Read Northwest Gbaya TOBIT 5 Bible Online

TOBIT 5 - Northwest Gbaya bible

TOBIT 5

¹Tobia kifa nú ha̧ dáà kɔ‘i Tobit, he mɔ'ɔ ga: «Dáà, mɔ nɛ̀‘Nɛ́ tɔ̧ɔ̧ ha̧‘m lɛŋ, mi tɛ de;

²ɓɛɛ mi tɛ de bɔɔ hee ge mɛ ba nɛ mbɔi'i er-a ge, wen ɛɛ in Gabaɛl, ɛɛ iŋ ŋmaa na? Ge mɔɔ-sedaako ge a̧‘m tɛ usi ha̧ a̧ mɛ iŋ nɛ‘m ge, ha̧ a̧ mɛ kɔ̧ɗɔaa'e nɛ mi nɛ mbetɛ, in ha̧ a̧ mɛ ha̧ nɛ mbɔi'i ha̧‘m ge? Mi iŋ yuwar n'am tɛ ba mɛ hɔ nɛnɛ nu Mɛdii na mbɛt.»

³Sa Tobit kifi nú ha̧bem kɔ‘i Tobia: «Ɛɛ in Gabaɛl, ɛɛ yɔra mɔɔ-sedaako wen zu mbɔi'i, ɓɛɛ mi kɛ̧ mɔɔ-sedaako'i fara yiitoo; mi baa war kɔ‘m, ɓɛɛ mi e war kɔ̧-a̧ zu mbɔi'i. Kinii dee pɛ ɓu-yiitoo kaɗi n'am ee nɛ mbɔi'i sɛn er-a. Mɛ kíí nɛ́ mgbak bíí nɛ tɛ nɛɛ e mɛ. Ɛɛ tɛ ha̧ mbɔi tom kɔ̧-a̧ ha̧ a̧ ŋgimbi pia-ɗoŋ kɔ-mɛ. Mɛ yak, mɛ nɛɛ́ ba mbɔi er Gabaɛl.»

⁴Tobia gboo zan mɛ kíí ŋma bíí nɛ iŋa yuwar nu Mɛdii nɛ dea, mɛ nɛ in a̧. A gboa, a kpa yi ŋmaa in Rafaɛl fara yora-a zan, ɓɛɛ a iŋ‘e Rafaɛl nɛ betom ko Sɔ̧ mɛ yiwese na.

⁵Tobia tɔ̧ɔ̧ ha̧ a̧: «Wi’ɛ, mɛ tɛ nɛ dée?» Betom Rafaɛl kifa nú ha̧ a̧: «Mi nɛ be Israɛl, ŋma nya-mɛ, ɓɛɛ mi tɛɛ hɛ̧ɛ̧ mɛ kìì tom.» Tobia tɔ̧a̧ ha̧ a̧: «Mɛ iŋa yuwar mɛ nɛ si nu Mɛdii »

⁶Rafaɛl kifa ha̧ a̧: «Ii, mi nɛ hi̧i̧ ɓɔnsɛnɛ, mi iŋa yuwar nɛ dea. Mi nɛɛ hi̧i̧ war ɔ dɔka, ɓɛɛ mi zir tɛ ko ŋma nya-ɛɛ Gabaɛl, nɛ ɔ sɛn Raguɛs. Kura Ekbatanɛ mɛ hɔ Raguɛs, wi de zɛ yiitoo yuwar: wen o ye nɔ‘i yiitoo'i ya sɛn mgbara kaya.»

⁷Tobia tɔ̧a̧: «Wiɛ́, mɛ zɛm am hɛ̧ɛ̧, ha̧‘m nɛɛ mbaŋ tɛ dáà kɔ‘m sɛ, wen mi kɔ̧a̧ ha̧ mɛ mɛ nɛɛ e'm, mi tɛ ha̧ mbɔi tom kɔ-mɛ ha̧ mɛ. »

⁸Rafaɛl kifa: «Mi tɛ zɛm mɛ, ká mɛ ɓɔn na! »

⁹Tobia sii ɗoŋ nɛɛ mbaŋ tɛ dáà kɔ‘i, ɓɛɛ tɔ̧ ha̧ a̧: «Mi kpaa ŋma bíí mɛ e'm: nɛ́ nutua nam k’ɛ́ɛ́ Israɛl.» Tobit kifa: «Mɛ mgbɔ a tɛnɛ ha̧‘m, bem kɔ‘m, ha̧‘m iŋ tugun-a, in zuduk kɔ̧-a̧, in kà a̧ nɛ nyɛma mɛ mgbɔ mɛ nɛnɛ. »

¹⁰Tobia gboo, sa a̧, ɓɛɛ tɔ̧ ha̧ a̧: «Wiɛ́, dáà kɔ‘m sa mɛ.» Betom Rafaɛl yee tua, ɓɛɛ Tobit kpɛk a̧ ti. Rafaɛl kifa ha̧ a̧: «Ɛnɛ kpa de dukaa!» Tobit tɔ̧a̧: «Ge de duka-a ge a'm tɛ kpa bɔɔ ɓɔ ge nde? yi'm kpee yinɛ, mi zɔk sa̧a̧mɔ mɛ yiwese ɓɔ na, mi duk zaŋ tum, hee o fio nɛ beka zɔk sa̧a̧mɔ ɓɔ na ga. Mi duk kpasa, ɓɛɛ mi duk mgbara o fio. Mi zíí tiger o bíí, ɓɛɛ mi zɔk wa na.» Betom Rafaɛl tɔ̧a̧ ha̧ a̧: «Mɛ nɔ ŋgiɗi! Sɔ̧ duk dɔ̧ɔ̧ mɛ kpasi mɛ! mɛ nɔ ŋgiɗi!» Tobit tɔ̧a̧ ha̧ a̧: «Bem kɔ‘m kɔ̧a mɛ nɛ sɛn nú Mɛdii. Mɛ nyɛma mɛ mgbɔ a̧ nɛnɛ hɔ fara'i nde, sɛm kɔ‘m? Mi tɛ ha̧ mbɔi tom kɔ-mɛ ha̧ mɛ.» Rafaɛl tɔ̧a̧: «Mi nyɛma mɛ mgbɔ a̧ nɛnɛ, mi iŋa o yuwar lɛŋ, mi nɛ sɛn nú ko o be Mɛdii dɔ̧ɔ̧dɔ̧ɔ̧, mi yara nɛ o bɔkɔnu in o zu kaya lɛŋ, mi iŋa o yuwar nu'i lɛŋ nɛ dea.»

¹¹Tobit aka a̧: «Sɛm kɔ‘m, mɛ nɛ ge zuduk ge? mɛ nɛ pɛrnam ko o? mɛ tɔ̧ kpasawen ha̧‘m, usɛni sɛm kɔ‘m.»

¹²Rafaɛl tɔ̧a̧: «Gba̧a̧ k’ɛ́nɛ́ tɛ pɛrnam kɔ‘m hee ge?» ɓɛɛ sa Tobit tɔ̧a̧ ha̧ a̧: «Sɛm kɔ‘m, mɛ tɔ̧ kpasawen ha̧‘m, mɛ nɛ mgbak bem ko o, in nin-mɛ hee ge?»

¹³A̧ kifa nú ha̧ a̧: «Mi nɛ Azaria, bem ko Ananias gasa-a, ŋma nya-mɛ.»

¹⁴Tobit tɔ̧a̧ ha̧ a̧: «Mɛ tɛɛ nɛ dea nde, sɛm kɔ‘m! Sɛm kɔ‘m, ká mɛ kpa ɗaŋsee wen n'am aka ndaa-mɛ na! Mɛ́ nɛ́ nya'm nɛ mbetɛ, tugun-mɛ ɔ dee nyɛmna. Mi iŋa Ananias in Natan, o bem ko Semelias gasaa yiitoo nɔ‘i nɛ dea: wa nɛ so Jerusalɛm in am, ɓɛɛ ɛɛ gasa nɛ Sɔ̧ in wa. Wa e yuwar ko Sɔ̧ dúk na.» O nya-mɛ nɛ o kpasa bíí, mɛ nɛ́ kpar de zuduk: «Mɛɛ ha̧ mɛ! mɛ tɛɛ nɛ dea nde? »

¹⁵ɓɛɛ a̧ tɔ̧ ha̧ a̧ woyo'e: «Mi tɛ ha̧ mbɔi-tom kɔ-mɛ ha̧ mɛ, kɔya bu-sede kpɔk dam ɗoŋ wese lɛŋ, ɓɛɛ nɛ ko o ŋma nɛ tɛ kɔ̧, mi tɛ de ha̧ mɛ, hee mɔ'ɔ n'am de wen bem kɔ‘m ga.

¹⁶A mɛ mgbɔ bem kɔ‘m nɛnɛ nɛ dea, ɓɛɛ mi tɛ e mbe mɔ zu mbɔi-tom kɔ-mɛ.»

¹⁷Ɓɛɛ betom tɔ̧: «Ii, mi tɛ mgbɔ a̧ nɛnɛ, k’ɛnɛ de kí na! Mɔ lɛŋ tɛ yak zu yɛ nɛ dea, tɛ nɛaa in tɛ piaa k’ɛ́ɛ́ mbɛt, wen yuwar nɔ k’ɛɛ‘i ɔ sa̧-a̧.» Ɓɛɛ Tobit tɔ̧ ha̧ a̧: «Sɔ̧ a tok de yoŋgo zu mɛ, sɛm kɔ‘m», ɓɛɛ a̧ sa bem kɔ̧-a̧ «Bem kɔ‘m, mɛ ɗafi mɔ wen nɔ k’ɛ́nɛ́, á mɛ yak in nya-mɛ. Sɔ̧ mɛ yiwese a̧ duk ti h’ɛ́nɛ́, ɓɛɛ a̧ ba'nɛ́ piinɛ, nɛ hayatɛ, kpa nɛ‘m! Betom kɔ̧-A̧ a nɛ́ yuwar in'nɛ́ɛ́, a̧ a̧ pɛm'nɛ́, bem kɔ‘m! » Tobia gboo zan mɛ yak, a̧ hɛra dáà kɔ̧-a̧ in nàà kɔ̧-a̧ war nɛ wa, ɓɛɛ dáà kɔ̧-a̧ tɔ̧ ha̧ a̧: «Nɔ a bá nɛ ɛ́nɛ́!»

¹⁸Nàà kɔ̧-a̧ zuu nú tɛ kɔ̧ɔ̧ tɔ̧ nɛnɛ ha̧ Tobit: «Mɛ dee ha̧ bem kɔ‘m mɛ yak wen ge? A̧ bo nɛ́ dɔra-nɛnɔ k’ɛ́ɛ́ na nde? a̧ n'aa duk zik nɛ ɛɛ'ɛ.

¹⁹Ká mbɔi daŋ zu mbɔi na, gana so ɛɛ zɔk bem k’ɛ́ɛ́.

²⁰Pɛrti dukaa k’ɛ́ɛ́, nɛ Gasa Wan ha̧h’ɛɛ'ɛ, nyɛma so kɔ‘i.»

²¹Tobit kifa ha̧ a̧: «Ká mɛ ta mɔ na! ká mɛ de kíí wen wa na, bokonya'm, mɔ lɛŋ tɛ yak nɛ dea zu bem k’ɛ́ɛ́, tɛ nɛaa in piaa kɔ̧-a̧ mbɛt: yí-mɛ tɛ zɔk wese n'aa tɛ pii nɛ ɗoŋ pii tɛ-mɛ, ŋma mɔ beka de a̧ na.

²²Ká mɛ ta mɔ na, bokonya'm, mɛ kaɗi dee kíí wen zu wa, ŋma de betom ko Sɔ̧ tɛ mgbɔ a nɛnɛ, nɔ kɔ̧-a̧ tɛ hɔ gba̧a̧, ɓɛɛ a̧ tɛ pii ɗoŋ, ŋma mɔ beka de a̧ na.»

²³Ɓɛɛ a̧ kaɗi hi̧a̧ kɔ̧a.