Read Northwest Gbaya ƐSTƐR 8 Bible Online

ƐSTƐR 8 - Northwest Gbaya bible

ƐSTƐR 8

¹Kale kpɔk wese'i, wannu Zɛrzɛs ha̧a̧ o mɔ ko Haman wi-kur-zu o Juif ha̧ ko-wan Ɛstɛr, ɓɛɛ wannu sa Mardochee, wen Ɛstɛr ɓaa so mgbara nàm kɔ‘i in Mardochee ha̧ a̧.

²Wannu kpɔ̧i̧a̧ wele n'aa ha̧a̧ so ha̧ Haman, ɓɛɛ ba ha̧ Mardochee; ɓɛɛ Ɛstɛr ba kɔ‘i nɛ́ Mardochee e zu o mɔ ko Haman.

³Ɗoŋ mɔ‘i, Ɛstɛr nɛ̀ɛ̀ ti wannu mɛ tɔ̧ wen in a̧ woyo. A̧ tika nù ti wannu, hí̧í̧ nɛ̀ kɔ̧a̧, ai nɛ̀ nú ha̧ a̧ mɛ dor ɗaŋ ee-zu-mɔ ko Haman bezaŋ Agag nɛ̀ ee so mɛ de in o be Juif.

⁴Wannu nyɛi̧a dɔra-lɔr kɔ‘i sitɛ Ɛstɛr, ɓɛɛ Ɛstɛr kur yor ti a̧.

⁵Ɛstɛr tɔ̧a̧: «K’ɛ̀nɛ̀ nɛ́ kɔ̧a̧, k’ɛ̀nɛ̀ nɛ́ zɔka'm nɛ̀ de yí, k’ɛ̀nɛ̀ nɛ́ zɔka'e mɔ n'am tɛ kɔfi'i dee tɛ‘nɛ́, in kà‘m nɛ́ dee yí‘nɛ́, ɓɛɛ ɛ̀nɛ̀ yɔ́r mɔ wen dora o kalata nɛ̀ Haman, bem ko Hamdata bezaŋ Agag yɔra so, tɔ̧ nɛnɛ ha̧ wa mɛ kum o Juif dam o zika-nù ko wannu lɛŋ.

⁶Héé ge a̧‘m tɛ zɔk bɔnɛ ko dukbíí kɔ‘m ge? Héé ge wa tɛ kum o nàm kɔ‘m nɛ̀ yí‘m ge?»

⁷Wannu Zɛrzɛs kifa nú ha̧ Ɛstɛr, ko-wan, in Mardochee, be Juif: «Ɛ̀nɛ̀ zìì, wa ga̧i̧a Haman tɛ te wen n'aa kɔ̧ɔ̧ so mɛ kum o be Juif, ɓɛɛ mi ha̧ o mɔ kɔ̧-a̧ lɛŋ ha̧ Ɛstɛr.

⁸Ɓɛɛ mɔ n’ɛnɛ tɛ de kinii'i, ɛ̀nɛ̀ yɔ́r mɔ ha̧ o be Juif hee mɔ'ɔ n’ɛnɛ kɔ̧ɔ̧ ga nɛ̀ nin wannu, ɓɛɛ ɛ̀nɛ̀ é dap-wele ko wannu sɛnɛ nɛ̀ tumbal, wen mɔ nɛ̀ yɔra so nɛ̀ nin wannu, ɓɛɛ kà‘i e dap-wele kɔ̧-a̧ sɛnɛ nɛ̀ tumbal kaɗi, wi beka ba wen-aa yinɛ na.»

⁹Tɛ̀ kpɔk ŋgimbi'i, wa saa wi-yɔr-mɔ ko wannu tɛnɛ. Duka nɛ́ tɛ ɓu-yiitoo-zua-taar ɔɔ-zɛ ko taar fio-zɛ nɛ̀ wa sa'e «Sivan». Wa yɔra mɔ nyɛm nɛ̀ ɗoŋ tɔ̧ɔ̧-wen ko Mardochee ha̧ o be Juif, ha̧ be-wan, ha̧ o gasawi in ha̧ o wi-duk-zu o zika-nù gɔmŋmaa-nɛ-ɓu-yiitoo-zua-mɔɔrɔ-ɗoŋ-yiitoo ko wannu nɛ̀ duk mgbara nù Indɛ in Etiopii. Wa yɔra mɔ ha̧ zika-nù kpɔk kpɔk nyɛm nɛ̀ ɗoŋ yuwar yɔramɔ kɔ-wa in ha̧ dukbíí kpɔk kpɔk nyɛm nɛ̀ ɗoŋ nú kɔ-wa, in ha̧ o Juif nyɛm nɛ̀ ɗoŋ nú kɔ-wa in yuwar yɔramɔ kɔ-wa mbɛt.

¹⁰Wa yɔra mɔ nɛ̀ nin wannu Zɛrzɛs, ɓɛɛ wa e dap wele kɔ̧-a̧ nɛ̀ tumbal sɛnɛ. Wa toma kalata nɔ‘i yaknɛ nɛ̀ o betom nɛ̀ daŋ nɛ́ o nyaŋa nɛ̀ kòó kɔ̧̀ kira ko wannu.

¹¹Gba̧a̧ wen kalata nɔ‘i nɛ́ mɔ'ɔ: «Wannu ha̧a̧ nú ha̧ o Juif sɛn gasa ye kpɔk kpɔk lɛŋ mɛ mɔi̧ ŋmaa ya kpɔk wen pɛma mɔ. Wa tɛ gbɛ o bíí nɛ̀ tɛ tik wa, kum wa, gú nɛ̀ o kóò in o bem kɔ-wa lɛŋ. Wannu ha̧a̧ nú ha̧ o Juif mɛ kai o mɔ kɔ-wa mbɛt.

¹²Mɔ‘i lɛŋ tɛ de tɛ kpɔk wese, dam ɗoŋ o zika-nù ko wannu Zɛrzɛs lɛŋ, tɛ ɓu-zua-taar ɔɔ-zɛ ko ɓu-zua-yiitoo fio-zɛ nɛ̀ wa sa'e ‹Adar›.

¹³Kalata'i tɛ duk nɛ́ geŋa nɛ̀‘i tɛ tɔr ha̧ o bíí tɛ zika-nu-wan ko Zɛrzɛs lɛŋ, ha̧ o Juif mɛ ɗafi mɔ pɛm nɛ̀ wese'i wen kifa er ha̧ o wisɛn wa.»

¹⁴Sɛn tɛ ha̧a̧nú ko wannu, o betom-daŋ-nyaŋa kaia o kalata nɔ‘i ma nɛ̀ yì yaknɛ nɛ̀ haya-a, ɓɛɛ wa tɔr heembea'i dam sɛn ŋgárá Suzɛ mbɛt.

¹⁵Mardochee gboo nɛ̀ tɛ̀ ko wannu nɛ̀ tu̧ laa-wan in bu-a, nɛ̀ ŋma gbɛ̧ yɛ́m-yɛ́m laa zu a̧, in nɛ̀ mɔɔ-gu-zu ko wannu nɛ̀‘i dee nɛ̀ lɔr mbɛt. Saaye Suzɛ lɛŋ duka tɛ nyɛŋɛ.

¹⁶Ŋgimbi'i duka nɛ́ ŋgimbi desee, tortɛ, nyɛŋɛ in gasamɔ wen o Juif.

¹⁷Wa yaa nɛ̀ desee, nɛ̀ tortɛ de nɛ̀ gbaŋa, yɔ nɛ̀ yɔyɛ dam o zika-nù in o saaye kpɔk kpɔk lɛŋ fara nɛ̀ wa tɔra geŋa ko wannu sɛnɛ. Ɓɛɛ o ŋma bíí nɛ̀ dɔka-a tɛ nù‘i bá tɛ̀ nɛ̀ Juif, wen mɔ ko o Juif pi̧i̧ so kíì tɛ wa nyɛmna.