KALATA NYƐRƐ 19 - Northwest Gbaya bible

1 KALATA NYƐRƐ 19

¹Ɗoŋ mɔ‘i, Nahas wannu ko o be Amɔŋ fea, ɓɛɛ bem kɔ̧-a̧ ɔ wan oi-aa.

²David tɔ̧a̧: «Mi tɛ de mɔ in Hanun bem ko Nahas nɛ̀ yuwar-a hee mɔ'ɔ nɛ̀ dáà kɔ̧-a̧ dee so nɛnɛ in am ga.» David toma o wi-de-tom kɔ‘i nɛnɛ ha̧ wa mɛ nɛ̀ɛ́ ha̧ ga̧a̧-see ha̧ Hanun oi fio ko dáà kɔ̧-a̧; ɓɛɛ o wi-de-tom ko David nɛ́ɛ̀ hɔ tɛ ye ko o be Amɔŋ tɛ Hanun mɛ ha̧ ga̧a̧-see ha̧ a̧.

³O gasawi ko o be Amɔŋ tɔ̧ɔ̧ ha̧ Hanun: «Ɛnɛ ta k’ɛ́nɛ́‘e David tu̧ nɛ tɛ dáà k’ɛ́nɛ́ wen n'aa toma o bíí tɛnɛ tɛ fio ko dáà k’ɛ́nɛ́'ɛ nde? Bo nɛ wen kpee naŋ ye k’ɛ́nɛ́ mɛ iŋ o fara-pɛm-mɔ k’ɛ́nɛ́, in wen ɗaŋa ye k’ɛ́nɛ́ á̧ à̧ toma nɛ̀ wa tɛnɛ na nde?»

⁴Hanun dee ŋmaa in o wi-de-tom ko David; a̧ kpuia zera kɔ-wa, ɓir laa kɔ-wa hɔ tɛ tua ndaa-wa, ɓɛɛ e wa mɛ si.

⁵Wa tɔ̧ɔ̧ nyɛrɛ mɔ nɛ̀ kpaa wi nɔ‘i ha̧ David, ɓɛɛ a̧ tom ŋma bíí mɛ we ti wa, wen foe gana so zu wa. Wannu toma tɔ̧ ha̧ wa ndé, wa a̧ ɓɔ́n sɛn Jeriko pɛm nɛ̀ ŋgimbi nɛ̀ zera kɔ-wa tɛ hɔ lɛŋ kaɗi sɛka wa yee ye.

⁶O be Amɔŋ zɔka'e, wi dee ɗaŋmɔ ti David, ɓɛɛ Hanun in o be Amɔŋ tom kilo bu-mbɔi booro-ɓu-taar-zua-naar ha̧ o be Aram nɛ̀ ɔ si ger nana-yì yiitoo in o be Aram mɛ Maka in mɛ Sɔba, wen ha̧ wa mɛ kai o keekee-biro kɔ-wa in o wi-daŋ-nyaŋa kɔ-wa tɛnɛ.

⁷Wa yoɓa wannu Maka gú nɛ̀ bíí kɔ̧-a̧ lɛŋ, bá nɛ̀ keekee-biro booro-ɓu-taar-zua-yiitoo, ɓɛɛ wa tɛ́ɛ̀ ba gbagari kɔ-wa ká̧ Madaba; o be Amɔŋ gboo nɛ̀ tɛ o ye kɔ‘i, mɔi̧ nɛ̀ ŋmaa, ɓɛɛ wa hɔ fara-biro.

⁸David zia nyɛrɛ mɔ‘i, ɓɛɛ a̧ tom Jɔab in o ŋgaŋa wi-biro lɛŋ nɛnɛ.

⁹O be Amɔŋ gboa, nɛk naŋ biro sɛn nú garo ye, ɓɛɛ o wannu nɛ̀ tɛ̀ɛ̀ mɛ ye ɗoŋ wa nɛka kɔ-wa nɛ̀ ɗoŋ si zaŋbɛɛ.

¹⁰Jɔab zɔka'e wi tɛ bi biro nɛti in nɛ̀ ɗoŋ mbɛt; a̧ hoka o bíí mgbara o ŋgaŋa wi-biro Israɛl lɛŋ, ɓɛɛ a̧ a wa wen bíí o be Aram.

¹¹A̧ ha̧a̧ o oi wi-biro ha̧ nya-a̧ Absai, ɓɛɛ wa nɛk kɔ-wa tan ti o be Amɔŋ.

¹²Jɔab tɔ̧a̧: «Kà o be Aram nɛ́ ŋgaia gan am, mɛ tɛ tɛ̀ɛ́ gbak am; ɓɛɛ kà o be Amɔŋ nɛ́ ŋgaia gan mɛ, ɓɛɛ mi tɛ nɛ̀ɛ́ gbak mɛ.

¹³Mɛ̀ nɔ́ ŋgiɗi, ɓɛɛ ɛ̀ɛ̀ úsí ŋgai k’ɛɛ wen dukbíí k’ɛɛ in wen o ye ko Sɔ̧ k’ɛɛ. GASA WAN a̧ dé mɔ n'aa kɔ̧a̧.»

¹⁴Jɔab in gii wi-biro kɔ‘i ɗɔla siti wen bíí o be Aram, ɓɛɛ o be Aram yu mɔ ti a̧.

¹⁵Ŋgimbi nɛ̀ o be Amɔŋ zɔka o be Aram yuu mɔ, wa mbɛt, wa yuu mɔ ti Absai, nya Jɔab, ɓɛɛ wa si ɗoŋ si ye kɔ-wa. Jɔab sii kɔ‘i si Jerusalɛm.

¹⁶O be Aram zɔka'e o be Israɛl gana wa nɛ̀ biro, ɓɛɛ wa tom o bíí sa nɛ̀ o be Aram nɛ̀ ɔ nɛ̀ kur nana-yì. Nɛ́ Sofak gasawi ko o wi-biro ko Hadadɛzɛr a̧ duka ti ha̧ wa.

¹⁷Nyɛrɛ mɔ‘i aa zer David. A̧ mɔi̧a o be Israɛl lɛŋ, ku Jurdɛn sitɛ wa, ɓɛɛ nɛk naŋ biro. David yora naŋ biro ti o be Aram, ɓɛɛ wa ba biro dúk nɛ̀ a̧.

¹⁸O be Aram yuu mɔ ti Israɛl yak, ɓɛɛ David gbɛ o wan keekee-biro booro-mɔɔrɔ-ɗoŋ-yiitoo in o géé wi-biro booro-ɓu-naar mgbara wa. A̧ gbɛɛ Sofak gasa wi-biro kɔ-wa mbɛt.

¹⁹O wi-de-tom ko Hadadɛzɛr zɔka'e Israɛl gbina biro ti wi kaɗi, ɓɛɛ wa mbo zu ha̧ David de nɛ̀ tom ha̧ a̧. Ɗoŋ mɔ‘i, o bíí Aram kɔ̧ so mɛ tɛ̀ɛ́ gbak o be Amɔŋ ɓɔna.