Read Northwest Gbaya JUDITH 16 Bible Online

JUDITH 16 - Northwest Gbaya bible

JUDITH 16

¹«Ɛnɛ mbɛ́r biɔ̧ bii nɛ gima ha̧ Sɔ̧ kɔ‘m, ɛnɛ mbɛ́r kuŋge bii nɛ gima ha̧ Gasa Wan, Ɛnɛ de gima mɛ zɔn A, ɛnɛ gás'A, ɛnɛ kɔf'A sa nɛ nin-A.

²Wen Gasa Wan nɛ Sɔ̧-gbin-biro, A dee o gbagari kɔ̧-A̧ poo dukbii kɔ̧-A̧. A ɓara'm er o wisɛn kɔ‘m yinɛ.

³Asur tɛa nɛ zaŋ kaya mɛ ŋgɔn, a tɛa nɛ gba gii widebiro, nɛ‘i nyɛm mɛ tɔr na, gii wi nɔ‘i gbisi gbisi, kpɛ nɛ o gbor-gbor-yi lɛŋ, o nyaŋa kɔ-wa kpɛ nɛ o zutɔ̧ lɛŋ diɔ̧m.

⁴Wa kɔ̧ɔ̧ so mɛ dɔ nu kɔ‘m gbuɗuk, mɛ gbɛ o be-ŋgaiwi kɔ‘m nɛ gbapaa, mɛ siŋ o be-zɔɗi bem kɔ‘m pi̧ nu, mɛ kai o bem kɔ‘m nɛ bara, in mɛ kai o bokobem kɔ‘m yaknɛ.

⁵Nɛ mɔ nɛ Gasa Wan nɛ a̧a̧ nɛ ŋgayamɔ lɛŋ dora wa nɛ er-okóò.

⁶Wen bo nɛ o ŋgaiwi a̧ gbɛa wan kɔ-wa na, bo nɛ obem ko ŋgaŋa wi a̧ mbɛra a na, bo nɛ o gba kusa wi a̧ tika zu a na mbɛt, ɓɛɛ mɛ nɛ Judith, bokobem ko Merari, mɛ nɛ de saŋayi-Judith a̧ dea ha̧ bele mɛ zar a pi̧ nu.

⁷A kpɔia so o laa-gɛra kɔ̧-a̧ pi nu, ha̧ a̧ mɛ ba o wibɔnɛ Israɛl e ŋgɔn. A sɔ̧a de pɛr nɔ̧ tɛ saŋayi-a,

⁸A hɛra muizu-a nɛ de salabi, a mara nɛ de goe wen mɛ ɔr a,

⁹o de ndara naŋ-a dea ha̧ zu-a mɛ zik, de saŋayi-a dea ha̧ gba-gbana bele mɛ zar a, ɓɛɛ gbapaa ɓira zu-a yinɛ.

¹⁰Nɔɔ-ŋgiɗi ko Judith dee ha̧ tɛ o be Pɛrsɛ mɛ nak, nyoŋa-nin kɔ̧-a̧ dea ha̧ bele mɛ dak o be Mɛdɛ pi nu.

¹¹O ga̧a̧wi mɛ dukbii kɔ‘m gaia mɔ, ɓɛɛ kii hɛr zaŋ o wi nɔ‘i, o ɓɔsawi k’ɛ́ɛ́ hiɗa mɔ nɛ heeger, ɓɛɛ tɛ o wi nɔ‘i nak; wa hiɗa mɔ nɛ ŋgayaa gan, ɓɛɛ zu o wi nɔ‘i daŋa.

¹²Wa toka wa sar hee o bem ko gee okóò ga, wa ɛɛ da̧i̧ tɛ wa hee tɛ o bem ko o wi-de-kii nɛ yu biro ga, ɓɛɛ wa fee yi biro ko Gasa Wan kɔ‘m.

¹³Mi tɛ bii nɛ mbe gima ha̧ Sɔ̧ kɔ‘m: Gasa Wan, ɛnɛ ɔ gasa nyɛmna, gasamɔ k’Ɛ́nɛ́ nyɛmna, ŋgai k’Ɛ́nɛ́ nɛ mɔ-gɔn-ɗɛɗɛ-wi, ŋma mɔ nyɛm mɛ gan'Nɛ́ na.

¹⁴O mɔ n’Ɛnɛ dea lɛŋ a̧ de tom h’Ɛ́nɛ́, wen Ɛnɛ tɔ̧a̧ so wen, ɓɛɛ mɔ nɔ‘i lɛŋ de, Ɛnɛ toma so Ɔmi k Ɛ́nɛ́ pi̧ zu wa, ɓɛɛ wa yor, ŋma bíí kpɔk nyɛm mɛ yor ti'Nɛ́ na.

¹⁵O naŋ kaya tɛ nak ɓɛɛ gbina tik ɗɔɔ yi, o kamta tɛ yeli ti ' nɛ́, hee mbɔɗa sake gɔrɔ ga: ɓɛɛ, nɛ k’Ɛ́nɛ́, Ɛnɛ beka kaɗi dee ko ha̧ o bíí nɛ yu kii'Nɛ́ na.

¹⁶O mɔɔ-dafi'Nɛ́ lɛŋ nɛ́ be-geɗɛk mɔ tikiɗi, nɛ pɛr-a nun nɛ dea ti'Nɛ́ na, o nɔ-kpoo nɛ wa dɔ nɛ oi-aa lɛŋ wen ɗafa Nɛ́ nɛ geemɔ gan, ɓɛɛ wi nɛ yu kii Gasa Wan duk nɛ gasawi kpoo nɛ kpoo.

¹⁷Bɔnɛ a̧ tik zu o zudukbii nɛ kur mɛ de biro in dukbii kɔ‘m: Gasa Wan nɛ a̧a̧ nɛ ŋgayamɔ lɛŋ tɛ usi bɔnɛ ha̧ wa sɛn wese gasa kita. A tɛ de ha̧ wee in o dɔk mɛ ye tɛ kpoo-tɛ-wa, ɓɛɛ wa tɛ hi̧i̧ kɔ̧a̧ tɛ nyimmɔ kpoo nɛ kpoo.»

¹⁸Ŋgimbi nɛ wa hɔa Jerualɛm, wa gasa Sɔ̧; ɓɛɛ, nɛ war tɛ dukbii ɗafa sa̧ kaɗi, wa dɔɔ kpoo ɗafi nɛ Sɔ̧, wa ha̧o ha̧a̧mɔ nɛ ta-tɛ, in o ŋma ha̧a̧mɔ nɛtɛ nɛtɛ.

¹⁹Judith ha̧so o mɔɔ-kɔtua kɔ Holofɛrn lɛŋ, nɛ dukbíí ha̧so ha̧ a̧, ha̧ Sɔ̧. A̧ ha̧zɔ-laa-ba-zifa, n'aa baa so kɔtua ko Holofɛrn, ha̧ Sɔ̧ mɓɛt.

²⁰Dukbíí hɔɔ zaŋgule ti sa̧-a̧ Tua ko Sɔ̧, sɛn Jerusalɛm tɛ fiozɛ taar, ɓɛɛ Judith duk in wa.

²¹Ɗoŋ nɛ gbaŋa yaka kaɗi, kóó o nde sia ɗoŋ tɛ kɔ‘i. Judith mbɛt sia ɗoŋ Betulii, ɓɛɛ a ɔ tɛ kɔ̧-a̧. Nin-a hu̧ra dam zikanu'i lɛŋ, hɔ wese fio kɔ̧-a̧.

²²O wiwii nɛ dɔkaa kɔ̧ɔ̧ so mɛ ba a nɛ koo, ɓɛɛ ɗoŋ nɛ wii kɔ̧-a̧ Manasse pɛɛ see, ɓɛɛ si ɗoŋ kpa o zɔmdaa kɔ‘i, ŋma wiwii kpɔk iŋ na, hegɔ hɔ nɛnɛ tɛ fio kɔ̧-a̧.

²³Nin-a hu̧ra siti siti; a duka kɔ tua ko wii kɔ̧-a̧ sɔk nɛnɛ: a kpaa nɛ pɛ gɔmŋma nɛ pɛ mɔɔrɔ. A gboa kodetom kɔ̧-a̧ tɛ bara, ɓɛɛ a fe sɛn Betulii. Wa guna a kɔ di̧i̧ ko wii kɔ̧-a̧ Manasse.

²⁴Dukbíí Israɛl hi̧a̧ fio kɔ̧-a̧ zaŋ zɛ mɔɔrɔ-ɗoŋ-yiitoo. Nɛti ha̧ a̧ mɛ fe, a kɛ̧a so o mbɔi kɔ̧-a̧ nɛ o nam ko wii kɔ̧-a̧ Manasse, in o pɛrnam kɔ̧-a̧ mbɛt.

²⁵Ŋgimbi ko Judith, in zaŋ pɛ nɛ dɔkaa ɗoŋ fio kɔ̧-a̧, ŋma bíí nɛ nɔɔ ŋgiɗi mɛ pi̧ kii tɛ o be-Israɛl bo ɓɔna.