Read Northwest Gbaya TOBIT 6 Bible Online

TOBIT 6 - Northwest Gbaya bible

TOBIT 6

¹Be-ŋgaiwi yaka in betom Rafaɛl, ɓɛɛ toyo kɔ̧-a̧ ndak ɗoŋ wa. Wa kaia ŋmaa yak, ɓɛɛ tɛ kuti zɛ wa ɔɔ ka zaŋ yi «Tigrɛ».

²Be-ŋgaiwi zira mɛ fɔr naŋ sɛn ɗɔɔ yì. Nɛ mɔ‘o nɛ gasa zoro ndɔra nɛ ɗɔɔ yi tik zan, ɓɛɛ kii mɛ nyɔŋ naŋ-a. Be-ŋgaiwi hiɗa mɔ,

³ɓɛɛ betom tɔ̧ ha̧ a̧ «Mɛ ba a̧, mɛ nɔkɔɗ ‘a!» Be-ŋgaiwi nɔkɔɗa zoro, ɓɛɛ zuɗi a̧ pi zan.

⁴Betom tɔ̧ɔ̧ ha̧ a̧ woyo: «Mɛ gbo zaŋ zoro, a̧ mɛ ba pa̧i̧-a, nyumu-a in see-a, mɛ kai wa a nɛtɛ, ɓɛɛ mɛ kai zaŋ-a a taŋ; wen pa̧i̧-a, nyumu-a in see-a nɛ mɔɔ-de-nyina.»

⁵Be-ŋgaiwi gboo zaŋ zoro, ba pa̧i̧-a, nyumu-a in see-a, a̧ dɔ ŋma ɓira zoro'i nyoŋ, ɓɛɛ a tɔŋ tɛ oi-aa, ká tɛɛ mbɔr.

⁶Hɔɗoŋ-aa, wa kaia ŋmaa mɛ nɛ nɔ kɔ-wa siti hɔ́ mgbak ka̧ nú Mɛdii.

⁷Ɓɛɛ be-ŋgaiwi ak betom: «Nya'm Azaria, nɛ ge nyina ge a'i nyɛma mɛ de nɛ nyumu-zoro, in see-a, in pa̧i̧-a ge? »

⁸Betom kifa ha̧ a̧: «Kóó, nɛ wiwii, kóó nɛ okóò, nɛ a̧a̧ nɛ ginaazi kóó ɗaŋ sɔ̧ sɛn tɛ, kà mɛ̀ dɔ nyumu in see-zoro sɛn ti wi’ɛi, zii-wee-a ndaka ɗaŋ-sɔ̧‘i yinɛ, ɓɛɛ a̧ kpasa.»

⁹Nɛ kó pa̧i̧-a, mɛ tɛ sɔ̧ yi-a sɛn yí-bíí, nɛ wíì kpea'i, mɛ ufa, ɓɛɛ wíì‘i ɓara yinɛ, ɓɛɛ a̧ zɔka mɔ wéér.

¹⁰Wa hɔɔ nú Mɛdii, ɓɛɛ ŋgimbi nɛ wa hɛɗa ka̧ ye Ekbatanɛ,

¹¹Rafaɛl tɔ̧a̧ ha̧ be-ŋgaiwi: «Nya'm Tobia!» ɓɛɛ Tobia kifi nu: «Nɛ́ ge?» Betom tɔ̧ɔ̧: «Nɛ́ tɛ ko Raguɛl ɛɛ tɛ zir sɛnɛ sɔsɔɔ! a̧ nɛ ŋma dáà kɔ-mɛ. A̧ a̧a̧ nɛ ŋma be-okóò, nin-a nɛ Sara.

¹²A bo nɛ ŋma be-wiwii kóó ŋma be-okóò yak zu be-okóò‘i na. Mɛ́ nɛ́ mgbak zuduk kɔ̧-a̧. Nɛ́ mɛ́ a nyɛma so mɛ ba a̧ nɛ̀ kóò ti. Nɛ́ mɛ́ a̧ nyɛma mɛ ba mbɔi oi dáà kɔ̧-a̧ mbɛt. Sara nɛ ŋma de be-zɔŋa, nɛ a̧a̧ nɛ mboozu in nɔɔŋgiɗi mbɛt, ɓɛɛ dáà kɔ̧-a̧ nɛ kpasa bíí.

¹³Mɛ nyɛma mɛ ba a̧ nɛ kóò. Mɛ zíí nú‘m, de sɛm kɔ‘m, ga̧a̧mɔ sɔsɔɔ'ɔ, mi tɛ tɔ̧ wen ko be-zɔŋa'i in dáà kɔ̧-a̧, wen ha̧ a̧ mɛ kɔ̧ɗɔaa mɛ ha̧ a̧ nɛ kóò ha̧ mɛ. Ɓɛɛ k’ɛ́ɛ́ bɛ tɛ̀ɛ́ kur Raguɛs mɛ si tɛ k’ɛ́ɛ́, ɛɛ tɛ de gbaŋa baaŋmaa. Mi iŋa, Raguɛl nyɛm mɛ dɔ mɛ nɛ a̧ na, a̧ nyɛm mɛ ha̧ a̧ ha̧ ŋma mbe wii na mbɛt, wen wa nyɛma mɛ gbɛ a̧, nyɛm nɛ ɗoŋ heembea ko Mɔise, a̧ iŋa nɛ mbetɛ nɛ́ mɛ́ a̧ nyɛma so mɛ ba a̧ nɛ kóò ti. Hegɔ, de sɛm kɔ‘m, ga̧a̧mɔ sɔsɔɔ, ɛɛ in Raguɛl, ɛɛ tɛ ba keta see zu be-zɔŋa'i, ɓɛɛ ɛɛ tɛ ɗafi mɔ wen baaŋmaa k’ɛ́nɛ́. Kura k’ɛ́ɛ́ Raguɛs wen siaa, ɛɛ tɛ mgbɔ a̧ si nɛnɛ, tɛ kɔ-mɛ.»

¹⁴Tobia kifa ha̧ Rafaɛl: «Azaria nya'm, mi zia, wa mgbɔɔ so Sara ha̧ wii war mɔɔrɔ-ɗoŋ-yiitoo, ɓɛɛ o wii nɔ‘i lɛŋ fe wese sii tua; nɛ kalɛ kpɔk zaŋ zɛ nɛ wa si nɛ tua ɗoŋ a̧‘i a̧ wa fe nɛnɛ. Mi zia o ŋma bíí fara tɔ̧a̧a nde nɛ ŋma ɗaŋ-sɔ̧ a̧ gbɛɛ wa;

¹⁵nɛ mɔ‘i, sa kíí de'm kinii mbɛt. Ɗaŋ-sɔ̧‘i de ɗaŋmɔ in kóò‘i na, ɓɛɛ, nɛ ŋgimbi nɛ ŋma wiwii nɛ si ka̧ tɛ a̧, a̧ ɗaŋ-sɔ̧‘i gbɛ nɛ a̧. Mi nɛ kpɔk bem ko dáà kɔ‘m. Ka'm fe, ɓɛɛ dáà kɔ‘m in nàà kɔ‘m tɛ fe fio gɛ̧ɛ̧mɔ wen zu'm. Wa be nɛ ŋma bem nɛ tɛ gun wa na.»

¹⁶Rafaɛl tɔɔ̧ ha̧ Tobia: «Tɛ-mɛ bii ɗoŋ mbɔrɔ ko dáà kɔ-mɛ nde? Bo nɛ a̧ tɔ̧ɔ̧ ha̧ mɛ mɛ ba kóò nutua ko dáà kɔ-mɛ na nde? De sɛm kɔ‘m, mɛ zíí! ká mɛ ta mɔ wen ɗaŋ-sɔ̧‘i na; Mɛ ba Sara nɛ kóò. Mi iŋa'e wa tɛ mgbɔ a̧ ha̧ mɛ mɛ ga̧a̧mɔ hɛ̧ɛ̧.

¹⁷Ɓɛɛ ŋgimbi nɛ mɛ tɛ ye babir ɗoŋ a̧, mɛ ba ɓira see-zoro in nyumu-a, mɛ a zu kɛ̧i-wee: ŋgimbi nɛ pɛr-a tɛ dun kɔ babir, ɗaŋ-sɔ̧‘i tɛ zíí pɛr-aa: a̧ tɛ gɔm yak, ɓɛɛ a̧ beka pii ɗɔŋ ɓɔ na.

¹⁸Ŋgimbi nɛ mɛ tɛ kɔ̧ mɛ iŋ tɛ in a̧, ɛnɛ kur yiitoo lɛŋ mɛ kɔfi Sɔ̧ mɛ yiwese, ha̧ A̧ mɛ de ko h’ɛ́nɛ́ in ha̧ A̧ mɛ pɛm'nɛ́. Ká mɛ de kíí na! Sɔ̧ hoka Sara nɛ kóò kɔ-mɛ ɓeemɛ, ɓɛɛ nɛ́ mɛ́ a̧ tɛ kpasi a̧. A̧ tɛ yak in mɛɛ, ɓɛɛ mi tɔ̧ nɛ kpasawen ha̧ mɛ: a̧ tɛ ko bem nɛ dɔkaa in mɛɛ: wa tɛ ya hee o nya-mɛ ga. Ká mɛ ta mɔ na.»

¹⁹Ɗoŋ nɛ Tobia zia wen nɛ Rafaɛl tɔ̧ɔ̧‘e Sara nɛ bokonya-a, pɛrnam ko dáà kɔ̧-a̧, ɓɛɛ soɓee see-a kura dúk tɛ Sara, ɓɛɛ a̧ kɔ̧ a̧ nɛ kpasaa.