Read Northwest Gbaya JUDITH 3 Bible Online

JUDITH 3 - Northwest Gbaya bible

JUDITH 3

¹O bíí toma o betom nɛ o sore-ga̧mɔ si tɛ Holofɛrn, wa tɔ̧̧ ha̧ a̧:

²«Ɛɛ nɛ o widetom ko gasa wannu Nabukɔdɔnɔsɔr, s’ɛ́ɛ́ tɛɛ ti'nɛ́'ɛ: Mɔ n’ɛnɛ kɔ̧a̧ lɛŋ, ɛnɛ dé nɛ ɛɛ.

³O ɓɔramɔ ko o mɔdai k’ɛ́ɛ́, o nu k’ɛ́ɛ́ lɛŋ, o fɔ-alkamaari k’ɛ́ɛ́ lɛŋ, o giigeɗɛk in o gasa mɔdai k’ɛ́ɛ́ lɛŋ, o ɓoramɔ ko mɔdai ko o yara k’ɛ́ɛ́ lɛŋ, a̧ ti ‘nɛ́, ɛnɛ kái mɛ de nɛ mɔ n’ɛnɛ kɔ̧a.

⁴O gasa ye k’ɛ́ɛ́, in o bíí zaŋ-a nɛ oi gun, nɛ́ o bara k’ɛ́nɛ́. Enɛ tɛ́, ɛnɛ yé sɛnɛ, hee mɔ'ɔ n’ɛnɛ kɔ̧a̧ ga.»

⁵O wi nɔ‘i tɛa tɛ Holofɛrn, ɓɛɛ wa tɔ̧́ ha̧ a̧ hee mɔ‘i ga.

⁶Nɛ mɔ'ɔ n'a̧a̧ zira si ka zaŋ gasa tɔp in o widebiro kɔ̧-a̧, a ea o wi-pem-mɔ kɔ̧-a̧ sɛn tɛ o gasa ngaŋa ye lɛŋ, ɓɛɛ a̧ kai o wan-ŋgai mgbara wa, mɛ gbak o widebiro kɔ̧-a̧.

⁷O wi saaye'i̧ lɛŋ in o bíí mɛ zikanu'i lɛŋ, wa ɗafa tɛ-wa nɛ demɔá-gu-zu, kpɛk nɛ a̧, mbɛr nɛ biɔ̧, yɔ nɛ yɛ ti a̧.

⁸A̧ yaia o zikanu kɔ-wa lɛŋ ɓɛɛ a̧ gɔm o te-ɗafi-sɔ̧ kɔ-wa a nu yinɛ mbɛt, wen, nyɛm nɛ ɗoŋ ha̧a̧nu ko wi nɛ toma a'i, a̧ tɛ yai o geesɔ̧ zu nu lɛŋ yinɛ, wen ha̧ o dukbíí lɛŋ mɛ gasi nɛ wannu Nabukɔdɔnɔsɔr kpɔk ɓɛɛ, ha̧ leɓe-wi lɛŋ in o zuduk-bíí lɛŋ mɛ gasi a̧ hee sɔ̧ ga.

⁹Nɛ mɔ'ɔ n'a̧a̧ hɔɔ nù Ɛsdrɛlɔn, sɛn ka ye Dɔtaim, mgbak ka naŋ gasa diɔ̧-kaya nu Judéé

¹⁰a dea gbagari kɔ̧-a̧ mgbara o gasa ye Gebai in Sytopolis, ɓɛɛ wa duka hi̧i̧, fiozɛ kpɔk, mɛ mɔi̧ o mbe tui wen o widebiro kɔ̧-a̧.