Read Northwest Gbaya TOBIT 2 Bible Online

TOBIT 2 - Northwest Gbaya bible

TOBIT 2

¹Ŋgimbi wan ko Asarhadɔn, mi sia ɗoŋ tɛ kɔ‘m, ɓɛɛ wa ha̧ koo kɔ‘m Anna in bem kɔ‘m Tobia ha̧‘m siɗoŋ woyo. Tɛ gbaŋa Pentekot k’ɛ́ɛ́ (nɛ‘i sa'e «gbaŋá ko o sa̧-a̧ alat mɔɔrɔ-zaŋ-a-yiitoo) wa gia de nyɔŋmɔ ha̧‘m, ɓɛɛ mi duk nu mɛ nyɔŋ,

²ɓɛɛ wa ba taŋe-nyɔŋmɔ e ti'm, wa kaia o de nyɔ nyɔŋmɔ tɛnɛ, ɓɛɛ mi tɔ̧ ha̧ bem kɔ‘m Tobia nde» Bem kɔ‘m, mɛ nɛ sɛn Ninivɛ, ɓɛɛ, mgbara o nya-ɛɛ, nɛ wa kaia nɛ bara si hi̧i̧, kà mɛ̀ nɛ́ kpaa ŋma wisan, nɛ tɛ-a mbaŋa ɗoŋ Gasa Wan Sɔ̧, in nɛ e ta nɛ A̧ mbɛt, ɓɛɛ mɛ mgbɔ a̧ tɛnɛ, ha̧ a̧ mɛ nyɔŋ mɔ in yɛɛ. Mi tɛ zɛm mɔ hɔ ŋgimbi pia-ɗoŋ kɔ-mɛ.

³Tobia yaka mɛ kii ŋma wisan mgbara o nya k’ɛ́ɛ́. A pia, ɓɛɛ tɔ̧: «Dáà!», mi kɔ̧ɔ̧ɗɔa: «Bem kɔ‘m, nɛ ge?» ɓɛɛ a̧ kifi: «Wa gbɛa ŋma zuduk k’ɛ́ɛ́, wa nɔkɔɗa nɛ́ ger-a gbɛ nɛ a, ɓɛɛ wa pi wɔr-a sɛn beegara mɛ‘i: a̧ ɓɔna hi̧i̧ hɔ kinii»

⁴Mi kura nɛ hayaa, siŋ nyɔŋmɔ kɔ‘m e duk nɛ oi-aa, mɛ nɛɛ ba wɔr-a beegara yinɛ, nɛɛ hu̧si sɛn ŋma bɛrtua, pɛm nɛ yee-wese, sɛka'm guna a̧.

⁵Ɗoŋ n'am sia tɛ kɔ‘m, mi zuia yì, ɓɛɛ mi nyɔŋ mɔ, zu ɗaŋsee,

⁶ta nɛ mɔ, nɛ wi-tɔ̧-wen oi nu-Sɔ̧ Amɔs tɔ̧a̧ so zu Betɛl: «O gbaŋa k’ɛ́nɛ́ tɛ kifi nɛ hi̧a̧-fio, ɓɛɛ o gima k’ɛ́nɛ́ lɛŋ tɛ kifi nɛ aia-nú», ɓɛɛ mi zu̧ nú‘m tɛ kɔ̧a̧.

⁷Nɛ wese yee kaɗi, mi nɛɛ za̧ kɔ̧, ɓɛɛ mi gun a.

⁸O wi nɛ ɔ katɛ‘m zɛkɛɗa'm, tɔ̧ nɛnɛ‘e: «Kii de a̧ ɓɔna; wa kia so a̧ mɛ gbɛ wen zu pɛr ti tom’ɛ, ɓɛɛ a̧ yu mɔ yak. Ɛnɛ zɔ́k a̧, n'aa gun o wɔr woyo’ɛ!»

⁹Mɛ zɛ‘i, mi zuia yì, mi gboa si beegara, ɓɛɛ mi ɔ nu mgbak ka̧ garo, mi gu mɔ yí‘m na, wen gbɛŋmɔ nyɛmna.

¹⁰Mi iŋ so’é o somdea a̧a̧ nu-ngeŋ zu'm'i na. Nɛ ɗɔr-wa, nɛ wee-a kpororo, huia tik yí‘m, wii hɔɔ sɛnɛ, ɓɛɛ yí‘m kú̧ naŋ mbɔraa. Mi nɛa tɛ o widenyina. Aa nyina nɛ wa a sɛnɛ, ɓɛɛ wii tɛɛ gasi gasi siti. Nɛ hegɔ a̧ yi'm boma nɛnɛ, mi zɔk mɔ ɓɔ na. Tɛ pɛ naar, mi zɔk mɔ na, ɓɛɛ o nya'm lɛŋ kpa ɗaŋsee tɛ mɔ‘i. Ahikar gbaka'm tɛ dukaa kɔ‘m tɛ pɛ yiitoo, nɛti ha̧ a mɛ yak si sɛn Elimaid.

¹¹Sɛn ŋgimbi'i koo kɔ‘m Anna kpaa tom toka laa:

¹²ka a ka̧i laa sinɛ ha̧ wan-tom ɓɛɛ wa yoɓa a̧. Tɛ mɔɔrɔ-ɗoŋ-yiitoo zɛ, tɛ fiozɛ Dystros, a̧ kaɗa ŋma zɔ̧-laa kpɔk, ɓɛɛ ha̧ ha̧ o wan-a, wa yoɓa a̧, ɓɛɛ wa ha̧ be gbaduá gee ha̧ a̧ mɛ nyɔŋ.

¹³Tɛ pia-ɗoŋ kɔ̧-a̧ píí katɛ‘m, be-gbadua ŋmaa nú tɛ hiɗi mɔ, mi saa koo kɔ‘m, ɓɛɛ mi ak a̧: «Gbadua’ɛ tɛ nɛ dee nde? mafara wa zu̧ a̧ zu̧u̧, mɛ ba a̧ si nɛ ɗoŋ ha̧ wan-a, ɛɛ nyɛm k’ɛ́ɛ́ mɛ nyɔŋ mɔɔ-zu̧zu̧ na, kóó nɛ ge mɔ ge.»

¹⁴Sa a̧ tɔ̧ ha̧‘m’é: «Nɛ́ mɔ nɛ wa ha̧ha̧‘m gee, é zu mbɔi tom kɔ‘m wo. » Mi kɔ̧ mɛ kɔ̧ɗɔaa ha̧ a̧ na ndó-ndó-ndó, ɓɛɛ mi tɔ̧ ha̧ a̧ a̧‘a̧ ba a̧ sinɛ ha̧ o wan-a. See-am tu̧u̧ zu a̧ wen zu be-gbadua'i, ɓɛɛ koo kɔ‘m kifi nú ha̧‘m: «O ha̧a̧mɔ kɔ-mɛ gee yaa dée? O dee deemɔ kɔ-mɛ ya bɔɔ dée nde? Mɔ nɛ kpaa mɛ'ɛ nyɛma sɛnɛ.»