Read Northwest Gbaya JUDITH 13 Bible Online

JUDITH 13 - Northwest Gbaya bible

JUDITH 13

¹Nɛ zɛ ɗuka kaɗi, o gasa widetom kɔ̧-a̧ gboa nɛ haya mɛ si tɛ kɔ-wa. Bagoas foa o bíí nɛ ɓɔna so katɛ wan kɔ‘i si zan, ɓɛɛ a kpɛe nutua-laa nɛ zan. Wa sia lɛŋ mɛ ɔ ya: tɛ-wa lɛŋ mbɔia wen dɔka dɔ̧ɔ̧ nɛ wa nɔa.

²Judith ɓɔna ɛnɛ in Holofɛrn nɛ tika kat gɔn gado kɔ̧-a̧, wen dɔ̧ɔ̧ gbɛ a.

³Judith tɔ̧̧ so ha̧ kodetom kɔ̧-a̧ mɛ yor zan, ka nutua, zɛm nɛ gboa kɔ̧-a̧, hee mɔ n'aa dee so wese lɛŋ ga. A tɔ̧a̧ so ha̧ a wi tɛ gbo zan mɛ kɔfi Sɔ̧; a tɔ̧a̧ nɛ kale kpɔk mɔ‘i ha̧ Bagoas mbɛt.

⁴O bíí pɛsa lɛŋ kaɗi: kóó kpɔk ɓɔn kɔ tua na, kóó nɛ geɗɛk-a kóó nɛ gasa mbɛt. Judith yor ŋgɔn ka naŋ-gado ko Holofɛrn, a kɔfi Sɔ̧, kɔ see-a, hee mɔ'ɔ ga: «Gasa Wan Sɔ̧, nɛ a̧a̧ nɛ ŋgayamɔ lɛŋ, Ɛnɛ dé ha̧ tom mɛ er-am mɛ hɔ gba̧a̧ kinii, wen ha̧ nin Jerusalɛm mɛ hu̧r.

⁵Ŋgimbi gbaka dukbíí k’Ɛ́nɛ́ hɔ̧ɔ̧ kaɗi, ŋgimbi kuma o wisɛn nɛ kura biro in yɛ hɔ̧ɔ̧ kaɗi: Ɛnɛ dé ha̧ tom, mɛ er-am, mɛ hɔ gba̧a̧.»

⁶Judith ɗɔla si ka zu-gado, fara nɛ Holofɛrn ee zu si sɛnɛ‘i, a ɓara gbapaa ko Holofɛrn,

⁷a ɗɔla siti woyo, a kasi muizu-Holofern, ɓɛɛ tɔ̧: «Gasa Wan Sɔ̧ ko Israɛl, Ɛnɛ há ŋgai k’Ɛ́nɛ́ ha̧‘m sɔsɔɔ. »

⁸A gɔma ger-Holofɛrn war yiitoo, nɛ ŋgai tɛ-a lɛŋ, ɓɛɛ ɓir zu-a yinɛ.

⁹Nɛ mɔ n'aa kina wɔr-a si ɗɔɔ gado, ɓɛɛ ɓar laa-kpɛ-zifa yinɛ, ɗoŋ tikiɗi, a gbo zan, ba zu-Holofɛrn ha̧ ha̧ kodetom kɔ̧-a̧,

¹⁰nɛ pi a kɔ ŋgɔɓɔ-nyɔŋmɔ kɔ̧-a̧, ɓɛɛ wa yiitoo, wa kai ŋma yak, hee mɔ'ɔ nɛ wa duka so mɛ de wese lɛŋ wen kɔfa Sɔ̧ ga. Wa ɓira nu gbagari si ɗɔɔ kaya, wa zika nɛ ka gbóŋgó, wa daŋ kaya si Betulii, ɓɛɛ wa hɔɔ nu-garo ye.

¹¹Judith hiɗa mɔ nɛ nyɛia̧ ha̧ o wi-pɛm nu-garo-ye: «Ɛnɛ húi, ɛnɛ húi nɛ hayaa, wen gasa Wan Sɔ̧ k’ɛ́ɛ́ a̧a̧ in yɛ, A̧ dea o gasa mɔ-gɔn-ɗɛɗɛ-bíí sɛn Israɛl, A usa ŋgai kɔ̧-A̧ ha̧ o wisɛn k’ɛ́ɛ́ sɔsɔɔ.

¹²Nɛ o bíí saaye zia tiger-Judith, wa zira nɛ hayaa si nu-garo ye, ɓɛɛ wa saa o kutiwi saaye tɛnɛ.

¹³O bíí lɛŋ, ku̧u̧naŋ-aa nɛ o bem hɔ tɛ o gasa bíí, wara yi gar nɛnɛ tɛnɛ, wen wa taa so, kɔ-wa, Judith beka pii ɗɔŋ ɓɔna! wa huia nu-garo, ɓɛɛ wa kpɛka o kóò nɔ‘i yiitoo nɛ dea, wa mɔi̧a̧ zik katɛ, ɓɛɛ wa yee wee mɛ zɔk mɔ nɛ sa̧-a̧.

¹⁴Ɓɛɛ Judith tɔ̧̧ ha̧ wa, nɛ heeger'e: «Ɛnɛ gási Sɔ̧, ɛnɛ gási A̧, ɛnɛ gási Sɔ̧, nɛ kaɗi dea ko ha̧ o be-Israɛl na, ɓɛɛ nɛ gbina ŋgai ko o wisɛn k’ɛ́ɛ́, nɛ ŋgai mɛ er'am, mɛ zaŋ-zɛ'ɛ̧.»

¹⁵Nɛ mɔ'ɔ n'a̧a̧ ba zu-Holofɛrn gbo nɛ kɔ ŋgɔɓɔ kɔ̧-a̧, usi ha̧ wa, ɓɛɛ a̧ tɔ̧ɔ̧ ha̧ wa: «Ɛnɛ zɔ́k zu-Holofɛrn, gasa wan-biro ko o be Asirii, ɛnɛ zɔ́k laa-kpe-zifa n'a̧a̧ ɔɔ so nu ɗɔɔ-a, ŋgimbi nɛ dɔɔ gbɛɛ a. Gasa Wan Sɔ̧ gusa a̧ nɛ er okóò.

¹⁶Nɛ nin Gasa Wan, nɛ duk kpasa nɛ gbaka'm tɛ tom kɔ‘m, nɛ mbetɛ nɛ́ saŋayi'm a ɔra Holofɛrn pi̧ a tɛ fio, ɓɛɛ a̧ de ɗaŋmɔ in am pi̧‘m tɛ foe in mɔ-buu na.»

¹⁷Tɛ zia wen'i, kíí dea o bíí lɛŋ, wa gu nù gasi nɛ Sɔ̧ ɓɛɛ wa tɔ̧ɔ̧ nyɛm ŋmaa'e: «Osoko h’Ɛ́nɛ́, Gasa Wan Sɔ̧ k’ɛ́ɛ́, wen sɔsɔɔ Ɛnɛ kuma o wisɛn ko dukbíí k’Ɛ́nɛ́ kaɗi

¹⁸Ozias baa wen, ɓɛɛ tɔ̧ ha̧ Judith: «Bokobem kɔ‘m, Sɔ̧ nɛ a̧a̧ nɛ ŋgayamɔ lɛŋ a̧ tok de yoŋgo zu mɛ gan zu o ŋma okóò zaŋnu lɛŋ. Osoko ha̧ Gasa Wan Sɔ̧, nɛ dee yiwese in nù, in nɛ mgbɔa mɛ nɛnɛ mɛ ɓir zu wan ko o wisɛn k’ɛ́ɛ́.

¹⁹Tɛ o bíí beka bii ɗɔŋ ee-ta kɔ-mɛ nɛ Sɔ̧ na yaknɛ sɔ̧i̧, tɛ-wa tɛ mbaŋ ɗoŋ ŋgai ko Sɔ̧ ɓɔnsɛnɛ.

²⁰Sɔ̧ a̧ de ha̧ nin-mɛ mɛ hu̧r ɓɔnsɛnɛ, A a̧ ha̧ o dɔka demɔ kɔ̧-A̧ ha̧ mɛ, wen nɛ mɛ yu kii fio mɛ kpasi dukbíí k’ɛ́ɛ́ nɛ wa ee so tɛ geemɔ na, in nɛ mɛ nɛɛ nɔ nɛ yuwar-a ti Sɔ̧ k’ɛɛ̧, mɛ dor yɛ tɛ yɔamɔ. Ɓɛɛ dukbíí lɛŋ kifa nú: Amɛn! Amɛn!