Read Northwest Gbaya ƐSDRAS 5 Bible Online

ƐSDRAS 5 - Northwest Gbaya bible

ƐSDRAS 5

¹O wi-tɔ̧-wen oi nú Sɔ̧ Agee in Zakarii bem ko Ido tɔ̧ɔ̧ wen zu o be Juif nɛ a̧a̧ sɛn Juda in sɛn Jerusalɛm nɛ nin Sɔ̧ ko Israɛl nɛ duka nɛ Sɔ̧ kɔ-wa.

²Hegɔ, Zorobabɛl bem ko Saltiɛl in Josue bem ko Yosadak kura ŋgɔn, ɓɛɛ ku̧ naŋ dee tom Tua ko Sɔ̧ sɛn Jerusalɛm woyo. O wi-tɔ̧-wen oi nú Sɔ̧ yaa in wa gbak nɛ wa.

³Ŋgimbi'i, Tatenai wi-duk-zu zika-nù kur Efrat nɛ war yee-wese in Sɛtar-Boznai ká bá nɛ̀ o gbama wi-de-tom in wa nɛ̀ɛ́ kpa wa, ɓɛɛ ak mɔ: «Nɛ́ o'o ha̧a̧ nú h’ɛ́nɛ́ mɛ de Tua’ɛ o? Nɛ́ o'o tɔ̧ɔ̧ ɛ̀nɛ̀ gba te ɗafi nɛ ŋgeŋ o?

⁴Ɛ̀nɛ̀ sá nin o wi nɛ̀ mbo mɔ'ɔ!»

⁵Sɔ̧ a̧a̧ so in o gasawi ko o be Juif, ɓɛɛ o wi nɔ‘i dor wa tɛ dee tom na, pɛm nɛ mɔ ha̧ kifa-nú tɛ kalata nɛ wa toma nɛnɛ ha̧ Darius mɛ pii ɗoŋ sɛ.

⁶Kalata nɛ Tatenai wi-duk-zu zika-nù kur Efrat nɛ war yee-wese in Sɛtar-Boznai, ká bá nɛ̀ o gbama wi-de-tom in wa, o gasawi kur Efrat nɛ war yee-wese toma ha̧ wannu Darius nɛ mɔ'ɔ:

⁷«Wannu Darius, ga̧a̧mɔ a̧ dúk in'nɛ̀ɛ́!

⁸Ɛɛ kɔ̧ɔ̧ mɛ mbaŋ tɛ wannu ndé, ɛɛ nɛ̀ɛ́ Juda sitɛ Tua ko gasa Sɔ̧; wa de nɛ tom-aa sɛk nɛ gasa ta, gba nɛ te ɗafi nɛ ŋgeŋ. Wa de nɛ tom-aa nɛ yuwar-a, ɓɛɛ tom-aa'i nɛ́ nɔ̀ nyɛmna.

⁹«Ɛɛ aka o gasawi kɔ-wa nde: ‹Nɛ́ o'o tɔ̧ɔ̧ ha̧ wa mɛ mbo Tua'i o? Nɛ́ o'o tɔ̧ɔ̧ wa a̧ gba te ɗafi nɛ ŋgeŋ o?›

¹⁰Ɛɛ aka nin-wa h’ɛ́ɛ́ mɛ tɔ̧ h’ɛ́nɛ́, h’ɛ́ɛ́ mɛ yɔr nin o wi nɛ duk zu wa tɛ tom'i.

¹¹«Wa kifa nú h’ɛ́ɛ́ hee mɔ'ɔ ga: ‹Ɛ́ɛ́ nɛ́ o wi-de-tom ko Sɔ̧ mɛ yiwese in nù. Ŋma gasa wannu Israɛl mboo so Tua’ɛ nɛti ɓeemɛ, s’ɛɛ ku̧ k’ɛɛ nɛ́ naŋ mboa-a woyo.

¹²Ɓɛɛ hee mɔ'ɔ nɛ o zɔmdáa k’ɛɛ dee so mɔɔ nyim see Sɔ̧ mɛ yiwese ga, a̧ aa wa er Nabukɔdɔnɔsɔr be Kaldee wannu Babilɔŋ; a̧ tɛɛ ɗaŋ kuti Tua’ɛ, ɓɛɛ kai o bíí yaknɛ nɛ bara-biro si Babilɔŋ.

¹³Sirus wannu Babilɔŋ ha̧a̧ nú tɛ kuti pɛ-wan kɔ‘i mɛ mbo Tua ko Sɔ̧ woyo.

¹⁴Nabukɔdɔnɔsɔr kaia so o nyɛk nɛ‘i dee nɛ lɔr in o wan nɛ‘i dee nɛ bu-mbɔi yinɛ kɔ̧ Tua ko Sɔ̧ sɛn Jerusalɛm sinɛ a kɔ̧ tua ko sɔ̧ kɔ‘i sɛn Babilɔŋ mɛ. Wannu Sirus kaia o nyɛk nɔ‘i gbonɛ woyo, ɓɛɛ ha̧ ha̧ Sɛsbasar n'aa ee so nɛ́ gasa wi-duk-zu zika-nù.

¹⁵A̧ tɔ̧ɔ̧ ha̧ a̧: Mɛ̀ káí o nyɛk nɔ'ɔ sinɛ á kɔ̧ Tua ko Sɔ̧ sɛn Jerusalɛm ɓɛɛ mɛ̀ tɔ̧́ ha̧ wa mɛ mbo Tua ko Sɔ̧ sɛn oi gba̧‘a̧ fara-a woyo.

¹⁶Sɛsbasar tɛɛ e naŋ Tua ko Sɔ̧, ku̧u̧naŋ-a nɛ ŋgimbi'i hɔ kinii, tom Tua'i a̧ de'i, ɓɛɛ tɛ kaɗi hɔ̧ɔ̧ na.›

¹⁷«Wen hegɔ, kà wannu nɛ́ kɔ̧a̧, ɛ̀nɛ̀ tɔ̧́ ha̧ o bíí k’ɛ́nɛ́ mɛ kii mɔ kɔ̧ tua-a-mbɔi k’ɛ́nɛ́ sɛn Babilɔŋ mɛ zɔk mɔ zaŋ o kalata. Wannu Sirus ha̧a̧ nú ha̧ wa mɛ mbo Tua ko Sɔ̧ sɛn Jerusalɛm woyo nɛ mbetɛ nde? Ɓɛɛ ɛ̀nɛ̀ tóm kifa-nú k’ɛ́nɛ́ tɛ mɔ‘i piinɛ ɗoŋ h’ɛ́ɛ́.»