Read Northwest Gbaya JUDITH 6 Bible Online

JUDITH 6 - Northwest Gbaya bible

JUDITH 6

¹Ŋgimbi nɛ ku̧i̧amɔ kaɗa mgbara o bíí nɛ mɔi̧a̧ wen baa keta'i kaɗi, Holofɛrn gasa wan-biro ko o be Asirii tɔ̧a̧ ha̧ Akiɔr, sɛn ti o gɛnɛ in o be-Mɔab:

²«Mɛ, Akiɔr, mɛ nɛ o? mɛ in o bíí nɛ de tom tum-mɔ ha o be Israɛl, ɛnɛ nɛ o? wen ɛnɛ tɔ̧a̧ wen in yɛɛ, hee o witɔ̧wen oi nú-Sɔ̧ ga, in wen mɛ dor yɛ‘e: K’ɛ́ɛ́ de biro in o be-Israɛl na, wen Gasa Wan Sɔ̧ kɔ-wa tɛ yor nɛ nɔ̧a ɗoŋ wa. Ŋma sɔ̧ nɛ gana Nabukɔdɔnɔsɔr so sɛnɛ nde? Nabukɔdɔnɔsɔr tɛ tom o ŋgaŋa widebiro kɔ‘i, ɓɛɛ wa tɛ kum o be-Israɛl lɛŋ gbuɗuk a nu: Sɔ̧ kɔ-wa beka kpasi wa na.»

³Ɛɛ nɛ o widetom ko Nabukɔdɔnɔsɔr. A tɛ kum wa war kpɔk gbuɗuk, wa beka yor ti o ŋgaŋa nyaŋa-biro k’ɛ́ɛ́ na.

⁴Ɛɛ tɛ dɔ wa nɛ kpasa. Zaŋ kaya kɔ-wa tɛ fok ruɛ-ruɛ nɛ tɔk-tɛ-wa lɛŋ, ɓɛɛ wɔr-wa tɛ dun o bɔkɔnu kɔ-wa lɛŋ kuuŋ. Wa beka nyɛm mɛ yor ti yɛ na; wa tɛ fe lɛŋ, ɛɛ tɛ kum wa lɛŋ, hee mɔ nɛ Nabukodonor, nɛ ɔ wan zu nu lɛŋ, ha̧nú h’ɛ́ɛ́ ga. A̧ tɔ̧̧ wen'i, ɓɛɛ wen kɔ̧-a̧ beka tik nu gee na.

⁵Ɓɛɛ, kɔ-mɛ, Akiɔr, mɛ́, bara ko o be-Ammɔn, mɛ tɔ̧ wen hee wi-e-ɗora ga, mɛ beka zɔk saŋayi'm ɓɔna, hɔ ŋgimbi n'am tɛ kifi nɛ er ha̧ o ɗaŋ wi nɔ‘i, nɛ gboa tɛ bara nu Ezypt yinɛ‘i.

⁶Gbapaa ko o widebiro kɔ‘m, in sɛɛ ko o wan-biro kɔ‘m tɛ tɔk mɛ sar, mgbara o be-Israɛl, ŋgimbi n'am tɛ pii ɗoŋ.

⁷Kinii o widetom kɔ‘m tɛ ba mɛ daŋ nɛnɛ si zu kaya; wa tɛ e mɛ sɛn ŋma ye zaŋ kaya, fara nɛ ɓɔtɔ ɓɔtɔ yuwar a̧a̧ sɛnɛ.

⁸Mɛ beka fe nɛti ha̧ wa mɛ gbɛ mɛ in o be Israɛl na.

⁹Mɛ ta kɔ-mɛ‘e wa beka tik er-yɛ na wó, ɓɛɛ mɛ kai sɔnti-mɛ nɛ ɗaŋsee hegɔ wen ge? Mi tɔ̧̧ kaɗi, ɓɛɛ ŋma wen kɔ‘m kpɔk beka tik nu gee na.»

¹⁰Holofɛrn ha̧nú ha̧ o widetom kɔ̧-a̧, nɛ ya kɔ tua-laa in a̧‘i, mɛ ba Akiɔr nɛnɛ, in mɛ mgbɔ a̧ yaknɛ sɛn Betulii ha̧ o be-Israɛl.

¹¹Wa baa a̧, ɓɛɛ wa mgbɔ a̧ gbonɛ nɛ kɔ yara si sɛn tɛ bɔkɔnu, sɛka wa baa war si zu kaya, ɓɛɛ wa hɔ tɛ kpuput-yi, ɗɔɔ ye Betulii.

¹²Nɛ o wi saaye zu kaya zɔka o bíí ko Holofɛrn fara tɛaa, wa kaia o boe-de-biro kɔ-wa, wa gboo nɛ ye bɛɗɛzu zu kaya, ɓɛɛ o wi nɛ a̧a̧ nɛ birndiŋ pi nɛ o kii-ta si tɛ wa, mɛ dor wa tɛ daŋa zu kaya pii tɛ wa.

¹³O wi nɔ‘i haia nɛ ka naŋ-kaya, wa hɛr Akiɔr sɛn hi̧i̧, wa siŋa a pi ka naŋ-kaya, ɓɛɛ wa si ɗoŋ si sɛn tɛ wannu kɔ-wa.

¹⁴O be-Israɛl zira nɛ saaye kɔ-wa tɛnɛ, ɓɛɛ wa hɔ kpa Akiɔr. Wa bura a̧, ɓɛɛ wa mgbɔ a nɛnɛ si saaye kɔ-wa Betulii, usi ha̧ o wanye kɔ-wa.

¹⁵O wanye tɛ ŋgimbi'i duka so nɛ Ozias bem ko Mika, zuduk ko Simeɔŋ, Kabris bem ko Otoniel, in Karmis bem ko Mɛlkiɛl.

¹⁶Wa mɔi̧a̧ o gasa wi saaye lɛŋ. O ŋgaiwi in o okóò gara tɛnɛ lɛŋ nɛ maayi si fara mɔi̧a̧ mbɛt. Wa mgbɔa Akiɔr e zaŋ gara, ɓɛɛ Ozias ak'a̧ wen ha̧ a̧ mɛ zii mɔ nɛ hɔa.

¹⁷Tɛ kifanú kɔ Akiɔr, a̧ dala o wen nɛ wa tɔ̧̧ tɛ ba keta ko Holofɛrn lɛŋ ha̧ wa, in mɔ nɛ a̧, nɛ tɛ-a̧, tɔ̧̧ ha̧ o gasa wi mɛ nu Asirii. A̧ tɔ̧̧ o zɔm gasa kpokowen ko Holofɛrn see zu o be-Israɛl mbɛt.

¹⁸Nɛ mɔ nɛ o bíí nɛ mɔi̧a̧ hi̧i̧ lɛŋ guu nu gasi nɛ Sɔ̧, wa hiɗa mɔ si tɛ Sɔ̧, wa tɔ̧̧:

¹⁹«Gasa Wan Sɔ̧ nɛ a̧a̧ yiwese, Ɛnɛ zɔ́k deemɔ-ŋgondo ko o wisɛn k’ɛ́ɛ́, Ɛnɛ dé ko h’ɛ́ɛ́, dukbíí k’Ɛ́nɛ́, tɛ dukaa k’ɛ́ɛ́ si ɗɔɔ. Ɛ́ɛ́ nɛ́ o bíí k’Ɛ́nɛ́, Ɛnɛ zɔk mɔ pi tɛ ɛ́ɛ́ sɔsɔɔ!»

²⁰Wa ga̧a̧ see-Akiɔr, ha̧ nɛ nɔɔŋgiɗi ha̧ a̧, ɓɛɛ wa zɔn a̧ nyɛmna.

²¹Ozias mgbɔa Akiɔr si tɛ kɔ‘i, ɓɛɛ a de gasa dina ha̧ o kuti bíí saaye. Mɛ zaŋ zɛ‘i lɛŋ, wa aia nú ha̧ Sɔ̧ ko Israɛl mɛ gbak wa.