Read Northwest Gbaya JUDITH 8 Bible Online

JUDITH 8 - Northwest Gbaya bible

JUDITH 8

¹Ŋgimbi'i, nyɛrɛ o mɔ nɔ‘i lɛŋ hɔɔ zer-Judith. Judith nɛ bokobem ko Merari, bem ko Ox, bem ko Josɛf, bem ko Oziɛl, bem ko Ɛlkia, bem ko Ananias, bem ko Gedeɔn, bem ko Rafain, bem ko Akitɔb, bem ko Elias, bem ko Kɛlkia, bem ko Eliab, bem ko Natanaɛl, bem ko Salamiɛl, bem ko Sarasadai, bem ko Israɛl.

²Wi kɔ̧-a̧, Manasse, be-nutua kɔ̧-a̧ in zuduk kɔ̧-a̧, fea ŋgimbi mɔi̧a̧ nyɔnɔ alkamaari.

³A duka so zɔk nɛ tom ko o wi-hɛr-sikila-alkamaari sɛn kpɛɛfɔ, ɓɛɛ kpɔra wese dɔa ɓɛɗɛzu-a; a nɛɛ ɔ nu, ɓɛɛ a̧ fe saaye kɔ̧-a̧ Betulii; wa guna a hi̧i̧ mgbara o nam kɔ̧-a̧, sɛn kpɛɛfɔ, mgbara Dɔtain in Balamɔn.

⁴Judith kifa kogɛra, ɓɛɛ a̧ ɔ kɔ tua kɔ̧-a̧ pɛ taar nɛ fiozɛ naar.

⁵A̧ ɗafa gɔna bɛrtua mɛ ŋgon zu tua kɔ̧-a̧ ha̧ a̧ mɛ ɔ sɛnɛ. A mara laa-bufu guntir-a, ɓɛɛ a̧ pi nɛ laa-gɛra zu a.

⁶A duka mɛ zim mɔ wese lɛŋ, ŋgimbi gɛra kɔ̧-a̧, ɓaa nɛ o wese-ɗafa-mɔ wen Sabbat, in wese Sabbat lɛŋ, o wese-ɗafa-mɔ wen mbe yi-zɛ, in wese mbe yi-zɛ lɛŋ, ká bá nɛ o wese gbaŋa in o wese desee ko o be-Israɛl ɓɛɛ.

⁷Judith yora so zɔŋa nyɛmna, gba de saŋayi-a nyɛmna mbɛt. Wii kɔ̧-a̧, Manasse, ee so o lɔr in bu mbɔi, o widetom in o kodetom, o gíí-mɔdai in o fɔ nɛ dɔkaa ha̧ a̧, ɓɛɛ a̧ duk so zu o mɔ nɔ‘i lɛŋ,

⁸ɓɛɛ ŋma bíí kai ndaa-a na, wen a yú kíí Sɔ̧ nyɛmna.

⁹A zia nyɛrɛ kú̧í̧á̧ mɔ ko o be-Israɛl si tɛ wanye kɔ-wa, nɛ ɓana-yì dea ha̧ nɔɔŋgiɗi kɔ-wa mɛ kaɗi, A zia nyɛrɛ kifanu ko Ozias mbɛt'e: «wi tɛ e yé er o be-Asirii ɗoŋ zɛ mɔɔrɔ.»

¹⁰A toma kodetom kɔ̧-a̧, nɛ duk zu o mbɔi kɔ̧-a̧ lɛŋ, mɛ nɛɛ sa o kutiwi saaye Ozias, Kabris in Karmis tɛnɛ.

¹¹Nɛ o wi nɔ‘i hɔa tɛ kɔ̧-a̧, Judith tɔ̧a̧ ha̧ wa: «Ɛnɛ, o wanye Betulii, ɛnɛ zíí mɔ n'am tɛ tɔ̧‘i: wen n’ɛnɛ tɔ̧̧ ha̧ dukbíí sɔsɔɔ nyɛm sɛnɛ na, in kanamɔ n’ɛnɛ kana mgbara ‘nɛ́ in Sɔ̧ hee ge nde: ɛnɛ tɛ e yé er o wisɛn k’ɛ́ɛ́, ka Sɔ̧ tɛ-mɛ gbak'nɛ́ tɛ zɛ n’ɛnɛ gɔna ha̧ A̧ na wo'i, kanamɔ‘i nyɛm sɛnɛ na mbɛt.

¹²Ɓɛɛ kinii, ɛnɛ nɛ o'o h’ɛnɛ mɛ we Sɔ̧ sɔsɔɔ o? in h’ɛnɛ mɛ ba zu-‘nɛ́ nɛ ŋgɔn, mɛ ba fara oi nu'A mgbara o bíí zaŋnu, o?

¹³Kinii, ɛnɛ we nɛ Gasa Wan nɛ a̧a̧ nɛ ŋgayamɔ lɛŋ, ɓɛɛ ɛnɛ beka zíí ŋma mɔ na ndó-ndó-ndó ɓɔnsɛnɛ.

¹⁴Ɛnɛ nyɛm mɛ iŋ mɔ nɛ a̧a̧ sɛn kɔ ɗuka see-wi na, ɛnɛ nyɛm mɛ iŋ mgbara o taamɔ kɔ̧-a̧ na mbɛt. Ɛnɛ tɛ iŋ ndaa-mɔ ko Sɔ̧ nɛ dea o mɔ lɛŋ, in taamɔ kɔ̧-A̧, in mɔ n'A̧a̧ kɔ̧a mɛ de lɛŋ, hee ge? Weyaa, o nya'm, k’ɛnɛ tu̧ see Gasa Wan Sɔ̧ k’ɛ́ɛ́ na.

¹⁵Wen, kóó A̧ kɔ̧ mɛ kpasi yɛ zaŋ zɛ mɔɔrɔ hɛ̧ɛ̧ na, A a̧a̧ nɛ ŋgai mɛ gbak yɛ ɗoŋ zɛ n'A̧a̧ kɔ̧a̧, kóó mɛ kum yɛ ɛɛ yinɛ ti o wisɛn k’ɛ́ɛ́ mbɛt.

¹⁶K’ɛnɛ ak Gasa Wan Sɔ̧ k’ɛ́ɛ́ mɛ ha̧ nu-A̧ h’ɛnɛ wen mɔ n'A̧a kɔ̧a mɛ de na. Wen Sɔ̧ bo nɛ bíí ka'i ɓil'A̧ na, A̧ bo nɛ bem ko bíí ka'i ɓa wen in A̧ na.

¹⁷Wen hegɔ, pɛm nɛ wese n'A̧a tɛ kpasi yɛ, ɛɛ kɔf'A̧ mɛ gbak yɛ kaŋ; ka A̧ nɛ kɔ̧a, A̧ tɛ zíí aia-nú k’ɛ́ɛ́.

¹⁸Mgbara o pɛrnam k’ɛ́ɛ́, in mgbara ɛɛ sosɔɔ, ŋma zuduk, ŋma nam, ŋma kpaar-nutua, kóó ŋma yé, nɛ gasi o geesɔ̧, nɛ‘i dee nɛ er, hee mɔ'ɔ nɛ o bíí mɛ ɓeemɛ wa duka so mɛ de ga, bo na.

¹⁹Nɛ wen mɔ‘i a̧ o zɔmdáà k’ɛ́ɛ́ zɔka nɛ bɔnɛ biro gbapaa, in nɛ'ì yaia nɛ mɔ kɔ-wa lɛŋ yinɛ, in nɛ wa lɛŋ kuma nɛnɛ ti o wisɛn k’ɛ́ɛ́.

²⁰Ɓɛɛ, nɛ k’ɛ́ɛ́, ɛɛ tɛ iŋ ŋma Sɔ̧ gan zu A̧ na. Hegɔ, ɛɛ e ta nɛ A̧: A̧ beka e ɛɛ tɛ geemɔ na, A̧ beka kaɗi dee ko in kpasa zuduk k’ɛ́ɛ́ na.

²¹Wen, ka wa nɛ baa ɛɛ, wa tɛ ba nu Judee lɛŋ mbɛt, wa tɛ yai sa̧-a̧ Fara k’ɛ́ɛ́ yinɛ, ɓɛɛ Sɔ̧ tɛ ak yɛ oi ɗaŋa Tua kɔ̧-A̧‘i.

²²Kumaa ko o nya k’ɛ́ɛ́, baa nu k’ɛ́ɛ́ nɛ bara, yaiaa ko nu k’ɛ́ɛ́ ɗaŋ lɛŋ, Sɔ̧ tɛ de ha̧ o mɔ nɔ‘i lɛŋ mɛ tik zu ɛɛ hee simbo ga, sen mgbara o gɔni duk n’ɛɛ́ tɛ ya bara sɛnɛ: ɛɛ tɛ ya nɛ mɔ-kɔ̧́ɔ̧́-náŋ ti o bíí nɛ tɛ ɔ wan zu ɛɛ, ɓɛɛ búu tɛ ba ɛɛ nɛ yi-wa.

²³Duka bara k’ɛ́ɛ́ beka de ha̧ o wan k’ɛ́ɛ́ mɛ zɔk yɛ nɛ de yí na, ɓɛɛ Gasa Wan Sɔ̧ tɛ pi̧i̧ foi tɛ ɛɛ, nɛ ɗoŋ aa.

²⁴Ɓɛɛ kinii, o nya'm, ɛɛ usi ha̧ o nya-ɛɛ nde kpasáá kɔ-wa a̧a̧ er-yɛ, in dukaa ko Sa̧a̧ Fara, dukaa ko Tua ko Sɔ̧ in ko Fara-ɗafi-Sɔ̧ a̧a̧ er-yɛ mbɛt.

²⁵Zua'i mbɛt, ɛɛ de osoko ha̧ Gasa Wan Sɔ̧ k’ɛ́ɛ́, nɛ wee ɛɛ kinii. Hee mɔ n'A̧a̧ wea so o zɔmdáà k’ɛ́ɛ́ ga.

²⁶Tɛ‘nɛ a mbaŋ ɗoŋ mɔ n'A̧a dea so in Abraham lɛŋ, in hee mɔ'ɔ n'A̧a wea so nɛ see-Izaak ga, in mɔ lɛŋ nɛ kpaa so Jakɔb sɛn Mezopotamii nu Syrii, ŋgimbi n'a̧a̧ dai so nɛ o sami ko nɔkɔ kɔ̧-a̧ Laban.

²⁷Sɔ̧ wea so wa mɛ iŋ kɔ̧ see-wa, hegɔ bo nɛ kifa er ɗaŋmɔ a̧ Sɔ̧ de in yɛ na mbɛt, mɛ nɛ wen mbaŋa tɛ-mɔ, a̧ Gasa Wan usi nɛ bɔnɛ ha̧ o wi nɛ ndaɗi ka tɛ-A̧ »

²⁸Ozias kifa ha̧ Judith: «O wen nɛ mɛ tɔ̧̧ lɛŋ duk nɛ yuwar-a, ŋma bíí beka si kafe sɛnɛ na.

²⁹Wen ɗuka-taamɔ kɔ-mɛ, bo nɛ mɔ sɔsɔɔ ɓɛɛ na; wen nɛ ŋgimbi nɛ mɛ duka so nɛ be-zɔŋa tikiɗi, a o bíí lɛŋ zɔka nɛ iŋa-mgbara-mɔ kɔ-mɛ, in de wɔmɔ kɔ see-mɛ.

³⁰Nɛ gasa wɔ-yi nɛ gbɛɛ o bíí a̧ ira ɛɛ nɛ ŋgai mɛ demɔ n’ɛɛ́ ha̧nu-ɛɛ ha̧ wa mɛ de: ɛɛ kanamɔ hɛr nɛ tɛ-yɛ, ɓɛɛ ɛɛ nyɛm mɛ bur na.

³¹Ɓɛɛ kinii, nɛ mɛ duk nɛ kpasa wí-yu-Sɔ̧, mɛ kɔfi Sɔ̧ wen zu ɛɛ; bɛɛ Gasa Wan tɛ tom koro tɛnɛ mɛ dun o gɔna-yi k’ɛ́ɛ́, bɛɛ ɛɛ beka ziɓi ɓɔ na.»

³²Judith tɔ̧̧ ha̧ wa: «Mi tɛ de ŋma mɔ-gɔn-ɗɛɗɛ-wi, nɛ o bezaŋ-yɛ tɛ tɔ̧ nyɛrɛ-a tɛ o pɛrnam hegɔ ɓɔnsɛnɛ.

³³Nɛ k’ɛ́nɛ́, mɛ zaŋ-zɛ hɛ̧ɛ̧, ɛnɛ tɛ duk ka nu-garo saaye, mi tɛ gbo in kodetom kɔ‘m, ɓɛɛ nɛti ha̧ ŋgimbi n’ɛnɛ gɔna wen ea yé er o wisɛn bé tɛɛ́ hɔ, Gasa Wan tɛ tɛ-mɛ kpasi Israɛl nɛ war ko er-am.

³⁴K’ɛnɛ kii mɛ iŋ mɔ n'am tɛ de na, beka'm tɔ̧ h’ɛnɛ nɛti ha̧ mɔ mɛ hɔ gba̧a̧ na.»

³⁵Ozias in o wanye tɔ̧a̧ ha̧ a̧: «Ga̧a̧mɔ a̧ duk zu mɛ! Gasa Wan Sɔ̧ a̧ mgbɔ mɛ yak ti, mɛ kifi er bɔnɛ ha̧ o wisɛn k’ɛ́ɛ́!»

³⁶O gasawi gboa tɛ ko Judith, ɓɛɛ yak si fara pɛm-mɔ kɔ-wa.