Read Northwest Gbaya JUDITH 9 Bible Online

JUDITH 9 - Northwest Gbaya bible

JUDITH 9

¹Ŋgimbi nɛ wa dɔɔ fuu-nyama mɛ ga̧a̧mɔ sɛn kɔ Tua ko Sɔ̧ sɛn Jerusalɛm, Judith guu sɔnti nu, a bùk zu, kpɔ̧i̧ laa-gɛra, e nɛ laa-bufu guntir ɓɛɛ, a̧ hiɗi mɔ nɛ ŋgaya ger si tɛ Gasa Wan, a̧ tɔ̧̧:

²«Gasa Wan Sɔ̧ ko zɔmdáà kɔ‘m Simeɔŋ, Ɛnɛ ee so gbapaa er-a mɛ kifi er ɗaŋmɔ si tɛ o gɔni wi, nɛ baa so ŋma bokobem nɛ ŋgai, ɔ in a̧, ɓɛɛ ɗaŋ a̧; wa kpɔ̧i̧a so laa tɛ-a̧ yinɛ pi̧i̧ nɛ foe tɛ a̧, wa ɗaŋa so zaŋ-a pi̧ nɛ búù zu a̧. Ɛnɛ tɔ̧ɔ̧ so: «wi nyɛm mɛ de pɛr ti mɔ hegɔ na», ɓɛɛ wa dea.

³Hegɔ Ɛnɛ ea ha̧‘i mɛ gbɛ o wan kɔ o wi nɔ‘i yinɛ: tɔk-tɛ-wa aa nu gɔn mɔ, de nɛ ŋdiŋ sɛn fara nɛ wa baa ɗaŋ so tɛ dea ŋdiŋmɔ in bokobem’ɛi. Ɛnɛ mbɛra so o bara ka tɛ o ŋgaŋa wi, in o ŋgaŋa wi zu kiti-wan kɔ-wa.

⁴Ɛnɛ ea ha̧‘i mɛ kai o kóò kɔ-wa yaknɛ, in mɛ kai o bokobem kɔ-wa nɛ bara. Ɛnɛ ea o mbɔi kɔ-wa lɛŋ er o bem k’Ɛnɛ, n’Ɛnɛ kɔ̧ɔ̧ nyɛmna: wɔ dee tom k’Ɛnɛ gbɛa o bem nɔ‘i nyɛmna; mɔɔ-búù nɛ aa so ŋdiŋ tɛ tɔk-tɛ-wa dee tɛ-wa na mbɛt, wa saa so'Nɛ́ mɛ gbak wa. Gasa Wan Sɔ̧ kɔ‘m, Ɛnɛ zíí aia-nú kɔ‘m, mi n'am duk nɛ gee kóò oi.

⁵Mɔ nɛ yaka, in mɔ mɛ kinii, in mɔ nɛ tɛ hɔ, nɛ Ɛ́nɛ́ a de. Ɛnɛ taa mɔ wen mɔ mɛ kinii in mɔ nɛ tɛ hɔ, ɓɛɛ hee mɔ'ɔ n’Ɛnɛ taa so ga hɔa kaɗi

⁶O mɔ, n’Ɛnɛ dee so taamɔ mɛ de, hɔa, ɓɛɛ wa tɔ̧ɔ̧: «Ɛɛ nɛ́ mɔ'ɔ!» Ɛnɛ ɗafa o yuwar k’Ɛnɛ lɛŋ, Ɛnɛ iŋa mɔ n’Ɛnɛ tɛ de lɛŋ kaɗi.

⁷Zɔk, o be-Asirii tɛa nɛ gii, ŋmaŋ nɛ tɛ-wa wen o nyaŋa in wi-daŋ-nyaŋa kɔ-wa, go nɛ tɛ-wa wen ŋgai ko o widebiro kɔ-wa nɛ nɛ́ nɛ naŋ, e nɛ ta nɛ o ngee kɔ-wa, in o sɛɛ kɔ-wa, nɛ o kuusaa in o birndiŋ kɔ-wa; wa iŋ‘e Ɛnɛ nɛ gasa Wan gbin-biro na.

⁸Nin'Nɛ́, nɛ́ Gasa Wan»! Ɛnɛ mbɔli ŋgai kɔ-wa nɛ ŋgai k’Ɛ́nɛ́, Ɛnɛ gbin ŋgaŋaa kɔ-wa nɛ nyimsea k’Ɛ́nɛ́, wen wa ha̧nú mɛ ɗaŋ Sa̧a̧ Fara k’Ɛ́nɛ́, mɛ de ŋdiŋ a tɛ Tua-laa nɛ Gasamɔ k’Ɛ́nɛ́ duk sɛnɛ, in mɛ gɔm Fara-ɗafi-‘Nɛ́ gbin a nu nɛ boe.

⁹Ɛnɛ zɔ́k ŋmaŋa-tɛ kɔ-wa, Ɛnɛ tok ɗaŋ yoŋgo a zu wa tɛ nyimsea k’Ɛ́nɛ́, ɓɛɛ, mi n'am duk nɛ gee kóò-oi, Ɛnɛ e ŋgai k’Ɛ́nɛ́ à n'am e tɛ‘m kɔ er-am,

¹⁰Nɛ war ko ɔramɔ mɛ kɔ nú‘m, Ɛnɛ mbɛ́r bara, kpɔk in wan kɔ‘i, Ɛnɛ mbɛ́r wan, kpɔk in widetom kɔ‘i mbɛt! Ɛnɛ gbín gɔɔ-tɛ kɔ-wa nɛ er okóò.

¹¹Ngai k’Ɛ́nɛ́ bo sɛn tɛ dɔkaa ko bíí na, bo sɛn tɛ ŋgaŋaa ko o bíí na mbɛt, ɓɛɛ Ɛnɛ nɛ Sɔ̧ ko o wi mɔkasee, Ɛnɛ nɛ Wi-gbak o wikɔsa, Ɛnɛ nɛ wi-tɔn o ɓɔsawi, in Fara-hu̧si-tɛ ko o wi nɛ ya ɛnɛ, Ɛnɛ nɛ Wi-kpasi o wi nɛ bo nɛ ee-ta ɓɔna.

¹²Ii, ii, Sɔ̧ ko daa kɔ‘m, Sɔ̧ ko nù Israɛl, Sɔ̧ nɛ ɔ wan zu yiwese in nù, Wan nɛ dea o yì, Ɛnɛ nɛ ɔ wan zu mɔ n’Ɛnɛ dea lɛŋ, Ɛnɛ zíí aia-nú kɔ‘m.

¹³Ɛnɛ ha̧ yɔka wen-ɔr-bíí ha̧‘m mɛ e da̧i̧ tɛ o wi nɔ'ɔ, in ha̧‘m mɛ gbɛ wa; o wi nɔ'ɔ nɛ dee so taamɔ mɛ ɗaŋ nɔɔtɔk k’Ɛ́nɛ́, in Sa̧-a̧ Tua k’Ɛ́nɛ́, in Sa̧a̧ Kaya k’Ɛ́nɛ́ Siɔŋ, in tua nɛ duk nɛ ko o bem k’Ɛ́nɛ́.

¹⁴Ɛnɛ dé ha̧ dukbíí lɛŋ in ha̧ o zuduk lɛŋ mɛ iŋ nde Ɛnɛ nɛ ŋgaŋa Sɔ̧, Sɔ̧ nɛ a̧a̧ nɛ ŋgayamɔ lɛŋ, in ŋma wi-pɛm o be-Israɛl nɛtɛ bo na, kana nɛ Ɛ́nɛ́ ɓɛɛ.»