Read Northwest Gbaya 2 KALATA NYƐRƐ 25 Bible Online

2 KALATA NYƐRƐ 25 - Northwest Gbaya bible

2 KALATA NYƐRƐ 25

¹Amasia yee wan ŋgimbi n'aa a̧a̧ so nɛ̀ pɛ ɓu-yiitoo ɓɛɛ a̧ ɔ wan sɛn Jerusalɛm pɛ ɓu-yiitoo-zua-mɔɔrɔ-ɗoŋ-naar. Nin nàà kɔ̧-a̧ so nɛ́ Yoadan zɔŋa Jerusalɛm.

²A̧ dee mɔ nɛ̀ yuwar-a ti GASA WAN, ɓɛɛ bo nɛ́ nɛ̀ see-aa lɛŋ na.

³Ŋgimbi nɛ̀ wan nɔɔ er-a nɛ̀ de-a kaɗi, a̧ gbɛɛ o wi-de-tom kɔ̧-a̧, o wan nɛ̀ gbɛɛ so dáà kɔ̧-a̧ wannu Jɔas.

⁴Mɔ kpɔk, a̧ gbɛ o bem kɔ-wa na, nyɛm nɛ̀ ɗoŋ mɔ nɛ̀ yɔra so zaŋ kalata Heembea ko Moisɛ, wen GASA WAN tɔ̧ɔ̧ so'e ndé: «Dáà beka fe oi nú bem na, in bem beka fe oi nú dáà na mbɛt, ɓɛɛ kóó o ndé tɛ fe nɛ́ fio ɗaŋmɔ kɔ‘i.»

⁵Amasia mɔi̧a bíí tɛ nù kɔ‘i, ɓɛɛ a̧ e o wan nyɛm nɛ̀ ɗoŋ pɛ́r-nam zu o bíí booro in bíí gɔmŋmaa, zaŋnu Juda in nú Bɛnjamin lɛŋ. A̧ tɔra o wi nɛ̀ a̧a̧ nɛ̀ pɛ ɓu-yiitoo in o wan nɛ̀ gana lɛŋ: wa kpaa o bíí booro-gɔmŋmaa-taar nɛ̀ iŋa bíí biro nɛ sɛɛ in ŋgee.

⁶Ɓɛɛ a̧ yoɓi kilo sede booro-taar, kai nɛ o ŋga wi-biro booro-gɔmŋmaa sɛn Israɛl mbɛt.

⁷Ŋma wi-tɔ̧-wen oi nú Sɔ̧ tɛ̀ɛ̀ tɔ̧ ha̧ a̧: «Wannu, k’ɛ́nɛ́ e ha̧ o wi-biro Israɛl mɛ nɛ̀ in'nɛ̀ɛ́ na, wen GASA WAN yor ɗoŋ o be si ká̧-zan-mɛ́-ŋgɔn na!

⁸Wen kà wa nɛ in'nɛ̀ɛ́, kóó ɛnɛ ŋgaia so tɛ biro hee ge, Sɔ̧ tɛ fo'nɛ́ pi̧ er o wisɛn k’ɛ́nɛ́, wen mɛ̀ nɛ́ Sɔ̧ kpɔk ɓɛɛ a̧ de ha'i mɛ gbin biro, kóó ha̧ biro mɛ ba wi.»

⁹Amasia aka wi-tɔ̧-wen oi nú Sɔ̧‘i hee mɔ'ɔ ga: «Ɓɛɛ mi tɛ de hee ge nɛ̀ zɔm kɔya sede n'am ha̧a̧ ha̧ gíí wi-biro nɔ'ɔ ge?» Wi-tɔ̧-wen oi nú Sɔ̧ kifa nú: «GASA WAN a̧a̧ nɛ̀ yuwar mɛ ha̧ mbe-a ha̧ mɛ gan woyo.»

¹⁰Hegɔ Amasia foo o wi-biro nɛ̀ tɛ̀ɛ́ nɛ̀ ká̧-zan-mɛ́-ŋgɔn sinɛ ɗoŋ sɛn nù kɔ-wa. O wi nɔ‘i kura si ɗoŋ ye kɔ‘i nɛ̀ zɔm nyimsea kɔ̧ see-wa zu nù Juda.

¹¹Ŋgimbi nɛ̀ Amasia kpaa ŋgai nɛ̀ de-a kaɗi, a̧ kaia o gíí wi-biro kɔ̧-a̧ si kɔ̧ ɗɔŋgɔ Tɔŋ, ɓɛɛ a̧ bi o wi Sɛir, gbɛ wa tɛ bíí booro-ɓu.

¹²O be Levii nù Juda kaia bíí booro-ɓu nɛ̀ kpasa, ɓɛɛ kai wi nɔ‘i si zu kaya; wa ira wa nɛ̀ zu kaya ŋgɔn mɛ a nù, ɓɛɛ o wi nɔ‘i gbin kɛsɛ-kɛsɛ.

¹³O wi-biro nɛ̀ Amasia dora so ká nɛ́ biro in wi'i na tika zu o ye Juda, ku̧u̧naŋ-a nɛ̀ Samarii hɔ nɛnɛ Bɛt-Hɔrɔŋ; wa gbɛɛ bíí booro-taar, ɓɛɛ wa kai mɔɔ-oi-biro nɛ̀ dɔka-a.

¹⁴Ŋgimbi nɛ̀ Amasia pia ɗoŋ nɛ̀ tɛ bíí o be Edɔm, a̧ kaia o géé-sɔ̧ ko o be Sɛir piinɛ, ɓɛɛ a̧ ɗafi nɛ̀ sɔ̧ kɔ̧-a̧; a̧ gasa wa, ɓɛɛ a̧ dɔ fuu-nyama ha̧ wa mbɛt.

¹⁵Tɛ mɔ‘i, see GASA WAN kura zu a̧, ɓɛɛ tom ŋma wi-tɔ̧-wen oi nú-wi mɛ tɔ̧ ha̧ a̧: «Mɛ gasi o sɔ̧ nɛ̀ nyɛm so mɛ gbo o bíí kɔ-wa er mɛ na wen ge?»

¹⁶A̧ tɛ kaɗi tɔ̧ɔ̧-wen'i hɔ̧ɔ̧ na, ɓɛɛ Amasia gɔn wen nú-a tɔ̧ nɛnɛ: «Nɛ́ o a̧ ee mɛ nɛ wi-tɔ̧-mbɔrɔ ha̧ wannu o? Kà mɛ nɛ́ kɔ̧ɔ̧ ha'i mɛ de ɗaŋmɔ in mɛɛ na, mɛ̀ kpé nú mɛ tɛ wen'i!» Wi-tɔ̧-wen oi nú Sɔ̧ gɔna wen kɔ‘i, ɓɛɛ tɔ̧: «Mi iŋa'e, Sɔ̧ kɔ̧ɔ̧ mɛ gbɛ mɛ, wen nɛ̀ mɛ bɛ̧ɛ̧ zia wen kɔ‘m, ɓɛɛ mɛ de mɔ hegɔ!»

¹⁷Amasia zia nɛ́ o ŋma mbɔrɔ, ɓɛɛ tom mɔ si zu Jɔas wannu Israɛl, bem ko Jɔakas bezaŋ Jɛhu hee mɔ'ɔ ga: «Mɛ̀ tɛ́, ɛ̀ɛ̀ bí ŋmaa.»

¹⁸Jɔas wannu Israɛl kifa nú ɓɛɛ tom si zu Amasia, wannu Juda mbɛt hegɔ: «Tɛn-ga̧a̧ Libaŋ toma ha̧ gbatui Libaŋ‘e: ‹Mɛ̀ há̧ boko-bem kɔ-mɛ nɛ̀ kóò ha̧ bem kɔ‘m!› Ɓɛɛ ŋma saɗi zaŋbɛɛ nɛ̀ a̧a̧ Libaŋ ɓir yak hi̧i̧, i̧si̧ tɛn-ga̧a̧‘i e nù.

¹⁹Mɛ‘e ndé, wi gana o be Edɔm, ɓɛɛ mɛ ŋmaŋ nɛ tɛ-mɛ zɔn nɛ̀ tɛ-mɛ. Mɔ kpɔk, gana so mɛ̀ dúk tɛ kɔ-mɛ! Wen ge mɛ kɔ̧ɔ̧ mɛ ye gee tum biro ha̧ mɛ mɛ fe in o be Juda lɛŋ ge?»

²⁰Amasia zii wen kɔ̧-a̧ na, wen mɔ‘i tɛ nɛ̀ tɛ Sɔ̧ nɛ̀ kɔ̧ɔ̧ so mɛ fo a̧ in o wi-biro kɔ̧-a̧ pi̧ er wi nɔ‘i, wen zu gasa o géé-sɔ̧ ko o be Edɔm nɛ̀ wa gasa.

²¹Jɔas wannu Israɛl daŋa, ɓɛɛ o wi-biro kɔ̧-a̧ in ko Amasia ba biro dúk nɛ̀ ŋmaa sɛn Bɛt-Sɛmɛs nù Juda.

²²Wa bìí ŋmaa ɓɛɛ o wi-biro ko Jɔas wannu Israɛl gbin biro ti o wi-biro ko Juda. Hegɔ o wi-biro Juda pɛsa, kóó o ndé ma yi si tɛ kɔ‘i.

²³Jɔas wannu Israɛl baa Amasia wannu Juda, bem ko Jɔas, be-koo Ahazia nɛ̀ bara-biro sɛn hi̧i̧, ɓɛɛ a̧ ba a̧ pii ɗoŋ sɛn Jerusalɛm. A̧ tɛɛ gbin garo ye Jerusalɛm a nù, nyɛi̧a ɗoŋ-aa nɛ́ mɛtrɛ gɔmŋmaa-yiitoo, ku̧u̧naŋ-a nɛ̀ nú garo ko Efraim hɔ nɛnɛ nú garo mɛ mgbii-aa.

²⁴A̧ kaia lɔr in o bu-mbɔi ká bá nɛ̀ o mɔ nɛ̀ yaa so sɛn kɔ̧ Tua ko Sɔ̧ nɛ̀ Obɛd-Edɔm duka so pɛm, o mbɔi-tua ko wannu in o ŋma bíí, ɓɛɛ a̧ si sɛn Samarii.

²⁵Amasia bem ko Jɔas wannu Juda duka zaŋnu pɛ ɓu-zua-mɔɔrɔ woyo ɗoŋ fio ko Jɔas bem ko Jɔakas, wannu Israɛl.

²⁶Oi o tom ko Amasia tɛ ku̧u̧naŋ-a hɔ sɔŋkur-aa yɔra zaŋ Kalata ko o wannu Juda in Israɛl.

²⁷Ku̧u̧naŋ-a nɛ̀ ŋgimbi nɛ̀ Amasia ee nɛ̀ nɛ́ɛ́ ɗoŋ GASA WAN duk, wa baa ɗaŋ keta zu a̧ sɛn Jerusalɛm, ɓɛɛ a̧ yu mɔ yak si Lakis. Wa toma o bíí ndak ɗoŋ-aa si Lakis, ɓɛɛ wa gbɛ a̧ hi̧i̧.

²⁸Wa baa wɔr-aa nɛ̀ keekee-nyaŋa nɛ́ɛ̀ gun in o dáà kɔ̧-a̧ sɛn tɛ ŋma ye nù Juda.