Read Northwest Gbaya GBOA-A 11 Bible Online

GBOA-A 11 - Northwest Gbaya bible

GBOA-A 11

¹GASA WAN tɔ̧ɔ̧ ha̧ Moisɛ: «Oi ŋgamɔ ɓɔna kpɔk n'am tɛ tom pi̧ zu wannu in sɛn nú Egiptɛ. Nɛ́ ɗoŋ mɔ‘i a̧ a̧ tɛ e nɛ war h’ɛ́nɛ́ mɛ yak; bo nɛ ee yuwar ɓɛɛ na, a̧ tɛ ndak nɛ ɛnɛ mbɛt.

²Mɛ̀ nɛ́ɛ̀ mbaŋ tɛ o wiwii in o okoo ha̧ wa mɛ ak o be mɔ nɛ‘i dee nɛ bu-mbɔi, kóó nɛ‘i dee nɛ lɔr er o sɛm kɔ-wa.»

³Ɓɛɛ GASA WAN de ha̧ o be Egiptɛ mɛ ha̧ mɔ nɛ ta-tɛ nɛ dɔka-a ha̧ o be Israɛl. Moisɛ mbɛt duka nɛ́ ŋma gasa bíí nú Egiptɛ yi o wi-de-tom ko wannu Egiptɛ in yi o dɔka bíí mbɛt.

⁴Moisɛ tɔ̧ɔ̧ ha̧ wannu: «GASA WAN tɔ̧a̧: Mɛ ɗuka zaŋ zɛ, wi tɛ yar nɛ nú Egiptɛ.

⁵O kaya-bem sɛn nú Egiptɛ lɛŋ tɛ fe. Ku̧u̧naŋ-a tɛ kaya-bem ko wannu Egiptɛ nɛ tɛ̀ɛ́ ba wan oi-aa hɔ tɛ kaya-bem ko kó-de-tom hɔ̧n fuu kɔ̧-a̧ in kaya o mɔ-dai lɛŋ mbɛt.

⁶Ɓɛɛ sɛn nú Egiptɛ lɛŋ, hiɗimɔ nɛ de nɛti na, in nɛ beka de nɛ ɗoŋ na, tɛ sɔi.

⁷Ɓɛɛ sɛn mgbara o be Israɛl lɛŋ, toyo beka mgbu gee mgbuu mɔ sitɛ ŋma bíí kà bó nɛ̀ saɗi na, h’ɛ́nɛ́ mɛ iŋ nde, GASA WAN kɛ̧ɛ̧ mgbara Israɛl in Egiptɛ.

⁸Ɓɛɛ o wi-de-tom kɔ-mɛ lɛŋ nɛ ya hɛ̧ɛ̧ tɛ tɛɛ gu nu ti'm tɔ̧ nɛnɛ‘e a̧‘m yak in dukbíí kɔ‘m lɛŋ, ɓɛɛ sɛn ɗoŋ mɔ‘i, mi tɛ yak.» Nɛ mɔ'ɔ nɛ see Moisɛ nyima, ɓɛɛ a̧ gbo tɛ ko wannu Egiptɛ yak.

⁹GASA WAN tɔ̧ɔ̧ ha̧ Moisɛ: «Wannu Egiptɛ kɔ̧ mɛ zii wen k’ɛ́nɛ́ na; nɛ́ mɔ‘i a̧ de ha̧ mɔɔ-kifi kɔ‘m mɛ de nɛ dɔka-a sɛn Egiptɛ.»

¹⁰Moisɛ in Arɔŋ dee mɔɔ-kifi nɔ‘i lɛŋ sɛn ti wannu Egiptɛ, ɓɛɛ GASA WAN de ha̧ see wannu Egiptɛ mɛ ŋgai, a̧ kɔ̧ mɛ e ha̧ o be Israɛl mɛ gbo sɛn tɛ nu kɔ̧-a̧ na.