Read Northwest Gbaya TOBIT 1 Bible Online

TOBIT 1 - Northwest Gbaya bible

TOBIT 1

¹Kalata nɛ tɔ̧ nyɛrɛmɔ ko Tobit, bem ko Tobiɛl, bem ko Ananiɛl, bem ko Aduɛl, bem ko Gabaɛl, bem ko Rafaɛl, bem ko Raguɛl, lɛŋ nɛ o bezaŋ Ariɛl, zuduk ko Nɛftalii.

²Tobit ɔɔ so sɛn saaye Tisbe, sɛn nu Nɛftalii, nu Galilee mɛ ŋgɔn, mgbara Kadɛs nɛ duk nɛ kazan-mɛ-ŋgɔn, in Hasɔr, nɛ duk nɛ war yee-wese, in Fogɔr nɛ duk nɛ kazan-mɛ-ɗɔɔ. Mɛ nɛ fara'i a̧ wa baa so a̧ nɛ bara-biro si sɛn nu Asirii, ŋgimbi wan ko Salmanazar.

³Mi Tobit, mi ndaka pata yuwar kpasawen, ɓɛɛ mi de o demɔ in o bii, ŋgimbi lɛŋ n'am duka nɛ kpasa. Mi ha̧mɔ nɛ dɔkaa sɔɔgee ha̧ o nya kɔ‘m, in ha̧ o bíí zuduk kɔ‘m, nɛ wa kaia so nɛ bara in am si saaye Ninivɛ, sɛn nu Asirii mbɛt.

⁴Tɛ ŋgimbi daŋa ŋgaiwi kɔ‘m, sɛn nu kɔ‘m, nu Israɛl, zuduk ko zɔmdáà kɔ‘m Nɛftalii lɛŋ kɛ̧a so tɛ nɛ nutua ko David, in nɛ Jerusalɛm, Jerusalɛm nɛ gasa ye nɛ wa hɔka so mgbara o zuduk Israɛl lɛŋ mɛ duk nɛ fara-ɗafi-Sɔ̧: nɛ sɛn fara'i a wa mboa so Sa̧-a̧ Tua nɛ Sɔ̧ duk sɛnɛ, Tua nɛ wa toka so de yoŋgo zu a, ha̧ a̧ mɛ duk hegɔ ɓɔnsɛnɛ wen o pɛrnam nɛ tɛ tɛ nɛ ɗoŋ.

⁵Sɛn zu o kaya Galilee lɛŋ, o nya kɔ‘m in o bíí nutua ko zɔmdáà Nɛftalii lɛŋ duka so mɛ ɗafi nɛ be ndai, hee sɔ̧ kɔ-wa̧ ga, be ndai nɛ Jeroboam wannu Israɛl dea so sɛn Dan.

⁶Dɔ̧ɔ̧dɔ̧ɔ̧, nɛ mi ɛn'am a duka so mɛ nɛ sɛn Jerusalɛm, ŋgimbi o gbaŋa, nyɛm nɛ ɗoŋ heembea, nɛ Sɔ̧ ha̧ha̧ o be-Israɛl lɛŋ wen ɓɔnsɛnɛ. Mi kai nɛ o zu-nyɔnɔ kɔ‘m, o kaya mɔdai kɔ‘m, o zu-mɔdai kɔ‘m lɛŋ, in kuti buma-sami nɛ‘i gɔn, si Jerusalɛm'i,

⁷ɓɛɛ mi ha̧o mɔ nɔ‘i lɛŋ ha̧ o wiɗafisɔ̧, o bezaŋ Aarɔn, wen ea a zu taŋe-ɗafi-Sɔ̧. Mi ha̧o zu-dɔ̧ɔ̧, alkamaari, waya-te-nɔ́, waya dɔn, waya-te-mbɔ́rá, in zu o ŋma wayate nɛtɛ nɛtɛ ha̧ o bezaŋ Levi, nɛ yaa so de nɛ tom sɛn Jerusalɛm. Mi duka so mɛ kpai yiitoo zumɔ kɔ‘m lɛŋ nɛ sede, ɓɛɛ mi nɛɛ ɗaŋ sede'i sɛn Jerusalɛm, dam ɗoŋ pɛ lɛŋ.

⁸Mi ha̧ taar zu mɔ kɔ‘m ha̧ o be-oi, o kogɛra, in o gɔni duk nɛ ya kpɔk in o be-Israɛl: dam ɗoŋ pɛ taar lɛŋ, mi ha̧o mɔ nɔ‘i ha̧ wa sɔɔgee. Ɓɛɛ ɛɛ nyɔŋa in wa, nyɛm nɛ ɗoŋ heembea ko Mɔise, in dómɔ ko Debɔra, naa ko zómdáà kɔ‘m Ananiɛl, wen dáà kɔ‘m fee so, e'm nɛ be-oi.

⁹Ɗoŋ n'am dee wiwii kaɗi, mi baa kóò zaŋ pɛrnam ko o dáà k’ɛ́ɛ́, mi koo bem in a̧, ɓɛɛ mi a nin bem’ɛi'e Tobia.

¹⁰Ŋgimbi kaia o bíí nɛ bara si sɛn nu Asirii, wa baa'm nɛnɛ mbɛt, ɓɛɛ mi ɔ sɛn saaye Ninivɛ. O nya'm lɛŋ in o bíí zuduk kɔ‘m lɛŋ yaa so mɛ nyɔŋ nyɔŋmɔ ko o bíí nɛ iŋ kpasa Sɔ̧ na.

¹¹Ɓɛɛ kɔ‘m, mi dora tɛ‘m tɛ nyɔŋa nyɔŋmɔ‘i.

¹²Hee mɔ'ɔ nɛ see-am lɛŋ duk so tɛ Sɔ̧ kɔ‘m ga,

¹³Wan mɛ ŋgɔn dea ha̧‘m mɛ demɔ nɛ dee tɛ Salmanazar, ɓɛɛ nɛ mi a hi̧fi so mɔ n'aa kɔ̧ɔ̧ lɛŋ ha̧ a̧.

¹⁴Hegɔ, mi duka so mɛ nɛ sɛn nu Mɛdii, hi̧fi nɛ o mɔ ha̧ a̧, hɔ nɛnɛ ŋgimbi fio kɔ̧-a̧. Nɛ hegɔ a'm aa nɛ o ŋgoɓo-sede, nɛ duna nɛ dita bu-kɔya-sede gɔmŋmaa taar, tɛ kɔ Gabaɛl, nya ko Gabri, sɛn saaye Ragɛs, sɛn nu Mɛdii mɛ.

¹⁵Ɗoŋ fio ko Salmanazar, bem kɔ̧-a Sɛnakɛrib ɔɔ wan oi-aa. Ŋgimbi'i, o yuwar mɛ nɛ si nu Mɛdii sa̧-a̧ na, ɓɛɛ mi nyɛm mɛ nɛ si hi̧i̧ ɓɔ na.

¹⁶Ŋgimbi wan ko Salmanazar, mi ha̧so mɔ sɔɔgee nɛ dɔkaa ha o zuduk kɔ‘m

¹⁷mi kɛ̧a̧ brɛt kɔ‘m ha̧ o wi nɛ wɔ gbɛ, in o laa ha̧ o wan nɛ ya so nɛ mgbíí; ɓɛɛ, ka'm kpa wɔr ŋma bíí nu kɔ‘m, nɛ‘i pii taŋ, ɗoŋ garo saaye Ninivɛ, ɓɛɛ mi nɛɛ kai mɛ gun.

¹⁸Mi guna o bíí nɛ Sɛnakɛrib gbɛa so mbɛt; wen Wan mɛ yiwese usa so ŋga bɔnɛ ha̧ Sɛnakɛrib, oi kpɔkɔ wen n'aa tɔ̧a̧ so pi tɛ wi. Tɛ yuu mɔ kɔ̧-a̧ pinɛ nɛ nu Judee, see-Sɛnakɛrib nyima, ɓɛɛ a gbɛɛ o be-Israɛl nɛ dɔkaa. Ɓɛɛ mi nɛɛ kai o wɔr-wa nɛ hu̧saa mɛ gun. Sɛnakɛrib toma o bíí mɛ kii wa takaɗi.

¹⁹Ŋma be Ninivɛ nɛɛ ɗɔ‘m ha̧ wannu'e «nɛ mi am gun wa», ɓɛɛ mi nɛ hu̧si tɛ‘m. Ɗoŋ n'am zia'e nyɛrɛ tom kɔ‘m aa zer wannu kaɗi, in n'aa kii nɛ‘m mɛ gbɛ wo, kii dee am, ɓɛɛ mi yu mɔ yak.

²⁰Wa kaia o mbɔi kɔ‘m lɛŋ a zu ko wannu; kóó ŋma be mɔ kpɔk ɓɔn ha̧‘m na, Kana nɛ kóò kɔ‘m Anna, in bem kɔ‘m Tobia a̧ wa ee so ha̧‘m ɓɛɛ.

²¹Zɛ ɓu-naar tɛ dam hɔ̧ɔ̧ na, ɓɛɛ o bem ko wannu yiitoo gbɛ a̧: wa yu mɔ yak si zu kaya Ararat. Ŋma bem kɔ̧-a̧ Asarhadɔn ɔɔ wan oi a. A ha̧tom zɔka nu wan kɔ̧-a̧ lɛŋ, in mbɔi kɔ̧-a̧ lɛŋ mbɛt ha̧ Ahikar, bem ko nya'm Anaɛl.

²²Hegɔ Ahikar ama mɔ zu'm, ɓɛɛ mi si ɗoŋ si Ninivɛ. Nɛ mbetɛ, ŋgimbi wan ko Sɛnakɛrib wannu Asirii, Ahikar duka so zu o dɔ̧ɔ̧ ko wannu, in zu tumbal kɔ̧-a̧, gasa-wi-duk-zu-tom in zu sede. Asarhadɔn ea a siti zu o tom nɔ‘i woyo. Ahikar nɛ nam kɔ‘m, be nɔ-kɔ kɔ‘m.