Read Northwest Gbaya JUDITH 4 Bible Online

JUDITH 4 - Northwest Gbaya bible

JUDITH 4

¹O be-Israɛl, nɛ ɔ nu Judéé, zia so nyɛrɛ mɔ nɛ Holofɛrn, gasa wan-de-biro ko Nabukɔdɔnɔsɔr, wannu Asirii, dea in o dukbíí nɛtɛ nɛtɛ, in hee mɔ'ɔ n'a̧a̧ kpɔi̧a nɛ́ mɔ lɛŋ sɛn kɔ tua-ko o geesɔ̧ kɔ-wa yinɛ, in n'a̧a̧ ɗaŋa nɛ o tua nɔ‘i ga.

²Gasa kíì dee wa nyɛmna, ɓɛɛ ɗɛɗɛ-wa ŋman nɛ ŋgaya wen Jerusalɛm in wen Tua ko gasa Wan Sɔ̧ kɔ-wa.

³Wen wa gboa so tɛ bara ɓan na, ɓɛɛ dukbíí mɛ nu Judéé lɛŋ mɔi̧a̧ ŋmaa, ɗoŋ-aa tɛ nyɛi hɔ̧ɔ̧ na, wa toka de yoŋgo zu Tua ko Sɔ̧, in o nyɛk nɛ ya sɛnɛ, in zu taŋge-ɗafi-Sɔ̧, ɗafi nɛ wa oi ɗaŋa nɛ wa ɗaŋa so wa, ɗoŋ-aa tɛ nyɛi hɔ̧ɔ̧ na mbɛt.

⁴O be-Israɛl toma o betom dam zikanu Samarii lɛŋ, in zikanu Kona, Bɛt-Hɔrɔŋ, Abɛlmain, Jeriko, hɔ sɛn Kɔba, Aisɔr in sɛn bɔkɔnu Salɛm.

⁵Wa baa fara mgbak ɓɛ̧i̧a̧ nu kaya nɛ gana o ŋmaa nɛ kusa, wa zika o ye zu kaya nɛ ŋgaya garo, ɓɛɛ wa mɔi̧ o mɔɔ-nyoŋ in o mɔɔ-de-biro nɛ dɔkaa á sɛnɛ, wen o nyɔnɔ kpɛɛfɔ kɔ-wa'i nɛ mɔ nɛ wa mɔi̧a̧ kinɛ ɓɛɛ.

⁶Joakim, nɛ duka so gasa wan-ɗafi-sɔ̧ sɛn Jerusalɛm ŋgimbi'i, toma kalata ha̧ o be Betulii in Betomɛstaim: o ye nɔ‘i a̧a̧ tan nɛ́ Ɛsdrɛlɔn, si war bɔkɔnu Dotaim.

⁷A̧ tɔ̧ɔ̧ ha̧ wa mɛ pɛm o ɓɔtɔ-ɓɔtɔ yuwar kaya, wen mɛ nɛ o yuwar nɔ‘i a̧ wa ba mɛ yak nɛnɛ si nu Judéé. Dora o bíí tɛ ba o yuwar nɔ‘i beka ŋgai na, wen nɛ o mɔi̧a̧ yuwar wen bíí yiitoo ɓɛɛ.

⁸O be Israɛl dea mɔ nyɛm ɗoŋ ha̧a̧nu ko gasa wan-ɗafi-sɔ̧ Joakim, in baketa ko o sɔka bem in ko dukbíí Israɛl sɛn Jerusalɛm lɛŋ.

⁹O wiwii Israɛl lɛŋ hiɗa mɔ nɛ ŋgaya ger si tɛ Sɔ̧, zim nɛ yi nɛ kpasaa.

¹⁰Wa lɛŋ, in o kóó kɔ-wa, o bem kɔ-wa, ka ba nɛ o mɔdai kɔ-wa lɛŋ, in o gɛnɛ nɛ a̧a̧ in wa lɛŋ, o widetom, in o bara, wa hɛra guntir-wa lɛŋ nɛ bufu.

¹¹O be-Israɛl mɛ Jerusalɛm lɛŋ, koo kɔ-wa in o bem kɔ-wa, wa guu nu sɛn nú-Tua ko Sɔ̧, zu-wa kpee nɛ bùk, nyɛi̧ nɛ́ er si tɛ Gasa Wan Sɔ̧.

¹²Wa kaɓala taŋgé-ɗafi-Sɔ̧ nɛ laa-zim-fio mbɛt, ɓɛɛ wa e nu-wa kpɔk hiɗi nɛ mɔ si tɛ Gasa Wan Sɔ̧ ko Israɛl'e: «ká Sɔ̧ e ha̧ o bem kɔ-wa mɛ kifi bara na, ká A̧ e ha̧ wa ɓar o koo kɔ-wa yinɛ na, ká A̧ e ha̧ o ye kɔ-wa, nɛ wa kpaa nɛ mɔɔ-oi, mɛ yai yinɛ na, ká A̧ e ha̧ sa̧a̧-Fara kɔ-wa mɛ ɗaŋ na, wen ka o gɔni-duk tɛɛ zɛkɛɗi tua'i.»

¹³Gasa Wan Sɔ̧ zia tiger-wa, ɓɛɛ A̧ zɔk ŋga bɔnɛ nɛ wa ya sɛnɛ. Dukbíí Juif zima mɔ, zɛ nɛ dɔkaa, sɛn nu Judéé lɛŋ, in sɛn Jerusalɛm sɛn nú Tua ko Gasa Wan nɛ a̧a̧ nɛ ŋgayamɔ lɛŋ.

¹⁴Gasa Wan-ɗafi-sɔ̧ Joakim, o wiɗafisɔ̧ lɛŋ, in o widetom kɔ̧ Tua ko Gasa Wan lɛŋ, hɛra bufu guntir, ɓɛɛ wa do nɛ kpoo ha̧ Sɔ̧ ɗafi nɛ A̧, wa ha̧ o ɗafasɔ̧ oi ha̧a̧nú, in o ɗafasɔ̧ nɛ ta-tɛ ko dukbíí ha̧ A̧ mbɛt.

¹⁵Wa aa bùk zu mɔɔ-gu-zu kɔ-wa, ɓɛɛ wa ai nu, nɛ ŋgai tɛ-wa lɛŋ, ha̧ Gasa Wan mɛ tɛɛ gbak o bíí nutua Israɛl lɛŋ.