Read Northwest Gbaya NEHEMII 3 Bible Online

NEHEMII 3 - Northwest Gbaya bible

NEHEMII 3

¹Eliasib wan-ɗafi-sɔ̧ kura in o nya-a̧, o wi-ɗafi-sɔ̧, ɓɛɛ wa mbo nú garo ko o Sami. Wa dee gbaŋa-a, ɓɛɛ wa a o kpar-nú-a. Wa mboo garo siti hɔ fara-pɛm-mɔ nɛ‘i sa'e Gɔmŋmaa. Wa dee gbaŋa-a, ɓɛɛ wa mbo siti woyo hɔ nɛnɛ fara-pɛm-mɔ ko Hananeɛl.

²Sɛn katɛ o wi nɔ‘i, nɛ́ o be Jeriko a̧ mbo mɔ, ɓɛɛ katɛ o be Jeriko nɛ́ Zakur bem ko Imri.

³O bíí Sɛnaa mboo kɔ‘i nɛ́ nú garo Zoro. Wa aa o gaŋgala, o kpar-nú-a, o dor-toyo in o mɔɔ-mana-a lɛŋ.

⁴O wi nɛ dee tom katɛ wa nɛ́ Mɛrɛmɔt bem ko Uria, be-koo Hakɔs, ɓɛɛ nɛ war katɛ a̧ nɛ́ Mɛsulam, bem ko Berekia, be-koo Mɛsezabɛl; ɗoŋ kɔ̧-a̧‘i nɛ́ Sadɔk bem ko Baana.

⁵Ɗoŋ ko Sadɔk nɛ́ o be Tɛkɔa; ɓɛɛ mɔ kpɔk, o gasawi ko o be Tɛkɔa kɔ̧ so mɛ mbo zu ha̧ wi-duk-zu tom na.

⁶Yoyada bem ko Pasɛa in Mɛsulam bem ko Bɛsɔdia dee kɔ‘i tom nú garo ko Yesana;[3] nɛ́ wa á̧ aa o gaŋgala-a, o kpar-nú-a, o dor-toyo in o mɔɔ-mana-a.

⁷Katɛ wa nɛ́ Melatia be Gabaɔŋ in Yadɔŋ be Mɛrɔm gú nɛ̀ o bíí Gabaɔŋ in Mispa a̧ de tom ká̧ fara-duk ko wi-duk-zu zika-nù mɛ kur Efrat nɛ war yee-wese.

⁸Hɔ-ɗoŋ-aa nɛ́ Uziɛl bem ko Harhaya wi-nɔi̧-lɔr a̧ de tom, ɓɛɛ sɛn katɛ a̧ nɛ́ Hanania, wi-gi-nyama. Tom kɔ-wa kaɗa sɛn Jerusalɛm ŋgimbi nɛ wa hɔɔ nɛnɛ tɛ fara nɛ garo ɔ pɛsa sɛnɛ.

⁹Katɛ wa nɛ́ Rɛfaya bem ko Hur, wi-duk-zu reeta Jerusalɛm.

¹⁰Siti nɛ́ Yɛdaya bem ko Harumaf a̧ de kɔ‘i sɛn mgbák nú tua kɔ‘i; katɛ a̧ nɛ́ Hatus bem ko Hasabnɛya.

¹¹Nɛ̀ ŋma fara woyo, Malkia bem ko Harim in Hasub bem ko Pahat-Mɔab dee kɔ‘i tom sɛnɛ si kpa nɛ Fara-dɔ-brɛt.

¹²Katɛ wa nɛ́ Salum bem ko Ha-Lɔhɛs, wi-duk-zu ŋma reeta Jerusalɛm in o boko-bem kɔ‘i a̧ de tom.

¹³Hanun in o bíí Zanɔa mbo kɔ‘i nɛ nú garo mɛ si kɔ̧ gboŋgo; nɛ́ wa a̧ mboo fara'i, a o kpar-nú-a, o dor-toyo in o mɔɔ-mana-a; zi̧a̧ garo nɛ wa mboo nɛ́ mɛtrɛ gɔmŋmaa-mɔɔrɔ si hɔ nɛnɛ nú Garo-a-yɔsɛ.

¹⁴Malkia bem ko Rɛkab wi-duk-zu nú Bɛt-Ha-Kɛrɛm mbo kɔ‘i nɛ́ nú Garo-a-yɔsɛ; a̧ aa o kpar-nú-a, o dor-toyo in o mɔɔ-mana-a.

¹⁵Salum bem ko Kol-Hɔzɛ wi-duk-zu nù Mispa de tom nú garo zu-zer. A̧ mboa, a̧ nyia zu-a, a nɛ́ o kpar-nú-a, o dor-toyo in o mɔɔ-mana-a. A̧ mboo garo ká̧ gɔna-yí Siloe ku̧u̧naŋ-a nɛ kpɛɛfɔ ko wannu hɔ fara-daŋ-nɛnɛ sitɛ ye ko David.

¹⁶Hɔ-ɗoŋ-aa, nɛ́ Nehemii bem ko Azbuk, wi-duk-zu reeta nú Bɛt-Sur a̧ de tom, tan nɛ o pɛsi ko David, hɔ nɛnɛ tɛ gɔna-yì nɛ wa za̧a̧ za̧a̧ nɛ er, si kpa nɛ tua ko o ŋgaŋa-wi.

¹⁷Hɔ-ɗoŋ-aa, nɛ́ o be Levii a̧ de tom. Rɛhum bem ko Bani a̧a̧ sɛnɛ; sɛn katɛ a̧ nɛ́ Hasabia wi-duk-zu reeta nú Kɛila a̧ de tom fara kɔ‘i.

¹⁸Hɔ-ɗoŋ-aa, nɛ́ nya-wa Bavai bem ko Hɛnadad, wi-duk-zu reeta nú Kɛila a̧ de tom.

¹⁹Hɔ-ɗoŋ-aa, nɛ́ Ezɛr bem ko Yesua, wi-duk-zu Mispa a̧ de tom tan nɛ fara-daŋ-nɛnɛ si fara-a-boi-biro hɔ nɛnɛ mgbii garo mɛ.

²⁰Hɔ-ɗoŋ-aa, nɛ́ Baruk bem ko Zabai a̧ ha̧ ŋgai-tɛ tɛ tom. A̧ ku̧u̧naŋ-a nɛ mgbii garo hɔ nú tua ko Eliasib, gasa wan-ɗafi-sɔ̧.

²¹Hɔ-ɗoŋ Baruk, nɛ́ Mɛrɛmɔt, bem ko Uria, be-koo Hakɔs a̧ de tom; ku̧u̧naŋ-a nɛ́ nú tua ko Eliasib hɔ nɛnɛ mgbii tua.

²²Hɔ-ɗoŋ-aa, nɛ́ o wi-ɗafi-sɔ̧ nɛ tɛ̀ɛ́ nɛ o be ye nɛ a̧a̧ ká̧ Jerusalɛm a̧ de tom.

²³Hɔ-ɗoŋ-wa, nɛ́ Bɛnjamin in Hasub a̧ de tom fara nɛ duk tan nɛ tua kɔ-wa. Hɔ-ɗoŋ-wa, nɛ́ Azaria bem ko Masɛya be-koo Anania a̧ de tom nɛ war ká̧ tua kɔ‘i.

²⁴Hɔ-ɗoŋ-aa, nɛ́ Binui bem ko Hɛnadad a̧ de tom, ku̧u̧naŋ-a tɛ tua ko Azaria hɔ nɛnɛ fara nɛ mgbii garo suia si zan sɛnɛ.

²⁵Hɔ-ɗoŋ-aa, nɛ́ Palal bem ko Uzai a̧ de tom ku̧u̧naŋ-a tɛ suia-garo hɔ nɛnɛ kusa fara-pɛm-mɔ nɛ duk tan nɛ tua-wan, ká̧ bee-gara ko o wi-pɛm-mɔ. Hɔ-ɗoŋ-aa, nɛ́ Pɛdaya bem ko Parɔs

²⁶in o geɗek wi-de-tom kɔ̧ Tua ko Sɔ̧ nɛ ɔ si Ofɛl a̧ de tom hɔ nɛnɛ tɛ kusa fara-pɛm-mɔ nɛ duk ká̧ nú Garo-yì nɛ war daŋa-wese.

²⁷Hɔ-ɗoŋ Pɛdaya, nɛ́ o be Tɛkɔa a̧ de tom tan nɛ gasa fara-pɛm-mɔ hɔ nɛnɛ ká̧ garo wan mɛ si Ofɛl.

²⁸Hɔ-ɗoŋ-aa, nɛ́ o wi-ɗafi-sɔ̧ a̧ de tom ku̧u̧naŋ-a nɛ nú garo ko o Nyaŋa, kóó o ndé tan nɛ tua kɔ‘i.

²⁹Hɔ-ɗoŋ-aa, nɛ́ Sadɔk bem ko Imɛr a̧ de tom tan nɛ nú tua kɔ‘i. Hɔ-ɗoŋ Sadɔk nɛ́ Sɛmaya bem ko Sɛkania, wi-pɛm nú-garo nɛ zɔk mɔ si daŋa-wese a̧ de tom.

³⁰Hɔ-ɗoŋ-aa, nɛ́ Hanania bem ko Sɛlɛmia in Hanun, mɔɔrɔ-ɗoŋ-kpɔk bem ko Salaf, a̧ de tom. Hɔ-ɗoŋ-aa, nɛ́ Mɛsulam bem ko Berekia a̧ de tom tan nɛ gɔna-bɛr-tua kɔ‘i.

³¹Hɔ-ɗoŋ-aa, nɛ́ Malkia wi-nɔi̧-lɔr a̧ de tom hɔ nɛnɛ tɛ tua ko geɗek wi-de-tom kɔ̧ Tua ko Sɔ̧ in ko o wi-ɗɔr-mɔ tan nɛ nú garo ko Mifkad, si hɔ nɛnɛ ká̧ kusa gɔna-bɛr-tua mgbii garo mɛ.

³²O wi-nɔi̧-lɔr in o wi-ɗɔr-mɔ, dee kɔ‘i tom mgbara kusa gɔna-bɛr-tua mɛ mgbii garo si hɔ nɛnɛ nú garo ko o Sami.

³³Ŋgimbi nɛ Sanbalat zia ndé, ɛ́ɛ́ mbó nɛ́ garo Jerusalɛm woyo, see-aa ɗaŋa nyɛmna, ɓɛɛ a̧ de nyimsea. A̧ zɛkɛɗa o be Juif,

³⁴tɔ̧ nɛnɛ ti o nya-a̧ in ti o wi-biro Samarii hee mɔ'ɔ ga: «Nɛ́ ge a̧ o ziɓa be Juif nɔ'ɔ de’ɛ ge? Wi tɛ e ha̧ wa mɛ de mɔ‘i siti? Wa tɛ ɗafi nɛ Sɔ̧ nde? Wa kɔ̧ɔ̧ mɛ kaɗi tom’ɛ kpɔk kale wese nde? Wa nyɛma mɛ kai o ta nɛ‘i dɔra nɛ ɗɔɔ fuunu-gbina-ŋgeŋ, nɛ bia wee mbɛt’ɛ de nɛ kpasa mɔ woyo nde?»

³⁵Tobia be Amɔŋ duka katɛ a̧, ɓɛɛ tɔ̧: «Wa a̧ mbó gɔ! Kóó nɛ́ géé gba-toyo a̧ daŋa garo-ta kɔ-wa'i, ɓɛɛ gbina a nù.»

³⁶Ɓɛɛ mi tɔ̧ nɛ hee ger: «Sɔ̧ k’ɛɛ, ɛ̀nɛ̀ zìì, wa e nɛ yɛ tɛ geemɔ. Ɛ̀nɛ̀ é ha̧ foe-dara kɔ-wa mɛ tik zu wa. Ɛ̀nɛ̀ é wa tɛ geemɔ, tɛ ŋma nù ha̧ wa de bara sɛnɛ.

³⁷K’ɛ́nɛ́ e ɗaŋmɔ kɔ-wa ha̧ wa na. Ká ɗaŋmɔ kɔ-wa bí sɛn ti'nɛ́ na mbɛt, wen wa tu̧u̧ see o bíí-mbo-garo’ɛ.»

³⁸Dukbíí ee see tɛ tom'i, ɓɛɛ ɛɛ mbo garo kusi hɔ bin-see-a kpa nú ŋmaa lɛŋ.