Read Northwest Gbaya TOBIT 11 Bible Online

TOBIT 11 - Northwest Gbaya bible

TOBIT 11

¹Hee mɔ'ɔ nɛ wa hɛɗa ka Kaserin ti Ninivɛ kaɗi ga, Rafaɛl tɔ̧a̧:

²«Mɛ iŋa hee mɔ'ɔ n’ɛɛ́ ee nɛ dáà kɔ-mɛ ga.

³Ɛɛ yak ti ha̧ kóò kɔ-mɛ, h’ɛ́ɛ́ mɛ nɛ ɗafi mɔ kɔ̧ tua, nɛti ha̧ a̧ mɛ hɔ in o dɔka bíí.»

⁴Wa kaia ŋmaa yiitoo lɛŋ yaknɛ. (Rafaɛl baa tɔ̧ so ha̧ Tobia: «Mɛ kasi pa̧i-zoro er-mɛ»). Ɓɛɛ kó toyo ko Tobia, kana nɛ ndaka ɗoŋ wa.

⁵Ŋgimbi'i, Anna dúk nɛ nu ka yuwar zɔk nɛ mɔ fara nɛ bem kɔ̧-a̧ tɛ pii nɛnɛ.

⁶A̧ zɔka a̧ fara piaa, ɓɛɛ a̧ tɔ̧ ha̧ dáà kɔ̧-a̧: «Mɛ zɔk bem kɔ-mɛ nɛ pii in gbamayari kɔ‘i mɛ‘i’ɛ.»

⁷Rafaɛl tɔ̧ɔ̧ ha̧ Tobia, nɛti ha̧ a̧ mɛ hɔ katɛ dáà kɔ̧-a̧: «Mi iŋa'e yí-dɛ́ kɔ-mɛ tɛ hu̧i̧.

⁸Mɛ a pa̧i-zoro yi-a̧; nyina tɛ fok, ɓɛɛ tɛ fo wíì yí-a yinɛ; ɓɛɛ dáà kɔ-mɛ tɛ zɔk mɔ nɛ sa̧-a̧, hee kuti-a nɛti ga.»

⁹Anna maa yi hɛr bem kɔ‘i, ɓɛɛ tɔ̧ ha̧ a̧: «Mi zɔka mɛ woyo, bem kɔ‘m, kinii mi nyɛma mɛ fe», ɓɛɛ a̧ zu nú-a̧ tɛ kɔ̧a̧.

¹⁰Tobit kura, tam nɛ mɔ nɛk nɛk nɛnɛ, ɓɛɛ gbo nɛ nutua mɛ beegara.

¹¹Tobia ɗɔŋa si ka tɛ dáà kɔ‘i, kasi nɛ pa̧i-zoro er, a̧ ufa si kɔ̧ yi-dɛ́ kɔ̧-a̧, ɓɛɛ a̧ tɔ̧ kasi nɛ a̧: «dɛ́ kɔ‘m, ɛnɛ nɔ́ ŋgiɗi!» A̧ aa nyina yí-a, kasi nɛ a̧ yor nɛnɛ.

¹²Nɛ er-a yiitoo, a̧ wɛna yí-dɛ́ kɔ̧-a̧, ɓɛɛ wii hui a nu.

¹³Tobit hɛra ger-a rɔɔm, híí nɛ kɔ̧a̧, ɓɛɛ tɔ̧ ha̧ a̧: «Mi zɔka mɛ woyo, bem kɔ‘m nɛ mɛ dúk nɛ sa̧a̧mɔ yí‘m.»

¹⁴Ɓɛɛ a̧ tɔ̧: «Osoko ha̧ Sɔ̧. Ɛɛ gasi nɛ sa̧-a̧ nin-A̧. Ɛɛ zɔn nɛ o sa̧a̧ betom kɔ̧-A̧ lɛŋ. Sɔ̧, nɛ nin-A̧ ɔ sa̧-a̧, a̧ pɛm yɛ! Ɛɛ zɔn nɛ o sa̧a̧ betom kɔ̧-a̧ lɛŋ kpoo nɛ kpoo! Wen Gasa Wan ee so'm tɛ gasa bɔnɛ, ɓɛɛ kinii mi zɔk nɛ bem kɔ‘m Tobia woyo

¹⁵Tobia yee kɔ tua nɛ nyɛŋɛ, zɔn nɛ nin Sɔ̧ nɛ heeger. A̧ tɔ̧ɔ̧ ha̧ dáà kɔ̧-a̧‘e nɔ kɔ‘i baa nɛ wi, wi baa mbɔi piinɛ, in wi baa Sara, bem ko Raguɛl, nɛ kóò mbɛt, ɓɛɛ a̧ tɔ̧ siti'e: «A̧ hɛɗa hɔaa kaɗi, a̧ nyɛi̧ nɛ nu garo Ninivɛ na.»

¹⁶Tobit nɛɛ nɛ desee gasi nɛ Sɔ̧, we ti for-a si war nu-garo Ninivɛ mɛ. Nɛ o bíí Ninivɛ be zɔk'a fara nɛ nɔ ɛnɛ-a, ŋma bíí duk ti ha̧ a̧ na, ɗɛɗɛ-wa gɔna nyɛmna. Tobit tɔ̧ɔ̧ ha̧ wa'e Sɔ̧ zɔka wi nɛ ko, ɓɛɛ hu̧i̧ yi-wi.

¹⁷A̧ hɔa katɛ Sara, kóò ko bem kɔ̧-a̧ Tobia, a̧ toka de yoŋgo a zu a̧, tɔ̧ nɛnɛ‘e «Mɛ hɔa nɛ dea nde, bem kɔ‘m? Osoko ha̧ Sɔ̧ kɔ-mɛ, nɛ mgbɔɔ mɛ tɛnɛ hɔ tɛ k’ɛɛ'ɛ. Sɔ̧ a̧ tok de yoŋgo zu dáà kɔ-mɛ, Sɔ̧ a̧ tok de yoŋgo zu bem kɔ‘m Tobia, Sɔ̧ a̧ tok de yoŋgo zu mɛ, bem kɔ‘m. Mɛ ye kɔ̧ tua kɔ-mɛ, mɛɛ, mɛɛ ha̧ mɛ! de yoŋgo in desee ha̧ mɛ, bem kɔ‘m! mɛ ye tua!»

¹⁸Sen wese'i, o be-Juif nɛ a̧a̧ Ninivɛ lɛŋ kpaa desee.

¹⁹Ahikar in Nadan, o be-nɔkɔ ko Tobit, tɛa nɛ desee tɛ kɔ̧-a̧ mbɛt.