Read Northwest Gbaya JUDITH 1 Bible Online

JUDITH 1 - Northwest Gbaya bible

JUDITH 1

¹Mɔ'ɔ duka so nɛ tɛ ɓu-zua-yiitoo pɛ-wan ko Nabukɔdɔnɔsɔr, nɛ ɔɔ so wan zu o bíí nu Asirii, sɛn gasa ye Ninivɛ, ŋgimbi nɛ Arfaxad ɔɔ so nɛ wan zu o be-Mɛdii sɛn saaye Ekbatanɛ.

²Arpazad'i mboo kusa garo nɛ o gasa sɛka ta, zik nɛ Ekbatanɛ: pɛsa ko o sɛka ta nɔ‘i nɛ́ mɛtrɛ kpɔk nɛ reeta, zia̧-a̧ nɛ́ mɛtrɛ taar. Garo'i, kusa-a nɛ́ mɛtrɛ ɓu-taar-zua-mɔɔrɔ, pɛsa-a lɛŋ nɛ́ mɛtrɛ ɓu-yiitoo-zua-mɔɔrɔ.

³Sɛn nú garo, a̧ mboa o kusa tua-pɛm-mɔ, kusa tua nɔ‘i nɛ mɛtrɛ ɓu-mɔɔrɔ, ɓɛɛ pɛsa gun-aa nɛ mɛtrɛ ɓu-taar.

⁴A̧ dea o kpar-nú-garo, kusa-a nɛ́ mɛtrɛ ɓu-taar zua-mɔɔrɔ, pɛsa-a nɛ́ mɛtrɛ ɓu-yiitoo, wen gboa ko o gii widebiro, in wen gbara ko o widebiro nɛ̀ nɛ́ nɛ̀ naŋ.

⁵Tɛ ŋgimbi'i, wannu Nabukɔdɔnɔsɔr déè biro in wannu Arfaxad kɔ gasa bɔkɔnù mɛ zikanù Ragau.

⁶O bíí lɛŋ nɛ ɔɔ so zu kaya in sɛn ɗoŋgɔ Efrat, Tigrɛ in Hydasp, ká bà nɛ o wan mɛ bokonù, nɛ Ariɔk wannu ko o be-Elyméé ɔɔ so wan zu wa, wa lɛŋ wa mɔi̧a ŋmaa in Nabukɔdɔnɔsɔr mɛ de biro in o bezaŋ Babilɔŋ.

⁷Nabukɔdɔnɔsɔr, wannu Asirii, toma o betom ha̧ o bíí nù Pɛrsɛ, in ha̧ o wan nɛ war yee-wese lɛŋ, o bíí nu Silisii in Damas, nu Liban in ka naŋ kaya Liban, ká bá nɛ o wan nɛ ya nɛ ka ŋgere gbatɔp Mediteranee

⁸in ha̧ o dukbíí mɛ nù Karmɛl, in Galaad in Galiléé mɛ ŋgɔn, in gasa bɔkɔnù Ɛsdrɛlɔn,

⁹ha̧ o bíí ye nù Samarii lɛŋ, in ha̧ o bíí mɛ kúr Jurdɛn hɔ sɛn Jerusalɛm, Batanéé, Keleus, Kadɛs, nanayì nu Ezypt, Tafnɛs, Ramsɛs, zikanu Gɔsɛn lɛŋ mbɛt,

¹⁰hɔ ɗoŋ Tanis in Mɛmfis, in ha̧ o bíí nu Ezypt lɛŋ, hɔ nɛnɛ nduti nu Ethiopii mɛ.

¹¹Ɓɛɛ o bíí nu nɔ‘i lɛŋ baa wen ko Nabukɔdɔnɔsɔr, wannu ko o be Asirii, e tɛ geemɔ, hegɔ wa mɔi̧ mɛ gbak a̧ tɛ biro na, wen wa yu a̧ na, wa dora tɛ-wa nɛ a̧ hee kpɔk wi ga, ɓɛɛ wa fɔ o betom kɔ̧-a̧ sinɛ nɛ gee er, e nɛ foe yi-wa.

¹²Gasa nyimsea baa Nabukɔdɔnɔsɔr zu o nù nɔ‘i lɛŋ, ɓɛɛ a̧ kán mɔ nɛ nin kiti-wan in nɛ nin nu-wan kɔ̧-a̧ mɛ kifi er ɗaŋmɔ‘i sitɛ o wi mgbíí nù Silisii, Damasɛn, Syrii, in mɛ gbɛ o wi nù Mɔab, o bezaŋ Ammɔn, in o wi nù Judéé in Ezypt lɛŋ, nɛ gbapaa hɔ nɛnɛ nduti o gbatɔp yiitoo.

¹³Ɓɛɛ Nabukɔdɔnɔsɔr in o widebiro kɔ̧-a̧ ku̧u̧ naŋ biro in wannu Arfaxad tɛ ɓu-zua-mɔɔrɔ-ɗoŋ-yiitoo pɛ-wan kɔ̧-a̧. Tɛ biro'i a̧ gana Arfaxad nɛ ŋgai, ɓɛɛ a̧ pɛsi o widebiro kɔ̧-a̧ sot sot, kpɔk in o wi-daŋ-nyaŋa-biro, ká bá nɛ o keeke-biro kɔ-wa mbɛt.

¹⁴A̧ ɓara o ye kɔ̧-a̧ lɛŋ, hɔ sɛn Ekbatanɛ, a̧ baa o taŋaɗa-pɛm-ye, a̧ ɗaŋa o beegara saaye lɛŋ lakati lakati, ɓɛɛ a̧ dee ha̧ gba de gasa ye'i mɛ kifi nɛ bɛɛ-oi,

¹⁵Hɔɗoŋ-a a̧ kpaa Arfaxad sɛn mgbara o kaya Ragau, ɓɛɛ a̧ tok a sar nɛ sɛɛ gbɛ ɗak.

¹⁶A̧ sia ɗoŋ si Ninivɛ in gba gii widebiro kɔ̧-a̧, ɓɛɛ a duk hi̧i̧ in o gii widebiro nɔ‘i zɛ gɔmŋmaa nɛ ɓu-yiitoo, de nɛ sa, in nyoŋ nɛ gba de nyɔŋmɔ.