Read Northwest Gbaya 2 KALATA NYƐRƐ 23 Bible Online

2 KALATA NYƐRƐ 23 - Northwest Gbaya bible

2 KALATA NYƐRƐ 23

¹Tɛ mɔɔrɔ-ɗoŋ-yiitoo pɛ, wi-ɗafi-sɔ̧ Yoyada kaia o gasawi zu o wi-biro gɔmŋmaa: mɛ̀ nɛ́ Azaria bem ko Yeroam, Ismaɛl bem ko Yohanaŋ, Azaria bem ko Obɛd, Masɛya bem ko Adaya, Elisafat bem ko Zikri wen ha̧ wa mɛ nɔ tɔk in a̧.

²Wa yara dam nù Juda, mɔi̧ nɛ̀ o be Levii tɛ o geɗek ye nù Juda lɛŋ in o gasawi nú-gara Israɛl, ɓɛɛ wa pii ɗoŋ sɛn Jerusalɛm.

³O bíí nɛ̀ mɔi̧a'i ee nú in wannu sɛn kɔ̧ Tua ko Sɔ̧, ɓɛɛ Yoyada tɔ̧ ha̧ wa: «Zɔ́k bem ko wannu hɛ̧ɛ̧; ɔ dee ha̧ a̧ mɛ ɔ wan nyɛm nɛ̀ ɗoŋ mɔ nɛ̀ GASA WAN baa tɔ̧ so zu o bezaŋ David.

⁴Mɔ n’ɛnɛ tɛ de nɛ́ mɔ'ɔ: o ŋma mgbara'nɛ́, o wi-ɗafi-sɔ̧ in o be Levii nɛ̀ de tom tɛ wese-ɔm-tɛ, ɛnɛ tɛ ya k’ɛ́nɛ́ nɛ́ o wi-pɛm-nú tua.

⁵O ŋma tɛ ya kɔ‘i wen pɛma tua ko wannu, ɓɛɛ sɛka oi bíí pɛma kɔ-wa mɔ si nú tua nɛ‘i sa'e Naŋ-tua; dukbíí nɛ̀ oi-aa lɛŋ tɛ ya kɔ‘i nú zala Tua ko GASA WAN.

⁶Ŋma bíí beka ye Tua ko GASA WAN na; mɛ̀ nɛ́ o wi-ɗafi-sɔ̧ in o be Levii nɛ̀ a̧a̧ tɛ tom a̧ tɛ ye Tua ɓɛɛ. Wa nyɛma mɛ ye kɔ-wa Tua, wen wi ee tom er wa, ɓɛɛ o géé bíí lɛŋ tɛ ya nɛ́ o wi-pɛm-mɔ ko GASA WAN.

⁷O be Levii tɛ mɔi̧ zik wannu, kóó o ndé nɛ̀ boi-biro er. Kóó o ndé nɛ̀ tɛ ye Tua, wi tɛ gbɛ a̧; ɛ̀nɛ̀ dúk in wannu fara n'aa tɛ́ nɛ̀ lɛŋ.»

⁸O be Levii in o be Juda lɛŋ dee hee mɔ'ɔ nɛ̀ wi-ɗafi-sɔ̧ Yoyada baa tɔ̧ so ga. Kóó o ndé kaia bíí kɔ‘i, o wan nɛ̀ ku̧u̧ naŋ tom wese-ɔm-tɛ sɛka o wan nɛ̀ gbo kɔ‘i gboo, wen Yoyada e ŋma wi-de-tom kpɔk duk na.

⁹A̧ ha̧a̧ so sɛ́ɛ̀ in o ŋgee ko wannu David nɛtɛ nɛtɛ nɛ̀ yaa so sɛn kɔ̧ Tua ko GASA WAN ha̧ o wi-duk-zu o wi-biro gɔmŋmaa.

¹⁰A̧ nɛka o géé bíí, kóó o ndé nɛ̀ sɛ́ɛ̀ er, ku̧u̧naŋ-a nɛ̀ ká̧ Tua ko GASA WAN nɛ̀ war wiiko hɔ nɛnɛ ɓii ká̧-a̧ nɛ̀ war gale, in si ká̧ fara-ɗafi-sɔ̧ wen zika wannu e see-a.

¹¹Wa foo bem ko wannu gbonɛ, wa guu laasɔ̧i̧-wan zu a̧, a o mɔɔ-sedaako-wan tɛ-a, ɓɛɛ wa de wan ha̧ a̧. Yoyada in o bem kɔ‘i tɛna nɔ̧́ a zu a̧, ɓɛɛ wa ha̧ er ha̧ a̧ tɔ̧ nɛnɛ‘e: «Wannu kànà nɛ́ ɛ́nɛ́ ɓɛɛ!»

¹²Atalii zia giti maa yì nɛ̀ o bíí ma ha̧ nɛ̀ er ha̧ wannu; a̧ gɔma nɛ́ɛ̀ kpa dukbíí sɛn kɔ̧ Tua ko GASA WAN.

¹³Kà a̧ zɔk wó, wannu nɛ́ mɔ'ɔ nɛ̀ duk zu mɔ nɛ̀ kusa-a ká̧ mbiŋ ká̧ nú Tua mɛ‘i’ɛ; o gasawi in o wi-dɔm-mbia a̧a̧ so katɛ a̧. O bíí lɛŋ de so nɛ́ tortɛ nɛ̀ desee; o mbia a̧ dɔm'i, o wi-mbɛr-mɔ a̧ mbɛr kɔ‘i mɔ bíí nɛ̀ gima, gai nɛ̀ mɔ mbɛt'i. Atalii a̧ka̧ laa tɛ, ɓɛɛ hiɗi mɔ: «Wa ɗɔa'm! Wa ɗɔa'm!»

¹⁴Wi-ɗafi-sɔ̧ Yoyada foo o wi-duk-zu o wi-biro gɔmŋmaa gbonɛ, tɔ̧ nɛnɛ ha̧ wa: «Ɛ̀nɛ̀ fó kóò'ɛ gbonɛ hɛ̧ɛ̧! Ɓɛɛ wi nɛ̀ tɛ ndak ɗoŋ-aa tɛ fe fio gba-paa!» Wi-ɗafi-sɔ̧ tɔ̧ɔ̧ hego wen a̧ baa tɔ̧ so'e, «K’ɛ́nɛ́ gbɛ a̧ kɔ̧ Tua ko GASA WAN na.»

¹⁵Wa baa Atalii nɛnɛ sitɛ tua ko wannu, tɛ nú tua nɛ̀‘i sa'e nú tua ko o Nyaŋa, ɓɛɛ wa gbɛ a̧ hi̧i̧.

¹⁶Yoyada nɔɔ tɔk in dukbíí nɛ̀ oi-aa lɛŋ, bá nɛ̀ wannu mbɛt, wen ha̧ wa mɛ duk nɛ́ dukbíí ko GASA WAN.

¹⁷Wa lɛŋ nɛɛ sitɛ tua-ɗafi Bal; wa gbina tua'i a nù, gú nɛ̀ o fara-ɗafi-sɔ̧ sɛn nú zala mbɛt lɛŋ, ɓɛɛ wa gbɛ Mataŋ wi-ɗafi-sɔ̧ Bal ti fara-ɗafi-sɔ̧.

¹⁸Yoyada ee tom-pɛma Tua ko GASA WAN er o wi-ɗafi-sɔ̧, o be Levii. David kɛ̧ɛ̧ so wa kɛ̧ɛ̧ a zu tom sɛn kɔ̧ Tua ko GASA WAN nyɛm nɛ̀ ɗoŋ mɔ nɛ̀ yɔra so sɛn zaŋ Heembea ko Moisɛ, wen dɔɔ kpoo-sɔ̧ ha̧ GASA WAN nɛ̀ desee in nɛ̀ gima nyɛm nɛ̀ ɗoŋ mɔ nɛ̀ David usa so.

¹⁹A̧ ee so o wi-pɛm-nú-tua sɛn nú Tua ko GASA WAN wen ká ŋma ndiŋmɔ tɛɛ ye Tua'i.

²⁰Yoyada kaia o wi-duk-zu o wi-biro gɔmŋmaa, o gasawi saaye, o wi nɛ̀ a̧a̧ zu dukbíí in o bíí lɛŋ. A̧ foo wannu Jɔas gbonɛ nɛ̀ kɔ̧ Tua ko GASA WAN, wa yee tua-wan nɛ̀ fara nɛ̀‘i sa'e Nú tua mɛ ŋgɔn, ɓɛɛ wa e a̧ sɛn zu damti.

²¹Bíí lɛŋ duka nɛ desee, ɓɛɛ saaye duk tɛ ga̧a̧mɔ. War ko Atalii, wa gbɛɛ so a̧ nɛ̀ gba-paa kaɗi.