Read Northwest Gbaya JUDITH 11 Bible Online

JUDITH 11 - Northwest Gbaya bible

JUDITH 11

¹Holofɛrn tɔ̧̧ ha̧ Judith: «Kóò'ɛ, mɛ nɔ́ ŋgiɗi, ka mɛ de kíí na! wen mi tɛ de ŋma ɗaŋmɔ in bíí nɛ hoka mɛ de tom ha̧ Nabudonosor nɛ ɔ wan zu nu lɛŋ'ɛ na.

²Ka dukbíí kɔ-mɛ nɛ ɔ zaŋ kaya’ɛ ee so'm tɛ geemɔ na, mi nyɛm so mɛ de biro in wa na: nɛ wa, nɛ zu-wa, a̧ kia mɔ‘i.

³Kinii mɛ tɔ̧ ha̧‘m: mɛ yu mɔ nɛ tɛ kɔ-wa pi̧i̧ tɛ ɛɛ hɛ̧ɛ̧ wen ge? Mɔ‘i kpasa mɛ nɛ mbetɛ! Mɛ nɔ ŋgiɗi! mɛ tɛ duk kpasa mɛ zaŋ zɛ hɛ̧ɛ̧, in mɛ ɗoŋ mbɛt.

⁴Ŋma bíí beka de ɗaŋmɔ in mɛ na, ɓɛɛ wa tɛ de demɔ in mɛ, hee mɔ'ɔ nɛ‘i de in o wi nɛ de tom ha̧ gasa wan kɔ‘m Nabukɔdɔnɔsɔr ga.»

⁵Judith tɔ̧ɔ̧ ha̧ a̧: «Nyaa, ɛnɛ zíí wen kɔ‘m, mi n'am duk nɛ bara k’ɛ́nɛ́, ɛnɛ é ha bara k’ɛ́nɛ́ mɛ tɔ̧ wen ti ‘nɛ́! beka'm tɔ̧ ndela ti gasa wan kɔ‘m mɛ zaŋ zɛ hɛ̧ɛ̧ na.

⁶K’ɛnɛ demɔ nɛ bara k’ɛ́nɛ́ tɛ tɔ̧ h’ɛ́nɛ́, Sɔ̧ tɛ de nɛ gasa tom nɛ er-‘nɛ́, tom ko gasa wan kɔ‘m beka tik nu mbulɛɛ gee na.

⁷Osoko ha̧ Nabukɔdɔnɔsɔr nɛ ɔ wan zu nu lɛŋ, nɛ toma ‘nɛ, nɛ ŋgai kɔ̧-a̧, mɛ de ha̧ o bíí lɛŋ mɛ ye tɛ tana war, osoko h’ɛ́nɛ́ mbɛt; wen see zu ‘nɛ in ŋgai-tɛ‘nɛ́, bo nɛ o bíí a̧ de tom ha̧ a̧ ɓɛɛ na, ɓɛɛ nɛ o bokonam, o mɔdai in o nɔi̧ mɛ yiwese tɛ duk kpasa wen a in o bíí nutua kɔ̧-a̧ lɛŋ mbɛt

⁸Wen ɛɛ zia nyɛrɛ ɗuka taamɔ in iŋa mgbara mɔ k’ɛ́nɛ́. Bíí zu nu lɛŋ iŋa'e sɛn nu ko Nabukɔdɔnɔsɔr lɛŋ, kpɔk de wi in kpɔk wi-iŋ-mɔ nɛ́ ɛ́nɛ́, bíí nɛ wa zɔn tɛ biro hee ɛ́nɛ́ ga bo na.

⁹Ɛɛ iŋa mɔ nɛ Akiɔr tɔ̧ɔ̧ so sɛn ti o wi-ba-keta k’ɛ́nɛ́, wen o be Betulii kpɛka Akiɔr, ɓɛɛ a̧ we ɗoŋ o wen lɛŋ n'a̧a̧ tɔ̧a̧ ti nɛ́à ha̧ wa.

¹⁰Wen hegɔ, wanusimɔ in gasa wan kɔ‘m, k’ɛnɛ é o wen ko Akiɔr tɛ geemɔ na, ɛnɛ kási wen kɔ̧-a̧ kɔ̧ see'nɛ́ nɛ dea, wen mɛ nɛ kpasawen. Ŋma bíí nyɛm mɛ usi bɔnɛ ha̧ dukbíí k’ɛ́ɛ́ na, gbapaa nyɛm mɛ kpa ŋgai zu wa na mbɛt, wa nɛ dea nɛ ɗaŋmɔ in Sɔ̧ sɛ́.

¹¹Ɓɛɛ, kinii, gasa wan, wa dea ɗaŋmɔ in Sɔ̧ kaɗi. Ŋgimbi lɛŋ nɛ wa dee ɗaŋmɔ, wa de ha̧ nyimsea ko Sɔ̧ mɛ tik zu wa. Hegɔ, gasa wan kɔ‘m, ɛnɛ beka de biro in wa sɔɔgee na, wa nyɛm mɛ ndak ‘nɛ sinɛ na: fio tɛ gbɛ kana wa lɛŋ gbuɗuk.

¹²Wa bo nɛ nyɔŋmɔ ɓɔ na, yi dɔk na mbɛt; hegɔ wa dee taamɔ mɛ gbɛ o mɔdai kɔ-wa: ɓɛɛ wa kɔ̧ɔ̧ mɛ nyɔŋ o mɔ lɛŋ nɛ heembea ko Sɔ̧ dora wa tɛ nyɔŋa.

¹³Wa tɔ̧a̧ wi tɛ nyɔŋ o zu-nyɔnɔ alkamaari, o zu-dɔ̧ɔ̧ in nɔ̧: nɛ mɔ nɛ wa ee nɛtɛ, wen ha̧ha̧ o wiɗafisɔ̧ nɛ yor ti Gasa Wan sɛn Jerusalɛm: ŋma gee bíí nyɛm mɛ fo gee foa o mɔ nɔ‘i, kóó nɛ er, na.

¹⁴Zu-a'i woyo, wa toma o bíí si Jerusalɛm si tɛ o kutiwi mɛ ak wa mɛ e war ha̧ wa mɛ nyɔŋ o mɔ nɔ‘i wen, kóó o bíí Jerusalɛm mbɛt dee nɛ kale kpɔk mɔ‘i.

¹⁵Hegɔ, wese nɛ wa tɛ kpa kifanu, in nɛ wa tɛ nyoŋ o mɔ nɔ‘i, nɛ kale wese'i a̧ Sɔ̧ tɛ e nɛ wa er-‘nɛ́, h’ɛnɛ mɛ kum wa.

¹⁶Ŋgimbi nɛ kodetom k’ɛ́nɛ́ zia o mɔ nɔ‘i lɛŋ, mi yua mɔ nɛ ka tɛ wa yak, ɓɛɛ Sɔ̧ toma'm pii tɛ‘nɛ́ h’ɛ́ɛ́ mɛ de o mɔ nɛ tɛ pi̧ kíí tɛ o bíí zaŋnu lɛŋ, nɛ tɛ zíí nyɛrɛ-a.

¹⁷Kodetom k’ɛ́nɛ́ nɛ wi-yu-kíí-Sɔ̧, mi de tom ha̧ Sɔ̧ mɛ yiwese, zɛ nɛ wese. Ɓɛɛ kinii, gasa wan kɔ‘m, mi tɛ duk ka tɛ‘nɛ́. Mɔ kpɔk, zaŋ zɛ lɛŋ, kodetom k’ɛ́nɛ́ tɛ gbo mɛ nɛ kɔfi Sɔ̧ ɗɔɔ kaya. Mi tɛ kɔf'A ha̧ A̧ mɛ de ha̧‘m mɛ iŋ ŋgimbi nɛ o wi nɔ‘i tɛ de ɗaŋmɔ‘i.

¹⁸Mi tɛ pii ɗoŋ mɛ mbaŋ tɛ-‘nɛ́, ɓɛɛ ɛnɛ tɛ gbo in o widebiro k’ɛ́nɛ́ lɛŋ mɛ tik zu wa: kóó ŋma bíí kpɔk mgbara wa beka yor ti ‘nɛ́ na.

¹⁹Hɔɗoŋ-aa, mi tɛ mgbɔ‘nɛ́ nɛnɛ ɓir nɛ nu Judee lɛŋ hɔ sɛn ti Jerusalɛm, mi tɛ e kiti-wan k’ɛ́nɛ́ sɛn see-ye'i, ɓɛɛ ɛnɛ tɛ mgbɔ wa nɛnɛ, hee o sami nɛ bo nɛ wi-dai-wa na ga, ɓɛɛ ɛnɛ beka kpa kóó ŋma toyo kpɔk, nɛ tɛ mgbu mɔ ti ‘nɛ́ bo na. Sɔ̧ mgbaŋa tɛ‘m wen o mɔɔ nɔ‘i lɛŋ nɛti, ɓɛɛ A̧ toma'm mɛ tɛ we ɗoŋ-a h’ɛ́nɛ́.»

²⁰Wen'i dee tɛ Holofɛrn in o gasa widebiro kɔ̧-a̧ lɛŋ: ɗɛɗɛ-wa lɛŋ gɔna wen ɗuka-taamɔ ko Judith, ɓɛɛ wa tɔ̧:

²¹«Ŋma okóò nɛ yora zɔŋa in nɛ zíí mgbara mɔ, hee a̧ ga, bo zaŋnu lɛŋ na.»

²²Holofɛrn tɔ̧̧ ha̧ Judith: «Sɔ̧ dea demɔ tɛ toma mɛ tɛnɛ ti ha̧ dukbíí. Mɛ e ŋgai ɓɔn kɔ er-am, in mɛ kum o bíí nɛ siŋa gasa wan kɔ‘m e tɛ geemɔ.

²³«Ɓɛɛ, nɛ kɔ-mɛ, mɛ yora de zɔŋa nyɛmna; mɛ tɔ̧ nɛ yɔka wen nyɛmna mbɛt. Ka mɛ demɔ nyɛm nɛ ɗoŋ wen nɛ mɛ tɔ̧a̧‘i, Sɔ̧ kɔ-mɛ tɛ duk nɛ Sɔ̧ kɔ‘m mbɛt, bɛɛ mɛ tɛ ɔ, kɔ-mɛ, kɔ kira-wan ko wannu Nabukɔdɔnɔsɔr, ɓɛɛ nin-mɛ tɛ hu̧r dam zaŋnu lɛŋ.»