Read Northwest Gbaya 2 KALATA NYƐRƐ 15 Bible Online

2 KALATA NYƐRƐ 15 - Northwest Gbaya bible

2 KALATA NYƐRƐ 15

¹Azaria bem ko Odɛd nɛ̀ Ɔmi ko Sɔ̧ duka zu a̧

²gboo yor ti Asa, ɓɛɛ tɔ̧ ha̧ a̧: «Wannu Asa in o be Juda gú nɛ̀ o be Bɛnjamin, ɛ̀nɛ̀ zíí wen kɔ‘m! GASA WAN a̧a̧ in'nɛ̀ɛ́ ŋgimbi nɛ̀ ɛ́nɛ́ a̧a̧ in a̧. K’ɛ̀nɛ̀ kii a̧, a̧ tɛ e h’ɛ́nɛ́ mɛ kpa a̧, ɓɛɛ k’ɛ̀nɛ̀ e a̧ duk, a̧ tɛ e'nɛ́ duk mbɛt.

³Ŋgimbi yaka nɛ̀ dɔka-a Israɛl bo nɛ̀ kpasa Sɔ̧ na; kpasa wi-ɗafi-sɔ̧ mɛ usi mɔ ha̧ wa bo na, Heembea bo na mbɛt.

⁴Hegɔ, sɛn tɛ ŋga bɔnɛ kɔ-wa, wa pia ɗoŋ pii tɛ GASA WAN Sɔ̧ ko Israɛl. Wa kia a̧ woyo, ɓɛɛ a̧ e ha̧ wa mɛ kpa a̧.

⁵Sɛn tɛ ŋgimbi'i, ga̧a̧mɔ bo so kà‘i yar nɛnɛ na, wen o foomɔ a̧a̧ sɛnɛ nɛ̀ pi̧i̧ kíì tɛ o bíí.

⁶O zuduk bíí in o ye bi so nɛ́ o ŋmaa wen Sɔ̧ pi̧i̧ so o ŋgamɔ nɛtɛ nɛtɛ zu wa.

⁷Ɓɛɛ k’ɛ́nɛ́, kinii ɛ̀nɛ̀ nɔ́ ŋgiɗi, k’ɛ́nɛ́ mbɔi na, wen ɛ́nɛ́ tɛ kpa mɔɔ-oi-tom k’ɛ́nɛ́.»

⁸Ŋgimbi nɛ̀ Asa zia wen ko wi-tɔ̧-wen oi nú Sɔ̧ Azaria bem ko Odɛd, a kpaa ŋgai; hegɔ a̧ ɗaŋa o géé-sɔ̧ yinɛ sɛn zu nù Juda in nú Bɛnjamin gú nɛ̀ o wan nɛ̀ a̧a̧ tɛ o ye nɛ̀ wa baa so zu kaya Efraim. A̧ ɗafa fara-ɗafi GASA WAN nɛ̀ duk ti zala Tua ko GASA WAN.

⁹Asa mɔi̧a o be Juda in o be Bɛnjamin, o be Efraim, o be Manase in o be Simɛɔŋ wen o dɔka be Israɛl pia so ye zu a̧, ŋgimbi nɛ̀ wa zɔka ndé, GASA WAN Sɔ̧ a̧a̧ in a̧.

¹⁰Wa mɔi̧a ŋmaa tɛ taar fio-zɛ, tɛ ɓu-zua-mɔɔrɔ pɛ ɔɔ-wan ko Asa sɛn Jerusalɛm.

¹¹Wa ɗafa sɔ̧ ha̧ GASA WAN wese'i nɛ̀ mɔɔ-oi-biro nɛ̀ wa kaia so piinɛ: o ndai gɔmŋmaa-mɔɔrɔ-ɗoŋ-yiitoo in o sami booro-mɔɔrɔ-ɗoŋ-yiitoo.

¹²Wa yora zu nɔɔ-tɔk, kii nɛ̀ GASA WAN Sɔ̧ ko o dáà kɔ-wa nɛ̀ see-wa in kiitɛ-wa lɛŋ.

¹³Ɓɛɛ kóó o ndé nɛ̀ kii GASA WAN Sɔ̧ ko Israɛl na, wa tɛ gbɛ a̧; kóó obem, kóó nɛ́ gasawi, kóó nɛ́ wiwii, kóó nɛ́ okoo.

¹⁴Wa kàná mɔ ti GASA WAN nɛ̀ hee ger, hiɗi nɛ̀ mɔ, dɔm nɛ̀ mbia in zak.

¹⁵Ɓɛɛ o be Juda lɛŋ kpa desee tɛ kanamɔ‘i. Hee mɔ'ɔ nɛ̀ wa kàná mɔ‘i nɛ̀ see-wa lɛŋ nɛ̀ desee wen kia GASA WAN ga, GASA WAN ee ha̧ wa mɛ kpa a̧, ɓɛɛ a̧ ha̧ ga̧a̧mɔ ha̧ wa sɛn tɛ gbisi-nù kɔ-wa lɛŋ.

¹⁶Wannu Asa foo nàà kɔ‘i Maka tɛ tom nàá-wannu yinɛ, wen a̧ ɗafa so ŋma géé-sɔ̧ nɛ̀ nin-a nɛ́ Asɛra. Asa ɗaŋa géé-sɔ̧‘i yinɛ gbin nduku-nduku a nù, ɓɛɛ a̧ kai nɛɛ dɔ sɛn kɔ̧ ɗɔŋgɔ Sɛdrɔŋ.

¹⁷Zu-a'i, fara-ɗafi géé-sɔ̧ kaɗi mgbara o be Israɛl na. Asa ee see tɛ Sɔ̧ hegɔ hɔ wese fio kɔ̧-a̧.

¹⁸A̧ kaia o bu-mbɔi in lɔr gú nɛ̀ o mɔ nɛtɛ nɛtɛ nɛ̀ dáà kɔ̧-a̧ ee so in war kɔ̧-a̧ nɛ̀ tɛ-a tɛnɛ sɛn kɔ̧ Tua ko Sɔ̧.

¹⁹Asa ɔɔ wan tɛ pɛ ɓu-taar-zua-mɔɔrɔ, biro bo na.