Read Northwest Gbaya TOBIT 4 Bible Online

TOBIT 4 - Northwest Gbaya bible

TOBIT 4

¹Wese'i, tɛ Tobit mbaŋa ɗoŋ mbɔi, n'aa ee so er Gabaɛl, sɛn Raguɛs nu Medii,

²ɓɛɛ a̧ ta mɔ kɔ see-a: «Hee mɔ'ɔ n'am aka mɔ mɛ fe ga’ɛ, gana so a'm sa bem kɔ‘m Tobia mɛ tɔ̧ wen mbɔi'i ha̧ a̧, nɛti ha̧‘m mɛ fe.»

³A̧ saa bem kɔ̧-a̧ Tobia pii ka̧ tɛ-a, ɓɛɛ tɔ̧ ha̧ a̧: «Mɛ gun am, hee mɔ'ɔ nɛ de ga. Mɛ tu̧ tɛ naa kɔ-mɛ. Ká mɛ siŋ a̧ pii nù ŋgimbi lɛŋ n'aa tɛ duk kpasa na. Mɛ de nɛ mɔ nɛ see-a kɔ̧a lɛŋ; ká mɛ demɔ nɛ tɛ ha̧ tu̧u̧-see ha̧ a̧ na.

⁴Tɛ-mɛ a mbaŋ ɗoŋ bonɛ n'aa zɔka tɛ hakala mɛ zu zaŋ. Ɓɛɛ ŋgimbi n'aa tɛ fe, mɛ gun a̧ ka̧ tɛ‘m kɔ̧ kpɔk kɔ̧.

⁵Bem kɔ‘m, dam ɗoŋ wese lɛŋ, tɛ-mɛ a mbaŋ ɗoŋ Gasa Wan. Ká mɛ kɔ̧ ɗɔɔ dee ɗaŋmɔ na, ká mɛ gbin heembea ko Sɔ̧ na. Tɛ duka-a kɔ-mɛ zaŋnu, mɛ demɔ lɛŋ nɛ yuwar-a, ká mɛ ndak pata yuwar gɔɔmɔ na.

⁶Wen, nɛ́ o wi nɛ demɔ nɛ yuwar-a a tɛ kpa mɔɔ-oi tom kɔ-wa.

⁷Mɛ kɛ̧ mbɔi kɔ-mɛ gbak nɛ o bíí nɛ demɔ nɛ yuwar-a. Ká mɛ e yí-mɛ ɗɔŋ mɔ nɛ mɛ ha̧na. Ká mɛ zik ɗoŋ-mɛ ha̧ wisan na, ɓɛɛ Sɔ̧ beka zik ɗoŋ-wi ha̧ mɛ na mbɛt.

⁸Mɛ ha̧ mɔ nyɛm nɛ ɗoŋ kpaamɔ kɔ-mɛ. Kà mɛ nɛ́ a̧a̧ nɛ be mɔ tikiɗi ɓɛɛ, ká kíí de mɛ tɛ ha̧be tikiɗi mɔ‘i na.

⁹Nɛ́ de be mbɔi a̧ mɛ mɔi̧, e nɛnɛ, pɛm nɛ ŋgimbi bɔnɛ,

¹⁰wen, ha̧mɔ ha̧ wisan kpasi wi kpasi tɛ fio, ɓɛɛ dora wi tɛ nɛa-a zaŋ tum mbɛt.

¹¹Nɛ mbetɛ, ha̧mɔ ha̧ o bíí gbak nɛ wa, dúk nɛ gba demɔ nyɛmna sɛn yí Sɔ̧, Wan mɛ ŋgɔn.

¹²Bem kɔ‘m, mɛ ba kóò nyɛm ɗoŋ heembea ko Sɔ̧; nɛti ha̧ mɔ lɛŋ, mɛ bá nɛ́ zuduk nam ko dáà kɔ-mɛ nɛ kóò. Ká mɛ ba kóò gɔni duk, nɛ bó nɛ duk ko dáà kɔ-mɛ na, na. Wen ɛɛ nɛ́ o bezaŋ wi-tɔ̧-wen oi nu Sɔ̧. Bem kɔ‘m, tɛ-mɛ a mbaŋ ɗoŋ o kuti zɔmdáà k’ɛ́ɛ́: Nɔe, Abraham, Izaak, in Jakɔb, wa lɛŋ wa baa kóò zaŋ nam kɔ-wa. Sɔ̧ toka de yoŋgo zu wa in o bezaŋ wa, ɓɛɛ A̧ ha̧ nú mɛ ha̧ nu Israɛl nɛ mɔɔ-oi ha̧ wa.

¹³Hegɔ, bem kɔ‘m, mɛ ndaɗi in o nya-mɛ. Ká mɛ ŋmaŋ tɛ-mɛ ti o nya-mɛ, o okóò in o wiwii zuduk nam kɔ-mɛ na. Ká mɛ bɛ̧ baa kóò sɛn mgbara wa na. Wen gɔɔtɛ de dee ha̧ bíí mɛ tik in ha̧ gba̧a̧-wi mɛ gbin. Hegɔ mbɛt tɛɛri de dee ha̧ mɔ lɛŋ mɛ tir si ɗɔɔ, hɔ tɛ gasa san, tɛɛri tui kaba tui pi zu bíí.

¹⁴Ká mɛ zɛm sa̧a̧mɔ, sɛka mɛ yɔɓa mbɔi ko widetom kɔ-mɛ na, mɛ yɔɓ‘a nɛ hayaa ŋgaɓo. Ká mɛ nɛ dee tom ha̧ Sɔ̧ hee mɔ‘i ga, A̧ tɛ ha̧ mɔá-oi-aa ha̧ mɛ ɓɔn ŋgɔn. Bem kɔ‘m, mɛ hai nɛ̀ tɛ-mɛ tɛ dee o mɔ kɔ-mɛ lɛŋ. Tɛ naŋanɔ kɔ-mɛ, mɛ usi'e mɛ nɛ kpasa bíí.

¹⁵Mɔ nɛ mɛ kɔ̧ na, ká mɛ demɔ‘i ha̧ bíí na mbɛt. Ká mɛ nɔ dɔ̀ɔ́ bɔkɔ na, ká mɛ hui nɛ yuwar kɔɗɔŋ kɔɗɔŋ na.

¹⁶Mɛ ha̧ mɔɔ-nyɔŋ ha̧ wi nɛ wɔ gbɛ, mɛ pi̧ laa tɛ wi nɛ duk nɛ sɔŋgɔɗɔ. Mɛ kɛ̧ mɔ nɛ mɛ kpaa gan zu mɛ ha̧ o wisan. Ká mɛ e yí-mɛ ɗoŋ mɔ nɛ mɛ ha̧ha̧ bíí ɓɔna.

¹⁷Mɛ ha̧ mɔɔ-nyɔŋ ha̧ o wi nɛ hi̧i̧ fio ko widemɔ nɛ yuwar-a, ɓɛɛ ká mɛ ha̧ wen wi-de-ɗaŋmɔ na.

¹⁸Mɛ zíí mbɔrɔ ko wan-ɗuka-taamɔ lɛŋ, ɓɛɛ ká mɛ e mbɔro nɛ wa tɔ̧ ha̧ mɛ tɛ geemɔ na.

¹⁹Mɛ gasi Sɔ̧ tɛ ŋgimbi lɛŋ, ɓɛɛ mɛ ak A̧ mɛ mgbɔ mɛ nɛnɛ tɛ tana war, mɛ kɔf'A mɛ de ha̧ mɔ nɛ mɛ kɔ̧ɔ̧ mɛ de lɛŋ mɛ hɔ gba̧a̧. Wen ŋma dukbíí kpɔk nɛ duk zu ɗuka-taamɔ, ɛ̀nɛ̀, bo na. Kana nɛ Gasa Wan Sɔ̧, ɛ̀nɛ̀, a ha̧ o demɔ lɛŋ ha̧ bíí. A̧ gbɔsi wi n'A̧a̧ kɔ̧ɔ̧ si ɗɔɔ, hɔ sɛn fara-duk ko o fio mɛ. Kinii, bem kɔ‘m, mɛ kasi o mɔ nɔ'ɔ lɛŋ e zú-mɛ, ká tɛ-mɛ bi ɗoŋ wa na ɓɔnsɛnɛ.

²⁰Kinii, bem kɔ‘m mi kɔ̧ɔ̧ mɛ tɔ̧ ha̧ mɛ‘e mi ee dita bu-kɔya-sede gɔmŋmaa taar er Gabaɛl, bem ko Gabri, sɛn saaye Raguɛs, nú Mɛdii mɛ.

²¹Bem kɔ‘m, ká kíí de mɛ wen nɛ san tika zu yɛ na. Mɛ́ nɛ́ gasa wanmbɔi nɛ mbetɛ, kà mɛ nɛ yuu kii Sɔ̧, kà mɛ nɛ ee ɗaŋmɔ lɛŋ dúk, in kà mɛ nɛ deemɔ nɛ de tɛ Gasa Wan Sɔ̧ kɔ-mɛ.