Read Northwest Gbaya TOBIT 10 Bible Online

TOBIT 10 - Northwest Gbaya bible

TOBIT 10

¹Hegɔ‘i dam ɗɔŋ wese kpɔk kpɔk, Tobit tɔr nɛ zɛ nɛaa sɛn Raguɛs, in zɛ piaa. Zɛ nɔ‘i lɛŋ yaka, ɓɛɛ bem kɔ̧-a̧ tɛ pii hɔɔ na.

²A taa mɔ: wa dora nɛ a̧ e hi̧i̧ ndé, ŋmafara Gabaɛl fe fee nde, kóó ŋma bíí bo wen ha̧sede'i ha̧ a̧ na ndé,

³ɓɛɛ a̧ ku̧ naŋ kpaa ɗaŋsee.

⁴Anna, kóò kɔ̧-a̧, tɔ̧̧: «Bem kɔ‘m fee kadi, bɛka'm kpa a̧ ɓɔ na.» A̧ ku̧u̧ naŋ hi̧a̧ kɔ̧a, ai nɛ nú-a wen bem kɔ̧-a̧, tɔ̧ nɛnɛ‘e:

⁵«Oe, bɔnɛ kɔ‘m wa, bem kɔ‘m! mɛ́ nɛ̀ mɛ̀ duk nɛ́ sa̧a̧mɔ yi'm, nɛ mɔ n'am ee mɛ mɛ yak’ɛ.»

⁶Tobit tɔ̧ɔ̧ ha̧ a̧: «Ká mɛ tɔ̧ wen hegɔ na, kóò kɔ‘m! a̧ dúk nɛ dea. Nɛ ŋma mɔ a sakala wa. Sɛm kɔ̧-a̧ nɛ wa yaka in ŋmaa nɛ́ mgbak bíí, a̧ nɛ ŋma nya-ɛɛ. Ká mɛ ta mɔ na, bokonya'm. Mɛ tɛ zɔk a̧: a̧ tɛ pii ɗoŋ. Dekpaa a̧ hɔɔ hɛ̧ɛ̧.»

⁷Anna kifa: «Mɛ kpe nú-mɛ! mɛ́ ɔr nɛ‘m! bem kɔ‘m fee kaɗi!» Wese lɛŋ, a̧ gbo zan nɛ hayaa mɛ zɔk mɔ si yuwar nɛ bem baa so, wen a̧ kɔ̧ so mɛ zíí wen kɔ ŋma bíí na. Dam ɗoŋ ga̧a̧mɔ lɛŋ, tɛ yee-wese a̧ ye tua, a̧ kiŋgili tɛ-a nɛ nu zaŋ zɛ lɛŋ, hi̧i̧ nɛ kɔ̧a, yá hɔ yi a̧ na.

⁸Ɗoŋ nɛ zɛ ɓu-zu-a-náár, nɛ Raguɛl gɔna so wen gbaŋa baakóò dama kaɗi, Tobia tɔ̧ɔ̧ ha̧ for wi: «Ɛnɛ e ha̧‘m si, wen mi iŋa dáà kɔ‘m in nàà kɔ‘m bo nɛ taamɔ zɔka'm ɓɔ na. Hegɔ, dɛ́ kɔ‘m, mi ai nú‘m h’ɛ́nɛ́, ɛnɛ e yuwar ha̧‘m mɛ si tɛ ko dáà kɔ‘m, wen mi baa tɔ̧ so nyɛrɛ dukaa, n'am e nɛ wa sɛnɛ h’ɛ́nɛ́. »

⁹Raguɛl tɔ̧ ha̧ Tobia: «Bem kɔ‘m, ká mɛ yak na! mɛ duk in am! Mi tɛ tom bíí mɛ tɔ nyɛrɛ dukaa kɔ-mɛ ha̧ dáà kɔ-mɛ.» Tobia tɔ̧a̧: «Weyaa! mi ai nú h’ɛ́nɛ́! ɛnɛ é‘m mɛ si ɗoŋ tɛ kɔ dáà kɔ‘m!»

¹⁰Wen'i nu'i, ɓɛɛ Raguɛl ha̧ kóò kɔ̧-a̧ Sara ha̧ a̧, in reta mbɔi kɔ-a̧ lɛŋ mbɛt: o wi-de-tom in o koo-de-tom, o ndai in o sami, o tuifuu in o ŋgeloba, o laa, o sede, o nyɛk, in o ŋma mɔ nɛtɛ nɛtɛ.

¹¹A̧ e ha̧ wa mɛ si nɛ desee, ɓɛɛ a̧ war Tobia, hee mɔ'ɔ ga: «De hayatɛ ha̧ mɛ, bem kɔ‘m, mɛ si nɛ dea. Gasa Wan mɛ yiwese a̧ duk ti h’ɛ́nɛ́, mɛ in kóò kɔ-mɛ Sara! A̧ a̧ de ha̧‘m mɛ zɔk o bem k’ɛ́nɛ́ nɛti ha̧‘m mɛ fe! »

¹²A̧ tɔ̧ɔ̧ ha̧ bem kɔ̧-a̧ Sara: «Mɛ̀ nɛ́ tɛ ko o for-mɛ, wen wa nɛ́ o dáà kɔ-mɛ kinii, hee ɛɛ n’ɛɛ́ koo mɛ ga. Bem kɔ‘m, mɛ nɛ́ ɗɔɔ ga̧a̧mɔ, mi kɔ̧ɔ̧ mɛ zíí nɛ́ nyɛrɛ demɔ kɔ-mɛ, ŋgimbi n’ɛɛ́ ɓɔna nɛ gbaayí-ɛɛ kaŋ.» A̧ wara wa, ɓɛɛ a̧ e wa yak.

¹³Ɛdna mbɛt tɔ̧ɔ̧ ha̧ Tobia: «Yaa-dua-see'am, Gasa Wan a̧ mgbɔ mɛ sinɛ nɛ dea. A̧ a̧ de ha̧‘m mɛ zɔk o bem k’ɛ́nɛ́ in Sara, nɛti ha̧‘m mɛ fe. Mi ha̧bokobem kɔ‘m ha̧ mɛ, nɛ nin Gasa Wan: mɛ kasi a̧ nɛ dea. Ká mɛ ha̧ tu̧u̧see ha̧ a̧ tɛ dukaa kɔ-mɛ zaŋnu’ɛ na! Bem kɔ‘m, mɛ nɛ ɗɔɔ ga̧a̧mɔ. Kinii mi nɛ nàà kɔ-mɛ, ɓɛɛ Sara nɛ bokonya-mɛ. Sɔ̧ a̧ de h’ɛ́ɛ́ mɛ kpa nɛ kpɔk desee tɛ dukaa k’ɛ́ɛ́ lɛŋ» Ɛdna hɛra wa yiitoo lɛŋ, ɓɛɛ a̧ e ha̧ wa mɛ yak nɛ gasa desee.

¹⁴Nɛ́ hegɔ a̧ Tobia gboo nɛ tɛ ko Raguɛl si nɛ tortɛ in nɛ nyɛŋɛ, de nɛ osoko ha̧ Gasa Wan mɛ yiwese in zaŋnu, Wi nɛ ɔ wan zu mɔ lɛŋ, wen A̧ dea ha̧ nɔ kɔ̧-a̧ mɛ ba nɛ a̧. Raguɛl tɔ̧ɔ̧ ha̧ a̧ woyo: «Sɔ̧ a̧ de ha̧ mɛ mɛ kpa desee, tɛ tu̧u̧ tɛ̧ o dáà kɔ-mɛ, wese lɛŋ tɛ duka-kpasa kɔ-wa.»