Read Northwest Gbaya TOBIT 14 Bible Online

TOBIT 14 - Northwest Gbaya bible

TOBIT 14

¹Nɛ hegɔ a̧ Tobit kaɗa nɛ̀ dee osoko ha̧ Sɔ̧.

²Tobit fea zaŋ ga̧a̧mɔ, ka a̧ kpaa nɛ́ pɛ gɔmŋmaa nɛ pɛ ɓu-zua-yiitoo, ɓɛɛ wa gun a̧ sɛn Ninivɛ tɛ gasa ɓɔɔmɔ. Yí-a boma, ká a̧ a̧ nɛ pɛ ɓu-mɔɔrɔ-ɗoŋ-kpɔk-zua-yiitoo. Ɗoŋ nɛ yí-a húi̧a woyo kaɗi, a̧ duka zaŋ kpaa dɔka mɔ, in ha̧mɔ nɛ dɔkaa ha̧ o wisan mbɛt. A̧ kaɗi dee osoko ha̧ Sɔ̧ in hú̧ra nin-A̧ na mbɛt.

³Ŋgimbi n'a̧a̧ hɛɗa fio kaɗi, a̧ saa bem kɔ̧-a̧ Tobia pii katɛ a̧, ɓɛɛ tɔ̧ ha̧ a̧: «Bem kɔ‘m, mɛ kai o bem kɔ-mɛ,

⁴a̧ mɛ yak nɛ hayaa si sɛn nu Medii, wen mi kɔ̧ɔ̧ ɗɔɔ wen nɛ Sɔ̧ tɔ̧a̧ zu Ninivɛ, nɛ nu Nahum; mɔ'ɔ nɔ‘i lɛŋ tɛ de, ɓɛɛ tɛ tik zu Asur in Ninivɛ: mɔ lɛŋ nɛ o wi-tɔ̧-wen oi nu Sɔ̧, nɛ Sɔ̧ toma nɛnɛ si Israɛl tɔ̧a̧ tɛ hɔ. O wen nɛ wa tɔ̧a̧ lɛŋ, kóó kpɔk beka tik nu gee na; o mɔ'ɔ nɔ‘i lɛŋ tɛ hɔ sɛn ŋgimbi-a. Wi tɛ duk nɛ dea sɛn nú Mɛdii gan nú Asirii in Babilɔŋ. Wen mi iŋa, in mi kɔ̧ɔ̧ɗɔaa ndemɔ nɛ Sɔ̧ tɔ̧̧ lɛŋ tɛ hɔ gba̧a̧, kóó ŋma wen kpɔk nɛ o wi-tɔ̧-wen oi nú Sɔ̧ tɔ̧̧ beka tik nu gee na. Wa tɛ tɔr o nya-ɛɛ nɛ ɔ sɛn nú Israɛl lɛŋ, ɓɛɛ wa tɛ kai wa nɛ bara yaknɛ, nyɛi̧ nɛ nu bɔtɛ‘i. Nu Israɛl lɛŋ tɛ kifi ŋgoyoro, Samarii in Jerusalɛm tɛ duk ŋgoyoro. Wa tɛ dɔ Tua ko Sɔ̧ a nu, tɛ kifi nɛ bɛɛ-oi wen ŋma ŋgimbi.

⁵«Sɔ̧ tɛ de ko ha̧ wa woyo, ɓɛɛ A̧ tɛ kai wa piinɛ sɛn nú Israɛl. Wa tɛ mbo tua kɔ̧-A̧ woyo, ɓɛɛ bo nɛ hee kuti-a ga na, hegɔ hɔ ŋgimbi nɛ Sɔ̧ gɔna. Ɗoŋ mɔ‘i, o be Israɛl lɛŋ tɛ gbo tɛ bara, ɓɛɛ wa tɛ mbo Jerusalɛm nɛ gba dea woyo. Wa tɛ mbo Tua ko Sɔ̧ woyo, hee mɔ'ɔ nɛ o wi-tɔ̧-wen oi nú Sɔ̧ baa tɔ̧ so ga.

⁶O dukbíí lɛŋ tɛ pii ɗoŋ tɛ Sɔ̧ nɛ kpasaa, ɓɛɛ wa tɛ yu A̧. Wa lɛŋ, wa tɛ e o geesɔ̧ nɛ dúka so mɛ ɔr wa dúk, ɓɛɛ wa tɛ gasi nɛ kpasa Sɔ̧ nɛ dúk kpoo nɛ kpoo, sɛn tɛ deemɔ nɛ yuwar-a, nɛ gbaayí-A̧

⁷O be-Israɛl lɛŋ nɛ tɛ kpasi wese'i, wen nɛ tɛ-wa mbaŋa ɗoŋ Sɔ̧ nɛ mbetɛ, tɛ mɔ́i̧ ŋmaa, ɓɛɛ wa tɛ nɛ Jerusalɛm. Wa tɛ ɔ sɛn nu ko Abraham nɛ dea, kpoo nɛ kpoo, ŋma mɔ beka nukuri wa na, nu'i tɛ duk nɛ kɔ-wa. O bíí nɛ tɛ kɔ̧ Sɔ̧ nɛ kpasaa tɛ ya nɛ desee, ɓɛɛ o bíí nɛ de ɗaŋmɔ in gɔɔmɔ tɛ yu zu nu’ɛ.

⁸Ɓɛɛ kinii, o bem kɔ‘m, mɔ n'am kɔ̧ɔ̧ mɛ tɔ̧ h’ɛnɛ nɛ mɔ'ɔ: ɛnɛ dé tom ha̧ Sɔ̧ nɛ kpasaa, ɓɛɛ ɛnɛ dé mɔ nɛ de tɛ-A̧. Ɛnɛ úsí ha̧ o bem k’ɛ́nɛ́ mɛ demɔ nɛ yuwar-a in mɛ gbak o wisan, tɛ-wa a̧ mbaŋ ɗoŋ Sɔ̧ tɛ ŋgimbi lɛŋ: wa a̧ zɔn A̧ nɛ kpasaa, in nɛ ŋgai tɛ-wa lɛŋ. Ɓɛɛ, nɛ kɔ-mɛ, bem kɔ‘m, mɛ yu Ninivɛ, ka mɛ duk hɛ̧ɛ̧ na! Kà mɛ̀ nɛ́ guna naa kɔ-mɛ sɛn katɛ‘m kaɗi, ká mɛ de zɛ kpɔk oi-aa sɛn saaye’ɛ na. Wen mi zɔka gɔɔmɔ ɔ dɔka saaye’ɛ, wa yɔ kaya mɔ, ɗoŋ ŋmaa ɗoŋ ŋmaa: foe de wa na.

¹⁰Bem kɔ‘m, mɛ zɔ́k mɔ nɛ Nadan dea in Ahikar, dáà nɛ kasa a̧: bo nɛ a̧ dee ha̧ a̧ mɛ zir kɔ̧́ kɔ̀ nɛ kpasa na nde? Sɔ̧ kifa er ɗaŋmɔ ha̧ Nadan nɛ gbaayí-a̧. Ahikar pia ɗoŋ tɛ sa̧a̧mɔ, ɓɛɛ Nadan yee kɔ‘i zaŋ tum kpoo nɛ kpoo, wen a̧ kia so yuwar mɛ gbɛ Ahikar. Wen n'aa gbak so o wisan, Ahikar gboa tɛ pɛr nɛ Nadan tuia há̧ a̧‘i, ɓɛɛ Nadan tik yi pɛr kɔ‘i, ɓɛɛ fe.

¹¹Hegɔ, o bem kɔ‘m, ɛnɛ zɔk mɔ'ɔ-oi gbaka wisan, in mɔ'ɔ-oi dee gɔɔmɔ. Kinii, mi iŋa, ŋgimbi kɔ‘m hɔa kaɗi.» Wa baa a̧ e gɔn gado kɔ̧-a̧, ɓɛɛ a̧ fe. Wa guna a̧ tɛ gasa ɓɔɔmɔ.

¹²Ŋgimbi nɛ nàà kɔ̧-a̧ fea, Tobia guna a̧ katɛ dáà kɔ‘i, ɓɛɛ a̧ yak in kóò kɔ̧-a̧, si sɛn nú Mɛdii, a̧ nɛɛ ɔ ye sɛn Ekbatanɛ, katɛ for-aa Raguɛl

¹³A̧ zɔka o for-aa nɛ dea tɛ sɔki kɔ-wa. A̧ guna wa sɛn Ekbatanɛ, sɛn nú Medii ɓɛɛ a̧ kai o mɔɔ-oi Raguɛl, hee mɔ'ɔ n'aa kaia so nɛ ko dáà kɔ̧-a̧ Tobit ga.

¹⁴A̧ fea, nɛ oi tu̧u̧-tɛ-mɔ, ká a̧ a̧a̧ nɛ pɛ gɔmŋma nɛ pɛ ɓu-zua-mɔɔrɔ-ɗoŋ-yiitoo.

¹⁵Nɛti ha̧ a̧ mɛ fe, a̧ zia nyɛrɛ yaiaa ko ye Ninivɛ, ɓɛɛ a̧ zɔk o be Ninivɛ nɛ Syaxare, wan nú Mɛdii, kaia so nɛ bara, fara hɔaa sɛn nú Mɛdii. A̧ dee osoko ha̧ Sɔ̧, wen mɔ n'A̧a dee in o be Ninivɛ in wan mɛ Asirii. Nɛti ha̧ a̧ mɛ fe, a̧ kpaa desee wen mɔ nɛ tika zu ye Ninivɛ, ɓɛɛ a̧ de osoko ha̧ Gasa Wan Sɔ̧, nɛ nyɛma ha̧ bíí mɛ zɔn kpoo nɛ kpoo. Amɛn.