Read Northwest Gbaya JUDITH 7 Bible Online

JUDITH 7 - Northwest Gbaya bible

JUDITH 7

¹Nɛ mɔ sa̧-a̧ kaɗi, Holofɛrn ha̧nú ha̧ o widebiro kɔ̧-a̧ lɛŋ, in ha̧ o gba gii bíí nɛ tɛa mɛ gbak a̧ lɛŋ mɛ kur ba nɛ yuwar Betulii, mɛ kpe o ɓɔtɔ ɓɔtɔ yuwar mgbara kaya in mɛ bi biro in o be-Israɛl.

²Wese'i, o wi nɛ a̧a̧ nɛ ŋgai lɛŋ kura mɛ yak biro. Dɔkaa widebiro lɛŋ duka so nɛ́ bíí booro gɔmŋmaa nɛ booro ɓu-mɔɔrɔ-ɗoŋ-yiitoo nɛ nɛ́ nɛ naŋ, in o wi-ɗaŋ-nyaŋa booro ɓu-zua-yiitoo, ka ba nɛ o tui, in o wi-tui-tui, nɛ gba gii-wa nyɛmna.

³Wa dee bagari kɔ-wa tɛ́ bɔkɔnu, nyɛi nɛ Betulii na, ka kpukpút-yì; wa baa fara siti, dika Dɔtaim hɔ Bɛlbaim, in nɛ war mgbar dika Betulii hɔ Kyamɔn nɛ zɔk ŋmaa in Ɛsdrelɔn.

⁴O be-Israɛl zɔka gba gíí-wa tululu, gasa kíí hɛra zaŋ-wa, ɓɛɛ wa tɔ̧ si tɛ o ŋmaa: «O wí nɔ‘i wa tɛ yai mɔ zu nù lɛŋ yinɛ ɗɛsɛ-ɗɛsɛ: ŋma mɔ beka yor ti wa na, kóó nɛ o kusa kaya, kóó nɛ o ɗuka gbóŋgó, kóó nɛ zu-tɔ̧ mbɛt.»

⁵Ko o nde kaia o boe-de-biro kɔ‘i, wa yee wee zu o kusa tua-pɛm-mɔ, ɓɛɛ wa ya tɛ pɛma mɔ mɛ zaŋ-zɛ‘i lɛŋ.

⁶Nɛ mɔ sa̧-a̧ woyo, Holofɛrn dea ha̧ o wí-daŋ-nyaŋa mɛ gbo nɛ gba̧a̧yí o be-Israɛl nɛ a̧a̧ Betulii, ɓɛɛ a̧ nɛ mɛ zɔk o be war-ɗaŋ-kaya si Betulii,

⁷A nɛɛ zɔk o kpúkpút-yì mbɛt, a̧ ee o bíí mɛ pɛm wa, ɓɛɛ a̧ si ɗoŋ kɔ gbagari kɔ̧-a̧.

⁸Nɛ mɔ nɛ o be-wan ko o bezaŋ Ezau, in o wan ko o be-Mɔab, in o gasa wan-biro mɛ zikanu ka ŋgere gbatɔp, nɛa si ka̧ tɛ Holofɛrn, ɓɛɛ tɔ̧ ha̧ a̧:

⁹«Nyaa, k’ɛnɛ zíí taamɔ k’ɛ́ɛ́, ɓɛɛ o bíí k’ɛ́nɛ́, kóó kpɔk, beka fe tɛ biro’ɛ na!

¹⁰«O be-Israɛl e nɛ ta nɛ kusaa ko o kaya nɛ wa ɔ sɛnɛ, nɛ bó nɛ ŋgai ko o boe-de-biro na, wen daŋa si zu kaya'i bó nɛ yɛkɓɛlɛk mɔ na.

¹¹Ɓɛɛ kinii, nyaa, k’ɛnɛ bi biro in wa na, ɓɛɛ o bíí k’ɛ́nɛ́, kóó kpɔk, beka fe na.

¹²Ɛnɛ duk geɗɛk sɛn kɔ̧ yara k’ɛ́nɛ́ in o widebiro k’ɛ́nɛ́, ɓɛɛ ɛnɛ tóm o ŋma bíí k’ɛ́nɛ́ mɛ pɛm kpukpút-yì nɛ gbo nɛ gun kaya,

¹³wen mɛ nɛ fara hi̧i̧ a̧ o be-Betulii nɛɛ ɗu yì-nɔ sɛnɛ. Wɔ-yì tɛ gbɛ wa, ɓɛɛ wa tɛ e ye kɔ-wa er-‘nɛ́; ɓɛɛ, nɛ war k’ɛ́ɛ́ in o widebiro k’ɛ́ɛ́, ɛɛ tɛ daŋ ba nɛ fara si zu o ɓɛɗɛzu kaya, zik nɛ ye kɔ-wa, ɓɛɛ ɛɛ tɛ pɛm mɔ hi̧i̧, wen ka ŋma bíí kɔ-wa tɛɛ gbo yaknɛ.

¹⁴Wɔ tɛ kum o bíí saaye lɛŋ, wiwii, okóò in o obem: wɔr-wa tɛ gbísí makpara beegara kɔ-wa, nɛti ha̧ gbapaa mɛ fo tɛ-wa.

¹⁵Ɓɛɛ ɛnɛ tɛ demɔ ba tɛ-wa nɛ ŋgaya, oi ŋgazu kɔ-wa, in oi bɛ̧a tɛaa mɛ kpa ŋmaa in'nɛ́ɛ́ nɛ sore-ga̧mɔ.»

¹⁶Holofɛrn in o wan-biro kɔ‘i lɛŋ kɔ̧ɔ̧ ɗɔ wen nɛ o wi nɔ‘i tɔ̧̧, ɓɛɛ a̧ ha̧nú ha̧ wa mɛ demɔ nɛ wa tɔ̧a̧‘i.

¹⁷O widebiro ko o be Ammɔn kura in o be Asirii booro mɔɔrɔ, wa nɛɛ yara kɔ-wa ɗɔɔ kaya, ɓɛɛ wa ba o kpukpút-yì in o ŋma fara-ɗu-yì ko o be-Israɛl.

¹⁸O be Edɔm in o be Ammɔn daŋa zu kaya, ɓɛɛ wa de gbagari kɔ-wa sɛn hi̧i̧ ti ye Dotaim, ɓɛɛ wa tom o ŋma bíí kɔ-wa si kazan mɛ ɗɔɔ, in si ndaazan, ti ye Egrebɛl, ka ye Kus, zu gbor-gbor-yi Mɔkmur. Oi o widebiro ko o be Asirii wa baa fara sɛn bɔkɔnù, ɓɛɛ wa kpɛ zu nù díɔ̧́m. O tua-laa in o tui kɔ-wa ya nɛ gba dɔka mɔ buraŋ buraŋ kɔ gbagari kɔ-wa: wa nɛ gba gíí-bíí nyɛmna, nyɛmna.

¹⁹O be-Israɛl hiɗa mɔ si tɛ Gasa Wan Sɔ̧ kɔ-wa, wen nɔɔŋgiɗi kɔ-wa kaɗa, tɛ zɔka o wisɛn nɛ kɛra wa lɛŋ, in fara-gboaa er-wa nɛ bo ɓɔna'i.

²⁰O gii widebiro ko o be Asirii kɛra wa, zɛ ɓu-taar-zua-náár: nɛ o wí nɛ̀ nɛ́ nɛ̀ naŋ, in o wi-daŋ-nyaŋa in o keekee-nyaŋa. O bíí Betulii zɔka'e oi yì kɔ-wa kaɗa yinɛ e: o kpana-yi kɔ-wa kora kpá-kpá.

²¹O gasa gɔna-yi kɔ-wa de mɛ kor yinɛ mbɛt. Yì dɔk ha̧ o bíí lɛŋ mɛ kpa mɔ nɛ tɛ nyɛm wa wen kpɔk wese ɓɔna: wa kɛ̧ yi kɛ̧ɛ̧.

²²O be-geɗɛk bem ziɓa kaɗi; ŋgai kaɗa tɛ o be-ŋgaiwi in o kóò mbɛt, wen wa kpa yi mɛ nɔ na: wa aia a nu kiŋdiŋ-kiŋdiŋ mgbara kira in nɛ yuwar gbo ye mbɛt.

²³O bíí saaye lɛŋ, o be-ŋgaiwi, in o kóò, ka ba nɛ o bem, mɔi̧a̧ ŋmaa kur zu Ozias in o wanye: wa hiɗa mɔ nɛ ŋgaya gɛr, ɓɛɛ wa tɔ̧, nɛ gba̧a̧yi o gasawi nugara:

²⁴«Sɔ̧ a̧ gɔn kita mgbara tɛ-‘nɛ́ in yɛɛ, wen ɛnɛ dea gasa ɗaŋmɔ in yɛ, sɛn tɛ bɛ̧a pia sore-ga̧mɔ mgbara ɛɛ in o be-Asirii.

²⁵Ɓɛɛ kinii ŋma wi-gbak-yɛ bo ɓɔna: Sɔ̧ ea ɛɛ er o wi nɔ‘i, ha̧ wɔ-yi mɛ kum yɛ, nɛ gbaayi-wa, h’ɛ́ɛ́ mɛ fe lɛŋ.

²⁶Kinii, ɛnɛ sa Holofɛrn in o widebiro kɔ̧-a̧ lɛŋ tɛnɛ, ɓɛɛ ɛnɛ e ye er-wa ha̧ wa mɛ yai yinɛ.

²⁷Gana so ɛɛ kifi nɛ o bara kɔ-wa, ɓa nɛ kumaa wen wɔ-yi, in zɔka fio ko o bezaŋ-yɛ, in o kóò k’ɛ́ɛ́, in o bem k’ɛ́ɛ́.

²⁸Ɛɛ ai nú h’ɛ́nɛ́, nɛ nin yiwese in nù, in nɛ nin Gasa Wan Sɔ̧ ko o zɔmdáà k’ɛ́ɛ́, nɛ usi bɔnɛ h’ɛ́ɛ́, nyɛm nɛ ɗoŋ ɗaŋmɔ k’ɛ́ɛ́, in ɗaŋmɔ ko o zɔmdáà k’ɛ́ɛ́; ɛnɛ dé mɔ n’ɛɛ́ ak ‘nɛ́ wen aa sɔsɔɔ, wen ka bɔnɛ tɛɛ tik zu yɛ.

²⁹Gii-wi lɛŋ hi̧a̧ kɔ̧a̧ tɛ gasa aia-nú, ɓɛɛ wa hiɗi mɔ nɛ ŋgaya ger si tɛ Gasa Wan Sɔ̧.

³⁰Ozias tɔ̧̧ ha̧ wa: «O nya-ɛɛ, ɛnɛ nɔ ŋgiɗi! ɛɛ nyɔŋ nin-yɛ tɛ zɛ mɔɔrɔ woyo: Gasa Wan Sɔ̧ k’ɛ́ɛ́ tɛ de ko h’ɛ́ɛ́ woyo: A beka e ɛɛ duk hɔ sɔŋkur-aa na.

³¹Ɓɛɛ, ka o zɛ mɔɔrɔ‘i nɛ yaka kaɗi, in ka Sɔ̧ tɛ-mɛ gbak yɛ na, mi tɛ de hee mɔ n’ɛnɛ tɔ̧a̧ ga.

³²Ɓɛɛ a fo wa si nɛ ɗoŋ lɛŋ. O wiwii yaka mɛ pɛm mɔ nɛ zu garo in zu o kusa tua-pɛm-yé, ɓɛɛ wa fo o kóò in o bem si nɛ ɗoŋ tɛ kɔ-wa. Bíí lɛŋ sɛn saaye yaa nɛ gasa kíí in ɗaŋsee.