Read Northwest Gbaya JUDITH 2 Bible Online

JUDITH 2 - Northwest Gbaya bible

JUDITH 2

¹Tɛ ɓu-zua-mɔɔrɔ-ɗoŋ-taar pɛ ɔɔ-wan kɔ̧-a̧, in wese ɓu-yiitoo-zua-yiitoo tɛ kuti zɛ, wa baa keta kɔ kira ko Nabukɔdɔnɔsɔr, wannu Asirii; mɛ kifi er daŋmɔ in o bíí nu lɛŋ, nyɛm nɛ ɗoŋ ha̧a̧nú ko wannu.

²A̧ saa o gasawi kɔ̧-a̧ lɛn, in o gasa wan-biro lɛŋ, a baa keta nɛ hu̧saa in wa, ɓɛɛ a̧ tɔ̧, nɛ nu-a, wi tɛ ɗaŋ nu ko o wi nɔ‘i.

³Wa ee zua mbɛt mɛ gbɛ o bíí lɛŋ nɛ bɛ̧ a sara ko wannu mɛ ye biro’ɛ.

⁴Hegɔ, ɗoŋ nɛ Nabukɔdɔnɔsɔr, wannu Asirii, kaɗa nɛ keta'i, a̧ saa Holofɛrn, gasa wan-de-biro kɔ̧-a̧, in gbama-ŋgai kɔ̧-a̧, ɓɛɛ tɔ̧ ha̧ a̧:

⁵«Wen ko gasa wannu, nɛ ɔ wan zu nu lɛŋ, nɛ mɔ'ɔ: mɛ yak, mɛ nɛ kai o ŋgaŋa widebiro in mɛ, hee bíí gɔmŋmaa nɛ bíí ɓu-yiitoo ga, in gba gíi nyaŋa-biro, ka ba nɛ o wi-daŋ-nyaŋa-biro booro ɓu-zua-yiitoo.

⁶Ɓɛɛ mɛ nɛ tik zikanu mɛ yee-wese nɛ biro wen wa bɛ̧a wen nú‘m.

⁷Mɛ tɔ̧ ha̧ wa mɛ ɗafi nu in yì, wen nyimsea kɔ‘m tɛ tik zu wa, dap naŋ o widebiro kɔ‘m tɛ yɔk nu hi̧i̧ ɗɔi-ɗɔi, ɓɛɛ mi tɛ e nu hi̧i̧ ha̧ wa mɛ ɗaŋ mɔ sɛnɛ lɛŋ kpaŋgala kpaŋgala.

⁸O wanda̧i̧ kɔ-wa tɛ dun o gboŋgo kúuŋ. O gbór-gbór-yì in o nana-yì lɛŋ tɛ dun nɛ o wɔr-fio kɔ-wa fok nɛnɛ kumɓaŋ kumɓaŋ.

⁹Mi tɛ kai o ŋma mgbara wa nɛ bara-biro yaknɛ hɔ nduti nù.

¹⁰Mɛ nɛ kɔ-mɛ, mɛ nɛɛ ba o zikanù kɔ-wa lɛŋ ha̧‘m; wa tɛ ɔ nu ha̧ mɛ, ɓɛɛ mɛ kasi wa nɛ dea hɔ wese n'am tɛ gɔn kita zu wa;

¹¹O wan nɛ tɛ de ŋgazu, ka gba̧a̧yí-mɛ nɛ́ to wa, ka mɛ de ko ha̧ wa na, mɛ gbɛ wa yine lɛŋ, a mɛ ɗaŋ nu kɔ-wa lɛŋ yinɛ mbɛt.

¹²Hee mɔ'ɔ n'am duk kpasa ga, hee mɔ'ɔ nɛ wan kɔ‘m kpa ŋgai ga, mi kanamɔ, mɔ nɛ nú‘m tɔ̧a̧, er-am tɛ de.

¹³Ɓɛɛ kɔ-mɛ, ká mɛ e o ha̧a̧nú ko wan kɔ-mɛ dúk, kóó kpɔk na. Mɛ dé mɔ lɛŋ n'am tɔ̧a̧ ha̧ mɛ nyɛm sɛnɛ, ɓɛɛ mɛ dé mɔ‘i nɛ hayaa.»

¹⁴Holofern gboa kɔ̧ tua ko wannu, ɓɛɛ a̧ mɔi̧ o be-wan, o wan-biro, in o gasa widebiro ko o bíí Asirii lɛŋ.

¹⁵Hee mɔ'ɔ nɛ wannu tɔ̧a̧ ha̧ a̧ ga, a̧ mɔi̧a o ŋgaŋa widebiro, hee booro gɔmŋmaa nɛ ɓu-yiitoo ga, in o wi-daŋ-nyaŋa nɛ oi boi de-biro kɔ-wa booro ɓu-zua-yiitoo.

¹⁶A̧ kɛ̧a wa hee mɔ'ɔ nɛ‘i kɛ̧ nɛ o bíí wen dee biro’ɛ ga.

¹⁷A̧ kaia o ŋgeloba, o tui-fuu in o alfadaari nɛ dɔkaa wen kaia o tui, ka ba nɛ o sami, o ndai in o gbadua, nɛ‘i nyɛm mɛ tɔr na, wen nyɔŋaa.

¹⁸Bíí kpɔk kpɔk kpaa mɔɔ-nyɔŋ nɛ dɔkaa, wa kpaa lɔr in bu-mbɔi nɛ tɛ nɛ tɛ ko wannu nɛ dɔkaa mbɛt.

¹⁹Holofɛrn kura in o widebiro kɔ‘i lɛŋ, a̧ yaka ti ha̧ wannu Nabukɔdɔnɔsɔr mɛ kpe o zikanu mɛ war yee-wese lɛŋ, nɛ o keeke-biro, o nyaŋa-biro, in o ŋgaŋa widebiro kɔ̧-a̧.

²⁰Gba gii bíí nɛ‘i nyɛm mɛ tɔr na, gba dɔka bíí nyɛmna, hee gba-dɔya ga kóó hee nyɛmɛ zaŋnu’ɛ̧ ga, yaka in wa.

²¹Wa kura Ninivɛ, wa nɛɛ nɔ zɛ taar yak si bɔkɔnù Bɛktilɛk ɓɛɛ wa kura Bɛktilɛk mɛ nɛ de gbaagari kɔ-wa sɛn ka kaya, nɛ duk nɛ war gale ko Silisii mɛ ŋgɔn.

²²Holofɛrn kura hi̧i̧ in o widebiro kɔ‘i lɛŋ, o wi nɛ nɛ nɛ naŋ, o wi-daŋ-nyaŋa in o keekee-nyaŋa, mɛ yak nɛ nyɛia̧ si mgbara kaya.

²³A̧ gana obe-Put, obe-Lut tɛ biro, ɓɛɛ a̧ kai o mɔ ko o bezaŋ Rassis in Ismaɛl nɛ ya nù gbárà mɛ ndaá Keleɔn lɛŋ.

²⁴A̧ baa ku̧u̧ Efrat ɓir yak nɛ nu Mesopotamii, ɓɛɛ a̧ yai o ŋgaŋa ye nɛ yaa so ka zaŋ gbor-gbor-yì Abrona, hɔ nɛnɛ nú gbatɔp.

²⁵A̧ baa zikanu Silisii lɛŋ, gbɛ nɛ o wi nɛ ba zu duk nɛ a̧ lɛŋ yinɛ, ɓɛɛ nɛ hɔ mgbara-nu ko Jafɛt mɛ ɗɔɔ, tan nɛ nu Arabii.

²⁶A̧ kɛra o be Madian lɛŋ e see-a, a̧ dɔa o gbagari kɔ-wa yinɛ, ɓɛɛ a̧ kai o mɔdai kɔ-wa yak nɛnɛ.

²⁷Hɔɗoŋ-aa a̧ zira si bɔkɔnù Damas, ŋgimbi mɔi̧a alkamaari, ɓɛɛ a̧ dɔ o fɔ kɔ-wa lɛŋ yinɛ. Nɛ mɔ'ɔ n'a̧a̧ kuma o gíí gedɛk in gasa mɔdai kɔ-wa lɛŋ gbuɗuk, kai nɛ o mbɔi gasa ye kɔ-wa lɛŋ nɛ ŋgai, ɗaŋ nɛ o fɔ kɔ-wa lɛŋ yinɛ, gbɛ nɛ o ŋgaiwi lɛŋ nɛ gbapaa.

²⁸Nɛ mɔ'ɔ nɛ gasa kii in bele baa o wi nɛ ɔ nú gbatɔp lɛŋ: o bíí Sidɔn in Tyr, o bíí Sur in Okina in Jamnia. Gasa kíí nyɛmna dee o bíí Azɔt in Askalɔn