Read Northwest Gbaya JUDITH 10 Bible Online

JUDITH 10 - Northwest Gbaya bible

JUDITH 10

¹Doŋ nɛ Judith kaɗa hiɗa mɔ sitɛ Sɔ̧ ko Israɛl, in tɔ̧a̧ wen kɔ̧-a̧,

²a̧ kura yor ŋgɔn, sa kodetom kɔ̧-a̧ ɓɛɛ zir si kɔ bɛrtua kɔ̧-a̧, fara n'aa duk sɛnɛ, wese ɔmtɛ in wese gbaŋa lɛŋ.

³A kpɔi̧a bufu n'aa mara guntir-a in o laa-gɛra kɔ̧-a̧ lɛŋ yinɛ, a nɛɛ zui yì, ɓɛɛ a sɔ̧ o de pɛr dita nɔ̧ tɛ a̧; a sara zu-a, hɛr nɛ salaabi, ɓɛɛ a pi nɛ o laa-gbaŋa, n'aa duka so mɛ mar, ŋgimbi nɛ wii kɔ̧-a̧ Manasse duka so nɛ yí.

⁴A aa ndara naŋ-a, a pi̧i̧ o mɔɔ-gɛr, o kana, o wele, o mɔɔ-zer, in o demɔɔ-ɗafi-tɛ lɛŋ: a kifa de boɗoe zɔŋa woyo, wen baa see-wiwii nɛ tɛ zɔk a.

⁵A ha̧dak dɔ̧ɔ̧ in kpana nɔ̧ ha̧ kodetom kɔ̧-a̧ mɛ tui; a aa fuu alkamaari dun ŋgoɓo kɔ̧-a̧, o makala waya te-mbɔra, o de sa̧-a̧ brɛt in nɔ̧ ber-ndai; a hɛra o mɔá nɔ‘i lɛŋ nɛ dea, ɓɛɛ ha̧ ha̧ kodetom kɔ̧-a̧ mɛ tui mbɛt.

⁶Wa kaia ŋmaa yak si yuwar nu-garo ye Betulii: wa kpaa Ozias in o gasawi saaye Kabris in Karmis, fara pɛma mɔ sɛn hi̧i̧.

⁷Ŋgimbi nɛ wa zɔka saŋa-yí Judith nɛ kpaia lɛŋ, in o de laa kɔ̧-a̧, ɗɛɗɛ-wa gɔna tɛ zɔka de yora zɔŋa kɔ̧-a̧.

⁸Ɓɛɛ wa tɔ̧ ha̧ a̧: «Sɔ̧ ko o zɔmdáà k’ɛ́ɛ́ a̧ pɛm mɛ tɛ kɔ̧ɔ̧mɔ kɔ̧-A̧! A a̧ de ha̧ mɔ nɛ mɛ kɔ̧a mɛ de mɛ hɔ gba̧a̧, wen ha̧ o be-Israɛl mɛ kpa desee in ha̧ nin Jerusalɛm mɛ hu̧r.»

⁹Judith gasa Sɔ̧, ɓɛɛ tɔ̧ ha̧ wa: «Ɛnɛ tɔ̧́ wa a̧ hu̧i̧ nu-garo saaye ha̧‘m ɓɛɛ mi tɛ gbo mɛ demɔ n’ɛɛ́ ee so zu-a in'nɛ́ɛ́.» Wa ha̧ nú ha̧ o ŋgaiwi mɛ hu̧i̧ ha̧ a̧, hee mɔ n'aa aka ga.

¹⁰Wa huia ha̧ a̧, ɓɛɛ Judith gbo in kodetom kɔ‘i. O wi saaye ya hi̧i̧ zɔk nɛ ɗoŋ-aa, hɔ ŋgimbi n'aa zira nɛ kaya hɔ tɛ ɓira nɛ ɗɔɔ kaya, ɓɛɛ wa zɔk a ɓɔ na.

¹¹Sɛn ɗɔɔ kaya, wa nɛa tan ti wa zeeŋ, ɓɛɛ o kuti wipɛmmɔ ko o be Asirii nɛɛ we ti wa.

¹²Wa tika tɛ Judith, ɓɛɛ wa ak a̧: «Duk kɔ-mɛ nɛ ge? Mɛ tɛ nɛ de? Mɛ nɛ si de?» A kifa ha̧ wa: «Mi nɛ zɔŋa hébreu. Mi yu nɛ saaye kɔ-wa yak, wen dekpaa wa tika er'nɛ́.

¹³Mi tɛa kɔ‘m tɛ gasa wan-biro k’ɛ́nɛ́ Holofɛrn, ha̧‘m mɛ tɔ̧ kpasawen ha a̧. Mi tɛ usi yuwar n'a̧a̧ tɛ ba ha̧ a̧ mɛ ɓar kaya lɛŋ er-wa, ɓɛɛ bii kɔ̧-a̧, kóó kpɔk, beka fe na.»

¹⁴Tɛ zia wen kɔ Judith, in tɛ guɗa de saŋa-yí-a, a̧ yora zɔŋa yí-wa nyɛmna o bíí ko Holofɛrn tɔ̧a̧ ha̧ a̧:

¹⁵«Mɛ gɔna nu fio kɔ-mɛ tɛ ziraa tɛnɛ nɛ hayaa mɛ zɔk wan k’ɛ́ɛ́. Kinii mɛ nɛ kɔ tua-laa kɔ̧-a̧: o ŋma bíí k’ɛ́ɛ́ tɛ mgbɔ mɛ nɛnɛ e kɔ er-a.

¹⁶Ŋgimbi nɛ mɛ tɛ yor sɛn ti a̧, ká kii de mɛ na! Mɛ tɛ we ɗoŋ mɔ nɛ mɛ tɔ̧a̧ h’ɛɛ‘i ha̧ a̧: ɓɛɛ a tɛ zɔk mɛ nɛ de yí.»

¹⁷Wa hoka wiwii gɔmŋma mɛ mgbɔ a̧ in kodetom kɔ̧-a̧ nɛnɛ hɔ sɛn kɔtua-laa ko Holofɛrn.

¹⁸Nyɛrɛ tɛaa ko Judith pɛsa dam kɔ̧tua gbagari lɛŋ: ɓɛɛ bíí lɛŋ mɔí; wa kɛra a̧ zik e see-aa, ŋgimbi n'a̧a̧ yor nɛ zan ka tua ko Holofɛrn, zɛm nɛ sara kɔ̧-a̧, ɗoŋ nɛ wa tɛ mbaŋ nɛ tɛ-a.

¹⁹Ɗɛɗɛ bíí lɛŋ gɔna tɛ zɔka de yora zɔŋa kɔ̧-a̧, ɓɛɛ wa zɔn nɛ o be-Israɛl lɛŋ wen zu a; wa tɔ̧ɔ̧ sitɛ o ŋmaa: «Wi tɛ e dukbíí nɛ a̧a̧ nɛ pɛrti de okóò hego tɛ geemɔ hee ge? Bo nɛ ɔ dee mɛ e ha̧ kóó ɔ nde mgbara wa mɛ duk kpasa na, wen wa nyɛma mɛ ɔr o bíí zaŋnu lɛŋ.»

²⁰O wi-pɛm Holofɛrn, in o gasawi-biro lɛŋ gboa, ɓɛɛ wa mgbɔ Judith si kɔ̧ tua-laa.

²¹Holofɛrn ɔm so kɔ‘i nɛ tɛ gɔn mɔ kɔ̧‘i ɗɔɔ nyɛm nyɛm gba de gbɛ̧ zɔ̧-laa-kpe-zifa nɛ‘i gɔna dap sɛnɛ nɛ garazi lɔr, in nɛ‘i fura o diama̧ in o de be yɔka ta sɛnɛ.

²²Wa mbaŋa tɛ-a wen tɛaa ko Judith, ɓɛɛ Holofɛrn gbo nu-zala tua kɔ̧‘i, o wi-tui mɔɔ-e-wee, nɛ wa dee nɛ bu-boe, duka ti ha̧ a̧.

²³Ŋgimbi nɛ Judith hɔa ti a, in ti o gasawi-biro kɔ̧-a̧, ɗɛɗɛ-wa lɛŋ gɔna tɛ zɔka de saŋa-yí -a. Judith gu sɔnti nu ti a, ɓɛɛ o widetom ko Holofɛrn ba a̧ ɛ ŋgɔn.