Read Northwest Gbaya NEHEMII 6 Bible Online

NEHEMII 6 - Northwest Gbaya bible

NEHEMII 6

¹Mi tɛ a o kpar-nú garo hɔ̧ɔ̧ na, ɓɛɛ Sanbalat, Tobia, Gɛsɛm be Arab in oi dɔka wisɛn k’ɛɛ zia'e, mi mboo garo siɗoŋ woyo, nɛ ŋma woi-aa bo ɓɔna.

²Nɛ mɔ'ɔ nɛ Sanbalat in Gɛsɛm toma tom ha̧‘m hee mɔ'ɔ ga: «Mɛ̀ tɛ́, ɛ̀ɛ̀ tɔ̧́ be nyɛrɛ sɛn Kɛfirim, mgbara ɗɔŋgɔ Ɔnɔ.» Wa ta so nɛ mɔ mɛ de ɗaŋmɔ in am.

³Mi toma o betom nɛ kifa-nú kɔ‘m ha̧ wa hee mɔ'ɔ ga: «Mɔ n'am de'i nɛ́ gasa tom, mi nyɛm mɛ zir si hi̧i̧ na. Kà‘m yák, ɓɛɛ tom beka nɛ siti na.»

⁴Wa toma kpɔk betom'i pii tɛ‘m war naar, ɓɛɛ mi kifi kànà nɛ kpɔk nú‘m ha̧ wa.

⁵Sanbalat toma mbe kalata nɛ wi-de-tom kɔ‘i tɛnɛ woyo, wa lati so nú kalata'i na.

⁶Mɔ n'aa yɔra sɛnɛ nɛ mɔ'ɔ: «O tugun bíí tɔ̧ nɛnɛ‘e, mɛ in o be Juif, ɛnɛ kɔ̧ɔ̧ mɛ de ŋgazu; nɛ́ wen mɔ‘i sa mɛ mbo garo ha̧ mɛ mɛ ɔ wan zu wa. Gɛsɛm mbɛt tɔ̧ɔ̧ hegɔ.

⁷«Mɛ aa o wi-tɔ̧-wen oi nú Sɔ̧ mbɛt ha̧ wa mɛ de wan Juda ha̧ mɛ sɛn Jerusalɛm; ɓɛɛ kinii, o wen nɔ‘i lɛŋ tɛ a zer wannu. Mɛ̀ tɛ́, ɛ̀ɛ̀ tɔ̧́ nyɛrɛ zu mɔ‘i in ŋmaa.»

⁸Ɓɛɛ mi kifi nú ha̧ Sanbalat: «Wen nɔ‘i nɛ mɛ tɔ̧‘i lɛŋ nyɛm sɛnɛ na. Nɛ mɛ'ɛ gɔn tɛ-mɛ tɔ̧ nɛnɛ.»

⁹O wi nɔ‘i kɔ̧ɔ̧ so mɛ pi̧ kíì tɛ yɛ tɔ̧ nɛnɛ‘e: «Tɛ-wa tɛ ga̧, ɓɛɛ tom'i beka de siti na.» Ɓɛɛ kinii, Sɔ̧, ɛ̀nɛ̀ há̧ ŋgai ha̧‘m!

¹⁰Mi nɛa tɛ ko Sɛmaya bem ko Delaya, be-koo Metabeɛl wen ŋma mɔ dora so a̧. A̧ tɔ̧a̧: «Ɛ̀ɛ̀ nɛ́ in ŋmaa sɛn kɔ̧ Tua ko Sɔ̧ sɛn mgbák kɔ̧ bɛr-tua mɛ, ɓɛɛ ɛ̀ɛ̀ kpé nú tua e zu yɛ wen wa tɛ tɛ mɛ gbɛ mɛ; wa tɛ tɛ̀ɛ́ gbɛ mɛ mɛ zɛ.»

¹¹Mi kifa nú: «Wiwii hee mi ga tɛ yu mɔ hee ge? Nɛ́ ge bíí ge hee mi ga a̧ tɛ ye sɛn kɔ̧ Tua ko Sɔ̧, ɓɛɛ duka kpasa ge nde? Mi beka ye na.»

¹²Mi iŋa ndé, bo nɛ Sɔ̧ a̧ tom a̧ na. A̧ tɔ̧ɔ̧ so wen zu'm wen Sanbalat in Tobia ha̧a̧ so nɛ́ sede ha̧ a̧.

¹³Wa ha̧a̧ sede ha̧ a̧ ha̧ a̧ mɛ pi̧ kíì tɛ‘m, ha̧‘m mɛ de mɔ n'aa tɛ tɔ̧, de nɛ ɗaŋmɔ. Hegɔ, wa tɛ̀ɛ́ kpa yuwar mɛ ɗaŋ nin-am, ɓɛɛ wa tɔ̧ɔ̧‘e, mi nɛ́ wi-ɗaŋ-nin Sɔ̧.

¹⁴Sɔ̧ kɔ‘m, tɛ‘nɛ́ a̧ mbáŋ ɗoŋ deemɔ ko Tobia in Sanbalat! Tɛ‘nɛ́ a̧ mbáŋ ɗoŋ o tom kɔ-wa! Tɛ‘nɛ́ a̧ mbáŋ ɗoŋ Nɔadia, ko-tɔ̧-wen oi nú Sɔ̧, in o dɔka wi-tɔ̧-wen oi nú Sɔ̧, nɛ kɔ̧ɔ̧ so mɛ pi̧ kíì tɛ‘m mbɛt.

¹⁵Tom mboo garo kaɗa tɛ ɓu-yiitoo-zua-mɔɔrɔ ɔɔ zɛ Elul;[6] tom'i lɛŋ baa nɛ́ zɛ ɓu-mɔɔrɔ-zua-yiitoo.

¹⁶Ŋgimbi nɛ o wisɛn k’ɛɛ zia nyɛrɛ mɔ‘i, kíì dee o dukbíí lɛŋ nɛ ɔ zik yɛ; foe dee wa. Wa iŋa'e tom'i hɔɔ gba̧a̧ wen nɛ́ mɔ nɛ̀ Sɔ̧ k’ɛɛ kɔ̧a̧.

¹⁷Nɛ́ tɛ ŋgimbi'i a̧ o dita-bíí Juda tom so nɛ o kalata ɓɔnsɛnɛ ha̧ Tobia, kpa nɛ kifa-nú kɔ̧-a̧ mbɛt.

¹⁸O bíí nɛ dɔka-a sɛn nù Juda ndaɗa so in a̧ nyɛmna wen n'aa duka so nɛ́ be-for Sɛkania bem ko Ara; ɓɛɛ bem kɔ̧-a̧ Yohanaŋ baa so nɛ́ boko-bem ko Mɛsulam, bem ko Berekia.

¹⁹Wa duka so zɔn nɛ a̧ sɛn ti'm, ɓɛɛ wa tɛ́ɛ̀ ba wen oi nú‘m nɛ́ɛ̀ tɔ̧ ha̧ a̧. Ko Tobia tom so kɔ‘i nɛ o kalata ha̧‘m wen pi̧i̧ kíì tɛ‘m.