Read Northwest Gbaya JUDITH 5 Bible Online

JUDITH 5 - Northwest Gbaya bible

JUDITH 5

¹Wa tɔ̧a̧ ha̧ Holofern, gasa wan-biro ko o bíí nu Asirii nde o be-Israɛl ɗafa mɔ wen biro kaɗi, wa kpɛa o ɓɔtɔ ɓɔtɔ yuwar mgbara kaya kaɗi, wa mbɔa o ŋgaya garo zik nɛ o ɓɛ̧i̧a̧ nú kusa kaya, ɓɛɛ wa ngasi o yuwar bɔkɔnu ɗɔɔ kaya.

²Tɛ zia wen'i, see-Holofern ɗaŋa nyɛmna; a̧ saa o gasawi nu Mɔab lɛŋ, in o gasa widebiro mɛ nu Ammɔn, in o gasawi mɛ ka ŋgere gbatɔp lɛŋ.

³A̧ aka nɛ wa: «Ɛnɛ o bíí nu Kanaan, ɛnɛ tɔ̧́ kpasawen ha̧‘m, nɛ́ ge dukbíí ge a ɔ see zu kaya ge? Wa ɔ sɛn ge ye ge? Wa a̧a̧ nɛ dɔka widebiro nde? Wa ɔ ken nde? Nɛ́ ge wannu ge a duk zu o widebiro kɔ-wa mgbɔ nɛ wa nɛnɛ ge nde?

⁴Wen ge wa bɛ̧ɛ̧ tɛa mɛ we ti'm, hee o doka bíí mɛ war yee-wese ga, ge?

⁵Wi nɛ ɔ wan zu o be-Ammɔn lɛŋ, nin-a nɛ Akiɔr, tɔ̧a̧ ha̧ Holofɛrn: «Nyaa, ɛnɛ é war ha̧ widetom k’ɛ́nɛ́ mɛ tɔ̧ wen in'nɛ́. Mi tɛ tɔ̧ kpasawen h’ɛ́nɛ́ zu dukbíí nɛ ɔ zu kaya hɛ̧ɛ̧, ka gbagari k’ɛ́nɛ́, ŋma ndela beka gbo nɛ kɔ nú widetom k’ɛ́nɛ́ na.

⁶Ɗukbíí nɔ‘i nɛ́ o bezaŋ bíí nu Kaldee.

⁷Wa kura so mɛ ɔ sɛn nu Mesopotamii nɛti, wen wa kɔ̧ so mɛ wor o sɔ̧ ko o zɔmdáà kɔ-wa nɛ ɓɔna sɛn nu Kaldee na,

⁸wa kɛ̧a tɛ-wa nɛ yuwar ko o zɔmdáà kɔ-wa, ɓɛɛ wa gasi nɛ Sɔ̧ mɛ yiwese, nɛ wa zɔk hee kpasa Sɔ̧ ga. Hegɔ, wa ndaka so wa nɛ nu ko o zɔmdáà, nɛ nu ko o gba̧‘a̧ sɔ̧ kɔ-wa yinɛ, wa yuu mɔ si nu Mesopotamii, ɓɛɛ wa ɔ hi̧i̧ pɛ nɛ dɔkaa.

⁹Nɛ mɔ'ɔ nɛ Sɔ̧ kɔ-wa tɔ̧̧ ha̧ wa mɛ kur fara nɛ wa yaa so sɛnɛ‘i mɛ yak si nu Kanaan. Wa ɔá ye sɛn hi̧i̧ ɓɛɛ wa mɔi̧a̧ lɔr in sede in o gii mɔdai nɛ dɔkaa.

¹⁰Hee mɔ‘o nɛ gasa kaɓa tika zu nu Kanaan ga, wa zira si sɛn nu Ezypt, wa ɔɔ hi̧i̧ kpa nɛ nyɔŋmɔ ɓɛɛ wa kpasi. Wa nyɛɓa siti siti sɛn hi̧i̧, ɓɛɛ wa kifi nɛ gasa dukbíí, nɛ‘i nyɛm mɛ tɔr na.

¹¹Nɛ mɔ nɛ see-wannu Ezypt kura zu wa, a̧ ɔra wa, ɓɛɛ a̧ fo wa nɛ ŋgai si tɛ ŋgaŋa tom daka brik. A pi̧i̧ foe tɛ wa, ɓɛɛ a e wa tɛ bara.

¹²Wa hiɗa mɔ si tɛ Sɔ̧ kɔ-wa, nɛ dea ha̧ gasa gɛŋa, nɛ nyina-a bo na, mɛ tik zu nu Ezypt lɛŋ, ɓɛɛ o be-Egyptɛ ndak wa nyɛi nɛ wa.

¹³Sɔ̧ dee ha̧ wa mɛ ku gbɛ̧ gbatɔp nɛ kora naŋ,

¹⁴ɓɛɛ A̧ mgbɔ wa nɛnɛ si war kaya Sinai in Kadɛs-Barne; wa ndaka o bíí nɛ ɔɔ ŋga gbára'i lɛŋ yinɛ.

¹⁵Wa baa fara sɛn nu ko o be-Amɔrit, ɓɛɛ wa kum o be Hɛchbɔn lɛŋ gbuɗuk a nù. Hɔɗoŋ-aa, wa kuu nanayi Jurdɛn, ɓɛɛ wa ba fara zaŋ kaya lɛŋ,

¹⁶Wa ndaka o be-Kanaan, in o be-Perizit, o bɛ-Jebuséé, o be-Sikɛm in o be-Girgasit lɛŋ yinɛ ti wa, ɓɛɛ wa ɔ sɛn hi̧i̧ zɛ nɛ dɔkaa.

¹⁷Ŋgimbi lɛŋ nɛ wa de ɗaŋmɔ nɛ yí-Sɔ̧ na, wa duka tɛ gasa desee, wɛn Sɔ̧ kɔ-wa kɔ̧ gɔɔmɔ na.

¹⁸Ɓɛɛ, ŋgimbi nɛ wa ea yuwar nɛ Sɔ̧ usa ha̧ wa duk, o wisɛn kɔ-wa kuma o ŋma mgbara wa tɛ biro, bɛɛ wa kai o ŋma nɛ bara-biro si sɛn gɔni nù. Wa yaia gasa Tua ko Sɔ̧ kɔ-wa yinɛ, ɓɛɛ o gasa ye kɔ-wa tik er o wisɛn kɔ-wa.

¹⁹Wa kifa see-wa si tɛ Sɔ̧ kɔ-wa woyo, ɓɛɛ wa pii ɗoŋ, nɛ nu nɛ wa pɛsa so si sɛnɛ pii tɛ nu kɔ-wa woyo. Wa dee ye kɔ-wa sɛn Jerusalɛm woyo, fara nɛ gasa Tua ko Sɔ̧ kɔ-wa duk sɛnɛ, ɓɛɛ wa si ɗoŋ de ye zu o kaya kɔ-wa woyo, wen bíí bo sɛnɛ na.

²⁰Ɓɛɛ kinii, nyaa, gasawi, kà o wi nɔ‘i e yuwar ko Sɔ̧ kɔ-wa duk, mɛ nɛɛ de ɗaŋmɔ, in k’ɛ́ɛ́ nɛ iŋa wa dea nɛ ɗaŋmɔ nɛ mbetɛ, ɛɛ tɛ daŋ mɛ tík wa nɛ biro.

²¹Ɓɛɛ, ka o wi nɔ‘i de ŋma ɗaŋmɔ si tɛ Sɔ̧ kɔ-wa na, nyaa, mi gɔm er h’ɛ́nɛ́, ɛnɛ e wa duk. Kà bo hegɔ na, Gasa Wan Sɔ̧ kɔ-wa tɛ yor ɗoŋ wa, ɓɛɛ o bíí zaŋnù lɛŋ tɛ zɛkɛɗi yɛ.»

²²Akiɔr tɔ̧̧ wen'i kaɗi, ɓɛɛ o bíí nɛ mɔi̧a̧ hi̧i̧ lɛŋ zik nɛ tua-laa ko gasa wan-biro ku̧u̧ naŋ kuia mɔ. O gasa widebiro ko Holofɛrn, in o wi mɛ ka ŋgere gbatɔp, ka ba nɛ o wi nu Mɔab kɔ̧a so mɛ mbɛr Akiɔr.

²³Wa tɔ̧̧: «Ɛɛ te de kii o be-Israɛl wen ge? Ɛnɛ zɔ́k, wa bo nɛ ŋgai na, wa nyɛm mɛ yor tɛ ŋga biro na.

²⁴Nyaa Holofɛrn, ɛɛ tík wa nɛ biro. Wa nɛ gee tumui mɔ ti o widebiro k’ɛ́nɛ́.»