Read Northwest Gbaya 2 KALATA NYƐRƐ 3 Bible Online

2 KALATA NYƐRƐ 3 - Northwest Gbaya bible

2 KALATA NYƐRƐ 3

¹Salomɔŋ ku̧u̧ naŋ mboo Tua ko GASA WAN sɛn Jerusalɛm, zu kaya Mɔriya, fara nɛ̀ GASA WAN usa so tɛ sɛnɛ ha̧ dáà kɔ̧-a̧ David sɛn fara nɛ̀ David ɗafa so, sɛn fara-gusi-alkamaari ko Ornaŋ be Jebus.

²Mɛ̀ nɛ́ tɛ yiitoo fio-zɛ, tɛ naar pɛ-wan kɔ̧-a̧, á̧ Salomɔŋ ku̧u̧ nɛ̀ naŋ mboo Tua'i.

³Naŋ Tua ko GASA WAN nɛ̀ Salomɔŋ yɔra wen mboa-a nɛ́ mɔ'ɔ: zi̧a̧-a̧ nɛ́ mɛtrɛ ɓu-taar; pɛsa-a nɛ́ mɛtrɛ ɓu.

⁴Zi̧a̧ zala nyɛma ŋmaa in pɛsa tua, nɛ́ mɛtrɛ ɓu mbɛt, ɓɛɛ kusa-a nɛ́ mɛtrɛ ɓu-mɔɔrɔ-ɗoŋ-kpɔk;[4] a̧ yɔka kɔ̧ a̧ nɛ̀ sa̧a̧ lɔr.

⁵A̧ aa gbáá zawaya kɔ̧ gasa bɛr-tua, ɓɛɛ a̧ yɔk ɗoŋ-aa nɛ̀ sa̧a̧ lɔr; a̧ gɔna dap wa̧a̧ ndɛŋgɛ, in zika-mɔ kirkiti sɛnɛ mbɛt.

⁶A̧ ɗafa gasa bɛr-tua'i nɛ̀ o de ta nɛ̀ gɛnɛ-a ɔ ŋgaya. Lɔr nɛ̀ wa dee nɛnɛ nɛ́ lɔr wan mɛ Parwaim.

⁷A̧ yɔka o kpaakpee, o te-ka̧-nú Tua, o ŋgeŋ gɔna-bɛr-tua, in o kpar-nú bɛr-tua'i nɛ̀ lɔr, ɓɛɛ a̧ gɔn dap keribim zaŋ ŋgeŋ mbɛt.

⁸A̧ ɗafa ŋma bɛr-tua mɛ duk nɛ́ fara nɛ̀ ɔ sa̧a̧ nyɛmna. Dura-a in pɛsa-a nyɛma ŋmaa tɛ mɛtrɛ ɓu nyɛm nɛ̀ pɛsa Tua. A̧ yɔka kɔ̧ a̧ nɛ̀ de lɔr tɛ kilo booro-ɓu-yiitoo.

⁹O pɔndi mgboia-a yaa so kànà nɛ́ lɔr mbɛt, ɓɛɛ dita-wa hee reeta kilo ga. A̧ sɔ̧ɔ̧ kɔ̧ o gɔna-bɛr-tua mɛ́ ŋgɔn[5] nɛ̀ lɔr mbɛt.

¹⁰A̧ nɔi̧a boi dui nɛ̀ keribim yiitoo a kɔ̧ fara nɛ̀ ɔ sa̧a̧ nyɛmna, ɓɛɛ a̧ yɔk ɗoŋ-wa nɛ̀ lɔr.

¹¹Dura wɔr-ɓaa o keribim nɔ‘i lɛŋ nɛ́ mɛtrɛ ɓu; wɔr-ɓaa kuti keribim nɛ̀ dura-a nɛ́ mɛtrɛ yiitoo nɛ reeta tam nɛ́ gɔna-bɛr-tua, ɓɛɛ ɓii wɔr-ɓaa-a nɛ̀ dura-a nɛ́ mɛtrɛ yiitoo nɛ reeta mbɛt tam nɛ́ ŋma wɔr-ɓaa yiitoo keribim.

¹²Ŋma wɔr-ɓaa yiitoo keribim nɛ̀ dura-a nɛ́ mɛtrɛ yiitoo nɛ reeta hɔŋ nɛ́ gɔna-bɛr-tua, ɓɛɛ ɓii wɔr-ɓaa nɛ̀ dura-a nɛ́ mɛtrɛ yiitoo nɛ reeta mbɛt ndɔɔ ŋmaa in wɔr-ɓaa kuti keribim.

¹³Dura wɔr-ɓaa o keribim nɔ‘i lɛŋ nɛ́ mɛtrɛ ɓu; wa yor nɛ́ ŋgɔn, ɓɛɛ yí-wa zɔk nɛ mɔ'ɔ pii nú Tua.

¹⁴A̧ dee babir-laa nɛ̀ gbɛ̧ zɔ̧-laa, gbɛ̧-a̧ zóŋ-zóŋ, tu̧ zɔ̧-laa in yɛ́m-yɛ́m zɔ̧-laa, ɓɛɛ a̧ tok o keribim sɛnɛ.

¹⁵A̧ dee mbiŋ yiitoo e nú Tua: kusa-wa kpɔk kpɔk nɛ́ mɛtrɛ ɓu-zua-mɔɔrɔ-ɗoŋ-yiitoo, ɓɛɛ o gan-ndui nɛ̀ ya zu wa nɛ́ mɛtrɛ yiitoo nɛ reeta.

¹⁶A̧ fana o kirkiti-mɔ a kɔ̧ fara nɛ̀ ɔ sa̧a̧ nyɛmna,[6] ɓɛɛ a̧ a wa zu o mbiŋ; a̧ nɔi̧a o ŋma mɔ hee waya kóɓò[7] ga ɓɛɛ a̧ a wa zu o fana mɔɔ nɔ‘i.

¹⁷A̧ kaia o mbiŋ a ŋgɔn nú Tua: kpɔk nɛ̀ war wiiko, ɓii-aa nɛ̀ war gale; a̧ saa nin wan mɛ wiiko'e, Yakim, ɓɛɛ nin wan mɛ gale nɛ́ Boaz.