Read Northwest Gbaya NEHEMII 13 Bible Online

NEHEMII 13 - Northwest Gbaya bible

NEHEMII 13

¹Ŋgimbi'i, wa tɔra mɔ zaŋ kalata ko Moisɛ ti dukbíí, ɓɛɛ wa kpa'e be Amɔŋ in be Mɔab beka ye zaŋ dukbíí ko Sɔ̧ na,

²wen wa ha̧ so yì in brɛt ha̧ o be Israɛl na. Wa yoɓa so Balam mɛ fom wa mbɛt, ɓɛɛ Sɔ̧ k’ɛɛ kpai fom'i nɛ̀ de yoŋgo.

³Ŋgimbi nɛ o bíí zia heembea'i kaɗi, wa foo o gɛnɛ yinɛ mgbara o be Israɛl.

⁴Nɛti ha̧ mɔ‘i, wa hoka Eliasib wi-ɗafi-sɔ̧ mɛ de tom bɛr Tua ko Sɔ̧ k’ɛɛ; a̧ nɛ́ nam ko Tobia.

⁵Eliasib ɗafa so fara ha̧ a̧ sɛn kɔ̧ pɛsa bɛr-tua nɛ wa mɔi̧ so o ha̧a̧mɔ, fuu-nyama, o nyɛk, o zu alkamaari, zu dɔ̧ɔ̧ in zu nɔ̧́ si sɛnɛ. Mɔɔ nɔ‘i nɛ́ war mɔ nɛ o be Levii, o wi-bii-gima in o wi-pɛm-nú tua gú nɛ̀ o wi-ɗafi-sɔ̧ tɛ kpa.

⁶Mi bo so kɔ‘m sɛn Jerusalɛm ŋgimbi'i na, wen mi sii so kɔ‘m ɗoŋ sɛn katɛ Artazɛrzɛs wannu Babilɔŋ tɛ ɓu-taar-zua-yiitoo pɛ-wan kɔ̧-a̧. Nɛ ɗoŋ tikiɗi, mi aka ɔma-tɛ er-a,

⁷ɓɛɛ mi si ɗoŋ si Jerusalɛm. Mi zɔka ɗaŋmɔ nɛ Eliasib dea tɛ ɗafa fara-ɔɔ ha̧ Tobia kɔ̧ Tua ko Sɔ̧.

⁸Mɔ‘i tu̧u̧ see-am nyɛmna, ɓɛɛ mi kai o mɔ ko Tobia nɛ a̧a̧ kɔ̧ Tua'i lɛŋ a zan.

⁹Mi tɔ̧ɔ̧ ha̧ wa mɛ bur war bɛr-tua'i ha̧ mɛ sa̧; ɓɛɛ mi kai o nyɛk Tua ko Sɔ̧, o ha̧a̧mɔ in o fuu-nyama nɛ duka hi̧i̧ sinɛ ɗoŋ a kɔ̧ a̧ woyo.

¹⁰Mi zia woyo'e, war mɔ nɛ o be Levii in o wi-bii-gima nɛ de so tom kɔ̧ Tua ko Sɔ̧ tɛ̀ɛ́ kpa so, wa kpa na; hegɔ wa sii mɔ kɔ-wa lɛŋ si tɛ̀ kɔ-wa zaŋbɛɛ mɛ.

¹¹Mi baa wen-aa kpa nɛ o gasawi, ɓɛɛ mi ak wa: «Nɛ́ ge á̧ dee ha̧ o bíí mɛ pɛsi e tom kɔ̧ Tua ko Sɔ̧ duk ge?» Nɛ mɔ'ɔ n'am mɔi̧a o be Levii in o wi-bii-gima pii ɗoŋ sɛn yí tom kɔ-wa woyo.

¹²Hegɔ, nù Juda lɛŋ kaia zu alkamaari, zu nyɔ̧ɔ̧ dɔ̧ɔ̧ in zu nɔ̧́ tɛnɛ, ɓɛɛ mi kai a fara-a.

¹³Mi ee nɛ́ Sɛlɛmia wi-ɗafi-sɔ̧, Sadɔk wi-yɔr-mɔ, in Pɛdaya ŋma be Levii ká bá nɛ̀ Hanaŋ bem ko Zakur, be-koo Matania ha̧ wa mɛ pɛm Tua ko Sɔ̧ wen o bíí lɛŋ tɔ̧ɔ̧ ndé, wa nɛ́ o wi-mboo-zu. Nɛ́ wa a̧ tɛ kɛ̧ mɔ ha̧ o nya-wa.

¹⁴Sɔ̧ kɔ‘m, tɛ‘nɛ́'ɛ mbáŋ ɗoŋ am wen zu mɔ n'am dea'i; ká tɛ‘nɛ́ bi ɗoŋ mboozu kɔ‘m wen Tua k’ɛ́nɛ́ in wen tom mɛ kɔ̧ a̧ na.

¹⁵Nɛ́ tɛ ŋgimbi'i a̧‘m zɔka nɛ o be Juda tɛ ɓara yí dɔ̧ɔ̧ wese-ɔm-tɛ. Mi zɔka wa fara kaia sikila alkamaari si kɔ̧ dam; wa hɛra o dak dɔ̧ɔ̧, o waya nyak-dɔ̧ɔ̧, o waya te-mbɔra in o tui nɛtɛ nɛtɛ zu tuifuu kɔ-wa mɛ kai yaknɛ si Jerusalɛm wese-ɔm-tɛ. Mi tɔ̧ɔ̧ wen a zu wa wese nɛ wa de nɛ gɛnɛ kɔ-wa'i.

¹⁶O wi Tir nɛ ya sɛn Jerusalɛm mbɛt kaia o zoro in o mɔɔ-gɛnɛ nɛtɛ nɛtɛ tɛnɛ ɗɔr nɛnɛ ha̧ o be Juda sɛn Jerusalɛm wese-ɔm-tɛ.

¹⁷Mi tɔ̧ɔ̧ wen a zu o gasawi Juda hee mɔ'ɔ ga: «Ɗaŋmɔ n’ɛnɛ de e nɛ wese-ɔm-tɛ tɛ geemɔ‘i ɔ dee nde?

¹⁸Mɔ nɛ o dáà k’ɛ́nɛ́ dee so bó a̧‘i na? Bó nɛ́ Sɔ̧ k’ɛɛ pi̧i̧ so ŋga bɔnɛ zu yɛ in zu ye’ɛ na? Ɓɛɛ k’ɛ́nɛ́, ɛ́nɛ́ aŋ nɛ nyimsea ko Sɔ̧ pi̧ ŋgɔn, zu o be Israɛl woyo tɛ ee wese-ɔm-tɛ n’ɛnɛ e tɛ geemɔ'ɛ.»

¹⁹Nɛ mɔ'ɔ n'am tɔ̧ɔ̧ ha̧ wa mɛ kpe nú garo Jerusalɛm nɛti ha̧ wese-ɔm-tɛ, ŋgimbi nɛ mɔ ga̧ nɛnɛ, in ha̧ wa mɛ hu̧i̧, ɗoŋ nɛ wese-ɔm-tɛ yaka kaɗi! Mi ee o ŋma wi-de-tom kɔ‘m sɛn nú garo-ye mɛ dor o tui ká yé saaye Jerusalɛm wese-ɔm-tɛ na.

²⁰Hegɔ, mɔ‘i dee ha̧ o wi-ɗɔr-mɔ in o wi-de-gɛnɛ nɛtɛ nɛtɛ mɛ ɔ zan ká̧ Jerusalɛm war kpɔk in war yiitoo.

²¹Mi mbaŋa tɛ-wa hee mɔ'ɔ ga: «Ɛ́nɛ́ ɔ sɛn ká̧ garo nɛ zan wen ge? K’ɛ̀nɛ̀ dé hegɔ woyo, ɛ́nɛ́ tɛ zɔk.» Ku̧u̧naŋ-a nɛ wese'i, wa kaɗa tɛa-a wese-ɔm-tɛ.

²²Mi tɔ̧ɔ̧ ha̧ o be Levii mɛ ɗafi war-tɛ in ha̧ wa mɛ nɛ̀ɛ́ pɛm nú garo wen ha̧ wa mɛ zɔk wese-ɔm-tɛ nɛ sa̧a̧-a̧. Sɔ̧ kɔ‘m, tɛ‘nɛ́'ɛ mbáŋ ɗoŋ am wen zu mɔ‘i n'am dea'i mbɛt, ɓɛɛ ɛ̀nɛ̀ dé ko ha̧‘m nyɛm nɛ ɗoŋ gasa deako k’ɛ́nɛ́.

²³Nɛ́ tɛ ŋgimbi'i mbɛt a̧‘m zɔka nɛ o be Juif nɛ baa so o zɔŋa Asdod, o zɔŋa Amɔŋ in o zɔŋa Mɔab nɛ kóò.

²⁴Díkìn bem kɔ-wa lɛŋ tɔ̧ nɛ nú Asdod; wa iŋa nɛ́ nú ko o gɔni-duk nɛtɛ nɛtɛ, ɓɛɛ wa iŋ nú ko o Juif na.

²⁵Mi tɔ̧ɔ̧ wen a zu wa, ɓɛɛ mi fom wa; mi gusa o ŋma, mi zuɗa mui̧-zu o ŋma, ɓɛɛ mi de ha̧ wa mɛ kan mɔ nɛ nin Sɔ̧ hee mɔ'ɔ ga: «Ɛɛ beka ha̧ be-okoo k’ɛɛ ha̧ o be-wiwii kɔ-wa nɛ̀ kóò na; ɛɛ beka ba o be-okoo kɔ-wa ha̧ o bem k’ɛɛ, kóó nɛ̀ war k’ɛɛ mɛ tɛ yɛ na mbɛt!»

²⁶Ɓɛɛ mi tɔ̧ ha̧ wa: «Bó nɛ́ tɛ mɔ‘i à Salomɔŋ wannu Israɛl dee nɛ ɗaŋmɔ na nde? Zaŋnu lɛŋ, ŋma wannu nɛ nyɛma so ŋmaa in a̧ bo na; Sɔ̧ kɔ̧-a̧ kɔ̧ɔ̧ so a̧ nyɛmna, ɓɛɛ ba a̧ mɛ ɔ wan zu nú Israɛl lɛŋ. Zu-a'i, mɛ̀ nɛ́ a̧‘i a̧ o zɔŋa gɔni-duk mgbɔɔ pi̧ tɛ yuwar dee ɗaŋmɔ.

²⁷Ɓɛɛ war-a k’ɛ́nɛ́ mbɛt, ɛɛ kɔ̧ mɛ zii'e ɛnɛ de nɛ gasa ɗaŋmɔ hegɔ sɛn ti Sɔ̧ k’ɛɛ, bá nɛ̀ o gɔni-duk nɛ kóò na.»

²⁸Ŋma bem ko Yoyada, bem ko Eliasib gasa wan-ɗafi-sɔ̧ baa so nɛ boko-bem ko Sanbalat be Hɔrɔŋ, ɓɛɛ mi ndak a̧ nyɛi̧ nɛ‘m.

²⁹Sɔ̧ kɔ‘m, tɛ‘nɛ́'ɛ mbáŋ ɗoŋ o wi nɔ‘i; wen zu dee ndiŋ nɛ wa dee pi̧ tɛ tom ɗafa-sɔ̧ in tɛ nɔɔ-tɔk n’ɛnɛ nɔɔ in o wi-ɗafi-sɔ̧ ká bá nɛ̀ o be Levii.

³⁰Mi ndaka o gɛnɛ katɛ wa yinɛ, ɓɛɛ mi usi tom ko o be Levii in o wi-ɗafi-sɔ̧ ha̧ wa woyo, o ndé tɛ tom kɔ‘i.

³¹Mi usa yuwar tom-ha̧a̧-gua tɛ ŋgimbi-a in ha̧a̧ zu-nyɔnɔ mbɛt. Sɔ̧ kɔ‘m, tɛ‘nɛ́'ɛ mbáŋ ɗoŋ am nɛ̀ de-a!