Read Northwest Gbaya JUDITH 14 Bible Online

JUDITH 14 - Northwest Gbaya bible

JUDITH 14

¹Judith tɔ̧̧ ha̧ wa: «O nya'm, ɛnɛ zíí: ɛnɛ bá zu-wiù hɛ̧ɛ̧, ɛnɛ gái a nɛ ŋgɔn tɛ garo ye k’ɛ́nɛ́

²Ɓɛɛ sa̧a̧mɔ mɛ tutuyɛ, nyɛm nɛ sɛkɛ sɛkɛ wese, o nde lɛŋ a̧ kai o boi-biro kɔ‘i, o ŋgaŋa bíí lɛŋ ɛnɛ tɛ gbo nɛ saaye, ɛnɛ tɛ hok ŋma bíí mɛ ɔ wan zu ‘nɛ́, ɓɛɛ ɛnɛ tɛ demɔ, hee ɛnɛ kɔ̧a̧ mɛ zir ɗɔɔ kaya sitɛ o wi-biro ko o be-Asirii ga, ɓɛɛ k’ɛnɛ zir na!

³O be-Asirii ɗɔɔ kaya tɛ kai o boi-biro kɔ-wa yak si kɔ gbagari kɔ-wa, wa tɛ tun o gasawi-biro kɔ-wa, nɛ tɛ ma yi si sɛn kɔ tua ko Holofɛrn; wa beka kpa a na, ɓɛɛ gasa kíí tɛ hɛr zaŋ-wa, ɓɛɛ wa tɛ yu mɔ yak nyɛi̧ nɛ ɛnɛ.

⁴Ɛnɛ, in o be-Israɛl lɛŋ, ɛnɛ tɛ ndak ɗoŋ wa, ɓɛɛ ɛnɛ tɛ gbɛ wa fara yuu mɔ.

⁵Nɛti, ɛnɛ tɛ nɛɛ sa Akiɔr be Ammɔn tɛnɛ sɛ, ha̧ a̧ mɛ zɔk, nɛ gbaayi'a, zu-wi nɛ tɔ̧̧ wen zu o be-Israɛl e nɛ wa tɛ geemɔ, zu-wi nɛ toma so a tɛnɛ ha̧ a̧ mɛ fe in yɛɛ.

⁶Wa nɛɛ sa Akiɔr nɛ kɔ tua ko Ozias tɛnɛ. Akiɔr hɔa, a̧ zɔka zu-Holofɛrn, nɛ ŋma wiwii kasi nɛ er, ɓɛɛ bele zar a pi nù.

⁷Wa baa Akiɔr e ngɔn, ɓɛɛ a hɔfi tik naŋ-Judith gu nù ti a, ɓɛɛ tɔ̧: «Toka de yoŋgo ko Sɔ̧ a̧ duk zu mɛ sɛn kɔ tua-laa ko o be Judéé lɛŋ, in mgbara o dukbíí zaŋnu lɛŋ, nɛ ɗɛɗɛ-wa tɛ gɔn tɛ zia saa nin-‘mɛ.

⁸Ɓɛɛ kinii, mɛ ɓa ɗoŋ mɔ nɛ mɛ dea lɛŋ zaŋ o zɛ nɔ‘i ha̧‘m.» Judith yora poo dukbíí we ɗoŋ mɔ n'a̧a̧ dea lɛŋ, ku̧u̧naŋ-a nɛ wese n'a̧a̧ gboo nɛ Betulii, hɔ ŋgimbi n'a̧a̧ tɔ̧ nɛ wen’ɛ̧.

⁹A̧ kaɗa tɔ̧ɔ̧ nyɛrɛ mɔ‘i kaɗi, ɓɛɛ dukbíí gai mɔ nɛ héé gɛ́r, ɓɛɛ hee yili dam saaye lɛŋ.

¹⁰Nɛ a̧ zia mɔ nɛ Sɔ̧ ko Israɛl dea'i lɛŋ, Akiɔr kɔ̧ɔ̧ɗɔa ha̧ Sɔ̧ nɛ ŋgai tɛ-a lɛŋ, ɓɛɛ a kpɛk ha̧‘i mɛ gɔn bɔr-a. Nɛ hegɔ a̧ a yea nɛ mgbara o be-Israɛl hɔ sɔsɔɔ.

¹¹Mɛ gɔna ndaazan, o be Betulii gai̧a zu-Holofɛrn ŋgɔn tɛ garo; o wiwii lɛŋ kaia o boi-biro kɔ-wa, ɓɛɛ wa kai nɛ ŋmaa zir si ɗɔɔ kaya.

¹²Nɛ o be Asirii zɔka wa, wa toma o bíí mɛ mbaŋ tɛ o wan-biro kɔ-wa: o i̧i̧ nɔ‘i toma ha̧ o wi-duk zu wa nɛtɛ nɛtɛ.

¹³Wa hɔa nutua ko Holofɛrn, ɓɛɛ wa tɔ̧ ha̧ wi-duk zu mɔ kɔ̧-a̧‘e: «Mɛ nɛɛ tun gasa wan-biro k’ɛ́ɛ́, wen o ɗaŋ bara nɔ'ɔ nɔɔ ŋgiɗi mɛ de biro in yɛɛ: wa a kíí h’ɛ́ɛ́ mɛ kum wa lɛŋ gbuɗuk'i.»

¹⁴Bagoas yee tua, ɓɛɛ a mbɛr er-a nu-ɓaɓur, wen a taa so'e Holofɛrn ɔ nɛ nu in Judith.

¹⁵Ɓɛɛ, hee mɔ'ɔ nɛ ŋma kifanú bo na ga, a wɛna laa nu-ɓaɓur yinɛ, a ye mɔ, ɓɛɛ a̧ kpa wɔr Holofɛrn mbɔɗɔnu ti gado, gɔ́ɔ́zu-a bo hi̧i̧ na.

¹⁶Bagoas hiɗa mɔ nɛ heeger, hi̧i̧ kɔ̧a, gɔfi mɔ, he mɔ nɛ ŋgaya, a̧k laa tɛ.

¹⁷A yee kɔ tua nɛ Judith ɔɔ so sɛnɛ, ɓɛɛ a kpa Judith na. A maa yi si poo gíí widebiro, hiɗi nɛ mɔ‘e:

¹⁸«O bara nɔ'ɔ wa deemɔ yek nɛ ɛ́ɛ́: kóò hébreu kpɔk pi̧i̧ foe tɛ nutua ko Nabukɔdɔnɔsɔr lɛŋ; Holofɛrn ɔ mbɔɗɔnu, gɔ́ɔ́zu-a bo na.»

¹⁹Tɛ zia wen'i, o gasawi-ɓiro ko be-Asirii a̧ka̧ laa tɛ, ɗɛɗɛ-wa gɔna nɛ ɗaŋa nyɛmna, wa nɔi̧a o gɔfamɔ in o ŋgaya hiɗimɔ dam zaŋ gbagari lɛŋ.