Read Northwest Gbaya JUDITH 15 Bible Online

JUDITH 15 - Northwest Gbaya bible

JUDITH 15

¹Nɛ o wi nɛ ɔ kɔ tua-laa zia nyɛrɛmɔ‘i, bele zara wa te mɔ nɛ hɔa.

²Gasa kii in naka-tɛ dee wa, wa nyɛm mɛ duk ka tɛ ŋmaa na, ɓɛɛ wa pɛsi lɛŋ yu nɛ mɔ, nɛ o yuwar zaŋ kaya in ɗɔɔ kaya.

³O wan nɛ ɔ zaŋ kaya zik nɛ ye Betulii yuu mɔ yak mbɛt. O be-Israɛl, wan nɛ nyɛma so mɛ de biro lɛŋ, tika zu wa.

⁴Ozias toma o betom si sɛn Betomɛstaim, in Bebai, Koba, Kola, in sɛn oi zikanù Israɛl lɛŋ, mɛ tɔ̧ mɔ nɛ yaka lɛŋ ha̧ wa, in mɛ tɔ̧ ha̧ wa mɛ máá yi ɗoŋ o wisɛn mɛ kum wa lɛŋ.

⁵Nɛ o be-Israɛl zia tom'i, wa wara yi tik zu wa war kpɔk, gbɛ nɛ wa hegɔ hɔ Kɔba. O wi Jerusalɛm in o wi mɛ zaŋ kaya lɛŋ hɔa mbɛt, wen wa toma nɛ nyɛrɛ mɔ nɛ hɔa sɛn gbagari ko o wisɛn ha̧ wa. O wi mɛ nu Galaad in mɛ nu Galiléé kura nɛ mgbɔɔr mɛ tik zu o wisɛn, ɓɛɛ ndak ɗoŋ wa, kum nɛ wa, hɔ nɛnɛ ka Damas in zikanu Damas.

⁶O wi nɛ ɓɔna sɛn Betulii zira kaya tik zu gbagari ko o be-Asirii ɗɔɔ kaya, wa yaia mɔ kɔ-wa lɛŋ, ɓɛɛ kai mbɔi kɔ-wa nɛ dɔkaa.

⁷O ŋma be Israɛl nɛ daŋa biro kaia o oi mɔ. O wi mɛ gedɛk ye in mɛ gasa ye zu kaya in ɗɔɔ kaya kpaa, war kɔ‘i, nɛ dɔkaa mbɛt, wen mbɔi oi biro gbisi so gbisi.

⁸Gasa Wan-ɗafi-sɔ̧ Joakim, in o kutiwi nu-gara ko o be-Israɛl, nɛ yaa so Jerusalɛm, tɛa mɛ zɔk o demɔ nɛ Gasa Wan Sɔ̧ dea in Israɛl, mɛ zɔk Judith in mɛ fan a̧.

⁹Wa yee tɛ kɔ Judith, ɓɛɛ wa ee nu-wa kpɔk mɛ zɔn a, wa tɔ̧̧: «Mɛ baa nin Jerusalɛm e ŋgɔn! mɛ nɛ mɔɔ-duk-tɛ kɔ o be Israɛl! mɛ nɛ mɔɔ-hu̧r-nin duk k’ɛ́ɛ́!

¹⁰O mɔ nɔ‘i lɛŋ dea nɛ er-mɛ! mɛ dea demɔ nyɛmna in Israɛl, ɓɛɛ Sɔ̧ kɔ̧ɔ̧ ɗɔɔ mɔ nɛ mɛ dea lɛŋ. Gasa Wan nɛ a̧a̧ nɛ ŋgayamɔ lɛŋ a̧ tok de yoŋgo zu mɛ kpoo nɛ kpoo!». Ɓɛɛ o bíí lɛŋ kɔ̧ɔ̧ɗɔa: «Amɛn! Amɛn!»

¹¹O be-Israɛl pɛa mɔ oi o be-Asirii sɛn gbagari kɔ-wa tɛ zɛ ɓu-taar. Wa ha̧tua-laa ko Holofɛrn ha̧ Judith, in o mɔ bu-boi kɔ̧-a̧ lɛŋ, o gado kɔ̧-a̧ lɛŋ, o nyɛk in o mɔ kɔtua kɔ̧-a̧ lɛŋ. Judith kaia o mɔ nɔ‘i hɛr zu alfadaari kɔ‘i, a mɔi̧a̧ oi mɔ kɔ o keekee-nyaŋa kɔ̧-a̧.

¹²O okóò Israɛl lɛŋ wara yi tɛnɛ mɛ zɔk Judith in mɛ zɔn a; o ŋma poo wa nɛka zik kpa, yɔ nɛ yɛ, bii nɛ gima zɔn nɛ a̧.

¹³Judith baa hɛra wa̧a̧-te kɔ er, ɓɛɛ ha̧ ha̧ o okóò nɛ yaa in a̧; wa gu o waa-te-nɔ zu wa, ɓɛɛ Judith duk ti ha̧ o dɔka okóò yɔ nɛ yɛ. O wiwii Israɛl lɛŋ kaia o boi-biro kɔ-wa, wa kara wa̧a̧ gu zu wa, ɓɛɛ wa nɛɛ ɗoŋ wa, bii nɛ gima in wa.

¹⁴Ɓɛɛ Judith ŋma nu tɛ gima de nɛ osoko ha̧ Sɔ̧, ti o be-Israɛl lɛŋ, ɓɛɛ bii lɛŋ ba gɛr gima in a: