Read Northwest Gbaya TOBIT 12 Bible Online

TOBIT 12 - Northwest Gbaya bible

TOBIT 12

¹Ŋgimbi nɛ gbaŋa-baakóò kaɗa kaɗi, Tobit saa bem kɔ‘i Tobia, ɓɛɛ tɔ̧ ha̧ a̧: «Bem kɔ‘m, mɛ ha̧ sede-tom ko gbamayari kɔ-mɛ ha̧ a̧, ɓɛɛ mɛ e mbe mɔ zu a ha̧ a̧ mbɛt.»

²Tobia kifa ha̧ dáà kɔ‘i: «Dáà, mi tɛ ha̧ ha̧ a̧ gee? Kóó mɛ kɛ̧ nɛ mbɔi nɛ ɛɛ baa piinɛ tan ka see-a ha̧ a̧, mi beka'm tik na.

³A̧ mgbɔa’ m piinɛ, kóó ŋma mɔ kpa'm na; a̧ kpasa kóò kɔ‘m, a̧ baa mbɔi piinɛ in am, a̧ kpasa ‘nɛ́ mbɛt! Nɛ ge mɔ ge a̧‘m tɛ ha̧ ha̧ a̧, oi mɔ'ɔ nɔ‘i lɛŋ ge?»

⁴Tobit tɔ̧̧: «Bem kɔ‘m, nyɛma so ha̧ a̧ mɛ ba reta mɔ n'a̧a̧ ba piinɛ lɛŋ.»

⁵Tobia sa a̧, ɓɛɛ tɔ̧ ha̧ a̧: «Mɛ ba reta mɔ nɛ mɛ baa piinɛ lɛŋ. Nɛ́ mbɔi-tom kɔ-mɛ, ɓɛɛ mɛ si ɗɔɔ ga̧a̧mɔ!»

⁶Rafaɛl saa wa yiitoo benaŋ si mgbɔɔr, ɓɛɛ tɔ̧ ha̧ wa: «Ɛnɛ dé osoko ha̧ Sɔ̧, ɛnɛ hú̧r nin-A̧ sɛn ti bíí lɛŋ, wen demɔ n'A̧a dee in'nɛ́. O dee ha̧‘i mɛ gasi A̧, in mɛ zɔn nin-A̧. Ɛnɛ déà ha̧ o bíí lɛŋ mɛ iŋ o mɔ n'A̧a dea, hee mɔ'ɔ nɛ nyɛma sɛnɛ ga. Ká tɛ-‘nɛ́ mbɔi tɛ zɔna A̧ na.

⁷Ɔ dee ha̧‘i mɛ kasi hu̧samɔ ko wannu nɛ dea, ɓɛɛ nɛ ko o tom nɛ Sɔ̧ dea, wi tɛ tɔ̧ kana nɛ nyɛrɛ-a, hu̧r nɛ nin-A wen a mbɛt, hee mɔ'ɔ nɛ nyɛma sɛnɛ ga. Ɛnɛ dé demɔ, ɓɛɛ bɔnɛ beka kpa ‘nɛ́ na.

⁸Kɔfa Sɔ̧ nɛ kpasaa, in gbaka o wisan nɛ yuwar-a gana kpaa dɔka mbɔi nɛ rikisi. Gana so ha̧mɔ ha̧ wisan bá nɛ mɔi̧a̧ lɔr.

⁹Ha̧a̧ mɔ ha̧ wisan gbo nɛ wi tɛ fio, ɓɛɛ fɔra ɗaŋmɔ tɛ wi yinɛ mbɛt. O wi nɛ gbak wisan tɛ duk nɛ dɔka zɛ zaŋnu.

¹⁰O wi nɛ de ɗaŋmɔ in gɔɔmɔ wa sɛn nɛ tɛ-wa.

¹¹Kinii mi tɛ tɔ̧ kpasawen lɛŋ h’ɛ́nɛ́, ŋma mɔ n'am tɛ hu̧si nɛ ɛ́nɛ́ bo na. Mi tɔ̧ h’ɛ́nɛ́ kinii nde'i: ɔ dee mɛ kasi hu̧samɔ ko wannu nɛ dea, in mɛ de ha̧ nyɛrɛ gasa tom ko Sɔ̧ mɛ hu̧r.

¹²Hegɔ, ŋgimbi nɛ mɛ kɔfa nɛ Sɔ̧, mɛ in Sara, nɛ́ mi a̧‘m baa kɔfamɔ k’ɛ́nɛ́ e ti Gasa Wan; ŋgimbi nɛ mɛ duka so gun nɛ o fio mbɛt.

¹³Ŋgimbi nɛ mɛ nik so naŋ-mɛ tɛ kuraa, e nɛ nyɔŋmɔ kɔ-mɛ dúk mɛ nɛ gun fio na, mɛ nɛ kpɔk ŋgimbi'i a̧ Sɔ̧ toma so nɛ‘m mɛ́ we mɛ.

¹⁴Kpɔk ŋgimbi'i mbɛt, Sɔ̧ toma so'm mɛ kpasi mɛ in be-for-mɛ Sara mbɛt.

¹⁵Nɛ́ mi Rafaɛl, ŋma kpɔk mgbara o betom ko Sɔ̧ mɔɔrɔ-ɗoŋ-yiitoo, nɛ ya ti Gasa Wan Sɔ̧, Wan gasamɔ, in nɛ dúk dɔ̧́ɔ̧́ wen dea tom ha̧ A̧.»

¹⁶Tobit in bem kɔ‘i yaa ɓeke-yeke, kii dee wa nyɛmna, ɓɛɛ wa ba yi-wa gu nù.

¹⁷Rafaɛl tɔ̧ɔ̧ ha̧ wa: «K’ɛnɛ de kii na! ga̧a̧mɔ a duk in'nɛ́! ɛnɛ dé osoko ha̧ Sɔ̧ ŋgimbi lɛŋ!

¹⁸Ŋgimbi n'am duka in ‘nɛ́ɛ́, bo nɛ tɛ kɔ̧ɔ̧mɔ kɔ‘m a'm duka nɛnɛ na, ɓɛɛ nɛ tɛ kɔ̧ɔ̧mɔ ko Sɔ̧. Nɛ́ A̧ ɛnɛ tɛ bii gima ha̧ A̧ gasi nɛnɛ dam ɗɔŋ wese lɛŋ.

¹⁹Ŋgimbi n’ɛnɛ taa so mi nyɔŋ nɛ mɔ, bo nɛ mi nyɔŋ so nɛ mɔ na, nɛ gee búk-tɛ‘m.

²⁰Hegɔ, ɛnɛ gási Sɔ̧ sɛn zaŋnu’ɛ, ɛnɛ zɔn gasamɔ kɔ̧-A̧. Ɓɛɛ kinii mi sia kɔ‘m ɗoŋ, si katɛ wi nɛ toma'm tɛnɛ. Ɛnɛ yɔr mɔ nɛ hɔa lɛŋ.» Ɓɛɛ Rafaɛl kur daŋ si tɛ Sɔ̧.

²¹Wa baa zu-wa nɛ ŋgɔn, ɓɛɛ wa nyɛm mɛ zɔk a̧ ɓɔ na.

²²Wa bia gima gasi nɛ Sɔ̧, ɓɛɛ wa zɔn A̧ wen o gasa mɔ n'A̧a dea: nɛ́ ŋma betom ko Sɔ̧ a usa tɛ ha̧ wa.