Read Northwest Gbaya TOBIT 13 Bible Online

TOBIT 13 - Northwest Gbaya bible

TOBIT 13

¹Ɓɛɛ Tobit tɔ̧:

²«Ɛɛ zɔn Sɔ̧ nɛ duk kpasá, nɛ ɔ wan kpoo nɛ kpoo! Nɛ́ A̧ a̧ usi bɔnɛ ha̧ bíí, nɛ́ A̧ a de ko ha̧ bíí mbɛt. A zir bíí si fara ko o fio, sɛn ɗuka ɗɔɔ nu mɛ, A̧ gboo bíí tɛ gasa yɔɔmɔ mbɛt: ŋma mɔ nɛ yun er-A bona. »

³Ɛnɛ o be Israɛl, ɛnɛ hú̧r nin-A sɛn ti dukbíí lɛŋ, n'A̧a pɛsa'nɛ́ si sɛnɛ.

⁴Wen nɛ sɛn fara'i a A̧ usa gasamɔ kɔ̧-A̧ h’ɛ́nɛ́. Ɛnɛ zɔ́n A̧ sɛn ti bíí lɛŋ nɛ duk kpasá, wen A̧ nɛ Gasa Wan k’ɛ́ɛ́, Sɔ̧ k’ɛ́ɛ́, Dáà k’ɛ́ɛ́, A̧ nɛ Sɔ̧ kpoo nɛ kpoo

⁵A̧ nɛ́ usa bɔnɛ h’ɛ́nɛ́, nɛ́ wen ɗaŋmɔ k’ɛ́nɛ́, ɓɛɛ A̧ tɛ de ko h’ɛ́nɛ́ lɛŋ woyo, A̧ tɛ mɔi̧ ‘nɛ́ piinɛ ɗɔŋ nɛ mgbara o dukbíí lɛŋ, n'A̧a pɛsa ‘nɛ si sɛnɛ.

⁶Wese n’ɛnɛ tɛ pii ɗɔŋ tɛ A̧, nɛ see'nɛ́ lɛŋ, in nɛ tɛ-‘nɛ́ lɛŋ, de nɛ tom ha̧ A̧ nɛ kpasaa, A̧ tɛ pii ɗoŋ tɛ ‘nɛ́, ɓɛɛ A̧ beka hu̧si sɔnti-A̧ nɛ ɛnɛ ɓɔ na.

⁷Ɓɛɛ kinii, ɛnɛ zɔ́k mɔ n'A̧a dea wen ɛnɛ, ɓɛɛ ɛnɛ hú̧r nin-A̧ nɛ heeger, ɛnɛ zɔ́n Gasa Wan yaa-demɔ nɛ yuwar-a, ɛnɛ gási Wannu nɛ dúk kpoo nɛ kpoo.

⁸War kɔ‘m, mi hu̧r nɛ nin-A̧, sɛn nu nɛ wa baa'm nɛ bara si sɛnɛ, mi tɔ̧ nɛ nyɛrɛ ŋgai kɔ̧-A̧ in gasamɔ kɔ̧-A̧ ha̧ zuduk-bíí-de-ɗaŋmɔ. Ɛ́nɛ́, o wi-de-ɗaŋmɔ, ɛnɛ píi ɗoŋ sɛn tɛ A̧, ɛnɛ dé mɔ nɛ yuwar-a sɛn ti A̧. O'o iŋa o, ŋmafara A̧ tɛ kpɛk ‘nɛ́ nɛ dea, ɓɛɛ A̧ tɛ zɔk ‘nɛ́ nɛ ko.

⁹Mi hu̧r nɛ nin-Sɔ̧ kɔ‘m, nɛ ɔ gasa, nyɛŋɛ pi̧ nɛ‘m wen zu Wan mɛ yiwese.

¹⁰Bíí lɛŋ á gasi nɛ gasamɔ kɔ̧-A̧, wa á̧ hur nɛ nin-A̧ sɛn Jerusalɛm! Jerusalɛm, sa̧-a̧ gasa ye, Sɔ̧ usi bɔnɛ ha̧ mɛ wen zu ɗaŋmɔ ko o bezaŋ-mɛ, ɓɛɛ A̧ tɛ de ko ha̧ o bezaŋ widemɔ nɛ yuwar-a woyo.

¹¹Mɛ hú̧r nin Gasa Wan, nɛ heeger, mɛ gási Wannu nɛ dúk kpoo nɛ kpoo, wen ha̧ wa mbo Tua kɔ̧-A tɛ-mɛ woyo nɛ desee.

¹²A̧ a̧ de ha̧ o wi nɛ wa kaia so nɛ bara mɛ kpa desee wen zu mɛ; A̧ a̧ kɔ̧ o wi-bɔnɛ lɛŋ, nɛ ɗoŋ mɛ, hegɔ tɛ pɛrnam ɗoŋ ŋmaa ɗoŋ ŋmaa.

¹³Gasa sa̧a̧mɔ tɛ nyɛk hɔ nduti nu mɛ. O dukbíí nɛ dɔkaa tɛ́ tɛ nɛ nyɛ́í̧á fara pii sɛn tɛ-mɛ, o bíí tɛ́ tɛ nɛ mgbiizan lɛŋ, hɔ tɛ-mɛ, er-wa duna nɛ o ha̧a̧mɔ wen Wan mɛ yiwese; o pɛrnam ɗoŋ ŋmaa ɗoŋ ŋmaa tɛ ha̧ desee ha̧‘m sɛn beegara kɔ-mɛ, ɓɛɛ tɛ o pɛrnam mɛ ɗoŋ tɛ mbaŋ ɗoŋ nin-mɛ, Jerusalɛm,

¹⁴Fom a tik zu o wi nɛ tɛ tɔ̧ ŋga wen a zu mɛ! Fom a tik zu o wi nɛ tɛ yai mɛ yinɛ, nɛ tɛ gbin o garo kɔ-mɛ a nu, nɛ tɛ gɔm o kusa taŋgada-pɛm-mɔ kɔ-mɛ a nu, in nɛ tɛ dɔ o tua kɔ-mɛ a nu! Ɓɛɛ de yongo a duk zu o wi nɛ tɛ yu kii mɛ ɓɔnsɛnɛ!

¹⁵Mɛ nɛ, mɛ de yɛŋɛ wen zu o bezaŋ widemɔ nɛ yuwar-a, wen wa tɛ mɔi̧ ŋmaa lɛŋ woyo mɛ gasi Sɔ̧ nɛ dúk kpoo nɛ kpoo. Desee a̧ dúk in o wi nɛ kɔ̧ɔ̧ mɛ! Desee a̧ dúk in o wi nɛ ga̧a̧mɔ kɔ-mɛ tɛ de tɛ-wa.

¹⁶Desee a̧ dúk in o wi nɛ tɛ ya nɛ ɗaŋsee wen zu o bɔnɛ nɛ tɛ tik zu mɛ. Desee kɔ-mɛ tɛ duk nɛ desee kɔ-wa. Wa tɛ ya nɛ desee in mɛɛ ɓɔnsɛnɛ. Ii, mi tɛ zɔn nɛ Gasa Wan, mi tɛ zɔn gasa Wannu,

¹⁷wen wa tɛ mbó Jerusalɛm woyo, ɓɛɛ Tua ko Gasa Wan tɛ yor ŋgɔn sɛnɛ kpoo nɛ̀ kpoo. Jerusalɛm, oé! desee n'am tɛ kpa, ka oi pɛrnam kɔ‘m tɛ zɔk gasamɔ kɔ-mɛ, in ka wa zɔn Wan mɛ yiwese wa! Wa tɛ mbó o nú-garo Jerusalɛm, nɛ de ta nɛ tok kɛn kɛn, nɛ‘i sa'e safir in emerod, wa tɛ mbo o ŋgɛŋ kɔ̧-a̧ lɛŋ nɛ o de ta nɛ gɛnɛ-a ɔ ŋgaya, o taŋgada tɛ de nɛ lɔr, in o ŋgárá nɛ sa̧-a̧ lɔr. O yuwar mgbara kira tɛ de nɛ o gbɛ̧ ta «rubis» in o de ta «ofir».

¹⁸Wa tɛ bii gima-desee sɛn nú-garo Jerusalɛm. Sɛn kɔ̧ tua lɛŋ wa tɛ bii «Aleluya! Ɛnɛ zɔ́n Sɔ̧ ko Israɛl», ɓɛɛ o bíí nɛ Sɔ̧ hoka tɛ zɔn sa̧-a̧ nin-A̧ kpoo nɛ kpoo.