Read Northwest Gbaya JUDITH 12 Bible Online

JUDITH 12 - Northwest Gbaya bible

JUDITH 12

¹Holofɛrn ha̧nú mɛ mgbɔ Judith si sɛn kɔ tua kɔ‘i, sɛn fara nɛ o nyɛk bu-mbɔi kɔ̧-a̧ a̧a̧ sɛnɛ, in mɛ ha̧ o ŋma nyɔŋmɔ in dɔ̧ɔ̧ kɔ‘i ha̧ a̧.

²Ɓɛɛ Judith tɔ̧: «Mi beka nyɔŋ mɔ‘i na, wen ka'm tɛɛ de ɗaŋmɔ: nyɔŋmɔ n'am kaia tɛnɛ tɛ nyɛm am.»

³Holofɛrn tɔ̧̧ ha̧ a̧: «Ɓɛɛ, ka nyɔŋmɔ kɔ-mɛ nɛ kaɗa, ɛɛ tɛ kpa pɛr ti nyɔŋmɔ‘i ha̧ mɛ sɛn de? wen ŋma bíí zuduk ko-mɛ bo mgbara ɛɛ na».

⁴Judith kifa ha̧ a̧: «Nyaa, hee mɔ'ɔ n’ɛnɛ duk kpasa ga, Gasa Wan Sɔ̧ tɛ de ha̧ mɔ n'Aa kɔ̧a̧ so mɛ de, nɛ er-am, mɛ hɔ gba̧a̧, nɛti ha̧ nyɔŋmɔ kɔ‘m mɛ kaɗi »

⁵O gasawi-biro ko Holofɛrn mgbɔa Judith nɛnɛ kɔ tua-laa kɔ̧-a̧, Judith ɔɔ ya hegɔ hɔ ɗuka zaŋ zɛ, sɛka a kur, nyɛm nɛ gbɛŋa-ti-ɗɛɗɛ.

⁶A toma nɛɛ tɔ̧ ha̧ Holofɛrn: «Nyaa, ɛnɛ ha̧ nú wa a̧ e war ha̧ kodetom k’ɛnɛ mɛ gbo zan mɛ kɔfi Sɔ̧.»

⁷Holofɛrn ha̧nú ha̧ o wi-pɛm'a ka wa dor Judith tɛ gboo zan na. Judith ɔɔ zɛ taar kɔ gbagari. Mɛ zaŋ zɛ lɛŋ a zira ɗɔɔ kaya Betulii mɛ zui yì tɛ kpukput-yì, nɛ o widebiro pɛm.

⁸Tɛ daŋaa kɔ̧-a̧, a̧ kɔfa Gasa Wan Sɔ̧ ko Israɛl mɛ duk ti ha̧ a̧ gbak nɛ a mɛ kpasi dukbíí kɔ‘i.

⁹Ka a pii kaɗi, in ka tɛ-a sa̧ mbɛt kaɗi, ɓɛɛ a duka kɔ tua-laa kɔ̧-a̧ hɔ nɛ ŋgimbi nɛ wa tɛ ba nɛ nyɔŋmɔ tɛnɛ ha̧ a̧ mɛ ga̧a̧mɔ.

¹⁰Tɛ naar zɛ, Holofɛrn dea gasa gbaŋa ha̧ o gasa widetom kɔ̧-a̧; a sa ŋma bíí nɛtɛ tɛ gbaŋa'i na.

¹¹Ɓɛɛ a tɔ̧ ha̧ Bagoas, be kpana n'aa ee zu mɔ kɔ̧-a̧ lɛŋ: «Mɛ nɛ sa be-zoŋa hébreu nɛ duk tɛ kɔ-mɛ tɛnɛ, a mɛ tɔ̧ h'a̧ a̧ a̧ tɛ̧ nyɔŋ mɔ in nɔɔ dɔ̧ɔ̧ in yɛɛ.

¹²Wen, k’ɛ́ɛ́ e ha̧ pɛr ti de okóò hegɔ mɛ si ɗɔŋ, ɓɛɛ ɛɛ iŋ a na, mɔ‘i tɛ duk nɛ gasa mɔɔ-foe nyɛmna wen yɛ; k’ɛ́ɛ́ nyɛm mɛ de ha̧ a̧ mɛ kɔ̧ɔ̧ɗɔa mɛ demɔ in yɛ na, a tɛ zɛkɛdi yɛ. »

¹³Bagoas gboo nɛ tɛ kɔ Holofɛrn, ye tɛ ko Judith, ɓɛɛ tɔ̧ ha̧ a̧: «Ka gba de zɔŋa’ɛ de kíí mɛ tɛ tɛ ko wan kɔ‘m na: a̧ tɛ kpa de zɔnamɔ ti a̧, a tɛ nɔ dɔ̧ɔ̧-gbooyì nɛ desee in yɛɛ: a tɛ duk hee ŋma be-zɔŋa nu Asirii, nɛ ɔ kɔ kira ko gasa wannu Nabukɔdɔnɔsɔr ga.»

¹⁴Judith kifa ha̧ a̧: «Mi nɛ o'o ka'm bɛ̧ sara ko gasa wan kɔ‘m o? mɔ nɛ tɛ de tɛ-a lɛŋ, mi tɛ de nɛ hayaa: mɔ‘i tɛ duk nɛ gasa desee wen am, hɔ wese fio kɔ‘m. »

¹⁵Judith kura, nɛɛ pi̧ o de laa-gbooyi kɔ‘i, a nɛ a o mɔ-ɗafi-tɛ kɔ̧-a̧ lɛn. Kodetom kɔ̧-a̧ yaka ti ha̧ a̧, ɓɛɛ tati o ndara-sami mbɔɗɔnù ti Holifɛrn: nɛ́ o ndara nɛ Bagoas ha̧so ha̧ Judith, ha̧ a̧ mɛ ɔ nù zu a wese lɛŋnyɔŋ nɛ mɔ.

¹⁶Judith yee tua, ɓɛɛ nyafi ɔ nu gɔn ndara'i: see-Holofɛrn lɛŋ duk tɛ a, ɓɛɛ ɗɛɗ‘a gɔna nyɛmna tɛ zɔka a: wɔ tɛ-a gbɛ a nyɛmna mɛt ɔ in a, wen dika tɛ kuti wese n'aa zɔka nɛ a, Holofɛrn kia war mɛ ɔr a,

¹⁷Holofɛrn tɔ̧ɔ̧ ha̧ a̧: «mɛ nɔ mɔ, mɛ de nyɛŋɛ in yɛ.»

¹⁸Judith kifa ha̧ a̧: «Ii, nyaa, mi tɛ nɔ mɔ; wen sɔsɔɔ mi kpaa desee gan o dɔka wese lɛŋ n'am duka nɛnɛ.»

¹⁹A nɔa mɔ, a nyɔŋa mɔ, nɛ kodetom kɔ̧-a̧ ɗafa so ha̧ a̧, nɛ gba̧a̧yí Holofɛrn.

²⁰Nyɛŋɛ gana zu Holofɛrn wenzu Judith, ɓɛɛ a nɔ dɔ̧ɔ̧ nɛ dɔkaa, yak zale, hee mɔ'ɔ n'aa tɛ nɔ nɛti daka mɛ bem ga na.